Read fon Tíntɔ́n 22 Bible Online

Tíntɔ́n 22 - fon bible

Tíntɔ́n 22

¹“Nú è gbo ajotɔ́ dó bɔ é ɖo dǒ tɔ́n wɛ, abǐ é ɖo hɔn fó wɛ zǎn mɛ, bɔ è dǒ nǔ i bɔ é kú ɔ́, kú tɔn ɖo kɔ nú mɛ e hu i ɔ́ ǎ.

²Nú é ká nyí ɖɔ kéze wɛ nǔ énɛ́ ɔ́ jɛ ɔ́, kú tɔn ɖo kɔ nú mɛ e hu i é. Nú mɛ ɖé ja ajo ɔ́, é ɖó ná sú nǔ e é fin ɔ́ sín axɔ́ mɛ e é ja ajo dó ɔ́; nú é má ká ɖó nǔɖé bó ná sú axɔ́ ɔ́ ná ǎ ɔ́, è nǎ sɔ́ ɛ sa, ɖó ajo e é ja ɔ́ nu.

³“Nú kanlin wɛ é fin bɔ é kpo ɖo gbɛ ɔ́, é ɖó ná zé kanlin ɔ́ jó, bó ná lɛ́ zé mɔ̌hunkɔtɔn ɖokpó gɔ́ ná dó sú axɔ́ tɔn ná. É sixú nyí nyibú abǐ tócí abǐ gbɔ̌.”

⁴Mawu ɖɔ: “Mǐ ní ɖɔ mɛ ɖé jó kanlin tɔn lɛ́ɛ dó, bɔ yě yi ɖu nǔ ɖo mɛ ɖě ɔ́ sín gle mɛ abǐ vǐwungbo tɔn mɛ, bó hɛn nǔ tɔn lɛ́ɛ gblé; nú nǔ nyí mɔ̌ ɔ́, kanlinnɔ ɔ́ ɖó ná sɔ́ nǔkún e nyɔ́ hú ɖě lɛ́ɛ bǐ ɖo gle tɔn mɛ abǐ vǐwungbo tɔn mɛ lɛ́ɛ dó sú nǔ e kanlin lɛ́ɛ hɛn gblé lɛ́ɛ sín axɔ́.

⁵“Mǐ nǐ ɖɔ mɛɖé ɖo zunkan dó zo wɛ, bɔ myɔ ɔ́ yi fyɔ́ blěe e mɛ ɖě ɔ́ kplé ɖó kpɔ́ lɛ́ɛ, abǐ éé kpo ɖo te lɛ́ɛ, abǐ gle ɔ́ bǐ; nú nǔ nyí mɔ̌ ɔ́, mɛ e dó zunkan zo ɔ́ ɖó ná sú mɛ ɖě ɔ́ sín nǔ e fyɔ́ lɛ́ɛ bǐ sésé sín axɔ́.

⁶“Nú è sɔ́ akwɛ́ abǐ nǔɖé ɖó mɛ ɖé gɔ́n, bɔ ajotɔ́ wá fin ɖo mɛ ɔ́ sín xwé gbe ɔ́, nú è wlǐ ajotɔ́ ɔ́, é ɖó nǎ zé nǔ e é fin ɔ́ we dó sú axɔ́ ná.

⁷Nú è ma ka wlí ajotɔ́ ɔ́ ǎ ɔ́, mɛ e gɔ́n è bɛ̌ nǔ lɛ́ɛ ɖó ɔ́ ná sɔ́ Mawu dó ɖó kúnnuɖetɔ́ ná, bó ná zin alɔ dó akɔ́n ɖɔ é kún nyí émí wɛ sɔ́ ó.

⁸Nú mɛ we ɖo nǔ dɔn wɛ ɖó nyibú, tócí, lɛ̌ngbɔ́ abǐ gbɔ̌ yǎyá, awu ɖaxó abǐ nǔ e bú ɔ́ ɖěbǔ wútu ɔ́, yě mɛ we e ɖo kanlin ɔ́ abǐ nǔ ɔ́ hwlɛ́n wɛ lɛ́ɛ ɖó ná sɔ́ Mawu dó ɖó kúnnuɖetɔ́ ná. Énɛ́ ɔ́, nú mɛɖé wɛ ɖo nǔvú ɖó wɛ bɔ Mawu ɖe xlɛ́ ɔ́, mɛ ɔ́ ɖó ná zé nǔ e hwlɛ́n wɛ yě ɖe ɔ́ we dó sú axɔ́ mɛ ɖě ɔ́.

⁹“Mǐ ní ɖɔ mɛɖé zɔ́n tócí, abǐ nyibú, abǐ lɛ̌ngbɔ́, abǐ gbɔ̌ yǎyá, abǐ kanlin ɖěbǔ hɛn mɛɖé bɔ é kú, abǐ é wɛ́n afɔ abǐ ajotɔ́ lɛ́ɛ wá fin, bɔ mɛ ɖé ka mɔ mɛ e fin lɛ́ɛ ǎ;

¹⁰nú nǔ nyí mɔ̌ ɔ́, mɛ e è zɔ̌n nǔ ɔ́ hɛn ɔ́ ɖó ná ɖɔ ɖo Mawu Mavɔmavɔ nukɔn ɖɔ é kún nyí émí wɛ sɔ́ ó. Mɛ e zɔ́n kanlin hɛn mɛ ɔ́ ná ɖi nǔ nú xó énɛ́ ɔ́; mɛ e è zɔ̌n kanlin hɛn ɔ́ ká ná sú axɔ́ ɖěbǔ ǎ.

¹¹Nú é ká nyí gɔ̌n tɔn wɛ è fin kanlin ɔ́ ɖe ɔ́, é ɖó ná sú axɔ́ tɔn kanlinnɔ ɔ́.

¹²Nú é ká nyí ɖɔ gběkanlin ɖé wɛ wlí kanlin ɔ́ bó ɖu kpo ɔ́, mɛ ɔ́ ɖó ná zé kanlin e kpo ɔ́ wá xlɛ́ kanlinnɔ ɔ́; énɛ́ ɔ́, é ná sú axɔ́ ɖě ǎ.

¹³“Nú mɛ ɖé hwé kanlin ɖé nú nɔzo tɔn, bɔ kanlinnɔ ɔ́ ɖo fínɛ́ ǎ, bɔ kanlin ɔ́ wɛ́n afɔ abǐ é kú ɔ́, mɛ e è hwě kanlin ɔ́ ná ɔ́ ɖó ná sú kanlin ɔ́ sín axɔ́.

¹⁴Nú kanlinnɔ ɔ́ ká ɖo fínɛ́ ɔ́, mɛ ɔ́ ná sú axɔ́ ɖě ǎ. Nú é ká nyí ɖɔ é xáya kanlin ɔ́ wɛ ɔ́, axɔ́ e é ná sú ɔ́ kó ɖo akwɛ́ e é dó xáya kanlin ɔ́ ná ɔ́ mɛ.”

¹⁵ Mawu ɖɔ: “Nú súnnu ɖé ɖɔ xó víví nú nyɔ̌nu e ɖo alɔ jí bó má kó ɖó xɔ́ntɔn ǎ é, bó ɖó xó xá ɛ ɔ́, súnnu ɔ́ ɖó ná ná agban nú vǐ ɔ́, bó ná da.

¹⁶Nú vǐ tɔ́ ɔ́ ká gbɛ́ bǐ ɖɔ émí kún ná ná ɛ vǐ ɔ́ ó ɔ́, é ná ná agban e è nɔ ná nú nyɔ̌nu ɖo alɔ jí ɔ́ sín akwɛ́ dó sú axɔ́.

¹⁷ “Mi ɖó ná jó nyɔ̌nu azětɔ́ dó nyi gbɛ ǎ.

¹⁸ Mɛ e nɔ ɖó xó xá kanlin ɔ́, mi ɖó ná hu i.

¹⁹ Mɛ e ma nɔ xwlé vɔ̌sánú Mawu Mavɔmavɔ ɔ́ kɛ́ɖɛ́ ǎ, lobo nɔ lɛ́ xwlé vodún lɛ́ɛ ɔ́, è ɖǒ ná sú kún tɔn dó.

²⁰ “Mi ɖó ná dó ya nú toɖévomɛnu e ɖo to mitɔn mɛ ɔ́ ǎ, mi ma táfú i ó; mi flín ɖɔ émí lɔ ko nyí jǒnɔ ɖo Ejípu mɛ ɖěvo to mɛ kpɔ́n.

²¹Mi ma dó akpɔ nú asúkúsi lɛ́ɛ lɔ ó, mi ma dó akpɔ nú tɔ́cyɔvǐ nɔcyɔvǐ lɛ́ɛ lɔ ó[6].

²²Nú mi dó akpɔ nú yě ɔ́, yě ná sú xó ylɔ́ mì; un ka ɖó ná yí gbe nú yě.

²³Xomɛ ná sin mì, bɔ un ná hu mi ɖo ahwangbénu; énɛ́ ɔ́, asi mitɔn lɛ́ɛ ná húzú asúkúsi, bɔ vǐ mitɔn lɛ́ɛ ná húzú tɔ́cyɔvǐ nɔcyɔvǐ.

²⁴ “Nú mi nya akwɛ́ nú mɛɖé ɖo togun ce mɛ, wamamɔnɔ e ɖo kpɔ́ xá mi ɔ́ ɖě hǔn, mi ma wa nǔ xá ɛ akwɛ́satɔ́ lɛ́ɛ ɖɔhun ó; mi ma yí akwɛ́ví ó.

²⁵ “Nú mi yí nɔzo mitɔn sín awu ɖaxó ɔ́ ɖó gbanu hǔn, mi lɛ́ sɔ́ jó n'i có bónú hwe ní yi xɔ;

²⁶ɖó awu ɖokpó géé énɛ́ ɔ́ wɛ é ɖó bó ná dó, nú é ká ba kpo ɔ́, ani wɛ é ná dó bó mlɔ́ ayǐ? É ná sú xó ylɔ́ mì ɖɔ nyɛ ní d'alɔ émí, bɔ un ka ná yí gbe n'i, ɖó mɛ nú nɔ́ blá wǔ nú mì.

²⁷ “Mi ɖó ná nylá nu dó Nyɛ Mawu mitɔn ǎ, mi ka ɖó ná dó nu togán mitɔn ǎ.

²⁸“Nǔkún e mi ya lɛ́ɛ kpódó vǐwun e mi gbɛ lɛ́ɛ kpó ɔ́, mi ná zé éé nyí ce lɛ́ɛ wá nú mì, mi ma ɖó hwenu ná ó; mi ná nukɔngbéví mitɔn lɛ́ɛ mì.

²⁹“Vǐ nukɔntɔn e nyibú, abǐ lɛ̌ngbɔ́, abǐ gbɔ̌ yǎyá ná ji ɔ́, è ɖǒ ná jó e dó nyi nɔ tɔn kɔn nú azǎn tɛ́nwe; azǎn tántɔngɔ́ ɔ́ gbe ɔ́, è nǎ sɔ́ ɛ ná mì.

³⁰ “Nyɛ ɖokpónɔ géé tɔn wɛ mi ná nyí; hǔn mi ɖó ná ɖu kanlin e gběkanlin lɛ́ɛ vún lan tɔn ɖu kpo ɔ́ ǎ; mi zé nyi dó cukú lɛ́ɛ.”