Read fon Tíntɔ́n 27 Bible Online

Tíntɔ́n 27 - fon bible

Tíntɔ́n 27

¹“A nǎ zé kasyatín dó bló vɔ̌sákpe ná. Akpáxwé tɔn lɛ́ɛ bǐ ná ɖó jlɛ̌ ɖokpó ɔ́; akpáxwé ɖokpó ɖokpó sín ga ná nyí mɛ̌tlu we adaɖé, jǐ yiyi tɔn ná nyí mɛ̌tlu ɖokpó adaɖé.

²A nǎ bló vɔ̌sákpe ɔ́ bɔ é ná ɖó zo ɖo zwe tɔn ɛnɛ lɛ́ɛ ɖokpó ɖokpó jí; zo lɛ́ɛ ná tɔ́n ganjí, bɔ zwe lɛ́ɛ kpó vɔ̌sákpe ɔ́ kpó ná nɔ bǔ, bɔ a nǎ kɔn ganvɔ dó.

³A nǎ zé ganvɔ dó bló nǔ e è nǎ zǎn ɖo vɔ̌sákpe ɔ́ jí lɛ́ɛ: gannú e mɛ afín ná nɔ́ kɔn dó lɛ́ɛ, pɛ́li lɛ́ɛ, gannú lɛ́ɛ, gǎfu lɛ́ɛ, kpódó nǔ e mɛ è nǎ nɔ́ dó zǎlínkpɔ́n zo ɖe lɛ́ɛ kpó.

⁴A nǎ bló ganvɔganja ɖokpó nú vɔ̌sákpe ɔ́, bó ná bló ganvɔlɔgan ɛnɛ dó ganja ɔ́ sín zwe ɛnɛ lɛ́ɛ jí.

⁵È nǎ sɔ́ ganja ɔ́ dó vɔ̌sákpe ɔ́ glɔ́, bɔ jǐ yiyi tɔn ná wá vɔ̌sákpe ɔ́ sín vlɔ̌.

⁶A nǎ kpa kasyakpo gaga we bɔ è nǎ nɔ́ dó zé vɔ̌sákpe ɔ́, bó ná kɔn ganvɔ dó.

⁷È nǎ fɔ kpo gaga lɛ́ɛ gbɔn alɔgan lɛ́ɛ mɛ, ɖo vɔ̌sákpe ɔ́ sín akpá we lɛ́ɛ xwé, bɔ è nǎ nɔ dó zé vɔ̌sákpe ɔ́.

⁸Xwlɛ ɔ́ wɛ a nǎ zé dó bló vɔ̌sákpe ɔ́ ná, nǔ ɖěbǔ ná ɖo xo tɔn mɛ ǎ, bɔ é ná sɔgbe xá ée un xlɛ́ we ɖo só jí fí din é.

⁹“A nǎ ɖǒ kɔ́xota lɛ́ lɛ̌ dó goxɔ ɔ́, bó ná zé lɛ̌ɛnkanvɔ e dɛ kan ganjí ɔ́ dó xá. Avɔ e è nǎ dó xá kɔ́xota ɔ́ ná ɔ́ sín ga ná nyí mɛ̌tlu kanɖé wǒ (50) ɖo goxɔ ɔ́ sín afɔligbé.

¹⁰Dotín ko wú wɛ è nǎ sin avɔ lɛ́ɛ dó, bɔ dotín lɛ́ɛ ɖokpó ɖokpó ná jínjɔ́n afɔ ɖokpó ɖokpó jí. Ganvɔ wɛ è nǎ dó bló dotín lɛ́ɛ kpó afɔ lɛ́ɛ kpó. Kpatágan wɛ è nǎ dó bló klɔcée e ɖo dotín lɛ́ɛ wú lɛ́ɛ kpó gankpo ɖěɖě è nǎ dó hɛn dotín lɛ́ɛ ná lɛ́ɛ kpó.

¹¹Mɔ̌ ɖokpó ɔ́, ɖo goxɔ ɔ́ sín taligbé ɔ́, avɔ ɔ́ ná ɖó ga ɖokpó ɔ́, bɔ è nǎ sin gbɔn alɔkpa ɖokpó ɔ́. Klɔcée lɛ́ɛ kpó gankpo lɛ́ɛ kpó ɔ́, kpatágan wɛ è dǒ bló.

¹²Avɔ e è nǎ dó ɖó kɔ́xota ɔ́ sín gblǒ jí, ɖo goxɔ ɔ́ sín gbadahwe jí ɔ́ sín ga ná nyí mɛ̌tlu koatɔ́n (25). Dotín wǒ wú wɛ è nǎ sin avɔ ɔ́ dó, bɔ dotín ɖokpó ɖokpó ná jínjɔ́n afɔ ɖokpó ɖokpó jí. Klɔcée lɛ́ɛ kpó gankpo lɛ́ɛ kpó ɔ́, kpatágan wɛ è dǒ bló yě.

¹³Akpá e xwé xwé ɔ́ sín hɔntogbó ɖe ɖo goxɔ ɔ́ sín zǎnzǎnhwe jí ɔ́ lɔ sín ga ná nyí mɛ̌tlu koatɔ́n (25).

¹⁴Avɔ e è nǎ dó ɖó ɖisí nú hɔntogbó ɔ́ ná ɖó mɛ̌tlu tɛ́nwe adaɖé (7,5), bɔ dotín lɛ́ɛ ná nyí atɔn, bó ná ɖó afɔ ɖokpó ɖokpó.

¹⁵Mɔ̌ ɖokpó ɔ́, avɔ e è nǎ dó ɖó amyɔxwé nú hɔntogbó ɔ́ lɔ ná ɖó mɛ̌tlu tɛ́nwe adaɖé (7,5), bɔ dotín lɛ́ɛ lɔ ná nyí atɔn, bó ná ɖó afɔ ɖokpó ɖokpó.

¹⁶Lɛ̌ɛnkanvɔ e dɛ kan ganjí ɔ́ wɛ ná nyí avɔ e a nǎ dó ɖó hɔntogbó ɔ́ nu; xɔmɛgbovɔ ɔ́ ná ɖó mɛ̌tlu wǒ, bó ná nyí fɛ́sinnɔ, vɔvɔ kpódó vɔvɔ cɛ́cɛ́ kpó, bɔ mɛ e nɔ kó avɔ lɛ́ɛ ná kó; é ná ɖó dotín ɛnɛ, bɔ bǐ ná ɖó afɔ ɖokpó ɖokpó.

¹⁷È nǎ sɔ́ kpatágan dó bló gankpo dó hɛn dotín e è tunwun lɛ́ lɛ̌ dó kɔ́xota ɔ́ lɛ́ɛ; kpatágan wɛ è nǎ dó bló klɔcée yětɔn lɛ́ɛ ná, bó ná zé ganvɔ dó bló afɔ yětɔn lɛ́ɛ.

¹⁸Hǔn, kɔ́xota ɔ́ sín ga ná nyí mɛ̌tlu kanɖé wǒ (50), gblǒ tɔn ná nyí mɛ̌tlu koatɔ́n (25). Avɔ ɔ́ sín jǐ yiyi ná nyí mɛ̌tlu we adaɖé (2,5). Lɛ̌ɛn e dɛ kan ganjí ɔ́ wɛ ná nyí avɔ lɛ́ɛ. Afɔ e jí dotín lɛ́ɛ ná jínjɔ́n lɛ́ɛ ná nyí ganvɔ.

¹⁹Ganvɔ wɛ è nǎ dó bló nǔ e è nǎ zán ɖo xɔ ɔ́ mɛ lɛ́ɛ bǐ ná. Ganvɔ wɛ è nǎ lɛ̌ dó bló goxɔ ɔ́ kpódó kɔ́xota ɔ́ kpó sín só lɛ́ɛ bǐ nǎ.

²⁰“A nǎ ɖɔ nú Izlayɛ́li ví lɛ́ɛ ɖɔ yě ní hɛn olívu sín ami akú wá nú we. Ami énɛ́ wɛ mi ná dó zogbɛ́n lɛ́ɛ mɛ, bɔ zogbɛ́n lɛ́ɛ ná nɔ títá hwebǐnu.

²¹Aalɔ́ɔn kpódó vǐ tɔn lɛ́ɛ kpó ná nɔ́ kpé nukún dó zogbɛ́n lɛ́ɛ wú ɖo goxɔ ɔ́ mɛ, ɖo xɔmɛgbovɔ e gúdo akɔjijɛgbá ɔ́ ɖe ɔ́ nukɔn; zogbɛ́n lɛ́ɛ ná ɖo títá ɖo nukɔn ce zǎn kéze. Izlayɛ́li ví lɛ́ɛ ɖó ná nyi sɛ́n énɛ́ ɔ́ káká sɔ́yi, sín jijimɛ ɖě yi ɖě jí.”