Read fon Tíntɔ́n 29 Bible Online

Tíntɔ́n 29 - fon bible

Tíntɔ́n 29

¹“Lě e a nǎ bló gbɔn nú Aalɔ́ɔn kpó vǐ tɔn súnnu lɛ́ɛ kpó, bó ná ɖe yě ɖó vo, bɔ yě ná nɔ́ wa vɔ̌sánú-xwlémawutɔ́ sín azɔ̌ ɔ́ nú mì ɔ́ ɖíe: “Zě nyibúsú wínnyáwínnyá ɖokpó, bó zé agbo we; blɔ̌ ɖěbǔ má ɖo yě wú ó.

²A nǎ lɛ́ zé blěelinfín dó ɖa wɔ̌xúxú e mɛ è ma dó tɔ́n ǎ é ná. A nǎ zé ami dó nya blěelinfín dó ɖa atá e mɛ è ma dó tɔ́n ǎ é. A nǎ zé blěelinfín dó bló acɔnmɔ e mɛ è ma dó tɔ́n ǎ é, bó sá ami dó.

³A nǎ bɛ́ nǔ énɛ́ lɛ́ɛ e a ɖa ɔ́ dó xasun mɛ, bó ná zé kpódó nyibúsú wínnyáwínnyá ɔ́ kpó, kpódó agbo we lɛ́ɛ kpó wá xwé ce gbe.

⁴“Mɔ̌ ɖokpó ɔ́, a nǎ kplá Aalɔ́ɔn kpódó vǐ tɔn súnnu lɛ́ɛ kpó wá goxɔ ɔ́ nukɔn; fínɛ́ wɛ un ná ɖɔ xó xá togun ɔ́ ɖe, bó ná zé sin dó slá wǔ nú yě.

⁵Énɛ́ ɔ́ gúdo ɔ́, a nǎ fɔ vɔ̌sánú-xwlémawutɔ́ sín awu lɛ́ɛ dó nú Aalɔ́ɔn. Awu lɛ́ɛ wɛ nyí: Awu ɖaxó ɔ́, dowu gaga ɔ́, efódu ɔ́ kpódó akɔ́ntakpo ɔ́ kpó, bó ná sin efódukan ɔ́.

⁶A nǎ sɔ́ tablá ɔ́ ɖó ta n'i, bó ná zé sikánú e wú è wlǎn mɛɖeɖóvo Mawu Mavɔmavɔ tɔn dó ɔ́ ɖ'é wú.

⁷A nǎ zé ami ɔ́ bó kɔn dó ta n'i, bó ná dó ɖe e ɖó vo.

⁸Énɛ́ ɔ́ gúdo ɔ́, a nǎ ylɔ́ vǐ tɔn súnnu lɛ́ɛ, bó ná dó awu gaga lɛ́ɛ nú yě.

⁹A nǎ sin gǒjíblánú yětɔn lɛ́ɛ nú yě, bó ná xwe gbǎkún yětɔn lɛ́ɛ nú yě. Bɛ́ sín gbe énɛ́ ɔ́ gbe ɔ́, yě ná nyí vɔ̌sánú-xwlémawutɔ́ káká sɔ́yi lě e un ɖɔ gbɔn é.

¹⁰“Énɛ́ ɔ́ gúdo ɔ́, a nǎ zé nyibúsú ɔ́ wá goxɔ ɔ́ nukɔn, bɔ Aalɔ́ɔn kpódó vǐ tɔn súnnu lɛ́ɛ kpó ná fɔ alɔ ɖó ta tɔn,

¹¹bɔ a nǎ gbo gbe nyibúsú ɔ́ ɖo nyɛ Mawu Mavɔmavɔ nukɔn, ɖo goxɔ ɔ́ sín alihɛ́nnu.

¹²A nǎ yǐ nyibúsú ɔ́ sín hun ɖě, bó sɔ́ alɔví d'é mɛ, bó ɖá dó vɔ̌sákpe e ɖo goxɔ ɔ́ nukɔn ɔ́ sín zo lɛ́ɛ wú, bó ná húzú hun e kpo ɔ́ kɔn nyi vɔ̌sákpe ɔ́ sín afɔ wú.

¹³A nǎ ɖe jǒ e ɖo kanlin ɔ́ sín xomɛnú lɛ́ɛ wú ɔ́ bǐ, bó ná ɖe alǐnnuvínu ɔ́ kpódó ayi we lɛ́ɛ kpó, bó ná dó bǐ zo ɖo vɔ̌sákpe ɔ́ jí, ɖo goxɔ ɔ́ nukɔn.

¹⁴Amɔ̌, kanlin ɔ́ sín lan kpódó anyǔ tɔn kpó, kpódó mǐ tɔn kpó ɔ́, a nǎ ɖe sín fí e mi ɖó gɔnu ɖó ɔ́, bó dó zo. É ná nyí hwɛsɔ́kɛmɛvɔ́.

¹⁵“Énɛ́ ɔ́ gúdo ɔ́, a nǎ zé agbo lɛ́ɛ ɖokpó, bɔ Aalɔ́ɔn kpódó vǐ tɔn súnnu lɛ́ɛ kpó ná fɔ alɔ ɖó ta tɔn.

¹⁶Bɔ a nǎ gbo gbe agbo ɔ́. A nǎ yí hun tɔn, bó ná mi dó vɔ̌sákpe ɔ́ wú lɛ́ lɛ̌ dó.

¹⁷A nǎ já agbo ɔ́. A nǎ klɔ́ xomɛnú lɛ́ɛ kpódó afɔ lɛ́ɛ kpó, lobo ná bɛ́ dó lan ɔ́ kpó ta ɔ́ kpó jí.

¹⁸ A nǎ dó bǐ zo ɖo vɔ̌sákpe ɔ́ jí. Vɔ̌ e è nɔ dó zo nú mì ɔ́ wɛ. Vɔ̌sísá ɖé wɛ é nyí bɔ wǎn tɔn nɔ nyɔ́ se nú nyɛ Mawu Mavɔmavɔ.

¹⁹“Énɛ́ ɔ́ gúdo ɔ́, a nǎ zé agbo wegɔ́ ɔ́, bɔ Aalɔ́ɔn kpódó vǐ tɔn súnnu lɛ́ɛ kpó ná fɔ alɔ ɖó ta tɔn,

²⁰a nǎ gbo gbe e. A nǎ yǐ hun tɔn ɖě, bó ná ɖá dó Aalɔ́ɔn kpó vǐ tɔn lɛ́ɛ kpó sín tó ɖisíxwé tɔn ɔ́ nuvínu. A nǎ lɛ́ ɖá dó alɔsú yětɔn ɖisíxwé tɔn ɔ́ wú, bó ná lɛ́ ɖá dó afɔsú yětɔn ɖisíxwé tɔn ɔ́ wú. Énɛ́ ɔ́ gúdo ɔ́, a nǎ mi hun e kpo ɔ́ dó vɔ̌sákpe ɔ́ wú lɛ́ lɛ̌ dó.

²¹Énɛ́ ɔ́ gúdo ɔ́, a nǎ wǔn hun e ɖo vɔ̌sákpe ɔ́ jí ɔ́ kpódó ami e è nɔ kɔn dó ta nú mɛ ɔ́ kpó kpɛɖé kpɛɖé, bó ná mi dó Aalɔ́ɔn kpódó vǐ tɔn lɛ́ɛ kpó sín awu wú. Lě e a nǎ ɖe Aalɔ́ɔn kpódó vǐ tɔn lɛ́ɛ kpó, kpódó awu yětɔn lɛ́ɛ kpó ɖó vo nú nyɛ Mawu Mavɔmavɔ gbɔn ɔ́ nɛ́.

²²Din ɔ́, agbo wegɔ́ e è hu ɔ́ ná ɖe xlɛ́ ɖɔ vɔ̌sánú-xwlémawutɔ́ lɛ́ɛ bɛ́ azɔ̌; a nǎ ɖe agbo énɛ́ ɔ́ sín sí, kpó jǒ e ɖ'é wú ɔ́ kpó; jǒ e ɖo xomɛnú lɛ́ɛ wú ɔ́, alǐnnuvínu ɔ́, ayi we lɛ́ɛ, kpódó jǒ e bú dó yě ɔ́ kpó, bó ná ɖe asá ɖisíxwé tɔn ɔ́ d'é jí.

²³A nǎ lɛ́ zé wɔ̌xúxú e mɛ è ma dó tɔ́n ǎ é ɖokpó, atá ɖokpó, acɔnmɔ ɖokpó ɖo xasun e ɖo nyɛ Mawu Mavɔmavɔ nukɔn ɔ́ mɛ.

²⁴A nǎ bɛ́ nǔ énɛ́ lɛ́ɛ bǐ dó Aalɔ́ɔn kpó vǐ tɔn súnnu lɛ́ɛ kpó sín alɔ mɛ, bó ná ɖɔ nú yě ɖɔ yě ní fɔ yě xwlé mì, lě e è nɔ xwlé vɔ̌sánú mì gbɔn é.

²⁵Énɛ́ ɔ́ gúdo ɔ́, a nǎ yǐ nǔ lɛ́ɛ sín alɔ yětɔn mɛ, bó ná zé dó vɔ̌ e è nɔ dó zo ɔ́ jí ɖo vɔ̌sákpe ɔ́ jí, bó ná dó zo. Vɔ̌sánú wɛ é nyí bɔ wǎn tɔn nɔ́ nyɔ́ se nú mì.

²⁶A nǎ zé agbo wegɔ́ énɛ́ sín akɔ́n, bó ná xwlé mì lě e è nɔ xwlé vɔ̌sánú mì gbɔn é, bɔ énɛ́ ɔ́ ná nyí kanta towe.

²⁷“A nǎ ɖe xlɛ́ ɖɔ agbo ɔ́ sín akɔ́n kpó asá tɔn kpó e è ɖe, bó xwlé nyɛ Mawu Mavɔmavɔ gbɔn mɔ̌ ɔ́, lan e è sɔ́ ɖó vo nú mì ɔ́ wɛ.

²⁸Énɛ́ ɔ́ wú wɛ Izlayɛ́li ví lɛ́ɛ ná nɔ́ ɖe akpáxwé énɛ́ lɛ́ɛ ɖo kanlin e yě dó sá kɔnɖókpɔ́ vɔ́ nú mì lɛ́ɛ wú hwebǐnu, bó ná nɔ́ bɛ́ jó nú Aalɔ́ɔn kpódó vǐ tɔn lɛ́ɛ kpó.

²⁹“Nú Aalɔ́ɔn wá kú ɔ́, è nǎ bɛ́ vɔ̌sánú-xwlémawutɔ́ sín awu tɔn lɛ́ɛ jó nú vǐ tɔn súnnu lɛ́ɛ, bɔ hwenu e è nǎ kɔn ami dó ta nú mɛ ɖokpó ɖo yě mɛ bó ná sɔ́ vɔ̌sánú-xwlémawutɔ́zɔ́ dó así n'i ɔ́, é ná dó.

³⁰Vǐ tɔn e ná jɛ do tɔn mɛ, bó ná jɛ vɔ̌sánú-xwlémawutɔ́zɔ́ ɔ́ wa jí ɔ́ ná dó awu lɛ́ɛ xɔ azǎn tɛ́nwe, hwenu e é ná byɔ́ goxɔ ɔ́ mɛ, bó ná wa vɔ̌sánú-xwlémawutɔ́zɔ́ ɖo tɛn mímɛ́ ɔ́ mɛ é.

³¹“A nǎ zé agbo wegɔ́ e è dǒ sɔ́ vɔ̌sánú-xwlémawutɔ́zɔ́ ɔ́ dó así nú yě ɔ́, bó ná ɖa lan tɔn ɖo tɛn mímɛ́ ɖé mɛ.

³²Bɔ Aalɔ́ɔn kpó vǐ tɔn súnnu lɛ́ɛ kpó ná ɖu lan tɔn kpódó wɔ̌xúxú e ɖo xasun ɔ́ mɛ ɔ́ kpó ɖo goxɔ e mɛ un ɖe ɔ́ sín ali hɛ́nnu.

³³Yědɛɛ lɛ́ɛ ɖokpónɔ wɛ ná ɖu nǔ énɛ́ lɛ́ɛ, ɖó nǔ énɛ́ lɛ́ɛ wɛ è zǎn dó súnsún hwɛ yětɔn lɛ́ɛ, bó ɖe yě ɖó vo bó sɔ́ vɔ̌sánú-xwlémawutɔ́zɔ́ ɔ́ dó así nú yě. Mɛ ɖěvo ɖěbǔ ná ɖu ǎ, ɖó nǔ mímɛ́ wɛ.

³⁴Nǔ é kpo lan ɔ́ ɖě kpódó wɔ̌xúxú ɔ́ ɖě kpó bɔ ayǐ hɔ́n dó ɔ́, a nǎ dó zo. È sɔ́ ná ɖu ǎ, ɖó nǔ mímɛ́ wɛ.

³⁵“A nǎ xwedó nǔ énɛ́ lɛ́ɛ e un ɖɔ nú we dó Aalɔ́ɔn kpó vǐ tɔn súnnu lɛ́ɛ kpó wú lɛ́ɛ bǐ. Azǎn tɛ́nwe wɛ a nǎ sɔ́ ɖó te, dó sɔ́ yě vɔ̌sánú-xwlémawutɔ́.

³⁶“A nǎ nɔ́ zé nyibúsú ɖokpó dó sá vɔ̌ nú mì ayǐhɔ́ngbe ayǐhɔ́ngbe xɔ azǎn tɛ́nwe lɛ́ɛ, bó ná dó mɔ hwɛsɔ́kɛ yí. Énɛ́ ɔ́, a nǎ wa mɔ̌ dó slá wǔ nú vɔ̌sákpe ɔ́; énɛ́ ɔ́ gúdo ɔ́, a nǎ kɔn ami d'é jí, bó dó ɖe e ɖó vo nú mì.

³⁷Énɛ́ ɔ́, a nǎ slá wǔ nú vɔ̌sákpe ɔ́ xɔ azǎn tɛ́nwe, bó dó ɖe e ɖó vo, bɔ vɔ̌sákpe ɔ́ ná nyí nǔ mímɛ́ bǐ, bɔ nǔ ɖěbǔ jɛ vɔ̌sákpe ɔ́ wú ɔ́ ná húzú nǔ mímɛ́.”

³⁸“Ayǐhɔ́ngbe ayǐhɔ́ngbe ɔ́, a nǎ nɔ́ xwlé mì lɛ̌ngbɔ́ví e ɖó xwe ɖokpó ɔ́ we ɖo vɔ̌sákpe ɔ́ jí. A nǎ nɔ́ bló mɔ̌ káká sɔ́yi.

³⁹A nǎ nɔ́ xwlé mì lɛ̌ngbɔ́ví ɔ́ ɖokpó zǎnzǎn, ɖokpó gbada.

⁴⁰Lɛ̌ngbɔ́ví zǎnzǎn tɔn ɔ́, linfín nyinya kilóo atɔn, olívu sín ami lǐtli ɖokpó adaɖé kpódó vɛ̌ɛn lǐtli ɖokpó adaɖé kpó, bɔ a nǎ xwlé mì. A nǎ zě vɛ̌ɛn lǐtli ɖokpó adaɖé, bó ná ba.

⁴¹Nǔ ɖokpó ɔ́ lɛ́ɛ wɛ ná jɛ lɛ̌ngbɔ́ví e a nǎ xwlé mì gbadanu ɔ́ jí. Vɔ̌ e è nɔ dó zo lɛ́ɛ wɛ, bɔ wǎn yětɔn nɔ́ nyɔ́ se nú nyɛ Mawu Mavɔmavɔ.

⁴²Bɛ́ sín din káká sɔ́yi ɔ́, è nǎ gɔn vɔ̌ e è nɔ dó zo ɔ́ sá nú mì ɖo goxɔ e mɛ un ɖe ɔ́ nukɔn gbeɖé ǎ. Fínɛ́ wɛ un ná nɔ́ wá kpé mi ɖe, bó ná nɔ́ ɖɔ xó nú we ɖe.

⁴³“Un ná nɔ́ wá kpé Izlayɛ́li ví lɛ́ɛ ɖo fínɛ́, bɔ tɛn énɛ́ ɔ́ ná húzú tɛn mǐmɛ́, ɖó susu ce wú.

⁴⁴Un ná ɖe goxɔ ɔ́ kpódó vɔ̌sákpe ɔ́ kpó ɖó vo. Un ná ɖe Aalɔ́ɔn kpódó vǐ tɔn súnnu lɛ́ɛ kpó ɖó vo, bɔ yě ná nɔ́ wa vɔ̌sánú-xwlémawutɔ́zɔ́ nú mì.

⁴⁵Un ná nɔ Izlayɛ́li ví lɛ́ɛ tɛ́ntin, bó ná nyí Mawu yětɔn.

⁴⁶Yě ná tunwun ɖɔ nyɛ wɛ nyí Mawu Mavɔmavɔ. Mawu yětɔn e ɖe yě tɔ́n sín Ejípu, bó ná nɔ tɛ́ntin yětɔn é. “Mawu Mavɔmavɔ, Mawu yětɔn wɛ un nyí.”