Read fon Tíntɔ́n 36 Bible Online

Tíntɔ́n 36 - fon bible

Tíntɔ́n 36

¹“Mawu Mavɔmavɔ ná nǔnywɛ́ kpó nukúnnú-mɔjɛnǔmɛ kpó Besalɛli, Oxoliyavu kpódó súnnu e alɔnu yětɔn mɛ́ ganjí lɛ́ɛ kpó. É ná yě, bɔ yě ná bló nǔ e è nǎ zǎn nú Mawu xwé ɔ́ lɛ́ɛ bǐ, lě e Mawu Mavɔmavɔ ɔ́ zɔ́n gbɔn é.”

²Mɔyízi ylɔ́ Besalɛli kpó Oxoliyavu kpó, bó ylɔ́ súnnu ɖě lɛ́ɛ e alɔnu yětɔn mɛ́ ganjí bɔ Mawu Mavɔmavɔ kó sɔ́ nukúnnú-mɔjɛnǔmɛ dó ayi mɛ ná bɔ yě ɖǒ jlǒ ɖagbe bo ná wa azɔ̌ ɔ́ lɛ́ɛ bǐ, bɔ yě wá azɔ̌ wa gbé.

³Ée é ylɔ́ yě ɔ́, é bɛ́ nǔ e Izlayɛ́li ví lɛ́ɛ hɛn wá bɔ è nǎ gbá Mawu xwé ɔ́ ná lɛ́ɛ bǐ nú yě, bɔ yě bɛ̌ azɔ̌. Zǎnzǎn tɛgbɛ ɔ́, mɛ lɛ́ɛ nɔ́ lɛ́ hɛn nǔ wá nú Mɔyízi kpó yě ɖésúnɔ sín jlǒ kpó.

⁴Énɛ́ ɔ́, azɔ̌watɔ́ e ɖo Mawu xwé ɔ́ sín azɔ̌ wa lɛ́ɛ bǐ ɖǒ azɔ̌ yětɔn lɛ́ɛ te, bó wá Mɔyízi gɔ́n,

⁵bó ɖɔ n'i ɖɔ: “Nǔ e hɛn wá wɛ togun ɔ́ ɖe ɔ́ sukpɔ́ hú nǔ e è ɖo ná mɔ, bó dó wa azɔ̌ e Mawu Mavɔmavɔ zɔ́n lɛ́ɛ é.”

⁶Énɛ́ ɔ́, Mɔyízi ɖɔ bɔ è ɖǒ gan gbɔn fí e yě ɖǒ gɔnu ɖó ɔ́ ɖɔ mɛ ɖěbǔ, súnnu abǐ nyɔ̌nu ní má sɔ́ bló nǔɖé bó hɛn wá nú Mawu xwé ɔ́ sín azɔ̌ ɔ́ ó. Bɔ mɛɖé sɔ́ hɛn nǔɖé wá ǎ.

⁷Đó azɔ̌ e ná wa wɛ è ɖe lɛ́ɛ ɔ́, nǔ e mɛ lɛ́ɛ ko hɛn wá lɛ́ɛ kpé kpo.

⁸Avɔlɔntɔ́ e alɔnu yětɔn mɛ́ ganjí lɛ́ɛ zé lɛ̌ɛnkanvɔ xwɛ gaga wǒ dó bló goxɔ ɔ́ ná. Avɔxwɛ lɛ́ɛ ɔ́, kan didɛ kwlésinnɔ vɔvɔ kpó vɔvɔ cɛ́cɛ́ kpó wɛ avɔlɔntɔ́ lɛ́ɛ dó lɔn ná, bó ɖe wɛnsagun susunɔ lɛ́ɛ gbɔn mɛ, dó ba acɔ́ ná.

⁹Avɔxwɛ lɛ́ɛ bǐ wɛ nyí nǔ ɖokpó ɔ́: ga yětɔn nyí mɛ̌tlu wɛ̌nɛ, bɔ gblǒ yětɔn nyí mɛ̌tlu we.

¹⁰È cá avɔxwɛ lɛ́ɛ atɔ́ɔ́n atɔ́ɔ́n ɖó kpɔ́.

¹¹Avɔxwɛ atɔ́ɔ́n nukɔntɔn e è cá ɖó kpɔ́ lɛ́ɛ ɔ́, è ɖǒ kan kwlésinnɔ gbɔn tó nú avɔxwɛ e gbɔn gúdo ɔ́, bó lɛ́ ɖó gbɔn tó nú avɔxwɛ e ɖo nukɔn nú atɔ́ɔ́n wegɔ́ ɔ́ e è cá ɖó kpɔ́ é.

¹²É bló kan kanɖé wǒ (50) gbɔn cícá nukɔntɔn ɔ́ tó, bó bló kanɖé wǒ (50) gbɔn wegɔ́ ɔ́ tó. Kan énɛ́ lɛ́ɛ ɖě kpé nu xá ɖě.

¹³È zě siká dó bló nǔhɛnnú kanɖé wǒ (50) ná, bó dó hɛn avɔ lɛ́ɛ ɖě dó ɖě wǔ, bó bú dó goxɔ ɔ́ bǐ; énɛ́ ɔ́ goxɔ ɔ́ nɔ bǔ.

¹⁴Mɔ ɖokpó ɔ́, é zé gbɔ̌fún dó lɔn avɔxwɛ gaga wǒ-ɖokpó ná, bó cyɔ́n goxɔ.

¹⁵Avɔxwɛ wǒ-ɖokpó lɛ́ɛ bǐ wɛ ɖó jlɛ̌ ɖokpó ɔ́: ga yětɔn nyí mɛ̌tlu afɔtɔn, bɔ gblǒ yětɔn nyí mɛ̌tlu we.

¹⁶È cá avɔxwɛ énɛ́ lɛ́ɛ atɔ́ɔ́n ɖó kpɔ́, bó cá ayizɛ́n e kpo lɛ́ɛ ɖó kpɔ́.

¹⁷È dǒ kan kanɖé wǒ (50) gbɔn tó nú avɔxwɛ e ɖo tó nú avɔxwɛ atɔ́ɔ́n nukɔntɔn e è cá ɖó kpɔ́ é, bó dó kan kanɖé wǒ (50) gbɔn tó nú avɔxwɛ ayizɛ́n ɖě lɛ́ɛ e è cá ɖó kpɔ́ é.

¹⁸Mɔ̌ ɖokpó ɔ́, è zě ganvɔ dó bló nǔhɛnnú kanɖé wǒ (50) ná, bó dó hɛn kan lɛ́ɛ bónú goxɔ ɔ́ bǐ ná nɔ bǔ.

¹⁹Ée è blǒ fó ɔ́, è zě agbonyú e è sá nǔ vɔvɔ dó ɔ́ bó cyɔ́n goxɔ ɔ́, bó zé anyǔ tlitli bó bú dó.

²⁰È zě kasyatín dó bló xwlɛ ná, bó tun te lɛ́ lɛ̌ dó goxɔ ɔ́, dǒ ɖɔhun.

²¹Xwlɛ lɛ́ɛ ɖokpó ɖokpó sín ga nyí mɛ̌tlu atɔ́ɔ́n bɔ gblǒ tɔn nyí mɛ̌tlu ɖokpó é hwe ɛnɛvlɔ́ɖó.

²²È kpa sóví we we dó xwlɛ ɖokpó ɖokpó glɔ́, bɔ sóví lɛ́ɛ jlɔ́ ganjí. Mɔ̌ wɛ è blǒ gbɔn nú xwlɛ lɛ́ɛ bǐ.

²³Énɛ́ ɔ́, è blǒ xwlɛ ko nú goxɔ ɔ́ ɖo afɔligbé.

²⁴È zě kpatágan dó bló afɔ kanɖé (40) ná, bó bɛ́ dó xwlɛ ko lɛ́ɛ glɔ́; we wɛ é dó xwlɛ ɖokpó ɖokpó glɔ́, bɔ é sɔgbe xá nabí e è kpa dó xwlɛ lɛ́ɛ glɔ́ é.

²⁵Mɔ̌ ɖokpó ɔ́, è blǒ xwlɛ ko nú goxɔ ɔ́ ɖo taligbé.

²⁶Bó zé kpatágan dó bló afɔ yětɔn kanɖé (40) lɛ́ɛ ná, bó xwe we we dó xwlɛ ɖokpó ɖokpó glɔ́.

²⁷È blǒ dotín ayizɛ́n nú goxɔ ɔ́ ɖo gǔdo, ɖo gbadahwe jí.

²⁸È blǒ xwlɛ we gɔ́ ná nú goxɔ ɔ́ sín zwe we lɛ́ɛ ɖo gǔdo.

²⁹Xwlɛ we énɛ́ lɛ́ɛ ɖó xwlɛ we we, bɔ è cá xwlɛ lɛ́ɛ ɖě bɔ dó ɖě wú sín do káká yi aga. Mɔ̌ wɛ è blǒ gbɔn nú xwlɛ e ɖo goxɔ ɔ́ sín zwe we lɛ́ɛ mɛ é.

³⁰Hǔn xwlɛ lɛ́ɛ bǐ blǒ tántɔn kpó afɔ yětɔn afɔtɔn-nukún-ɖokpó kpó. Afɔ lɛ́ɛ ɔ́, kpatágan wɛ è dǒ bló, bɔ we we ɖo xwlɛ ɖokpó ɖokpó glɔ́.

³¹Énɛ́ ɔ́ gúdo ɔ́, è zě kasyakpo gaga atɔ́ɔ́n dó blá wɛ̌n dó xwlɛ lɛ́ɛ wú, ɖo goxɔ ɔ́ sín akpáxwé ɖokpó.

³²Mɔ̌ ɖokpó ɔ́, è zě kpo gaga atɔ́ɔ́n dó blá wɛ̌n ɖo goxɔ ɔ́ sín akpáxwé wegɔ́ ɔ́, bɔ atɔ́ɔ́n blá ɖo goxɔ ɔ́ gǔdo ɖo gbadahwe jí.

³³Kpo gaga e è blǎ wɛ̌n ná ɖo tɛ́ntin ɔ́ gosín tó ɖě jí yi tó ɖě jí.

³⁴È kɔn siká dó xwlɛ lɛ́ɛ, bó zé siká dó bló gan tobotobo e mɛ kpo gaga e è dǒ blá wɛ̌n ná lɛ́ɛ gbɔn lɛ́ɛ ná, bó kɔn siká dó kpo gaga nɛ́ lɛ́ɛ.

³⁵È zě lɛ̌ɛnkanvɔ e dɛ kan ɔ́ dó bló xɔmɛgbovɔ ɖokpó ná, bɔ é ɖó hwɛkan kwlésinnɔ vɔvɔ kpó vɔvɔ cɛ́cɛ́ kpó. Avɔlɔntɔ́ e alɔnu yětɔn mɛ́ ganjí lɛ́ɛ ɖe wɛnsagun susunɔ lɛ́ɛ d'é mɛ dó ba acɔ́ ná.

³⁶È sin lɛ̌ɛnkanvɔ ɔ́ dó dotín kasya tɔn ɛnɛ wú; è kɔn siká dó dotín lɛ́ɛ, siká klɔcée lɛ́ɛ ɖo dotín lɛ́ɛ wú, bó jínjɔ́n kpatágan sín afɔ ɖokpó ɖokpó jí.

³⁷È blǒ avɔ ɖokpó, bó dó ɖó goxɔ ɔ́ sín ali nu, bɔ é ɖó hwɛkan kwlésinnɔ, vɔvɔ kpó vɔvɔ cɛ́cɛ́ kpó. Lɛ̌ɛnkanvɔ e dɛ kan ɔ́ wɛ è dǒ bló ná. Mɛ e nɔ kó avɔ lɛ́ɛ wɛ ka kó ganjí.

³⁸È blǒ dotín atɔ́ɔ́n n'i kpó klɔcée yětɔn lɛ́ɛ kpó, bó kɔn siká dó ata yětɔn lɛ́ɛ kpó gankpo yětɔn lɛ́ɛ kpó. Ganvɔ wɛ è sɔ́ dó bló afɔ atɔ́ɔ́n e jí yě jínjɔ́n lɛ́ɛ ná.