Read fon Tíntɔ́n 24 Bible Online

Tíntɔ́n 24 - fon bible

Tíntɔ́n 24

¹Mawu Mavɔmavɔ ɖɔ nú Mɔyízi ɖɔ: “Wǎ gɔ̌n ce ɖo só ɔ́ jí; hwi kpó mɛ e ná wá lɛ́ɛ kpó ɖíe: Aalɔ́ɔn, Nadavu, Avihu, kpódó tomɛxó Izlayɛ́li tɔn kanɖé gban (70) kpó. Mi ná nɔ zɔ bó ná ɖe kɔ́ nú mì.

²Mɔyízi, hwɛ ɔ́, hwi ɖokpónɔ géé ná sɛkpɔ́ mì, mɛ ɖě lɛ́ɛ ɖě ní má sɛkpɔ́ mì ó; togun ɔ́ ní má ká xwedó mi wá só ɔ́ jí ó.”

³Mɔyízi yi wlí nǔ e Mawu Mavɔmavɔ ɖɔ n'i lɛ́ɛ bǐ ɖɔ nú togun ɔ́; yě ká ɖó gbe kpɔ́, bó yí gbe ɖɔ: “Mi ná bló nǔ e Mawu Mavɔmavɔ ɖɔ ɔ́ bǐ.”

⁴Mɔyízi wlán nǔ e Mawu Mavɔmavɔ ɖɔ n'i lɛ́ɛ bǐ. Ayǐhɔ́ngbe tɔn ɔ́, é fɔ́n zǎn, bó bló vɔ̌sákpe ɖokpó ɖó só ɔ́ kpá, bó fɔ awǐnnya wěwe tun te nyi fínɛ́. Awǐnnya lɛ́ɛ ɖokpó ɖokpó nyi Izlayɛ́li sín akɔta wěwe lɛ́ɛ ɖokpó ɖokpó tɔn.

⁵Énɛ́ ɔ́ gúdo ɔ́, é ɖɔ nú dɔ̌nkpɛvú Izlayɛ́li tɔn lɛ́ɛ ɖɔ yě ní wá xwlé vɔ̌sánú e è nɔ dó zo ɔ́ Mawu Mavɔmavɔ ɖo fínɛ́, lobo xwlé nyibúsú lɛ́ɛ, dó sá kɔnɖókpɔ́ vɔ́ n'i.

⁶Mɔyízi kɔn kanlin e è hu lɛ́ɛ sín hun vlɔ̌ dó gannú mɛ gannú mɛ, bó mi vlɔ̌ e kpo ɔ́ dó vɔ̌sákpe ɔ́ wú.

⁷Énɛ́ ɔ́ gúdo ɔ́, é zé akɔjijɛwéma ɔ́, bó zé gbe dó jǐ, lobo xa nú togun ɔ́, bɔ yě ɖɔ: “Mǐ ná bló nǔ e Mawu Mavɔmavɔ ɖɔ lɛ́ɛ bǐ, mi ná se tónú n'i.”

⁸ Ée yě ɖɔ mɔ̌ ɔ́, Mɔyízi mi hun e é kɔn dó gannú mɛ lɛ́ɛ dó togun ɔ́ wú bó ɖɔ: “Mi ɖótó! Hun élɔ́ wɛ sɔ́ akɔ e Mawu Mavɔmavɔ ɖɔ xó nú mi bó dó jɛ xá mi ɔ́ sín afɔ ɖó te.”

⁹Énɛ́ ɔ́ gúdo ɔ́, Mɔyízi xá só ɔ́ jí; é kpódó Aalɔ́ɔn, kpó Nadavu, kpó Avihu, kpódó tomɛxó Izlayɛ́li tɔn kanɖé gban (70) lɛ́ɛ kpó.

¹⁰Yě mɔ Mawu Izlayɛ́li tɔn ɔ́. Awǐnnya fɛ́sinnɔ kpaba kpaba safíi ɖɔhun ɖé ɖo afɔ tɔn lɛ́ɛ glɔ́.

¹¹Mawu ká wa nǔ nyanya ɖěbǔ nú tonukún Izlayɛ́li tɔn nɛ́ lɛ́ɛ ǎ; yě mɔ ɛ ganjí, bó ɖu nǔ, bó nu ahan.

¹²Mawu Mavɔmavɔ ɖɔ nú Mɔyízi ɖɔ: “Sɛ wá akpá ce ɖo só ɔ́ jí, bó nɔ fínɛ́, bónú má zé awǐnnyatɛ e jí un wlán sɛ́n lɛ́ɛ dó ɔ́ nú we, nú a nǎ kplɔ́n Izlayɛ́li ví lɛ́ɛ.”

¹³Énɛ́ ɔ́, Mɔyízi sɔ́ nǔ, bó ná yi só Mawu tɔn ɔ́ jí, éé kpódó Jozuwée e nɔ wa azɔ̌ xá ɛ ɔ́ kpó.

¹⁴Cóbónú yě ná yi ɔ́, Mɔyízi ɖɔ nú tomɛxó lɛ́ɛ ɖɔ: “Mi nɔ te kpɔ́n mǐ ɖo fí káká bónú mǐ ná lɛ́ kɔ wá. Aalɔ́ɔn kpó Húu kpó ná nɔ fí xá mi; nú mɛɖé ɖó xó ɖé ɔ́, ní mɔ yě.”

¹⁵Ée Mɔyízi ɖɔ mɔ̌ ɔ́, é xá só ɔ́ jí bɔ akpɔ́kpɔ́ cyɔ́n só ɔ́.

¹⁶Énɛ́ ɔ́, susu Mawu Mavɔmavɔ tɔn nɔ Sinayíi só ɔ́ jí, bɔ akpɔ́kpɔ́ cyɔ́n só ɔ́ káká nú azǎn ayizɛ́n. Azǎn tɛ́nwegɔ́ ɔ́ gbe ɔ́, Mawu Mavɔmavɔ nɔ akpɔ́kpɔ́ tɛ́ntin, bó ylɔ́ Mɔyízi.

¹⁷Izlayɛ́li ví lɛ́ɛ mɔ susu Mawu Mavɔmavɔ tɔn; é cí myɔ e ɖo jiji wɛ ɔ́ ɖɔhun, ɖo só ɔ́ jí.

¹⁸ Lo ɔ́, Mɔyízi ɔ́, éyɛ́ byɔ́ akpɔ́kpɔ́ ɔ́ mɛ, ɖo só ɔ́ jí, bó ɖo yiyi wɛ. É nɔ só ɔ́ jí xɔ kéze kanɖé (40), zǎn kanɖé (40).