Read fon Tíntɔ́n 35 Bible Online

Tíntɔ́n 35 - fon bible

Tíntɔ́n 35

¹Mɔyízi kplé Izlayɛ́li ví lɛ́ɛ bǐ, bó ɖɔ nú yě ɖɔ: “Nǔ e Mawu Mavɔmavɔ ɖɔ mi ɖó ná nɔ́ wa lɛ́ɛ ɖíe:

² Azǎn ayizɛ́n wɛ è nǎ nɔ́ dó wa azɔ̌ ná, amɔ̌, azǎn tɛ́nwegɔ́ ɔ́ ná nyí Sabáa, gbɔjɛzán ɔ́, bɔ mi ɖó ná zé ɖó vo nú Mawu Mavɔmavɔ. Mɛ ɖé wa azɔ̌ gbe énɛ́ gbe ɔ́, è nǎ hu mɛ ɔ́.

³Mi ná ɖa nǔ vɔ́vɔ́ ɖo gbɔjɛzán ɔ́ gbe ɖo fí e mi ná ɖe lɛ́ɛ ɖěbǔ ǎ.”

⁴Mɔyízi lɛ́ ɖɔ nú Izlayɛ́li ví lɛ́ɛ bǐ ɖɔ: “Nǔ e Mawu Mavɔmavɔ ɖɔ mi ɖó ná nɔ́ wa lɛ́ɛ ɖíe:

⁵Nǔ e mi ɖó lɛ́ɛ ɔ́, mi ná sɔ́ ɖě, bó ná ná Mawu Mavɔmavɔ. Mɛ e ɖó jlǒ ɖagbe, bó ná bló lɛ́ɛ ɔ́, yě ná hɛn nǔ alɔkpa alɔkpa wá nú Mawu Mavɔmavɔ. Yě ná hɛn siká, kpatágan, ganvɔ.

⁶Avɔ kwlésinnɔ, avɔ vɔvɔ, avɔ vɔvɔ cɛ́cɛ́, lɛ̌ɛnkanvɔ ɖagbe ɖagbe kpódó gbɔ̌fúnvɔ kpó.

⁷Yě ná hɛn agbonyú e è sá nǔ vɔvɔ dó é, anyǔ tlitli lɛ́ɛ kpó kasyatín kpó.

⁸Ami e è nǎ dó zogbɛ́n lɛ́ɛ mɛ é, atínkɛn wǎnɖagbenɔ e è nǎ dǒ bló ami mímɛ́ wǎnɖagbenɔ e è nǎ sá nú mɛ, dó ɖe mɛ ɖó vo nú mì é, bó ná lɛ́ hɛn zǎlínkpɔ́n.

⁹Yě ná lɛ́ hɛn awǐnnya ɖagbe ɖagbe e è nɔ ylɔ́ ɖɔ Onísi ɔ́, kpódó awǐnnya ɖěvo lɛ́ɛ kpó, bɔ è nǎ to ɖó efódu ɔ́ kpódó akɔ́ntakpo ɔ́ kpó wú.

¹⁰Alɔnuzɔ́watɔ́ e ɖo mi mɛ, bɔ alɔnu yětɔn mɛ́ ganjí lɛ́ɛ bǐ ná kplé, bó ná bló nǔ e Mawu Mavɔmavɔ ɖɔ è nǐ bló lɛ́ɛ bǐ.

¹¹Nǔ élɔ́ lɛ́ɛ wɛ nyí Mawu xwé ɔ́: goxɔ ɔ́, avɔ e è nǎ cyɔ́n dó lɛ́ɛ, nǔhɛnnú lɛ́ɛ, xwlɛ lɛ́ɛ, wɛ̌n lɛ́ɛ, dotín lɛ́ɛ kpódó afɔ lɛ́ɛ kpó.

¹²Akɔjijɛgbá ɔ́, kpo tɔn lɛ́ɛ, nusú tɔn kpó xɔmɛgbovɔ ɔ́ kpó.

¹³Távo ɔ́, kpo tɔn lɛ́ɛ, nǔ e è nɔ zán ɖo távo ɔ́ jí lɛ́ɛ bǐ kpódó wɔ̌xúxú e è xwlé Mawu lɛ́ɛ kpó.

¹⁴Zogbɛ́nhɛnnú ɔ́ kpó nǔ e è nɔ bló myɔ ɖó ná lɛ́ɛ kpó, zogbɛ́n lɛ́ɛ kpó ami e è nǎ dó tá myɔ ná ɔ́ kpó.

¹⁵Vɔ̌sákpe e jí è nɔ dó zǎlínkpɔ́n zo ɖe é, kpo tɔn lɛ́ɛ, ami e è nɔ sá nú mɛ dó ɖe mɛ ɖó vo nú mì é, célu wǎnɖagbenɔ kpó avɔ e è dǒ ɖó goxɔ ɔ́ sín hɔnlinu é kpó.

¹⁶Vɔ̌sákpe e jí è nɔ dó vɔ̌ zo ɖe é, kpó ganja tɔn e è zě ganvɔ dó bló ná é kpó, gankpo tɔn lɛ́ɛ kpódó nǔ e è nɔ zán ɖo vɔ̌sákpe ɔ́ kɔn lɛ́ɛ bǐ kpó, basya ɔ́ kpó nǔ e jí é nɔ́ nɔ ɔ́ kpó.

¹⁷Avɔ e è ɖe nǔ d'é mɛ bɔ è dǒ xá xwé ɔ́ lɛ́ɛ kpó dotín yětɔn lɛ́ɛ kpó, afɔ yětɔn lɛ́ɛ kpó avɔ e è dǒ ɖó xwé ɔ́ sín hɔntogbó nu ɔ́ kpó.

¹⁸Goxɔ ɔ́ sín só lɛ́ɛ kpó ée è xá xwé ɔ́ ná lɛ́ɛ kpó, kpódó kan yětɔn lɛ́ɛ kpó,

¹⁹kpó azɔ̌wu e nyí vɔ̌sánú-xwlémawutɔ́ Aalɔ́ɔn tɔn lɛ́ɛ kpó, kpódó awu e nyí Aalɔ́ɔn sín vǐ súnnu lɛ́ɛ tɔn bɔ yě nɔ́ dó dó wa sinsɛnzɔ́ yětɔn ná lɛ́ɛ kpó.”

²⁰Ée Mɔyízi ɖɔ xó fó ɔ́, Izlayɛ́li ví lɛ́ɛ bǐ gosín gɔ̌n tɔn.

²¹Énɛ́ ɔ́ gúdo ɔ́, Izlayɛ́li ví e ayi ɖɔ xó ná, bɔ yě ɖǒ jlǒ ɖagbe lɛ́ɛ bǐ wá bó hɛn nǔ wá nú Mawu Mavɔmavɔ nú è nǎ dó bló goxɔ e mɛ Mawu nǎ nɔ́ wá kpé yě ɖe ɔ́ ná, kpó nǔ e è nǎ nɔ́ dó sɛn ɛ ná lɛ́ɛ kpó, kpódó nǔ e è nǎ dǒ tɔ vɔ̌sánú-xwlémawutɔ́ sín awu lɛ́ɛ ná lɛ́ɛ kpó.

²²Súnnu kpó nyɔ̌nu kpó wɛ wá; yě mɛ e ɖó jlǒ ɖagbe lɛ́ɛ bǐ wɛ hɛn nǔ e è nɔ sɔ́ ɖó awu wú lɛ́ɛ, tógbé lɛ́ɛ, alɔgan lɛ́ɛ kpódó kɔjɛ́ lɛ́ɛ kpó wá nú Mawu Mavɔmavɔ. Nǔ é nɛ́ lɛ́ɛ bǐ wɛ nyí sikánú. Mɛ ɖokpó ɖokpó nɔ́ sɔ́ jó lě e è nɔ bló gbɔn bó nɔ́ sɔ́ nǔ jó nú Mawu Mavɔmavɔ é.

²³Mɛ e ɖó avɔ kwlésinnɔ, avɔ vɔvɔ, avɔ vɔvɔ cɛ́cɛ́, lɛ̌ɛnkanvɔ ɖagbe ɖagbe, gbɔ̌fúnvɔ, agbonyú e è sá nǔ vɔvɔ dó lɛ́ɛ kpódó anyǔ tlitli lɛ́ɛ kpó bǐ hɛn wá.

²⁴Mɛ e zé kpatágan abǐ ganvɔ ɖó vo nú Mawu Mavɔmavɔ lɛ́ɛ bǐ bɛ́ wá. Mɛ e ɖó kasyatín bɔ è hɛn ɔ́, è nǎ zán nú xɔzɔ́ ɔ́ lɛ́ɛ bɛ́ wá.

²⁵Nyɔ̌nu e alɔnu yětɔn mɛ́ ganjí lɛ́ɛ bǐ hɛn avɔ e yě lɔn lɛ́ɛ wá: yě hɛn avɔ kwlésinnɔ, avɔ vɔvɔ, avɔ vɔvɔ cɛ́cɛ́, kpó lɛ̌ɛnkanvɔ ɖagbe ɖagbe kpó.

²⁶Nyɔ̌nu ɖěvo e alɔnu yětɔn mɛ́ ganjí bɔ yě tunwun acɔ́ ɖó jlǒ ɖagbe, bó nyɔ́ avɔ lɔn ganjí lɛ́ɛ bǐ lɔn gbɔ̌fúnvɔ.

²⁷Gǎn e ɖo togun ɔ́ mɛ lɛ́ɛ hɛn awǐnnya ɖagbe ɖagbe e è nɔ ylɔ́ ɖɔ Onísi ɔ́ lɛ́ɛ, kpódó awǐnnya ɖagbe ɖagbe ɖěvo lɛ́ɛ kpó wá nú è nǎ to ɖó efódu ɔ́ kpó akɔ́ntakpo ɔ́ kpó wú.

²⁸Yě hɛn atínkɛn wǎnɖagbenɔ lɛ́ɛ kpó ami kpó, bɔ è nǎ dǒ bló ami e è nɔ dó zogbɛ́n mɛ é kpó ami e è nɔ sá nú mɛ dó ɖe mɛ ɖó vo nú mì é kpó zǎlínkpɔ́n kpó.

²⁹Izlayɛ́li ví súnnu kpó nyɔ̌nu kpó e ɖó jlǒ ɖagbe bó ná jɔ fún dó azɔ̌ e Mawu Mavɔmavɔ zɔ́n gbɔn Mɔyízi jí lɛ́ɛ mɛ lɛ́ɛ bǐ hɛn nǔ wá nú Mawu Mavɔmavɔ kpó yě ɖésúnɔ sín jlǒ kpó.

³⁰Mɔyízi ɖɔ nú Izlayɛ́li ví lɛ́ɛ ɖɔ: “Mi ní tunwun ɖɔ Mawu Mavɔmavɔ sɔ́ mɛ ɖé nú azɔ̌ énɛ́ ɔ́: Besalɛli, Wulíi ví, Húu vívú ɔ́ wɛ; akɔta Judáa tɔn ɔ́ mɛ wɛ é jɔ ɖe.

³¹É ná ɛ Yɛ tɔn bɔ é gɔ́ ayi tɔn mɛ, bɔ é bí bó ná mɔ nukúnnú jɛ nǔ mɛ titewungbe. É ná tunwun azɔ̌ xwítíxwítí alɔkpa bǐ.

³²Mawu Mavɔmavɔ bló bɔ é nyɔ́ tito lɛ́ɛ bló, é nyɔ́ siká sín azɔ̌ wa, bó nyɔ́ kpatágan kpó ganvɔ kpó sín azɔ̌ wa;

³³é nyɔ́ awǐnnya ɖagbe ɖagbe lɛ́ɛ kpa, bó nyɔ́ to dó nǔ mɛ; é nyɔ́ atín kpa; nú mǐ nǎ ɖɔ ɔ́, Mawu Mavɔmavɔ bló bɔ é nyɔ́ nǔ bǐ wa.

³⁴Besalɛli nɛ́ ɔ́ wɛ Mawu Mavɔmavɔ ná Yɛ e nɔ kplɔ́n nǔ mɛ é; é ná Yɛ ɖokpó énɛ́ ɔ́ Oxoliyavu; Oxoliyavu ɔ́ Axisamaki ví wɛ. Akɔta Dan tɔn ɔ́ mɛ wɛ é jɔ ɖe.

³⁵Ée Mawu Mavɔmavɔ ná nǔnywɛ́ yě bɔ é gɔ́ ayi yětɔn mɛ mɔ̌ ɔ́, yě ná nɔ wa azɔ̌ alɔkpa alɔkpa lɛ́ɛ bǐ: yě ná nɔ kpa awǐnnya ɖagbe ɖagbe lɛ́ɛ, yě ná nɔ ɖe nǔ dó avɔ mɛ, yě ná nɔ́ kó avɔ kwlésinnɔ, avɔ vɔvɔ, avɔ vɔvɔ cɛ́cɛ́; yě ná nɔ kó lɛ̌ɛnkanvɔ, yě ná nɔ́ lɔn avɔ, bó ná nɔ́ wa azɔ̌ tɛnmɛ tɛnmɛ lɛ́ɛ abǐ yě ná nɔ́ dó nǔ lɛ́ɛ wá.