Read fon Tíntɔ́n 28 Bible Online

Tíntɔ́n 28 - fon bible

Tíntɔ́n 28

¹Mawu Mavɔmavɔ lɛ́ ɖɔ nú Mɔyízi ɖɔ: “Mɔyízi, ylɔ̌ nɔví towe Aalɔ́ɔn ní wá gɔ̌n towe, é kpódó vǐ tɔn Nadavu, Avihu, Eleazáa kpódó Itamáa kpó. A nǎ ɖe yě ɖó vo nú Izlayɛ́li ví ɖě lɛ́ɛ, bɔ yě ná nɔ wa vɔ̌sánú-xwlémawutɔ́zɔ́ nú mì.

²A nǎ tɔ vɔ̌sánú-xwlémawutɔ́ sín awu nú nɔví towe Aalɔ́ɔn, bó ná dó ɖe tɛn e mɛ é ɖe ɔ́ kpó susu e é ɖó ɔ́ kpó xlɛ́.

³A nǎ ɖɔ nú avɔlɔntɔ́ e un bló bɔ alɔnu yětɔn mɛ́ ganjí lɛ́ɛ bǐ, bɔ yě ná tɔ awu lɛ́ɛ nú Aalɔ́ɔn; è nǎ sɔ́ ɛ ɖó vo nú mì, bɔ é ná nɔ́ wa vɔ̌sánú-xwlémawutɔ́zɔ́ nú mì.

⁴Nǔ e yě ná tɔ nú nɔví towe Aalɔ́ɔn kpó vǐ tɔn lɛ́ɛ kpó, bɔ yě ná nɔ́ nɔ mɛ, bó ná nɔ́ wa vɔ̌sánú-xwlémawutɔ́zɔ́ yětɔn lɛ́ɛ é ɖíe: akɔ́ntakpo, efódu, awu ɖaxó, dowu gaga bɔ è nǎ kó, tablá kpó gǒjíblánú kpó.

⁵Yě ná nɔ́ zán kan gansinnɔ, bó ná nɔ́ zán avɔ fɛ́sinnɔ, vɔvɔ, vɔvɔ cɛ́cɛ́, kpódó lɛ̌ɛnkanvɔ ɖagbe ɖagbe kpó.”

⁶“Avɔlɔntɔ́ e alɔnu yětɔn mɛ́ ganjí lɛ́ɛ ná zé kan didɛ e è nɔ dó lɔn lɛ̌ɛnkanvɔ ná ɔ́ dó lɔn efódu ná, bɔ kan kwlésinnɔ, kan vɔvɔ, kpó kan vɔvɔ cɛ́cɛ́ kpó ná gbɔn mɛ, bɔ yě ná zé kan gansinnɔ dó kó ná.

⁷È nǎ lɔn abɔ̌tavɔ we bɔ è nǎ tɔ dó efódu ɔ́ sín tó we lɛ́ɛ wú dó hɛn ɖó te.

⁸Efódu ɔ́ kpó kan tɔn kpó bǐ wɛ è lɔn ɖó bǔ. Kan gansinnɔ, kan kwlésinnɔ, kan vɔvɔ, kan vɔvɔ cɛ́cɛ́, kpódó kan didɛ e è nɔ dó lɔn lɛ̌ɛnkanvɔ ná ɔ́ kpó wɛ è nǎ dó lɔn ná.

⁹A nǎ fɔ awǐnnya e è nɔ ylɔ́ ɖɔ onísi ɔ́ we, bó ná wlán Jakɔ́bu ví súnnu lɛ́ɛ sín nyǐkɔ dó yě jí.

¹⁰A nǎ xwedó lě e è ji yě gbɔn ɖě jɛ ɖě gúdo ɔ́, bó ná wlán mɛ ayizɛ́n sín nyǐkɔ dó awǐnnya ɔ́ ɖokpó jí, bó ná wlán mɛ ayizɛ́n ɖé lɛ́ɛ sín nyǐkɔ dó awǐnnya wegɔ́ ɔ́ jí.

¹¹A nǎ wlán Jakɔ́bu ví súnnu lɛ́ɛ sín nyǐkɔ ɖó awǐnnyatɛ we lɛ́ɛ jí, lě e awǐnnyazɔ́watɔ́ nɔ́ kun nǔ dó awǐnnya jí gbɔn ɔ́. A nǎ kɔn siká lɛ́ lɛ̌ dó awǐnnyatɛ we lɛ́ɛ.

¹²A nǎ bɛ́ awǐnnyatɛ we lɛ́ɛ dó efódu ɔ́ sín abɔ̌tavɔ lɛ́ɛ jí, dó ná akɔta Izlayɛ́li tɔn wěwe lɛ́ɛ sín xlɛ̌. Énɛ́ ɔ́, Aalɔ́ɔn ná hɛn nyǐkɔ yětɔn abɔ̌ta ɖo sinsɛnxɔ ɔ́ mɛ, bɔ nyɛ Mawu Mavɔmavɔ ɔ́, un ɖo mimɔ wɛ ɔ́, un ná wɔn mi Izlayɛ́li ví lɛ́ɛ ǎ.

¹³Din e a kɔn siká lɛ́ lɛ̌ dó awǐnnyatɛ we lɛ́ɛ ɔ́,

¹⁴a nǎ zé siká akú dó bló wlɔ kpɛví kpɛví we ná, bó ná gbɛ kan ɖɔhun, bó ná sin dó awǐnnyatɛ ɖokpó ɖokpó wú.”

¹⁵“Avɔlɔntɔ́ e alɔnu yětɔn mɛ́ ganjí lɛ́ɛ ná zé kan didɛ e è nɔ dó lɔn lɛ̌ɛnkanvɔ ná ɔ́ dó lɔn akɔ́ntakpo e è nɔ sin dó akɔ́nta, dó ɖɔ hwɛ é, bɔ kan kwlésinnɔ, vɔvɔ, kpó vɔvɔ cɛ́cɛ́ kpó ná gbɔn mɛ, bɔ yě ná zé kan gansinnɔ dó kó ná, lě e è lɔn efódu ɔ́ gbɔn é.

¹⁶Akpo wɛ é ná nyí, bó ná ɖó gblǒ zɛ̌ɛ́n ga zɛ̌ɛ́n, bó ná nyí mɛ̌tlu ɖokpó sín ɛnɛvlɔ́ɖó.

¹⁷A nǎ to awǐnnya ɖagbe ɖagbe d'é wú dó ba acɔ́ ná; hǎ ɛnɛ jí wɛ a nǎ to ɖó. A nǎ to awǐnnya sadwáni ɖokpó, tokpázi ɖokpó kpó emɛlodu ɖokpó kpó ɖó hǎ nukɔntɔn ɔ́ jí.

¹⁸Bó ná to awǐnnya ɛsikabukli ɖokpó, safíi ɖokpó kpó dyamáa ɖokpó kpó ɖó hǎ wegɔ́ ɔ́ jí.

¹⁹A nǎ to awǐnnya okpálu ɖokpó, agáti ɖokpó kpó amɛtisi ɖokpó kpó ɖó hǎ atɔngɔ́ ɔ́ jí.

²⁰Bó ná to awǐnnya klizolíti ɖokpó, onísi ɖokpó kpó jasipée ɖokpó kpó ɖó hǎ ɛnɛgɔ́ ɔ́ jí. Siká wɛ è nǎ kɔn lɛ́ lɛ̌ dó awǐnnya énɛ́ lɛ́ɛ.

²¹È nǎ wlán Jakɔ́bu ví lɛ́ɛ ɖokpó ɖokpó sín nyǐkɔ ɖó awǐnnya lɛ́ɛ ɖokpó ɖokpó wú, lě e awǐnnyazɔ́watɔ́ nɔ́ kun nǔ dó awǐnnya wú gbɔn é. Bɔ awǐnnya énɛ́ lɛ́ɛ nyí xlɛ̌ akɔta Izlayɛ́li tɔn wěwe lɛ́ɛ tɔn.

²²“A nǎ zé siká akú dó bló wlɔ kpɛví kpɛví ná, bó ná gbɛ kan ɖɔhun nú akɔ́ntakpo ɔ́.

²³A nǎ bló sikálɔgan we, bó fɔ ɖó akɔ́ntakpo ɔ́ sín tó we e ɖo aga lɛ́ɛ wú.

²⁴A nǎ fɔ sikáwlɔ we nɛ́ lɛ́ɛ gbɔn alɔgan e ɖo akɔ́ntakpo ɔ́ sín tó e ɖo aga lɛ́ɛ mɛ.

²⁵A nǎ zé wlɔ ɔ́ sín nu we ɖě lɛ́ɛ gbɔn efódu ɔ́ sín abɔ̌tavɔ ɔ́ glɔ́, gbɔn nukɔn, dó hɛn efódu ɔ́ dó abɔ̌tavɔ ɔ́ wú.

²⁶A nǎ lɛ́ bló sikálɔgan we, bó ná fɔ yě ɖó akɔ́ntakpo ɔ́ sín tó we lɛ́ɛ tó, ɖo do bɔdó awu gaga ɔ́ wú ɖo xomɛ.

²⁷A nǎ lɛ́ bló sikálɔgan we ɖó efódu ɔ́ sín abɔ̌tavɔ we lɛ́ɛ sín do, ɖo nukɔn, ɖo fí e è tɔ gbɔn lɛ́ɛ, ɖo gǒjíblánú e ɖo efódu ɔ́ wú ɔ́ sín ta nu.

²⁸A nǎ zé kan kwlésinnɔ gbɔn alɔgan lɛ́ɛ mɛ, bó dó sin akɔ́ntakpo ɔ́ ná, dó gǒjíblánú e ɖo efódu ɔ́ jí ɔ́ wú, bónú é má gosín efódu ɔ́ wú ó.

²⁹“Nú Aalɔ́ɔn xwe goxɔ ɔ́ mɛ ɔ́, akɔ́ntakpo e è nɔ sin dó akɔ́ntakpo bó nɔ́ ɖɔ hwɛ ɔ́ mɛ wɛ é ná ɖe, bɔ akɔta Izlayɛ́li tɔn lɛ́ɛ sín nyǐkɔ ná ɖo akɔ́nnu tɔn bó ná nyí flǐnnú tɛgbɛ tɔn ɖo Mawu Mavɔmavɔ nukɔn.

³⁰ A nǎ bɛ̌ Wulímu kpó Tumímu kpó dó akɔ́ntakpo ɔ́ mɛ, bɔ Aalɔ́ɔn xwe nyɛ Mawu Mavɔmavɔ nukɔn ɔ́, yě ná nɔ́ ɖo akɔ́n tɔn ta. Énɛ́ ɔ́, Wulímu kpó Tumímu kpó ná ɖo akɔ́nta n'i hwebǐnu, ɖo nyɛ Mawu Mavɔmavɔ nukɔn, bɔ é ná sixú tunwun nǔ e ba nú Izlayɛ́li ví lɛ́ɛ wɛ un ɖe é.”

³¹“Avɔ kwlésinnɔ kɛ́ɖɛ́ wɛ a nǎ dó tɔ awu e ná nɔ do nú efódu ɔ́ ná.

³²A nǎ ɖe ali d'é mɛ gbɔn tɛ́ntin, bɔ è nǎ nɔ́ zé ta gbɔn mɛ. A nǎ kó kɔ mɛ ná, bɔ é ná tlí bó má wá vún ó.

³³A nǎ zé kan kwlésinnɔ, kan vɔvɔ kpódó kan vɔvɔ cɛ́cɛ́ kpó dó bló atínsínsɛ́n e è nɔ ylɔ́ ɖɔ glenádi ɔ́ gbɔn awu ɔ́ tó lɛ́ lɛ̌ dó, ɖo do, bó dó ba acɔ́ ná, bó ná zé siká dó bló gan e è nɔ xúxú ɔ́ kpɛví kpɛví ɖé lɛ́ɛ lɛ́ lɛ̌ dó gbɔn glenádi lɛ́ɛ tɛ́ntin.

³⁴Hǔn, è mɔ gan ɖokpó ɔ́, è nǎ mɔ glenádi ɖokpó, bɔ é ná nɔ mɔ̌ lɛ́ lɛ̌ dó awu ɔ́ bǐ.

³⁵Awu énɛ́ ɔ́ wɛ Aalɔ́ɔn ná nɔ́ dó dó wa vɔ̌sánú-xwlémawutɔ́zɔ́ tɔn. Hwenu e é ná ɖo Tɛn mímɛ́ ɔ́ mɛ byɔ́ wɛ ɔ́ kpódó hwenu e é ná ɖo tíntɔ́n sín mɛ wɛ ɔ́ kpó ɔ́, è nǎ nɔ se gan e ɖo awu ɔ́ tó lɛ́ɛ sín gbe; énɛ́ ɔ́, nú gan ɔ́ ɖo nǔ ɖɔ wɛ ɔ́, é ná kú ǎ.

³⁶“Mɔ̌ ɖokpó ɔ́, a nǎ zé siká akú dó bló gan gbajagbaja ɖokpó ná, bó ná ɖe d'é ji ɖɔ: ‘Mɛɖeɖóvo Mawu MAVƆMAVƆ tɔn’. A nǎ ɖe lě e awǐnnyazɔ́watɔ́ nɔ́ kun nǔ dó awǐnnya jí gbɔn é.

³⁷A nǎ zé kan kwlésinnɔ dó blá ɛ ganjí dó tablá ɔ́ wú ɖo nukɔn.

³⁸Hwenu e é ná wá nyɛ Mawu Mavɔmavɔ ɔ́ nukɔn, bó ná xwlé vɔ̌sánú Izlayɛ́li ví lɛ́ɛ tɔn mì ɔ́, nǔwlánwlán énɛ́ ɔ́ ná ɖo nukɔn tɔn. Énɛ́ ɔ́, nú Izlayɛ́li ví lɛ́ɛ ná bó xwlé vɔ̌sánú mì nyi do ɔ́, un ná kpɔ́n dó nǔwlánwlán énɛ́ ɔ́ e ɖo Aalɔ́ɔn nukɔn ɔ́ wú, bó yí vɔ̌sánú yětɔn lɛ́ɛ.

³⁹“Mɔ̌ ɖokpó ɔ́, a nǎ zé kan didɛ e è nɔ dó lɔn lɛ̌ɛnkanvɔ ná ɔ́ dó tɔ dowu gaga, bɔ è nǎ kó tablá kpó gǒjíblánú kpó nú Aalɔ́ɔn.

⁴⁰“A nǎ tɔ awu gaga nú Aalɔ́ɔn sín vǐ súnnu lɛ́ɛ lɔmɔ̌, bó ná bló gǒjíblánú nú yě, bó ná tɔ gbǎkún nú yě. Nǔ énɛ́ lɛ́ɛ ná ɖe tɛn e mɛ yě ɖe ɔ́ kpó susu e yě ɖó ɔ́ kpó xlɛ́.

⁴¹“A nǎ dó awu énɛ́ lɛ́ɛ nú nɔví towe Aalɔ́ɔn kpódó vǐ tɔn súnnu lɛ́ɛ kpó. A nǎ kɔn ami dó ta nú yě, a nǎ zé azɔ̌ yětɔn dó así nú yě, a nǎ ɖe yě ɖó vo, bɔ yě ná nɔ wa vɔ̌sánú-xwlémawutɔ́ sín azɔ̌ ɔ́ nú mì.

⁴²A nǎ zé lɛ̌ɛnkanvɔ dó tɔ cokoto kpɛví kpɛví nú yě, bɔ yě ná nɔ́ dó ɖó do dó hwlá mɛ̌. Cokoto énɛ́ ɔ́ ná gosín alin wa yi asá.

⁴³Nú Aalɔ́ɔn kpódó vǐ tɔn súnnu lɛ́ɛ kpó xwe goxɔ ɔ́ mɛ, bó ná kpé nyɛ Mawu, abǐ nú yě xwe vɔ̌sákpe ɔ́ kɔn, bó ná wa vɔ̌sánú-xwlémawutɔ́zɔ́ yětɔn ɔ́, yě ɖó ná dó cokoto kpɛví énɛ́ ɔ́ dó do. É má nyí mɔ̌ ǎ ɔ́, un ná mɔ ɖɔ yě wa nǔ nyi do, bɔ yě ná kú. Sɛ́n ɖé wɛ sɛ́n énɛ́ ɔ́ nyí, bó ɖo te káká sɔ́yi nú Aalɔ́ɔn kpódó kúnkan tɔn lɛ́ɛ kpó.”