Read fon Tíntɔ́n 6 Bible Online

Tíntɔ́n 6 - fon bible

Tíntɔ́n 6

¹Mawu Mavɔmavɔ ɖɔ nú Mɔyízi ɖɔ: “A nǎ mɔ nǔ e un ná wa xá axɔ́sú Ejípu tɔn ɔ́ din é. Un ná ɖe hlɔ̌nhlɔ́n ce xlɛ́ ɛ, bɔ é ná jó Izlayɛ́li ví lɛ́ɛ dó bɔ yě ná yi. Un ná wa nǔ xá ɛ, bɔ é ná nya yě tɔ́n sín to tɔn mɛ.”

² Mawu lɛ́ ɖɔ nú Mɔyízi ɖɔ: “Nyɛ wɛ nyí Mawu Mavɔmavɔ.

³Un tɔ́n dó Ablaxámu kpó Izáki kpó Jakɔ́bu kpó jí, bó ɖe xlɛ́ yě ɖɔ un nyí Mawu Nǔbǐwúkpétɔ́. Amɔ̌, un ka ɖe xlɛ́ yě ɖɔ un nɔ lɛ́ nyí Mawu Mavɔmavɔ ǎ.

⁴Un lɛ́ jɛ akɔ xá yě, bó ná ná yě Kanáa; to énɛ́ e mɛ yě yi nɔ ɖ'ayǐ é, to énɛ́ e mɛ yě hɔn yi cí é.

⁵Nyi ɖésúnɔ wɛ se azɔn e wɛn wɛ Izlayɛ́li ví lɛ́ɛ ɖe ɖó kannumɔzɔ́ e ɖó kɔ jí nú yě wɛ Ejípunu lɛ́ɛ ɖe ɔ́ wú é, bɔ un tunwun ɖɔ akɔ e un jɛ xá yě ɔ́ kpo ɖo te.

⁶Énɛ́ ɔ́ wú ɔ́, a nǎ ɖɔ nú Izlayɛ́li ví lɛ́ɛ ɖɔ nyɛ wɛ nyí Mawu Mavɔmavɔ; a nǎ ɖɔ nú yě ɖɔ un ná ɖe yě sín azɔ̌ syɛ́nsyɛ́n e Ejípunu lɛ́ɛ ɖó kɔ jí nú yě lɛ́ɛ mɛ. Mɛ kannu wɛ yě ɖe, un ka ná ɖe yě sín mɛ kannu. Un ná zán hlɔ̌nhlɔ́n ce dó dɔn tó nú Ejípunu lɛ́ɛ bɔ é ná syɛ́n ɖésú, bó dó ɖe yě tɔ́n. Mɛ ɖé nɔ́ nɔ te hlɔ̌nhlɔ́n ce nukɔn ǎ.

⁷Un ná zé mi dó ɖó togun ce ná; un ná nyí Mawu mitɔn, bɔ mi ná tunwun ɖɔ nyɛ Mawu Mavɔmavɔ, Mawu mitɔn ɔ́ wɛ ɖe mi sín azɔ̌ syɛ́nsyɛ́n e Ejípunu lɛ́ɛ ɖó kɔ jí nú mi lɛ́ɛ mɛ.

⁸Un ná kplá mi yi to e sín akpá un dó, bó xwlé nǔ d'é jí ɖɔ un ná ná Ablaxámu, Izáki kpódó Jakɔ́bu kpó ɔ́ mɛ. Un ná ná to ɔ́ mi, bɔ é ná nyí mitɔn. Nyɛ Mawu Mavɔmavɔ wɛ ɖɔ mɔ̌.”

⁹Mɔyízi ka yi wlí xó énɛ́ lɛ́ɛ bǐ ɖɔ nú Izlayɛ́li ví lɛ́ɛ. Lo ɔ́, ayi ma jɛ ayǐ kpó kannumɔzɔ́ e Ejípunu lɛ́ɛ ɖó kɔ jí nú yě lɛ́ɛ kpó lɔn bónú yě ná ɖótó Mɔyízi ǎ.

¹⁰É ká ɖo mɔ̌ có Mawu Mavɔmavɔ lɛ́ ɖɔ nú Mɔyízi ɖɔ:

¹¹“Yi ɖɔ xó nú axɔ́sú Ejípu tɔn ɔ́ bónú é ná jó Izlayɛ́li ví lɛ́ɛ dó nú yě ná tɔ́n sín to tɔn mɛ.”

¹²Mɔyízi ɖɔ nú Mawu Mavɔmavɔ ɖɔ: “Ée Izlayɛ́li ví lɛ́ɛ má ká ɖo tó ɖó mì wɛ din ǎ ɔ́, nɛ̌ axɔ́sú Ejípu tɔn ɔ́ ká ná ɖótó mì gbɔn? Nyi ɖíe má nyɔ́ xó ɖɔ ǎ e!”

¹³Énɛ́ ɔ́, Mawu Mavɔmavɔ ɖe gbe nú Mɔyízi kpó Aalɔ́ɔn kpó ɖɔ yě ní zɔn kpɔ́ bó yi mɔ Izlayɛ́li ví lɛ́ɛ kpó axɔ́sú Ejípu tɔn ɔ́ kpó, bó ná ɖe Izlayɛ́li ví lɛ́ɛ tɔ́n sín Ejípu.

¹⁴Izlayɛ́li ví lɛ́ɛ ɔ́, hɛ̌nnugán yětɔn lɛ́ɛ sín nyǐkɔ ɖíe: Jakɔ́bu ví nukɔntɔn Hwlibɛ́ni ɔ́, vǐ tɔn lɛ́ɛ sín nyǐkɔ ɖíe: Hanɔki, Palúu, Ɛslɔ́ni kpó Kaamíi kpó. Xwédo Hwlibɛ́ni tɔn lɛ́ɛ nɛ́.

¹⁵Sinmɛnyɔ́ɔ ví lɛ́ɛ sín nyǐkɔ ɖíe: Yemúwɛli, Yamini, Oxádi, Yakíni kpódó Soháa kpó, kpó Cawúlu e nyí nyɔ̌nu Kanáanu ɔ́ sín vǐ ɔ́ kpó. Xwédo Sinmɛnyɔ́ɔ tɔn lɛ́ɛ nɛ́.

¹⁶ Levíi ví lɛ́ɛ sín nyǐkɔ kpó kúnkan yětɔn lɛ́ɛ kpó ɖíe: Gɛɛcɔ́ni, Kexáti kpó Mɛlali kpó. Xwe kantɔn afɔtɔn-nukún-we (137) wɛ Levíi nɔ gbɛ xɔ.

¹⁷Gɛɛcɔ́ni ví lɛ́ɛ sín nyǐkɔ ɖíe: Livuni kpó Cimɛ́yi kpó, xwédo yětɔn lɛ́ɛ kpó sín nyǐkɔ nɛ́.

¹⁸Kexáti ví lɛ́ɛ ɖíe: Amulámu, Yisexáa, Eblɔ́n kpó Wuziyɛ́li kpó. Xwe kantɔn wǎtɔn (133) wɛ Kexáti nɔ gbɛ xɔ.

¹⁹Mɛlali ví lɛ́ɛ ɖíe: Maxli kpó Muci kpó. Levíi sín xwédo lɛ́ɛ kpó kúnkan yětɔn lɛ́ɛ kpó nɛ́.

²⁰Amulámu da daányɔ̌nu tɔn Yokɛvɛ́di bɔ é ji Aalɔ́ɔn ɔ́ kpó Mɔyízi ɔ́ kpó n'i. Xwe kantɔn afɔtɔn-nukún-we (137) wɛ Amulámu nɔ gbɛ xɔ.

²¹Yisexáa ví lɛ́ɛ sín nyǐkɔ ɖíe: Kolée, Nɛfɛ́gi kpódó Zikli kpó.

²²Wuziyɛ́li ví lɛ́ɛ sín nyǐkɔ ɖíe: Micaɛ́li, Ɛlisafáni kpó Sitli kpó.

²³Aalɔ́ɔn da Aminadabu ví Elizabɛ́ti, Naxicɔ́ni nɔví ɔ́, bɔ é ji Nadavu, Avihu, Eleazáa kpódó Itamáa kpó n'i.

²⁴Kolée ví lɛ́ɛ sín nyǐkɔ ɖíe: Asíi, Ɛlukana kpódó Aviasáfu kpó; xwédo Kolée tɔn nɛ́.

²⁵Eleazáa Aalɔ́ɔn ví ɔ́ da Putiyɛli sín vǐ nyɔ̌nu ɖokpó, bɔ é ji Pínxási n'i. Levíi ví lɛ́ɛ sín hɛ̌nnugán lɛ́ɛ kpó xwédo yětɔn lɛ́ɛ kpó nɛ́.

²⁶Aalɔ́ɔn kpó Mɔyízi kpó wɛ nyí mɛ e Mawu Mavɔmavɔ ɖɔ ná ɖɔ yě ní ɖe Izlayɛ́li ví lɛ́ɛ tɔ́n sín Ejípu sonu sonu é.

²⁷Mɔyízi kpó Aalɔ́ɔn kpó wɛ nyí mɛ e ɖɔ xó nú axɔ́sú Ejípu tɔn ɔ́, bó ná ɖe Izlayɛ́li ví lɛ́ɛ tɔ́n sín Ejípu é.

²⁸Hwenu e Mawu Mavɔmavɔ ɖɔ xó nú Mɔyízi ɖo Ejípu ɔ́,

²⁹é ɖɔ n'i ɖɔ: “Nyɛ wɛ nyí Mawu Mavɔmavɔ. Đɔ xó e un ɖɔ nú we lɛ́ɛ bǐ nú axɔ́sú Ejípu tɔn ɔ́.”

³⁰Bɔ Mɔyízi ɖɔ nú Mawu Mavɔmavɔ ɖɔ: “Nyɛ ɖíe má nyɔ́ xó ɖɔ ǎ e, nɛ̌ axɔ́sú ɔ́ ná ɖótó mì gbɔn?”