Read fon Tíntɔ́n 31 Bible Online

Tíntɔ́n 31 - fon bible

Tíntɔ́n 31

¹Mawu Mavɔmavɔ lɛ́ ɖɔ nú Mɔyízi ɖɔ:

²“Đǒtó! Un sɔ́ Besalɛli Wulíi vǐ, Húu vǐvú ɔ́; akɔta Judáa tɔn ɔ́ mɛ wɛ é jɔ ɖe;

³un ná ɛ Yɛ ce bɔ é gɔ́ ayi tɔn mɛ, bɔ é bí, bó mɔ nukúnnú jɛ nǔ mɛ titewungbe. É tunwun azɔ̌ xwítíxwítí alɔkpa bǐ.

⁴É nyɔ́ tito lɛ́ɛ bló; é nyɔ́ siká sín azɔ̌ wa, bó nyɔ́ kpatágan kpó ganvɔ kpó sín azɔ̌ wa.

⁵É nyɔ́ awǐnnya ɖagbe ɖagbe lɛ́ɛ kpa, bó nyɔ́ to dó nǔ mɛ; é nyɔ́ atín kpa; mǐ ná ɖɔ kpowun ɔ́, é nyɔ́ nǔ bǐ wa.

⁶Un sɔ́ Oxoliyavu Axisamaki ví ɔ́ gɔ́ n'i; akɔta Dan tɔn ɔ́ mɛ wɛ é jɔ ɖe; un ná alɔlyɛ́nwiwa alɔnuzɔ́watɔ́ ɖěvo lɛ́ɛ. Yě ná nɔ kpɔ́, bó ná bló nǔ e un ɖɔ hwi ní bló lɛ́ɛ bǐ:

⁷yě ná bló goxɔ e mɛ un ná nɔ́ wá kpé yě ɖe ɔ́, bó ná bló akɔjijɛgbá ɔ́, bó ná bló nusú tɔn, bó ná bló nǔ e è nɔ zán ɖo goxɔ ɔ́ mɛ lɛ́ɛ bǐ,

⁸bó ná bló távo mímɛ́ ɔ́ kpódó sikázogbɛ́nhɛnnú ɔ́ kpó, bó ná bló nǔ e è nɔ zán ɖo yě kɔn lɛ́ɛ bǐ, bó ná bló éé jí è nǎ nɔ́ dó atínkɛn wǎnɖagbenɔ lɛ́ɛ zo ɖe ɔ́,

⁹bó ná bló vɔ̌sákpe e jí è nǎ nɔ́ dó vɔ̌sánú lɛ́ɛ zo ɖe ɔ́ kpódó nǔ e è nǎ nɔ́ zán ɖ'é kɔn lɛ́ɛ kpó, bó ná bló ganzɛ́n kpó afɔ tɔn kpó,

¹⁰bó ná bló azɔ̌wu lɛ́ɛ kpódó vɔ̌sánú-xwlémawutɔ́ sín awu kpó nú Aalɔ́ɔn, bó ná bló vǐ tɔn súnnu lɛ́ɛ sín awu lɛ́ɛ, bɔ yě ná nɔ́ dó, bó dó wa sinsɛnzɔ́ yětɔn lɛ́ɛ.

¹¹Ami mímɛ́ wǎnɖagbenɔ e è nǎ nɔ́ zán dó ɖe mɛ ɖó vo nú mì ɔ́ kpódó célu wǎnɖagbenɔ e è nǎ nɔ́ zán ɖo goxɔ ɔ́ mɛ ɔ́ kpó. Alɔnuzɔ́watɔ́ lɛ́ɛ ná bló lě e un ɖɔ nú we gbɔn é.”

¹²Mawu Mavɔmavɔ lɛ́ ɖɔ nú Mɔyízi ɖɔ:

¹³“Đɔ nú Izlayɛ́li ví lɛ́ɛ ɖɔ yě ní ma gɔn gbɔjɛzán ce nyí gbeɖé ó: azǎn ɖé wɛ é nyí bɔ un sɔ́ ɖó vo; ɖó wuntun ɖé wɛ é ná nyí ɖo nyɛ kpó mi kpódó kúnkan mitɔn lɛ́ɛ kpó tɛ́ntin, bɔ è ná dó tunwun ɖɔ nyɛ Mawu Mavɔmavɔ ɔ́ wɛ sɔ́ mi bɔ mi ná nyí togun ce.

¹⁴Hǔn, mi bo nyi gbɔjɛzán ɔ́, mi ma zé dó mɔ azǎn yǎyá ɖé ná ó. Mɛ e ma ná ɖó sísí nú azǎn énɛ́ ɔ́, bó má ná mɔ ɖɔ sinsɛn sín azǎn wɛ é nyí ǎ ɔ́, è nǎ hu i; mɛ ɖěbǔ wa azɔ̌ gbe énɛ́ ɔ́ gbe ɔ́, è nǎ ɖe e sín togun tɔn mɛ bó ná hu i.

¹⁵ Mawu Mavɔmavɔ zán gbla ɖokpó mɛ ɔ́, mi ɖó azǎn ayizɛ́n bó ná dó wa azɔ̌ ná; azǎn tɛ́nwegɔ́ ɔ́ wɛ nyí gbɔjɛzán, azǎn énɛ́ ɔ́, azǎn ɖé wɛ é nyí, bó ɖo vo nú nyɛ Mawu Mavɔmavɔ, bɔ è nǎ nɔ́ gbɔjɛ́. Mɛ ɖěbǔ wa azɔ̌ gbɔjɛzán gbe ɔ́, è nǎ hu i dandan.

¹⁶Izlayɛ́li ví lɛ́ɛ ɖó ná nɔ́ nyi gbɔjɛzán énɛ́ ɔ́, bɔ nǔ bǐ ná vɔ ɖ'é wú, jijimɛ ɖě jɛ ɖě gúdo, ɖó akɔjijɛ ɖé wɛ é nyí, bó ɖ'ayǐ káká sɔ́yi.

¹⁷ Azǎn énɛ́ ɔ́ ɖó ná nyí kɔnɖókpɔ́ e ɖo nyɛ kpódó Izlayɛ́li ví lɛ́ɛ kpó tɛ́ntin ɔ́ sín xlɛ̌ káká sɔ́yi. Đó azǎn ayizɛ́n wɛ un sɔ́ ɖó te dó bló jǐnukúnsin kpódó ayǐkúngban kpó; amɔ̌, azǎn tɛ́nwegɔ́ ɔ́ gbe ɔ́, un ɖó azɔ̌ te bo gbɔjɛ́.”

¹⁸Ée Mawu ɖɔ xó xá Mɔyízi fó ɖo Sinayíi só ɔ́ jí ɔ́, é bɛ́ awǐnnyatɛ we e jí é ɖésúnɔ sɔ́ alɔví tɔn dó wlán sɛ́n lɛ́ɛ dó ɔ́ n'i.