Read fon Tíntɔ́n 32 Bible Online

Tíntɔ́n 32 - fon bible

Tíntɔ́n 32

¹ Izlayɛ́li togun ɔ́ mɔ ɖɔ hwenu e Mɔyízi ná jɛ te sín só ɔ́ jí ɔ́ ɖo lǐnlín wɛ, bó kplé lɛ́ lɛ̌ dó Aalɔ́ɔn, bó ɖɔ n'i ɖɔ: “Đǒtó! Blǒ vodún ɖokpó nú mǐ, bónú é ná nɔ nukɔn nú mǐ[8]. Đó Mɔyízi ɔ́, nya énɛ́ ɔ́ e kplá mǐ tɔ́n sín Ejípu ɔ́, mǐ tunwun nǔ e jɛ dó jǐ tɔn ɔ́ ǎ.”

²Aalɔ́ɔn ɖɔ nú yě ɖɔ: “Mi bó yí siká tógbé e asi mitɔn lɛ́ɛ dó lɛ́ɛ, kpó éé vǐ mitɔn súnnu kpódó nyɔ̌nu kpó dó lɛ́ɛ kpó, bó bɛ́ yě wá nú mì.”

³Ée é ɖɔ mɔ̌ ɔ́, Izlayɛ́li ví lɛ́ɛ bǐ ɖe siká tógbé yětɔn lɛ́ɛ bǐ, bó bɛ́ nú Aalɔ́ɔn.

⁴ Bɔ é yí, bó sínsín yě, bó kɔn dó to mɛ, bó dó bló nyibúví ná. Énɛ́ ɔ́ gúdo ɔ́, yě jɛ xó sú jí ɖɔ: “Izlayɛ́li ví lɛ́ɛ e mi, vodún mǐtɔn e ɖe mǐ tɔ́n sín Ejípu ɔ́ ɖíe!”

⁵Ée Aalɔ́ɔn mɔ mɔ̌ ɔ́, é mɛ vɔ̌sákpe ɖokpó ɖó nyibúví ɔ́ nukɔn, bó ɖɔ: “Sɔ ɔ́, mǐ ná ɖu xwe dó kpa susu nú Mawu Mavɔmavɔ!”

⁶ Ayǐhɔ́ngbe tɔn ɔ́, Izlayɛ́li togun ɔ́ fɔ́n zǎn bó sá vɔ̌ e è nɔ dó zo ɔ́ kpódó kɔnɖókpɔ́ vɔ́ kpó ɖo vɔ̌sákpe ɔ́ jí, bɔ togun ɔ́ jínjɔ́n ayǐ bó ɖu nǔ, bó nu ahan; énɛ́ ɔ́ gúdo ɔ́, yě sí te bó j'awǎ.

⁷Hwe énɛ́ ɔ́ nu ɔ́, Mawu Mavɔmavɔ ɖɔ nú Mɔyízi ɖɔ: “Jɛ te din tlóló, ɖó togun e a ɖe tɔ́n sín Ejípu ɔ́, wa nǔ gblégblé.

⁸Yě yá wǔ lɛ́ kɔ sín ali e un ɖɔ yě ní gbɔn ɔ́ jí; yě sínsín siká bó dó bló nyibúví ná, bó jɛ kpo ɖo nukɔn tɔn, bó ɖe kɔ́ n'i, bó xwlé vɔ̌sánú i, bó ɖɔ: ‘Izlayɛ́li ví lɛ́ɛ e mi, vodún mǐtɔn e ɖe mǐ tɔ́n sín Ejípu ɔ́ ɖíe!’

⁹Un mɔ nǔ e wa nú togun ɔ́ nyí ɔ́; yě bǐ wɛ tlí tó.

¹⁰Din ɔ́, gbɔ nú má zé xomɛsin dó wa nǔ xá yě; un ná hu yě bǐ; amɔ̌, hwɛ ɔ́, un ná zé we dó bló akɔta ɖaxó ɖé ná.”

¹¹ Mɔyízi ka sa vo nú Mawu Mavɔmavɔ, Mawu tɔn ɖɔ ní fá xomɛ; é ɖɔ n'i ɖɔ: “Mawu Mavɔmavɔ, aniwú wɛ a nǎ zé xomɛsin towe dó wa nǔ xá togun towe e a zǎn hlɔ̌nhlɔ́n towe, lobo zán nǔwúkpíkpé towe dó ɖe e tɔ́n sín Ejípu ɔ́?

¹²Nú a blǒ gbɔn mɔ̌ ɔ́, Ejípunu lɛ́ɛ ná ɖɔ dǎ wɛ hwi dá Izlayɛ́li ví lɛ́ɛ wú, bó dó ɖe yě tɔ́n sín to émítɔn mɛ, bó ná hu yě kɔn nyi sókan mɛ, bó ná sú kún yětɔn dó sín ayǐkúngban jí. Mawu Mavɔmavɔ, fá xomɛ bó jó nǔ nyanya e a jlǒ ná wa xá togun towe ɔ́ dó.

¹³ Flín mɛsɛntɔ́ towe Ablaxámu, Izáki kpódó Jakɔ́bu kpó e a dó akpá ná ɖɔ émí ná bló bɔ kúnkan yětɔn lɛ́ɛ ná sukpɔ́ sunví ɖɔhun bɔ émí ná ná to e sín akpá émí dó ɔ́ kúnkan yětɔn lɛ́ɛ, bɔ é ná nyí yětɔn káká sɔ́yi é.”

¹⁴Ée Mɔyízi ɖɔ mɔ̌ ɔ́, Mawu Mavɔmavɔ sɔ́ wa nǔ nyanya e sín adǎn e é gblɔ́n ɔ́ xá togun tɔn ǎ.

¹⁵Énɛ́ ɔ́ gúdo ɔ́, Mɔyízi jɛ te sín só ɔ́ jí. Awǐnnyatɛ we lɛ́ɛ ɖo alɔ tɔn mɛ. Awǐnnyatɛ we énɛ́ lɛ́ɛ jí wɛ Mawu wlǎn sɛ́n tɔn lɛ́ɛ dó gǔdo nukɔn.

¹⁶Mawu wɛ wa awǐnnyatɛ énɛ́ lɛ́ɛ sín azɔ̌. É ɖésúnɔ wɛ zé alɔ tɔn dó wlán sɛ́n lɛ́ɛ d'é jí.

¹⁷Jozuwée se xó e sú wɛ togun ɔ́ ɖe ɔ́, bó ɖɔ nú Mɔyízi ɖɔ: “È ɖo ahwanfunfun sín xósúsú se wɛ ɖo fí e mǐ ɖó gɔnu ɖó é.”

¹⁸Bɔ Mɔyízi ɖɔ: “Éeǒ! Ényí ɖuɖéjí sín xósúsú wɛ ǎ. É ká nyí ayǐjijɛ sín xósúsú wɛ ǎ, lo ɔ́, awǎjijɛ sín xósúsú se wɛ un ɖe.”

¹⁹Ée yě sɛkpɔ́ fí e togun ɔ́ ɖó gɔnu ɖó ɔ́ tlóló ɔ́, Mɔyízi mɔ nyibúví ɔ́ sɛ́ dó, bó mɔ togun ɔ́ ɖo we ɖú wɛ. Ée Mɔyízi mɔ mɔ̌ ɔ́, xomɛ sin i káká, bɔ é bɛ́ awǐnnyatɛ e ɖo alɔ tɔn mɛ lɛ́ɛ nyi gbě, bɔ yě wá gba ɖo só ɔ́ kpá.

²⁰É zé nyibúví e yě bló ɔ́, bó dó zo, bó li éé kpo ɔ́ kpɔ́ɖɔ́kpɔ́ɖɔ́, bó fúnfún gbɔn sin nukún mɛ, bó ná Izlayɛ́li ví lɛ́ɛ bɔ yě nu.

²¹Énɛ́ ɔ́ gúdo ɔ́, Mɔyízi kanbyɔ́ Aalɔ́ɔn ɖɔ: “Ani wɛ togun ɔ́ wa nú we bɔ a jǒ e dó bɔ é hu hwɛ ɖaxó élɔ́?”

²²Bɔ Aalɔ́ɔn yí gbe n'i ɖɔ: “Gǎn ce, ma sin xomɛ ó; hwi ɖésúnɔ ɔ́, a tunwun ɖɔ togun élɔ́ ɔ́, nǔ nyanya wiwa wɛ nɔ yá alɔ n'i.

²³Yě ɖɔ nú mì ɖɔ: ‘Blǒ vodún ɖokpó nú mǐ, bónú é ná nɔ nukɔn nú mǐ, ɖó Mɔyízi ɔ́, nya énɛ́ ɔ́ e ɖe mǐ tɔ́n sín Ejípu ɔ́, mǐ tunwun nǔ e jɛ dó jǐ tɔn ɔ́ ǎ.’

²⁴Bɔ un ɖɔ nú yě ɖɔ mɛ e ɖó siká lɛ́ɛ ní bɛ́ wá, bɔ yě bɛ́ nú mì, bɔ un bɛ́ kɔn nyi myɔ mɛ bɔ é húzú nyibúví élɔ́.”

²⁵Mɔyízi mɔ ɖɔ Aalɔ́ɔn jó togun ɔ́ dó, bɔ é wa nǔ e jló e ɔ́, bɔ kɛntɔ́ yětɔn lɛ́ɛ ná dó mɔ tɛn bó ɖɔ slǎmɛ yě wú.

²⁶Énɛ́ ɔ́, é yi cí fí e yě ɖǒ gɔnu ɖó ɔ́ sín hɔnlinu, bó sú xó ɖɔ: “Mɛ e yí wǎn nú Mawu Mavɔmavɔ lɛ́ɛ ní wá gɔ̌n ce!” Énɛ́ ɔ́, mɛ e ɖo akɔta Levíi tɔn mɛ lɛ́ɛ wá kplé lɛ́ lɛ̌ dó e.

²⁷Bɔ é ɖɔ nú yě ɖɔ: “Nǔ e Mawu Mavɔmavɔ, Mawu Izlayɛ́li tɔn ɔ́ ɖɔ ɔ́ ɖíe: ‘Mɛ ɖokpó ɖokpó ní zé hwǐ tɔn. Mi gbɔn fí e togun ɔ́ ɖó gɔnu ɖó ɔ́ bǐ, sín hɔntogbó ɖě jí yi ɖěvo jí. Mi gbɔn ɔ́, mi ná nɔ́ lɛ́ vɔ́ gbɔn. Mɛ ɖokpó ɖokpó ní hu nɔví tɔn, xɔ́ntɔn tɔn, mɛ e kpó é kpó ɖo kpɔ́ é.’ ”

²⁸Levíi ví lɛ́ɛ bló nǔ e Mɔyízi ɖɔ ɔ́, bɔ gbɛtɔ́ afɔwó-afatɔ́n (3.000) mɔ̌ kú ɖo togun ɔ́ mɛ gbe énɛ́ ɔ́ gbe.

²⁹Bɔ Mɔyízi ɖɔ: “Égbé din ɔ́, mi zé miɖée jó nú Mawu Mavɔmavɔ, ɖó mi xo kpɔ́n có bó hu nɔví mitɔn ɖésú abǐ xɔ́ntɔn mitɔn lɛ́ɛ, abǐ mɛ e kpó mi kpó ɖo kpɔ́ é ǎ. Mawu Mavɔmavɔ ní bó kɔn nyɔ̌ná tɔn dó mi jí égbé.”

³⁰Ayǐhɔ́ngbe tɔn ɔ́, Mɔyízi ɖɔ nú togun ɔ́ ɖɔ: “Hwɛ ɖaxó wɛ mi hu. Din ɔ́, un ná lɛ́ kɔ yi Mawu Mavɔmavɔ gɔ́n ɖo só ɔ́ jí; afɔ nyɔ́ ɔ́, é sixú yí gbe nú vosisa ce lɛ́ɛ, bó sɔ́ hwɛ mitɔn lɛ́ɛ kɛ mi.”

³¹Énɛ́ ɔ́, Mɔyízi lɛ́ kɔ yi Mawu Mavɔmavɔ gɔ́n, bó ɖɔ n'i ɖɔ: “Mawu Mavɔmavɔ, togun élɔ́ hu hwɛ ɖaxó. Yě zé siká dó bló vodún ɖokpó ná.

³² Din ɔ́, kɛnklɛ́n sɔ́ hwɛ yětɔn kɛ yě, é má ká nyí mɔ̌ ǎ hǔn, bo súnsún nyǐkɔ ce e a wlǎn dó gbɛwéma mɛ ɔ́ síin.”

³³Lo ɔ́, Mawu Mavɔmavɔ ɖɔ nú Mɔyízi ɖɔ: “Mɛ e hu hwɛ dó mì ɔ́ sín nyǐkɔ jɛ́n un ná súnsún sín wěma ce mɛ.

³⁴Hǔn bo yi, bó kplá togun ɔ́ yi fí e un ɖɔ nú we ɔ́; wɛnsagun ce ka ná nɔ nukɔn towe. Amɔ̌, gbe e gbe un ná ba hlɔn ɔ́, un ná dɔn tó nú yě, ɖó hwɛ e yě hu ɔ́ wú.”

³⁵Mawu Mavɔmavɔ dɔn tó nú togun ɔ́, ɖó togun ɔ́ wɛ ɖɔ nú Aalɔ́ɔn ɖɔ ní bló bǒcyɔ nyibúví tɔn ɖokpó nú émí.