Read fon Tíntɔ́n 30 Bible Online

Tíntɔ́n 30 - fon bible

Tíntɔ́n 30

¹“A nǎ zé kasyatín dó bló vɔ̌sákpe ɖokpó bó ná nɔ́ dó zǎlínkpɔ́n zo ɖ'é jí.

²Akpáxwé tɔn lɛ́ɛ bǐ ná ɖó jlɛ̌ ɖokpó ɔ́; ɖokpó ɖokpó sín ga ná nyí mɛ̌tlu vlɔ̌; vɔ̌sákpe ɔ́ sín jǐ yiyi ná nyí mɛ̌tlu ɖokpó. Zo tɔn ɛnɛ lɛ́ɛ ná tɔ́n ganjí, bɔ zo lɛ́ɛ kpó vɔ̌sákpe ɔ́ kpó ná nɔ bǔ.

³A nǎ kɔn siká akú dó gbɔn fí bǐ, a nǎ kɔn dó tó tɔn ɖo aga, bó ná kɔn dó zo tɔn e tɔ́n lɛ́ɛ, bó ná kɔn dó akpáxwé tɔn ɛnɛ lɛ́ɛ. A nǎ kɔn siká gbɔn tó tɔn lɛ́ lɛ̌ dó.

⁴A nǎ bló sikálɔgan we we ɖó ɖisí amyɔ nú vɔ̌sákpe ɔ́ ɖo do. A nǎ fɔ kpo gaga gbɔn alɔgan lɛ́ɛ mɛ, bɔ è ná dó nɔ́ zé vɔ̌sákpe ɔ́ ná.

⁵Kasyatín wɛ a nǎ kpa dó bló kpo gaga lɛ́ɛ ná, bó ná kɔn siká dó.

⁶A nǎ zé vɔ̌sákpe ɔ́ ɖó xɔmɛgbovɔ ɔ́ nukɔn; xɔmɛgbovɔ e gúdo akɔjijɛgbá e mɛ awǐnnyatɛ ɖe ɔ́ nukɔn, ɖo fí e un ná nɔ́ wá kpé we ɖe é.

⁷Aalɔ́ɔn ná nɔ́ dó atínkɛn wǎnnɔ zo ɖo vɔ̌sákpe énɛ́ ɔ́ jí. Nú é yi zogbɛ́n lɛ́ɛ blóɖó gbé zǎnzǎn tɛgbɛ ɔ́, é ná nɔ́ dó zǎlínkpɔ́n zo.

⁸Nú é yi zogbɛ́n lɛ́ɛ blóɖó gbé gbadanu ɔ́, é ná nɔ́ lɛ́ dó zǎlínkpɔ́n zo; mɔ̌ wɛ è nǎ nɔ́ dó zo nú mì gbɔn káká sɔ́yi sín jijimɛ ɖě jí yi ɖě jí.

⁹Mi ná nɔ́ dó zǎlínkpɔ́n ɖěvo zo ɖo vɔ̌sákpe ɔ́ jí ǎ, mi ka ná nɔ́ dó vɔ̌ zo ɖ'é jí ǎ, mi ka ná dó nǔníná jinukún tɔn zo ɖ'é jí ǎ, mi ká ná ba ahan kɔn d'é jí ǎ.

¹⁰Aalɔ́ɔn ná nɔ́ sá hwɛsɔ́kɛmɛvɔ́ azɔn ɖokpó ɖo xwe ɖokpó mɛ. É ná kɔn kanlin e è hu dó sá vɔ̌ énɛ́ ɔ́ ná, bó ná mɔ hwɛsɔ́kɛmɛ yí ɔ́, sín hun dó vɔ̌sákpe ɔ́ sín zo e tɔ́n lɛ́ɛ jí. Xwewú xwewú wɛ è nǎ nɔ́ sá vɔ̌ énɛ́ ɔ́, sín jijimɛ ɖě jí yi ɖě jí. È ná zé vɔ̌sákpe ɔ́ ɖó vo nú mì, bɔ é ná nyí nǔ mímɛ́ titewungbe ɖé.”

¹¹Mawu Mavɔmavɔ lɛ́ ɖɔ nú Mɔyízi ɖɔ:

¹²“Hwenu e a nǎ sɔ́ Izlayɛ́li ví lɛ́ɛ sín kɛ́n ɔ́, mɛ ɖokpó ɖokpó ná sú takwɛ́ ɖé mì dó hwlɛ́n gbɛ éɖée tɔn gán, bónú awě ɖěbǔ ní má xo mi ɖo kɛ́nsísɔ́ énɛ́ ɔ́ hwenu ó.

¹³ Mɛ e sín kɛ́n a nǎ sɔ́ lɛ́ɛ ɖokpó ɖokpó ná ná gankwɛ́ glǎmu atɔ́ɔ́n, bɔ kpinkpɛn tɔn ná sɔgbe xá akwɛ́ e è nɔ zán ɖo Mawu xwé gbe ɔ́ sín vlɔ̌. É wɛ a nǎ yǐ ɖo mɛ ɖokpó ɖokpó sí nú mì.

¹⁴Izlayɛ́li ví súnnu e kó ɖó xwe ko abǐ éé kó ɖó hú mɔ̌ bɔ a sɔ́ kɛ́n yětɔn lɛ́ɛ bǐ wɛ ná sú akwɛ́ énɛ́.

¹⁵Dɔkunnɔ ná ná hú mɔ̌ ǎ, wamamɔnɔ lɔ ka ná ná bɔ é ná hwe hú mɔ̌ ǎ, mɛ ɖokpó ɖokpó ná ná nabí e è byɔ̌ ɔ́, bó ná dó xɔ gbɛ nú éɖée.

¹⁶Nú a yǐ akwɛ́ énɛ́ ɔ́ bǐ ɖo Izlayɛ́li ví lɛ́ɛ sí ɔ́, a nǎ zé dó wa goxɔ ɔ́ sín azɔ̌. Énɛ́ ɔ́, un ná nɔ́ flín Izlayɛ́li ví lɛ́ɛ, bó ná nɔ́ nya xɛ ɖo yě jǐ.”

¹⁷Mawu Mavɔmavɔ lɛ́ ɖɔ nú Mɔyízi ɖɔ:

¹⁸ “A nǎ zé ganvɔ dó bló zɛ̌n ɖokpó ná, bó ná zé ganvɔ dó bló afɔ n'i, bɔ è nǎ nɔ́ slá wǔ ɖ'é mɛ. È ná sɔ́ ɖó goxɔ ɔ́ kpó vɔ̌sákpe e jí è nɔ dó vɔ̌ zo ɖe ɔ́ kpó tɛ́ntin, bó ná dun sin ɖ'é mɛ bɔ é ná gɔ́, bɔ è nǎ nɔ zé dó slá wǔ.

¹⁹Aalɔ́ɔn kpódó vǐ tɔn súnnu lɛ́ɛ kpó ná nɔ́ zé sin e ɖ'é mɛ ɔ́ dó klɔ́ alɔ kpódó afɔ kpó,

²⁰có bó ná nɔ́ byɔ́ goxɔ ɔ́ mɛ, abǐ có bó ná wá vɔ̌sákpe e jí è nɔ dó vɔ̌ zo ɖe ɔ́ kɔn, bó ná xwlé vɔ̌sánú mì. Énɛ́ ɔ́, yě sɔ́ ná kú ǎ.

²¹Nǔgbó ɔ́, yě ɖó ná nɔ́ klɔ́ alɔ kpódó afɔ kpó, bó má wá kú ó. Sɛ́n énɛ́ ɔ́ ɖo te nú yě kpódó kúnkan yětɔn lɛ́ɛ kpó káká sɔ́yi.”

²² Mawu Mavɔmavɔ lɛ́ ɖɔ nú Mɔyízi ɖɔ:

²³“A nǎ zé ami wǎnɖagbenɔ e nyɔ́ hú ɖě lɛ́ɛ bǐ é: a nǎ zé mǐlami kilóo atɔ́ɔ́n, sinnamɔmi wǎnɖagbenɔ kilóo we adaɖé. Kanɛ́lu wǎnnɔ kilóo we adaɖé.

²⁴Kasi kilóo atɔn; gan e è nɔ dó da nǔ ɖo Mawu xwé gbe ɔ́ wɛ è nǎ zé dó da. Olívumi lǐtli ayizɛ́n ná jɛ jí.

²⁵A nǎ zé dó ɖa ami e è nɔ sá dó ɖe mɛ ɖó vo ɔ́ ná lě e céluɖatɔ́ nɔ́ ɖa célu gbɔn é. Ami mímɛ́ wɛ é ná nyí bɔ è nǎ nɔ́ zán hwenu e è nǎ ɖo mɛ ɖe ɖó vo nú mì wɛ é.

²⁶A nǎ mi ami ɔ́ dó goxɔ ɔ́ kpódó akɔjijɛgbá ɔ́ kpó wú.

²⁷A nǎ mi dó távo ɔ́, zogbɛ́nhɛnnú ɔ́, kpódó nǔ e ɖo yě wú lɛ́ɛ bǐ kpó wú. A nǎ mi dó vɔ̌sákpe e jí è nɔ dó ami wǎnɖagbenɔ zo ɖe ɔ́ wú.

²⁸A nǎ mi dó vɔ̌sákpe e jí è nɔ dó vɔ̌ zo ɖe ɔ́ wú, bó ná mi dó nǔ e è nɔ zán ɖo vɔ̌sákpe ɔ́ kɔn lɛ́ɛ bǐ wú. A nǎ mi dó ganzɛ́n ɔ́ kpódó nǔ e jí è sɔ́ ɖó ɔ́ kpó wú.

²⁹A nǎ ɖe nǔ énɛ́ lɛ́ɛ ɖó vo, bɔ yě ná nyí nǔ mímɛ́ bǐ yi fó, gbɛtɔ́ abǐ nǔ ɖěbǔ jɛ yě wú ɔ́ é ná húzú nyɛ Mawu Mavɔmavɔ tɔn.

³⁰Ami énɛ́ ɔ́ wɛ a nǎ kɔn dó ta nú Aalɔ́ɔn kpódó vǐ tɔn súnnu lɛ́ɛ kpó, bó ná dó ɖe yě ɖó vo, bɔ yě ná nɔ́ wa vɔ̌sánú-xwlémawutɔ́zɔ́ nú mì.

³¹“A nǎ ɖɔ nú Izlayɛ́li ví lɛ́ɛ ɖɔ: ‘Ami mímɛ́ wɛ é nyí, bɔ è nǎ nɔ́ kɔn dó ta nú mɛ. É jɛ́n è nǎ nɔ́ zán dó wa azɔ̌ nú mì tɛgbɛ.

³²È nǎ sá kpowun ǎ, mɛɖé ká ná zé nǔ e è cáká dó bló ná lɛ́ɛ dó bló mɔ̌hunkɔtɔn ɖěvo ná ǎ. Ami e è nɔ kɔn dó ta nú mɛ dó ɖe mɛ ɖó vo nú Mawu é wɛ é nyí, bɔ mi ná nɔ́ mɔ dó mɔ nǔ mímɛ́.

³³Mɛ ɖěbǔ bló mɔ̌hunkɔtɔn ɖě bó ná sá nú mɛ kpaa ɖé ɔ́, è nǎ ɖe mɛ ɔ́ sín togun tɔn mɛ.’ ”

³⁴Mawu Mavɔmavɔ lɛ́ ɖɔ nú Mɔyízi ɖɔ: “A nǎ zě nǔ wǎnɖagbenɔ élɔ́ lɛ́ɛ: atínhúnhɔ́n, onísi kpódó galubanumu kpó, bó zé zǎlínkpɔ́n akú gɔ́ ná. Nǔ énɛ́ lɛ́ɛ ɖě ná hú ɖě ǎ.

³⁵A nǎ bɛ̌ dó bló célu ná. A nǎ cáká yě lě e céluɖatɔ́ lɛ́ɛ nɔ́ cáká gbɔn é. È nǎ dó jɛ mɛ, bɔ é ná nyí nǔ akú, bó ná nyí nǔ mímɛ́.

³⁶A nǎ li ɖě kpɔ́ɖɔ́kpɔ́ɖɔ́, bó ná sɔ́ ɖó akɔjijɛgbá ɔ́ nukɔn ɖo goxɔ ɔ́ mɛ fí e un ná nɔ́ wá kpé we ɖe ɔ́, bɔ mi ná nɔ́ mɔ dó mɔ nǔ mímɛ́ titewungbe ɖé.

³⁷Mi ná zé nǔ e è cáká dó bló ná lɛ́ɛ dó bló mɔ̌hunkɔtɔn ɖě nú mi ɖésúnɔ ǎ. Mi ná mɔ dó mɔ nǔ mímɛ́ e è sɔ́ ɖ'ayǐ nú nyɛ Mawu Mavɔmavɔ ɖokpónɔ géé é.

³⁸Mɛ ɖěbǔ bló mɔ̌hunkɔtɔn ɖě, bó ná nɔ́ se wǎn tɔn ɔ́, è nǎ ɖe mɛ ɔ́ sín togun tɔn mɛ.”