Read fon Tíntɔ́n 38 Bible Online

Tíntɔ́n 38 - fon bible

Tíntɔ́n 38

¹Besalɛli zé kasyatín dó bló vɔ̌sákpe ná. Akpáxwé tɔn lɛ́ɛ bǐ ɖǒ jlɛ̌ ɖokpó ɔ́. Akpáxwé ɖokpó ɖokpó sín ga nyí mɛ̌tlu we adaɖé, jǐ yiyi tɔn nyí mɛ̌tlu ɖokpó adaɖé.

²É bló vɔ̌sákpe ɔ́, bɔ é ɖó zo ɖo zwe ɛnɛ lɛ́ɛ ɖokpó ɖokpó tɔ́n ganjí, bɔ zwe lɛ́ɛ kpó vɔ̌sákpe ɔ́ kpó ɖo bǔ, bɔ é kɔn ganvɔ dó.

³É zé ganvɔ dó bló nǔ e è nɔ zán ɖo vɔ̌sákpe ɔ́ jí lɛ́ɛ: gannú e mɛ afín nɔ kɔn dó lɛ́ɛ, pɛ́li lɛ́ɛ, gannú lɛ́ɛ, gǎfu lɛ́ɛ kpódó nǔ e mɛ è nɔ dó zǎlínkpɔ́n zo ɖe lɛ́ɛ kpó.

⁴É bló ganvɔganja ɖokpó nú vɔ̌sákpe ɔ́; é sɔ́ ganja ɔ́ dó vɔ̌sákpe ɔ́ glɔ́, bɔ jǐ yiyi tɔn wá vɔ̌sákpe ɔ́ sín vlɔ̌.

⁵É bló ganvɔlɔgan ɛnɛ ɖó ganja ɔ́ sín zwe ɛnɛ lɛ́ɛ jí, bó fɔ kpo gaga lɛ́ɛ gbɔn mɛ.

⁶É kpa kasyatín sín kpo gaga we, bó kɔn ganvɔ dó, bɔ è nɔ dó zé vɔ̌sákpe ɔ́.

⁷É fɔ kpo gaga lɛ́ɛ gbɔn alɔgan lɛ́ɛ mɛ, ɖo vɔ̌sákpe ɔ́ sín akpá we lɛ́ɛ xwé, bɔ è nɔ dó zé vɔ̌sákpe ɔ́ ná. É zé xwlɛ dó bló vɔ̌sákpe ɔ́ ná; nǔ ɖěbǔ ɖo xo tɔn mɛ ǎ.

⁸É zé ganvɔ dó bló gannú ɖokpó kpó afɔ e jí è sɔ́ ɖó ɔ́ kpó; nyɔ̌nu e nɔ kplé ɖo goxɔ ɔ́ lihɛ́nnu lɛ́ɛ sín wě wɛ è sɔ́ dó bló nǔ énɛ́ lɛ́ɛ ná.

⁹É ɖó kɔ́xota lɛ́ lɛ̌ dó goxɔ ɔ́, bó zé lɛ̌ɛnkanvɔ e dɛ kan ganjí ɔ́ dó xá. Avɔ e è dǒ xá kɔ́xota ɔ́ ná ɔ́ sín ga nyí mɛ̌tlu kanɖé wǒ ɖo goxɔ ɔ́ sín afɔligbé.

¹⁰Dotín ko wú wɛ é sin avɔ lɛ́ɛ dó, bɔ dotín ɖokpó ɖokpó lɛ́ɛ jínjɔ́n afɔ ɖokpó ɖokpó jí. Ganvɔ wɛ é dó bló dotín lɛ́ɛ kpó afɔ lɛ́ɛ kpó. Kpatágan wɛ è dǒ bló klɔcée e ɖo dotín lɛ́ɛ wú lɛ́ɛ kpó gankpo ɖěɖě è nǎ hɛn dotín lɛ́ɛ kpó.

¹¹Mɔ̌ ɖokpó ɔ́, ɖo goxɔ ɔ́ sín taligbé ɔ́, avɔ ɔ́ ɖó ga ɖokpó ɔ́, bɔ è sin gbɔn alɔkpa ɖokpó ɔ́; klɔcée lɛ́ɛ kpó gankpo lɛ́ɛ kpó ɔ́, kpatágan wɛ é dó bló.

¹²Đo goxɔ ɔ́ sín gbadahwe jí ɔ́, avɔ e è dǒ ɖó kɔ́xota ɔ́ sín gblǒ jí ɔ́, ga tɔn nyí mɛ̌tlu koatɔ́n (25). Dotín wǒ wú wɛ é sin avɔ ɔ́ dó, bɔ dotín lɛ́ɛ ɖokpó ɖokpó jínjɔ́n afɔ ɖokpó ɖokpó jí. Klɔcée lɛ́ɛ kpó gankpo lɛ́ɛ ɔ́, kpatágan wɛ é dó bló.

¹³Akpá e xwé xwé ɔ́ sín hɔntogbó ɔ́ ɖe, ɖo goxɔ ɔ́ sín zǎnzǎnhwe jí ɔ́ lɔ sín ga nyí mɛ̌tlu koatɔ́n (25).

¹⁴Avɔ e é dó ɖó ɖisí nú hɔntogbó ɔ́ ɖó mɛ̌tlu tɛ́nwe adaɖé; dotín lɛ́ɛ nyí atɔn bó ɖo afɔ ɖokpó ɖokpó jí,

¹⁵Mɔ̌ ɖokpó ɔ́, avɔ e è dǒ ɖó amyɔxwé nú hɔntogbó ɔ́ lɔ ɖó mɛ̌tlu tɛ́nwe adaɖé; bɔ dotín lɛ́ɛ lɔ nyí atɔn, bó ɖo afɔ ɖokpó ɖokpó jí.

¹⁶Avɔ e è xá kɔ́xota ɔ́ ná ɔ́, bǐ wɛ é zé lɛ̌ɛnkanvɔ e dɛ kan ganjí ɔ́ dó bló.

¹⁷Ganvɔ wɛ é sɔ́ dó bló afɔ e jí dotín lɛ́ɛ jínjɔ́n lɛ́ɛ ná bó sɔ́ kpatágan dó bló dotín lɛ́ɛ sín klɔcée lɛ́ɛ kpó kpo yětɔn lɛ́ɛ kpó ná; kpatágan wɛ é kɔn dó dotín lɛ́ɛ sín ata. Kɔ́xota ɔ́ sín dotín lɛ́ɛ bǐ ɔ́, kpo e é sɔ́ kpatágan dó bló ná lɛ́ɛ wɛ dɔn yě cá.

¹⁸Avɔ e é dó ɖó xwé ɔ́ sín hɔntogbó nu ɔ́, kan kwlésinnɔ, vɔvɔ, vɔvɔ cɛ́cɛ́ kpó lɛ̌ɛnkanvɔ kan didɛ kpó wɛ è dǒ kó ná; ga tɔn nyí mɛ̌tlu wǒ, jǐ yiyi tɔn nyí mɛ̌tlu we adaɖé avɔ e è dǒ xá kɔ́xota ɔ́ sín gblǒ ɖɔhun.

¹⁹Ganvɔ wɛ é sɔ́ dó bló dotín ɛnɛ lɛ́ɛ kpó afɔ ɛnɛ e jí dotín lɛ́ɛ jínjɔ́n lɛ́ɛ kpó. Kpatágan wɛ è sɔ́ dó bló klɔcée lɛ́ɛ kpó afɔ yětɔn lɛ́ɛ kpó ná, bó kɔn kpatágan dó dotín lɛ́ɛ sín ata.

²⁰Ganvɔ wɛ é sɔ́ dó bló goxɔ ɔ́ kpódó kɔ́xota ɔ́ kpó sín só lɛ́ɛ bǐ ná.

²¹Gan e è zǎn dó goxɔ e mɛ è ɖǒ ná zé akɔjijɛwéma ɔ́ ɖó ɔ́ lɛ́ɛ ɖíe. Levíi ví lɛ́ɛ wɛ lɛ́n gan lɛ́ɛ lě e Mɔyízi ɖɔ gbɔn é. Itamáa, vɔ̌sánú-xwlémawutɔ́ Aalɔ́ɔn ví ɔ́ wɛ nɔ ɛ nu.

²²Besalɛli Wulíi ví, Húu vívú ɔ́ bló nǔ e Mawu Mavɔmavɔ ɖɔ nú Mɔyízi lɛ́ɛ bǐ. Judáa sín akɔta ɔ́ mɛ wɛ é jɔ ɖe.

²³Oxoliyavu, Axisamaki ví ɔ́ wɛ dó alɔ ɛ; akɔta Dan tɔn ɔ́ mɛ wɛ é jɔ ɖe; é nɔ́ kpa awǐnnya ɖagbe ɖagbe lɛ́ɛ, é nɔ́ ɖe nǔ dó avɔ mɛ; é nɔ́ kó avɔ kwlésinnɔ, avɔ vɔvɔ, avɔ vɔvɔ cɛ́cɛ́, kpó lɛ̌ɛnkanvɔ kpó.

²⁴Siká e è zǎn dó wa goxɔ ɔ́ sín azɔ̌ lɛ́ɛ ná ɔ́ bǐ bló kilóo afɛnɛ kanɖé gbantɔ́n-nukún-we (877) bɔ glǎmu afɔɖé kanwe ko (300) jɛjí; gan e è nɔ dó da nǔ ná ɖo sinsɛnxɔ mɛ ɔ́ wɛ è zě dó da.

²⁵ Kpatágan e mɛ e sín kɛ́n è sɔ́ lɛ́ɛ ná ɔ́, bǐ bló kilóo afɔwó-afatɔ́n afɔtɔn-nukún-we (3.017) kpó glǎmu nǔwɔntɔn kantɔn gban (750) kpó; gan e è nɔ dó da nǔ ná ɖo Mawu xwé gbe ɔ́ wɛ è zě dó da.

²⁶ Súnnu e ɖó xwe ko abǐ xwe ko jɛjí bɔ è sɔ́ kɛ́n yětɔn lɛ́ɛ ɖokpó ɖokpó ná kpatágan glǎmu atɔ́ɔ́n; yě mɛ e ná lɛ́ɛ bǐ kplékplé yi adɔ̌kpo gban afɔwó afɔ tɛ́nwe kantɔn gban jɛjí (603.550).

²⁷Kpatágan kilóo afɔwó-afatɔ́n (3.000) wɛ è zǎn dó bló afɔ kanwe ko (100) e jí dotín goxɔ ɔ́ tɔn lɛ́ɛ jínjɔ́n lɛ́ɛ kpódó afɔ e jí xɔmɛgbovɔ ɔ́ jínjɔ́n lɛ́ɛ kpó; nǔ lɛ́ɛ ɖokpó ɖokpó nɔ́ da kilóo gban (30).

²⁸È zě kpatágan kilóo afɔtɔn-nukún-we glǎmu nǔwɔntɔn kantɔn gban (750) e kpo lɛ́ɛ dó bló dotín lɛ́ɛ sín klɔcée lɛ́ɛ, gankpo yětɔn lɛ́ɛ, kpó ata yětɔn lɛ́ɛ kpó.

²⁹Ganvɔ e Izlayɛ́li ví lɛ́ɛ ná ɔ́ bǐ bló kilóo afɔwó kantɔn-nukún-ɛnɛ (2.124).

³⁰Ganvɔ énɛ́ ɔ́ wɛ è zǎn dó bló só e ɖo goxɔ ɔ́ sín ali nu lɛ́ɛ ná, bó bló vɔ̌sákpe ɔ́ kpó ganja tɔn kpó, kpódó nǔ e è nɔ zán ɖo vɔ̌sákpe ɔ́ kɔn lɛ́ɛ bǐ kpó.

³¹É wɛ è zě dó bló dotín e è dǒ xá kɔ́xota ɔ́ sín afɔ lɛ́ɛ, hɔntogbó ɔ́ sín dotín lɛ́ɛ sín afɔ lɛ́ɛ, goxɔ ɔ́ sín só lɛ́ɛ kpódó dotín e è dǒ xá kɔ́xota ɔ́ sín só lɛ́ɛ kpó.