Read fon Tíntɔ́n 33 Bible Online

Tíntɔ́n 33 - fon bible

Tíntɔ́n 33

¹ Mawu Mavɔmavɔ ɖe gbe nú Mɔyízi ɖɔ: “Jɛ ali, gosín fí, hwi kpódó togun e a ɖe tɔ́n sín Ejípu ɔ́ kpó. Jɛ ali bó yi to e sín akpá un dó nú Ablaxámu, Izáki kpódó Jakɔ́bu kpó ɖɔ un ná ná kúnkan yětɔn lɛ́ɛ ɔ́ mɛ.

²Un ná sɛ́ wɛnsagun ce dó, bɔ é ná nɔ nukɔn nú mi, bó ná nya Kanáa ví lɛ́ɛ, Amɔliti lɛ́ɛ, Hitíti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó.

³Mi ɖidó to énɛ́ ɔ́ mɛ; nyibúnɔ́sin kpódó wǐin kpó nɔ́ sa tɔ ɖ'é mɛ. Lo ɔ́, un sɔ́ ná nɔ tɛ́ntin mitɔn ǎ, un táá hu mi ɖo alixo, ɖó mi tlí tó dín.”

⁴Hwenu e togun ɔ́ se adǎn énɛ́ ɔ́ e Mawu Mavɔmavɔ gblɔ́n n'i ɔ́, wǔ kú i, káká bɔ mɛ ɖěbǔ sɔ́ ba acɔ́ ǎ.

⁵Nǔgbó ɔ́, Mawu Mavɔmavɔ kó ɖɔ nú Mɔyízi ɖɔ ní ɖɔ nú Izlayɛ́li ví lɛ́ɛ ɖɔ: “Mi tlí tó, nú un nɔ tɛ́ntin mitɔn kpɛví ɖé ɔ́, un ná ɖibla hu mi. Hǔn, mi bo ɖe nǔ e mi dó ba acɔ́ ná lɛ́ɛ bǐ nyi ayǐ. Énɛ́ ɔ́ gúdo ɔ́, un ná tunwun lě e nǎ wa nǔ mitɔn gbɔn é.”

⁶Énɛ́ ɔ́, bɛ́ sín Holɛ́bu só ɔ́ kɔn ɔ́, Izlayɛ́li ví lɛ́ɛ ɖe nǔ e yě dǒ, bó dó ba acɔ́ ná lɛ́ɛ bǐ.

⁷Hwenu e Izlayɛ́li ví lɛ́ɛ ɖo goxɔ e mɛ yě ná nɔ lɛ́ɛ bló wɛ ɔ́, Mɔyízi zé goxɔ tɔn, bó tɔ́n sín fí e yě ɖe ɔ́ bó kɛ́, bɔ é lín dó fí ɔ́ zaan. É nɔ́ ylɔ́ goxɔ ɔ́ ɖɔ goxɔ e mɛ Mawu Mavɔmavɔ ná nɔ́ kpé togun ɔ́ ɖe é. Mɛ e jló ná kan nǔ byɔ́ Mawu Mavɔmavɔ lɛ́ɛ bǐ nɔ́ tɔ́n sín fí e yě ɖǒ gɔnu ɖó ɔ́, bó nɔ́ ɖidó goxɔ ɔ́ kɔn.

⁸Nú Mɔyízi xwe goxɔ ɔ́ kɔn ɔ́, togun ɔ́ bǐ nɔ́ sí te, bɔ mɛ ɖokpó ɖokpó nɔ́ nɔ te goxɔ é ɖésúnɔ tɔn sín alihɛ́nnu, bó nɔ́ ɖo Mɔyízi kpɔ́n sɛ́ dó wɛ káká bɔ é nɔ́ byɔ́ goxɔ e mɛ Mawu Mavɔmavɔ ná nɔ́ kpé togun ɔ́ ɖe ɔ́ mɛ.

⁹Mɔyízi byɔ́ goxɔ ɔ́ mɛ ɔ́, akpɔ́kpɔ́ nɔ́ jɛ te wá goxɔ ɔ́ lihɛ́nnu, bɔ Mawu Mavɔmavɔ nɔ́ ɖo xó ɖɔ xá Mɔyízi wɛ.

¹⁰Nú Izlayɛ́li ví lɛ́ɛ mɔ akpɔ́kpɔ́ ɔ́ lě tlóló ɔ́, yě mɛ ɖokpó ɖokpó nɔ́ sí te bó nɔ́ ɖe kɔ́ kpódó sísí kpó, ɖo goxɔ é ɖésúnɔ tɔn sín alihɛ́nnu.

¹¹Mawu Mavɔmavɔ kpó Mɔyízi kpó nɔ́ kpé nu bó nɔ́ ɖɔ xó, lě e xɔ́ntɔn xɔ́ntɔn nɔ́ kpé nu bó nɔ́ ɖɔ xó ɔ́ ɖɔhun. Énɛ́ ɔ́ gúdo ɔ́, Mɔyízi nɔ lɛ́ kɔ wá fí e yě ɖǒ gɔnu ɖó ɔ́; lo ɔ́, azɔ̌ví tɔn Jozuwée Nuni ví ɔ́ cí goxɔ e mɛ Mawu Mavɔmavɔ nɔ wá kpé togun ɔ́ ɖe ɔ́ mɛ.

¹²Mɔyízi ɖɔ nú Mawu Mavɔmavɔ ɖɔ: “Éɖíe, Mawu Mavɔmavɔ! A ɖe gbe nú mì ɖɔ má kplá togun élɔ́ hɛn yi; a ka ɖɔ mɛ e a jlǒ ná sɛ́ dó bɔ é ná dó alɔ mì ɔ́ nú mì ǎ. Có a ɖɔ nú mì ɖɔ émí tunwun mì ganjí bó ná fɛ́nú mì.

¹³Din ɔ́, a nǎ fɛ́nú towe mì nǔgbó hǔn, blǒ bónú má tunwun linlin towe lɛ́ɛ; énɛ́ ɔ́, un ná tunwun we nǔgbó nǔgbó, bɔ a nǎ lɛ́ ná fɛ́nú towe mì yi fó. Ma wɔn ɖɔ émítɔn wɛ togun élɔ́ nyí ó.”

¹⁴Mawu Mavɔmavɔ yí gbe nú Mɔyízi ɖɔ: “Nyɛ ɖésúnɔ kpódó hwi kpó wɛ xweyǐgbe, ado ní má hu we ó.”

¹⁵Mɔyízi ɖɔ nú Mawu Mavɔmavɔ ɖɔ: “Nú hwi ɖésúnɔ kpó mǐ kpó má ná zɔn yi ǎ hǔn, ma ɖɔ nú mǐ ɖɔ mǐ nǐ yi ó.

¹⁶Đó nú hwi ɖésú kpó mǐ kpó má zɔn ǎ ɔ́, nɛ̌ wɛ è ka ná tunwun ɖɔ a nǎ fɛ́nú towe nyɛ kpó togun towe kpó gbɔn? Nú a ɖo kpɔ́ xá mǐ ɔ́ wɛ ná ɖe xlɛ́ ɖɔ mǐ gbɔn vo nú togun ɖě lɛ́ɛ e ɖo ayǐkúngban jí lɛ́ɛ.”

¹⁷Mawu Mavɔmavɔ ka yí gbe nú Mɔyízi ɖɔ: “Un ná bló nǔ e a ɖɔ din é lɔ; ɖó un ná fɛ́nú ce we, ɖó hwi wɛ nyí mɛ e un tunwun tawun é.”

¹⁸Énɛ́ ɔ́, Mɔyízi ɖɔ nú Mawu Mavɔmavɔ ɖɔ: “Bo ɖe susu towe xlɛ́ mì!”

¹⁹ Bɔ Mawu Mavɔmavɔ ɖɔ n'i ɖɔ: “Un ná ɖe xomɛnyínyɔ́ ce bǐ xlɛ́ ɖo nukɔn towe, bó ná jlá nyɛ Mawu Mavɔmavɔ sín nyǐkɔ ɖo nukɔn towe. Un nɔ ná fɛ́nú ce mɛ e jló mì ɔ́, bó nɔ́ kú nǔbláwǔ nú mɛ e jló mì ɔ́.”

²⁰É lɛ́ ɖɔ nú Mɔyízi ɖɔ: “Nǔ ɖo mɔ̌ có a sixú mɔ nukún ce mɛ ǎ, ɖó mɛ ɖěbǔ nɔ́ mɔ nukún ce mɛ bó nɔ́ gán ǎ.

²¹Tɛn ɖokpó ɖíe ɖo akpá ce fí e; awǐnnya wɛ, bɔ a nǎ nɔ jí.

²²Hwenu e un ná ɖo susu ce mɛ bó ɖo dǐndín wɛ ɔ́, un ná zé we hwlá dó awǐnnya ɔ́ sín nu ɖé mɛ, bó ná bú alɔ dó we káká bó ná dín.

²³Hwenu e un ná ɖe alɔ ce síin ɔ́, a nǎ mɔ gǔdo ce sɛ́ dó; a nǎ mɔ nukún ce mɛ ǎ.”