Read fon Tíntɔ́n 39 Bible Online

Tíntɔ́n 39 - fon bible

Tíntɔ́n 39

¹È zě avɔ kwlésinnɔ, avɔ vɔvɔ kpó avɔ vɔvɔ cɛ́cɛ́ kpó dó tɔ sinsɛnwu e è nǎ dó wa azɔ̌ ɖo goxɔ ɔ́ mɛ lɛ́ɛ. È tɔ vɔ̌sánú-xwlémawutɔ́ sín awu lɛ́ɛ nú Aalɔ́ɔn lě e Mawu Mavɔmavɔ ɖɔ gbɔn nú Mɔyízi é.

²È zě kan didɛ e è nɔ dó lɔn lɛ̌ɛnkanvɔ ná ɔ́ dó lɔn efódu ná bɔ kan kwlésinnɔ vɔvɔ kpó vɔvɔ cɛ́cɛ́ kpó gbɔn mɛ, bɔ è zě kan gansinnɔ dó kó ná.

³È zě siká akú dó gan gbajagbaja bó sɛ́n kan tɔn bó gbɛ kan ɖɔhun, bó ján gbɔn kan kwlésinnɔ ɔ́, vɔvɔ ɔ́, vɔvɔ cɛ́cɛ́ ɔ́, kpó kan didɛ e è nɔ dó lɔn lɛ̌ɛnkanvɔ ná ɔ́ kpó mɛ; è blǒ bɔ é mɛ́ sin.

⁴È blǒ abɔ̌tavɔ we bó tɔ dó efódu ɔ́ sín tó we lɛ́ɛ wú, dó hɛn ɖó te.

⁵Efódu kpó gǒjíblánú ɔ́ kpó bǐ wɛ è lɔn ɖó bǔ; kan gansinnɔ, kwlésinnɔ, vɔvɔ, vɔvɔ cɛ́cɛ́ kpó kan didɛ e è nɔ dó lɔn lɛ̌ɛnkanvɔ ná ɔ́ kpó wɛ è dǒ lɔn ná, lě e Mawu Mavɔmavɔ ɖɔ nú Mɔyízi gbɔn é.

⁶È kpa awǐnnya e è nɔ ylɔ́ ɖɔ Onísi ɔ́ we bó kɔn siká lɛ́ lɛ̌ dó, lobo wlán Izlayɛ́li ví lɛ́ɛ sín nyǐkɔ dó yě wú lě e awǐnnyazɔ́watɔ́ nɔ kun nǔ dó awǐnnya wú gbɔn é.

⁷È bɛ̌ awǐnnyatɛ we lɛ́ɛ ɖó efódu ɔ́ sín abɔ̌tavɔ lɛ́ɛ jí dó ná akɔta Izlayɛ́li tɔn wěwe lɛ́ɛ sín xlɛ̌, lě e Mawu Mavɔmavɔ ɖɔ nú Mɔyízi gbɔn é.

⁸Avɔlɔntɔ́ e alɔnu yětɔn mɛ́ ganjí lɛ́ɛ zé kan didɛ e è nɔ dó lɔn lɛ̌ɛnkanvɔ ná ɔ́ dó lɔn akɔ́ntakpo e è nɔ sin dó akɔ́nta dó ɖɔ hwɛ é, bɔ kan kwlésinnɔ vɔvɔ kpó vɔvɔ cɛ́cɛ́ kpó gbɔn mɛ; yě zé kan gansinnɔ dó kó ná, lě e è lɔn efódu ɔ́ gbɔn é.

⁹Akpo wɛ é nyí bó ɖó gblǒ zɛ̌ɛ́n, ga zɛ̌ɛ́n; gblǒ ɔ́ nyí mɛ̌tlu ɖokpó sín ɛnɛvlɔ́ɖó, bɔ ga ɔ́ lɔ nyí mɛ̌tlu ɖokpó sín ɛnɛvlɔ́ɖó.

¹⁰È to awǐnnya ɖagbe ɖagbe d'é wú dó ba acɔ́ ná; hǎ ɛnɛ jí wɛ è to ɖó: è to awǐnnya sadwáni ɖokpó, tokpázi ɖokpó, kpó emɛlodu ɖokpó kpó ɖó hǎ nukɔntɔn ɔ́ jí.

¹¹È to awǐnnya ɛsikabukli ɖokpó, safíi ɖokpó kpó dyamáa ɖokpó kpó ɖó hǎ wegɔ́ ɔ́ jí,

¹²bó to awǐnnya okpálu ɖokpó, agáti ɖokpó, kpó amɛtisi ɖokpó kpó ɖó hǎ atɔngɔ́ ɔ́ jí.

¹³È to awǐnnya klizolíti ɖokpó, onísi ɖokpó, kpó jasipée ɖokpó kpó ɖó hǎ ɛnɛgɔ́ ɔ́ jí. Siká wɛ è kɔn lɛ́ lɛ̌ dó awǐnnya énɛ́ lɛ́ɛ.

¹⁴È wlǎn Jakɔ́bu ví lɛ́ɛ ɖokpó ɖokpó sín nyǐkɔ ɖó awǐnnya lɛ́ɛ ɖokpó ɖokpó wú, lě e awǐnnyazɔ́watɔ́ nɔ kun nǔ dó awǐnnya wú gbɔn é. Awǐnnya énɛ́ lɛ́ɛ nyí xlɛ́ akɔta Izlayɛ́li wěwe lɛ́ɛ tɔn.

¹⁵È zě siká akú dó bló wlɔ kpɛví kpɛví ná, bó gbɛ kan ɖɔhun nú akɔ́ntakpo ɔ́.

¹⁶È kɔn siká lɛ́ lɛ̌ dó awǐnnyatɛ we bó bló sikálɔgan we, bó fɔ ɖó akɔ́ntakpo ɔ́ sín tó we lɛ́ɛ wú.

¹⁷È zě sikáwlɔ we lɛ́ɛ gbɔn alɔgan we e ɖo akɔ́ntakpo ɔ́ sín tó lɛ́ɛ mɛ.

¹⁸È zě wlɔ ɔ́ sín nu we ɖě lɛ́ɛ gbɔn efódu ɔ́ sín abɔ̌tavɔ ɔ́ glɔ́ gbɔn nukɔn dó hɛn efódu ɔ́ dó abɔ̌tavɔ ɔ́ wú.

¹⁹È lɛ̌ blǒ sikálɔgan we, bó fɔ yě ɖó akɔ́ntakpo ɔ́ sín tó we lɛ́ɛ tó ɖo do, bɔdó awu gaga ɔ́ wú, ɖo xomɛ.

²⁰È lɛ̌ bló sikálɔgan we ɖó efódu ɔ́ sín abɔ̌tavɔ we lɛ́ɛ sín do, ɖo nukɔn, ɖo fí e è tɔ gbɔn lɛ́ɛ, ɖo gǒjíblánú e ɖo efódu ɔ́ wú ɔ́ sín ta nu.

²¹È zě kan kwlésinnɔ gbɔn alɔgan lɛ́ɛ mɛ, bó dó sin akɔ́ntakpo ɔ́ ná dó gǒjíblánú e ɖo efódu ɔ́ jí ɔ́ wú, bónú é má gosín efódu ɔ́ wú ó. Lě e Mawu Mavɔmavɔ ɖɔ nú Mɔyízi gbɔn ɔ́ nɛ́.

²²Avɔ kwlésinnɔ kɛ́ɖɛ́ wɛ è dǒ tɔ awu e ná nɔ do nú efódu ɔ́.

²³È ɖe ali d'é mɛ gbɔn tɛ́ntin bɔ è nɔ zé ta gbɔn mɛ. È kó kɔ mɛ ná bɔ é tlí, bó má wá vún ó.

²⁴È zě kan kwlésinnɔ, vɔvɔ, vɔvɔ cɛ́cɛ́ kpó kan didɛ e è nɔ dó lɔn lɛ̌ɛnkanvɔ ná ɔ́ kpó dó bló atínsínsɛ́n e è nɔ ylɔ́ ɖɔ glenádi ɔ́ gbɔn awu ɔ́ tó, lɛ́ lɛ̌ dó ɖo do, bó dó ba acɔ́ ná.

²⁵È zě siká akú dó bló gan e è nɔ xúxú ɔ́ kpɛví kpɛví bó to gbɔn awu ɔ́ tó, lɛ́ lɛ̌ dó ɖo do, gbɔn glenádi lɛ́ɛ tɛ́ntin.

²⁶Hǔn è mɔ gan ɖokpó ɔ́, è nǎ mɔ glenádi ɖokpó, bɔ è nǎ dǒ wa sinsɛnzɔ́ ná, lě e Mawu Mavɔmavɔ ɖɔ nú Mɔyízi gbɔn é.

²⁷È zě kan didɛ e è nɔ dó lɔn lɛ̌ɛnkanvɔ ná ɔ́ dó lɔn awu gaga nú Aalɔ́ɔn kpó vǐ tɔn lɛ́ɛ kpó.

²⁸È zě kan didɛ e è nɔ dó lɔn lɛ̌ɛnkanvɔ ná ɔ́ dó bló tablá kpó gbǎkún ɖé kpó nú yě, bó dó ɖe susu e yě ɖǒ ɔ́ xlɛ́; è lɛ̌ zé kan didɛ e è nɔ dó lɔn lɛ̌ɛnkanvɔ ná ɔ́ dó tɔ cokoto kpɛví kpɛví nú yě.

²⁹È zě kan didɛ e è nɔ dó lɔn lɛ̌ɛnkanvɔ ná ɔ́ dó bló gǒjíblánú ná bó kó, bɔ kan kwlésinnɔ vɔvɔ kpó vɔvɔ cɛ́cɛ́ kpó gbɔn mɛ, lě e Mawu Mavɔmavɔ kó ɖɔ nú Mɔyízi gbɔn é.

³⁰Énɛ́ ɔ́ gúdo ɔ́, è zě siká akú dó bló gan gbajagbaja ɖokpó ná, bó ɖé d'é jí ɖɔ: “Mɛɖeɖóvo Mawu Mavɔmavɔ tɔn.” È ɖe lě e awǐnnyazɔ́watɔ́ nɔ́ kun nǔ dó awǐnnya jí gbɔn é.

³¹È zě kan kwlésinnɔ dó hɛn gan gbajagbaja ɔ́ dó tablá ɔ́ wú ɖo aga lě e Mawu Mavɔmavɔ kó ɖɔ nú Mɔyízi gbɔn é.

³²Lě e è fó Mawu xwé, nɔtɛn Mawu Mavɔmavɔ tɔn ɔ́ sín azɔ̌ lɛ́ɛ bǐ gbɔn ɔ́ nɛ́. Izlayɛ́li ví lɛ́ɛ bló nǔ e Mawu Mavɔmavɔ ɖɔ nú Mɔyízi ɖ'ayǐ lɛ́ɛ bǐ.

³³Izlayɛ́li ví lɛ́ɛ bɛ́ nǔ e è nǎ dó bló nɔtɛn Mawu Mavɔmavɔ tɔn ɔ́ ná lɛ́ɛ bǐ wá nú Mɔyízi: goxɔ ɔ́ kpó nǔ e ɖo wǔ tɔn lɛ́ɛ bǐ kpó; nǔ lɛ́ɛ wɛ nyí nǔhɛnnú lɛ́ɛ, xwlɛ lɛ́ɛ, wɛ̌n lɛ́ɛ, dotín lɛ́ɛ kpódó afɔ lɛ́ɛ kpó,

³⁴kpó agbonyú e è sá nǔ vɔvɔ dó lɛ́ɛ kpó, anyǔ tlitli lɛ́ɛ kpó, kpó xɔmɛgbovɔ ɔ́ kpó,

³⁵kpó gbǎ e mɛ akɔjijɛwéma ɔ́ ɖe ɔ́ kpó, kpó kpo e è nɔ dó sɔ́ ná lɛ́ɛ kpó, kpódó nusú tɔn kpó;

³⁶távo e jí akɔjijɛgbá ɔ́ nɔ́ nɔ ɔ́ kpó nǔ e è nɔ zán ɖ'é jí lɛ́ɛ kpó, kpó wɔ̌xúxú e è nɔ ná Mawu lɛ́ɛ kpó.

³⁷Zogbɛ́nhɛnnú e è sɔ́ siká akú dó bló ná é, kpó zogbɛ́n tɔn lɛ́ɛ kpó, kpódó nǔ e è nɔ zán ɖo zogbɛ́nhɛnnú ɔ́ kɔn lɛ́ɛ bǐ kpó ami e è nǎ tá myɔ ɔ́ ná é kpó.

³⁸Vɔ̌sákpe e è sɔ́ siká dó bló ná é, ami e è nǎ sá dó ɖe mɛ ɖó vo é kpó atínkɛn wǎnɖagbenɔ ɔ́ kpó, kpódó avɔ e è dǒ ɖó goxɔ ɔ́ sín ali nu é kpó.

³⁹Vɔ̌sákpe e è sɔ́ ganvɔ dó bló ná é, ganja tɔn e è sɔ́ ganvɔ dó bló ná é, kpo e è nɔ dó sɔ́ ná lɛ́ɛ kpó nǔ e è nɔ zǎn ɖo vɔ̌sákpe ɔ́ kɔn lɛ́ɛ bǐ kpó; ganzɛ́n ɔ́ kpó nǔ e jí è sɔ́ ɖó ɔ́ kpó.

⁴⁰Avɔ e è nǎ dǒ xá xwé ɔ́ ná lɛ́ɛ, dotín lɛ́ɛ kpó afɔ lɛ́ɛ kpó, avɔ e è nǎ dǒ xwé ɔ́ sín hɔntogbó nu é, kan e è nǎ dǒ hɛn nǔ lɛ́ɛ ɖó te lɛ́ɛ, só lɛ́ɛ, nǔ e è nǎ zǎn dó wa azɔ̌ ɖo Mawu xwé ɔ́ gbe kpó éé è nǎ zán ɖo goxɔ ɔ́ mɛ lɛ́ɛ kpó.

⁴¹Sinsɛnwu e è nɔ dó wa azɔ̌ ná ɖo goxɔ ɔ́ mɛ lɛ́ɛ; vɔ̌sánú-xwlémawutɔ́ sín awu lɛ́ɛ vɔ̌sánú-xwlémawutɔ́ Aalɔ́ɔn tɔn lɛ́ɛ, kpó awu e vǐ tɔn lɛ́ɛ ná dó dó wa azɔ̌ lɛ́ɛ kpó.

⁴²Izlayɛ́li ví lɛ́ɛ bló nǔ énɛ́ lɛ́ɛ bɔ é sɔgbe xá lě e Mawu Mavɔmavɔ ɖɔ nú Mɔyízi gbɔn lɛ́ɛ bǐ.

⁴³Mɔyízi kpɔ́n azɔ̌ e yě wa lɛ́ɛ bǐ bó mɔ ɖɔ yě bló nǔ lɛ́ɛ bǐ lě e Mawu Mavɔmavɔ ɖɔ gbɔn é. Énɛ́ ɔ́, é xo ɖɛ dó yě jí.