Read fon Tíntɔ́n 23 Bible Online

Tíntɔ́n 23 - fon bible

Tíntɔ́n 23

¹ Mawu ɖɔ: “Mi má dó funfún to mɛ ó. Mi ma ɖe kúnnu agɔ dó nɔ nǔnyanyawatɔ́ jí ó.

²Mi ma kpɔ́n ɖɔ mɛ e ɖo nǔ nyanya wa wɛ lɛ́ɛ sukpɔ́, bó wa nǔ yě ɖɔhun ó. Nú è ɖo hwɛ ɖɔ wɛ hǔn, mi ma kpɔ́n ɖɔ mɛ e ɖo bɔnyijí ɖɔ wɛ lɛ́ɛ sukpɔ́, bó nɔ yě jí ó.

³ Nú è ɖo hwɛ ɖɔ wɛ hǔn, mi ma nɔ mɛɖé jí ó; mɛ ɔ́ ná bó nyí wamamɔnɔ hǔn, mi ma nɔ jǐ tɔn ó.

⁴ “Ényí kɛntɔ́ towe sín nyibú bú abǐ tócí tɔn bú bɔ a mɔ ɔ́, a ɖǒ ná kplá yi jó n'i.

⁵Nú a mɔ kɛntɔ́ towe kpó tócí tɔn kpó, bɔ tócí tɔn ɔ́ ɖo ayǐ jɛ wɛ ɖo agban e é dó n'i ɔ́ glɔ́ hǔn, ma ɖe kɔ dó ó; dǒ alɔ ɛ bónú é ní fɔ́n ɛ sí te.

⁶ “Mi ma táfú wamamɔnɔ e ɖo to mitɔn mɛ lɛ́ɛ ɖo hwɛ nukɔn ó.

⁷Ma dó hwɛ mɛ dó acɛ jí ó, ma hu xomɛvɔ́nɔ, abǐ hwɛjijɔnɔ ó; ɖó mɛ e gba acɛ mɔ̌ ɔ́, nyɛ nɔ mɔ ɛ dó mɔ xomɛvɔ́nɔ ǎ.

⁸Ma ɖu kpa ó, ɖó nú è ɖu kpa ɔ́, nukún mɛtɔn nɔ ɖo te có è nɔ tɔ́n nukún. Kpaɖuɖu ɔ́, xó gblégblé wɛ é nɔ́ sɔ́ dó nu mɛ nú mɛ e nɔ ɖɔ nǔgbó é.

⁹ “Mi ma dó ya nú toɖévomɛnu e ɖo to mitɔn mɛ lɛ́ɛ ó; mi tunwun nǔ e nɔ gbo toɖévomɛnu é; mi flín ɖɔ émí lɔ ko nyí jǒnɔ ɖo Ejípu, mɛ ɖěvo to mɛ kpɔ́n.”

¹⁰ “Mi ná nɔ́ lɛ gle mitɔn, bó ná nɔ́ ya nǔ e mi dó ɖ'é jí lɛ́ɛ xɔ xwe ayizɛ́n.

¹¹Amɔ̌, xwe tɛ́nwegɔ́ ɔ́ mɛ ɔ́, mi ná jó gle lɛ́ɛ dó bǐ, mi ná lɛ ǎ. Hwe énɛ́ ɔ́ nu ɔ́, wamamɔnɔ e ɖo to mitɔn mɛ lɛ́ɛ ná mɔ nǔkúnflá lɛ́ɛ ɖu, bɔ gběkanlin lɛ́ɛ ná ɖu ée ná kpo ɔ́. Mɔ̌ ɖokpó ɔ́, mi ná lɛ́ jó vǐwungbo mitɔn lɛ́ɛ kpódó olívugbo mitɔn lɛ́ɛ kpo dó xwe énɛ́ ɔ́ xwe.

¹² “Mi ná wa azɔ̌ nú azǎn ayizɛ́n ɖo Mawu Mavɔmavɔ zán gbla ɔ́ mɛ; amɔ̌, azǎn tɛ́nwegɔ́ ɔ́ gbe ɔ́, mi ná gbɔjɛ́, bɔ nyibú mitɔn kpó tócí mitɔn kpó ná gbɔjɛ́, bɔ kannumɔ kpó toɖévomɛnu kpó ná mɔ agbɔ̌n.

¹³“Mi xwedó nǔ e un ɖɔ nú mi ɔ́ bǐ sésé; mi ma sɛn nǔ ɖěvo gbeɖé ó, è ma se nyǐkɔ yětɔn ɖo nu mitɔn vɔ́vɔ́ ó.”

¹⁴Mawu ɖɔ xwe atɔn wɛ mi ná nɔ́ ɖu ɖo xwe ɖokpó mɛ dó kpa susu nú mì.

¹⁵ Xwe nukɔntɔn e mi ná ɖu ɔ́ wɛ nyí wɔ̌xúxú e mɛ è ma dó tɔ́n ǎ sín xwe. Mi ná ɖu wɔ̌xúxú e mɛ è ma dó tɔ́n ǎ, xɔ azǎn tɛ́nwe, ɖo Abibu sun ɔ́ mɛ, hwenu e un ɖó nú mi dó é, lě e un ɖɔ nú mi gbɔn ɔ́; ɖó sun énɛ́ ɔ́ mɛ wɛ mi gosín Ejípu. Mi ka ná wá gɔ̌n ce asígbá alɔgbá ǎ.

¹⁶ Énɛ́ ɔ́ gúdo ɔ́, mi ná ɖu nǔkún-yiya sín xwe, hwenu e mi ná ya nǔkún nukɔntɔn e nyɔ́ ɖo gle mitɔn jí é. Mɔ̌ ɖokpó ɔ́, mi ná ɖu nǔkún dó agɔ̌ sín xwe, hwenu e mi ná gbɛ atínsínsɛ́n e ɖo gle mitɔn mɛ lɛ́ɛ fó dó ɖo xwe fífó ɔ́.

¹⁷Hǔn xwewú xwewú ɔ́, súnnu e ɖo togun mitɔn mɛ lɛ́ɛ bǐ ná nɔ́ wá nyɛ Mawu Mavɔmavɔ, Mawu mitɔn nukɔn azɔn atɔn.

¹⁸Kanlin e mi ná dó sá vɔ̌ nú mì ɔ́, mi ma hɛn wɔ̌xúxú e mɛ è dǒ tɔ́n ɔ́ dó jǐ tɔn ó. Ayǐ ká ná hɔ́n dó kanlin e è dǒ sá vɔ̌ nú mì ɔ́ sín jǒ ǎ.

¹⁹ Nyɛ wɛ nyí Mawu Mavɔmavɔ, Mawu mitɔn; énɛ́ ɔ́ wú ɔ́, mi ná zé nǔ nukɔntɔn e gle mitɔn lɛ́ɛ ná ɔ́ wá xwé ce gbe. Mi ka ná ɖa gbɔ̌ví ɖo nɔ tɔn sín anɔ̌sin mɛ ǎ[7].

²⁰Mawu lɛ́ ɖɔ: “Mi ɖótó, un ná sɛ́ wɛnsagun ɖokpó dó bɔ é ná nɔ nukɔn nú mi, é ná nya xɛ ɖo jǐ mitɔn ɖo alixo, bó ná kplá mi yi to e un blóɖó ɖ'ayǐ nú mi ɔ́ mɛ.

²¹Mi nɔ sí i, bó nɔ́ se tónú n'i; mi ma gbɛ́ gbe n'i ó, mi fɔ́n gǔ do jǐ tɔn ɔ́, é ná sɔ́ kɛ mi ǎ, ɖó nyǐkɔ ce mɛ wa azɔ̌ dó wɛ é ɖe.

²²Lo ɔ́, nú mi se tónú n'i, bó bló nǔ e un ná ɖɔ nú mi lɛ́ɛ bǐ ɔ́, un ná nyí kɛntɔ́ mitɔn lɛ́ɛ sín kɛntɔ́, un ná li za xá mɛ e ɖo za li xá mi wɛ lɛ́ɛ.

²³“Wɛnsagun ce ná nɔ nukɔn nú mi, bó ná kplá mi yi Amɔliti ví lɛ́ɛ, Hitíti ví lɛ́ɛ, Pɛliziti lɛ́ɛ, Kanáa ví lɛ́ɛ, Hivíti lɛ́ɛ kpódó Jebuzinu lɛ́ɛ kpó sín to mɛ, bɔ un ná sú kún yětɔn dó.

²⁴Mi ma jɛ kpo nú vodún yětɔn lɛ́ɛ ó, mi ma sɛn vodún yětɔn lɛ́ɛ ó, mi ma wa nǔ yě ɖɔhun ó. Lo ɔ́, mi ná gba vodún yětɔn lɛ́ɛ, bó ná gba awǐnnya e yě nɔ́ tun te bó nɔ́ sɛn lɛ́ɛ.

²⁵Nyɛ Mawu Mavɔmavɔ, Mawu mitɔn wɛ mi ná sɛn; énɛ́ ɔ́, un ná ná nǔɖuɖu mi, bó ná ná sin mi, bó ná hwlɛ́n mi ɖo azɔn sí.

²⁶Nyɔ̌nu ɖé sɔ́ ná nɔ́ gblé xo ɖo to mitɔn mɛ ǎ; nyɔ̌nu ɖé ká ná nyí wɛnsinɔ ɖo to mitɔn mɛ ǎ. Un ná ná jidɔ́ mi.

²⁷“Un ná dó xɛsi to lɛ́ɛ bǐ káká bɔ mi byɔ́ to ɖěbǔ mɛ ɔ́, mɛ e ɖo to ɔ́ mɛ lɛ́ɛ bǐ ná hɔn gbadó, un ná bló bɔ kɛntɔ́ mitɔn lɛ́ɛ bǐ ná hɔn ɖo nukɔn mitɔn.

²⁸Un ná sɛ́ gbɔ̌nvɛ dó bɔ yě ná jɛ nukɔn mitɔn, bó ná nya Hivíti lɛ́ɛ, Kanáa ví lɛ́ɛ kpódó Hitíti lɛ́ɛ kpó dó zɔ nú mi.

²⁹É ká nyí ɖɔ xwe ɖokpó ɔ́ mɛ wɛ un ná nya togun énɛ́ lɛ́ɛ bǐ dó zɔ nú mi ǎ. Nú un bló mɔ̌ ɔ́, to ɔ́ ná jɛ vɔ̌, bɔ gběkanlin lɛ́ɛ ná wá gba kún ɖo to ɔ́ mɛ, bó ná sukpɔ́, lobo ná wá wa nǔ dó mi wú.

³⁰Kpɛɖé kpɛɖé wɛ un ná ɖo yě nya wɛ, bɔ midɛɛ lɛ́ɛ ná ɖo kpɔ́ su d'é jí wɛ, káká bó ná yí to ɔ́ bǐ.

³¹Bɔ un ná ɖó dogbó nú mi, sín Xu Vɔvɔ ɔ́ tó, káká yi Mɛditɛlanɛ́ɛ xu ɔ́ tó; dogbó mitɔn ná lɛ́ bɛ́ sín gbětótló mɛ, káká yi Efláti tɔ ɔ́ tó. Đó un ná jó to ɔ́ mɛ nu lɛ́ɛ nú mi, bɔ mi ná nya yě.

³²Mi ná jɛ akɔ xá yě ǎ, mi ka ná jɛ xá vodún yětɔn lɛ́ɛ ǎ.

³³Mi ná lɔn bɔ yě ná nɔ to mitɔn mɛ ǎ, yě táá wá dɔn mi, bónú mi ná hu hwɛ dó mì. Mi táá wá sɛn vodún yětɔn lɛ́ɛ, bɔ é ká ná nyí mɔ nú mi.”