Read fon Tíntɔ́n 26 Bible Online

Tíntɔ́n 26 - fon bible

Tíntɔ́n 26

¹“Goxɔ ɔ́, lɛ̌ɛnkanvɔxwɛ gaga wǒ wɛ a nǎ dó bló ná. Avɔxwɛ lɛ́ɛ ɔ́, avɔlɔntɔ́ e alɔnu yětɔn mɛ́ ganjí lɛ́ɛ ná zé kan didɛ kwlésinnɔ, vɔvɔ, kpódó vɔvɔ cɛ́cɛ́ kpó dó lɔn ná, bó ná lɔn wɛnsagun susunɔ lɛ́ɛ gbɔn mɛ, dó ba acɔ́ ná.

²Avɔxwɛ lɛ́ɛ bǐ ná ɖó jlɛ̌ ɖokpó ɔ́; ga yětɔn ná nyí mɛ̌tlu wɛ̌nɛ; bɔ gblǒ yětɔn ná nyí mɛ̌tlu we.

³È nǎ cá avɔxwɛ lɛ́ɛ atɔ́ɔ́n atɔ́ɔ́n ɖó kpɔ́.

⁴Avɔxwɛ atɔ́ɔ́n nukɔntɔn e a cá ɖó kpɔ́ lɛ́ɛ ɔ́, a nǎ ɖó kan kwlésinnɔ gbɔn tó nú avɔxwɛ e gbɔn gǔdo ɔ́, bó ná lɛ́ ɖó gbɔn tó nú avɔxwɛ e ɖo nukɔn nú atɔ́ɔ́n wegɔ́ ɔ́ e a cá ɖó kpɔ́ é.

⁵Kan kanɖé wǒ (50) wɛ ná nɔ cícá nukɔntɔn ɔ́ tó, bɔ kanɖé wǒ (50) ná nɔ wegɔ́ ɔ́ tó. Kan énɛ́ lɛ́ɛ ɖě ná kpé nu xá ɖě.

⁶A nǎ zé siká dó bló nǔhɛnnú kanɖé wǒ (50) ná, bó ná dó hɛn avɔ lɛ́ɛ ɖě dó ɖě wú, bó bú dó goxɔ ɔ́ bǐ; énɛ́ ɔ́, goxɔ ɔ́ bǐ ná nɔ bǔ.

⁷“Mɔ̌ ɖokpó ɔ́, a nǎ zé gbɔ̌fún dó lɔn avɔxwɛ gaga wǒ-ɖokpó ná, bó ná cyɔ́n goxɔ ɔ́.

⁸Avɔxwɛ lɛ́ɛ sín ga ná nyí mɛ̌tlu afɔtɔn, bɔ gblǒ yětɔn ná nyí mɛ̌tlu we. Jlɛ̌ ɖokpó ɔ́ wɛ wǒ-ɖokpó lɛ́ɛ bǐ ná ɖó.

⁹A nǎ cá avɔxwɛ nɛ́ lɛ́ɛ atɔ́ɔ́n ɖo kpɔ́, bó ná cá ayizɛ́n e kpo lɛ́ɛ ɖo kpɔ́. A nǎ nyɛ́ ayizɛ́ngɔ́ ɔ́ nyi jí ɖo goxɔ ɔ́ ta ɖo nukɔn,

¹⁰bó ná dó kan kanɖé wǒ (50) gbɔn tó nú avɔxwɛ e ɖo tó nú avɔxwɛ atɔ́ɔ́n nukɔntɔn e è cá ɖó kpɔ́ é, bó ná dó kan kanɖé wǒ (50) gbɔn tó nú avɔxwɛ ayizɛ́n ɖě lɛ́ɛ e è cá ɖó kpɔ́ é.

¹¹Mɔ̌ ɖokpó ɔ́, a nǎ zé ganvɔ dó bló nǔhɛnnú kanɖé wǒ (50) ná, bó ná dó hɛn kan lɛ́ɛ, bó ná dó hɛn goxɔ ɔ́ bǐ ɖó bǔ.

¹²Avɔ e è cyɔ́n dó goxɔ ɔ́ ná gbló hú ée è dǒ gbá goxɔ ɔ́ ná é, bɔ éé lán ɖ'é jí ɔ́ nyí cícá ɖokpó sín vlɔ̌, bó kɔn nyi goxɔ ɔ́ gúdo.

¹³Mɔ̌ ɖokpó ɔ́, avɔ énɛ́ ɔ́ ná ɖi ga hú éé è dǒ gbá goxɔ ɔ́ ná é, bɔ éé lán ɖ'é jí ɔ́ nyí cícá ɖokpó sín vlɔ̌ bó kɔn nyi goxɔ ɔ́ sín ga jí ɖo akpá ɖokpó ɖokpó xwé.

¹⁴Bó ná fó ɔ́, a nǎ zé agbonyú e è sá nǔ vɔvɔ dó bó cyɔ́n goxɔ ɔ́, bó ná zé anyǔ tlitli bó bú dó.

¹⁵“A nǎ zé kasyatín dó bló xwlɛ ná, bó tun te lɛ́ lɛ̌ dó goxɔ ɔ́ dǒ ɖɔhun.

¹⁶Xwlɛ lɛ́ɛ ɖokpó ɖokpó sín ga ná nyí mɛ̌tlu atɔ́ɔ́n, bɔ gblǒ tɔn ná nyí mɛ̌tlu ɖokpó é hwe ɛnɛvlɔ́ɖó.

¹⁷A nǎ kpa sóví we dó xwlɛ ɖokpó ɖokpó glɔ́, bɔ sóví lɛ́ɛ ná jlɔ́ ganjí. Mɔ̌ wɛ a nǎ bló gbɔn nú xwlɛ lɛ́ɛ bǐ.

¹⁸Énɛ́ ɔ́, a nǎ bló xwlɛ ko nú goxɔ ɔ́ ɖo afɔligbé.

¹⁹A nǎ zé kpatágan dó bló afɔ kanɖé (40) ná, bó ná bɛ́ dó xwlɛ ko lɛ́ɛ glɔ́; we we wɛ a nǎ dó xwlɛ ɖokpó ɖokpó glɔ́, bɔ é ná sɔgbe xá sóví nabí e a kpa dó xwlɛ lɛ́ɛ glɔ́ é.

²⁰Mɔ̌ ɖokpó ɔ́, a nǎ bló xwlɛ ko nú goxɔ ɔ́ ɖo taligbé,

²¹bó ná zé kpatágan dó bló afɔ yětɔn kanɖé (40) lɛ́ɛ, bó ná xwe we we dó xwlɛ ɖokpó ɖokpó glɔ́.

²²Mɔ̌ ɖokpó ɔ́, a nǎ bló xwlɛ ayizɛ́n nú goxɔ ɔ́ ɖo gǔdo, ɖo gbadahwe jí.

²³A nǎ bló dotín we nú goxɔ ɔ́, gbɔn zwe lɛ́ɛ jí, ɖo gǔdo.

²⁴Dotín we lɛ́ɛ ná zɔn bǔ sín do, bɔ è nǎ zě gan tobotobo dó cá ná ɖo aga. Mɔ̌ wɛ è nǎ bló gbɔn nú dotín e ɖo goxɔ ɔ́ sín zwe we lɛ́ɛ mɛ é bǐ.

²⁵A nǎ bló dotín tántɔn kpódó sóví yětɔn afɔtɔn-nukún-ɖokpó lɛ́ɛ kpó. Sóví we we wɛ ná nɔ dotín ɖokpó ɖokpó glɔ́.

²⁶“A nǎ fɔ kasyakpo gaga atɔ́ɔ́n dó blá wɛ̌n dó dotín lɛ́ɛ wú, ɖo goxɔ ɔ́ sín akpá ɖokpó xwé.

²⁷Kpo gaga atɔ́ɔ́n ná blá wɛ̌n ɖo goxɔ ɔ́ sín akpáxwé wegɔ́ ɔ́, bɔ atɔ́ɔ́n ná blá ɖo goxɔ ɔ́ sín gǔdo ɖo gbadahwe jí.

²⁸Kpo gaga e è nǎ dó blá wɛ̌n ná ɖo tɛ́ntin ɔ́, nǎ gosín tó ɖě yi tó ɖě ɔ́.

²⁹A nǎ kɔn siká dó dotín lɛ́ɛ, bó ná zé siká dó bló gan tobotobo e mɛ kpo gaga e è dǒ blá wɛ̌n ná lɛ́ɛ ná gbɔn lɛ́ɛ ná, bó ná kɔn siká dó kpo gaga lɛ́ɛ.

³⁰A nǎ bló goxɔ ɔ́, bɔ é ná sɔgbe xá xlɛ̌ e un ná we ɖo só élɔ́ jí fí din é.

³¹“A nǎ zé lɛ̌ɛnkanvɔ e dɛ kan ɔ́ dó bló xɔmɛgbovɔ ɖokpó ná, bɔ é ná ɖó hwɛkan kwlésinnɔ, vɔvɔ kpódó vɔvɔ cɛ́cɛ́ kpó. Avɔlɔntɔ́ lɛ́ɛ ná wa azɔ̌ tɔn ganjí, bó ná ɖe wɛnsagun susunɔ lɛ́ɛ d'é mɛ dó ba acɔ́ ná.

³²A nǎ sin dó dotín kasya tɔn ɛnɛ wú. È nǎ kɔn siká dó dotín lɛ́ɛ, siká klɔcée lɛ́ɛ ná ɖo dotín lɛ́ɛ wú, bó ná jínjɔ́n kpatágan dodó ɛnɛ jí.

³³ A nǎ zé xɔmɛgbovɔ ɔ́ gbɔn nǔhɛnnú lɛ́ɛ glɔ́. “Xɔmɛgbovɔ énɛ́ ɔ́ gúdo wɛ è nǎ sɔ́ akɔjijɛgbá ɔ́ ɖó. Xɔmɛgbovɔ ɔ́ wɛ ná gbo Tɛn mímɛ́ ɔ́ kpó tɛn mímɛ́ bǐ ɔ́ kpó.

³⁴A nǎ zé akɔjijɛgbá ɔ́ sín nusú sú d'é nu, ɖo Tɛn mímɛ́ bǐ ɔ́ mɛ.

³⁵A nǎ zé távo ɔ́ kpó zogbɛ́nhɛnnú ɔ́ kpó ɖó xɔmɛgbovɔ ɔ́ gúdo: Zogbɛ́nhɛnnú ná ɖo afɔligbé, bɔ távo ɔ́ ná ɖo taligbé.

³⁶“A nǎ bló avɔ ɖokpó, bó dó ɖó Tɛn mímɛ́ ɔ́ sín ali nu, bɔ é ná ɖó hwɛkan kwlésinnɔ vɔvɔ kpódó vɔvɔ cɛ́cɛ́ kpó. Lɛ̌ɛnkanvɔ e dɛ kan ɔ́ wɛ è ka ná dó bló ná. Mɛ e nɔ kó avɔ lɛ́ɛ wɛ ká ná kó ganjí.

³⁷A nǎ zé kasya dó bló dotín atɔ́ɔ́n ná nú avɔ e a dǒ ɖó tɛn mímɛ́ ɔ́ sín ali nu é, a nǎ kɔn siká dó dotín lɛ́ɛ, bɔ siká klɔcée ná nɔ yě wú. A nǎ sínsín ganvɔ dó bló afɔ atɔ́ɔ́n nú dotín lɛ́ɛ.”