Read fon Tíntɔ́n 7 Bible Online

Tíntɔ́n 7 - fon bible

Tíntɔ́n 7

¹Énɛ́ ɔ́, Mawu Mavɔmavɔ ɖɔ nú Mɔyízi ɖɔ: “Đǒtó mì, un sɔ́ we dó ɖó Mawu nú axɔ́sú Ejípu tɔn ɔ́; nɔví towe Aalɔ́ɔn ka ná nyí gbeyíɖɔ towe.

²Hwɛ ɔ́, a nǎ ɖɔ xó e un ná ɖɔ nú we lɛ́ɛ bǐ nú nɔví towe Aalɔ́ɔn, bɔ éyɛ́ ná wlí bǐ ɖɔ nú axɔ́sú Ejípu tɔn ɔ́, bónú é ná jó Izlayɛ́li ví lɛ́ɛ dó, bɔ yě ná gosín to tɔn mɛ.

³ Nyɛ ɔ́, un ka ná zɔ́n bɔ axɔ́sú Ejípu tɔn ɔ́ ná tlí tó bɔ un ná ɖo nǔjíwǔ ce lɛ́ɛ kpó nǔdábaɖa ce lɛ́ɛ kpó ɖe tɔ́n wɛ ɖě jɛ ɖě gúdo, ɖo to tɔn mɛ.

⁴Axɔ́sú ɔ́ ná ɖótó mi ǎ. Alɔ ce ka ná jɛ to tɔn Ejípu ɔ́ wú, bɔ un ná dɔn tó nú to ɔ́ bɔ é ná syɛ́n ɖésú, bó ná dó ɖe togun ce Izlayɛ́li ɔ́ tɔ́n, é wɛ nyí ahwangɔnu ce.

⁵Hwenu e alɔ ce ná jɛ Ejípunu lɛ́ɛ wú, bɔ un ná ɖe Izlayɛ́li ví lɛ́ɛ tɔ́n sín yě mɛ ɔ́, Ejípunu lɛ́ɛ ná tunwun ɖɔ nyɛ wɛ nyí Mawu Mavɔmavɔ.”

⁶Mɔyízi kpó Aalɔ́ɔn kpó ká bló nǔ e Mawu Mavɔmavɔ ɖɔ nú yě lɛ́ɛ pɛ́pɛ́pɛ́.

⁷Hwenu e Mɔyízi kpó Aalɔ́ɔn kpó yi ɖɔ xó nú axɔ́sú Ejípu tɔn ɔ́, xwe kanwe (80) ɖó wɛ Mɔyízi ɖe, bɔ Aalɔ́ɔn ɖo xwe kanwe-nukún-atɔn (83) ɖó wɛ.

⁸Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ:

⁹“Ényí axɔ́sú Ejípu tɔn ɔ́ ɖɔ nú mi ɖɔ mi ní jlɛ́ nǔɖé dó ɖe xlɛ́ ɖɔ nyi wɛ sɛ́ mi dó hǔn, hwɛ Mɔyízi ɔ́, a nǎ ɖɔ nú Aalɔ́ɔn ɖɔ é ní zé kpo tɔn nyi kɔ́ mɛ ɖo axɔ́sú ɔ́ nukɔn. Énɛ́ ɔ́, kpo ɔ́ ná húzú dan.”

¹⁰Mɔyízi kpó Aalɔ́ɔn kpó ká yi axɔ́sú Ejípu tɔn ɔ́ gɔ́n, bó bló nǔ e Mawu Mavɔmavɔ ɖɔ yě ní bló é. Aalɔ́ɔn zé kpo tɔn nyi kɔ́ mɛ ɖo axɔ́sú ɔ́ kpó gǎn hɔn-yitɔ́ tɔn lɛ́ɛ kpó nukɔn, bɔ kpo ɔ́ húzú dan.

¹¹Axɔ́sú ɔ́ ká ylɔ́ bokɔ́nɔ lɛ́ɛ kpó azɔnɖatɔ́ lɛ́ɛ kpó, bɔ yě ná sɔ́ azě yětɔn dó bló nǔ ɖokpó ɔ́.

¹²Yě mɛ bǐ zé kpo yětɔn lɛ́ɛ nyi kɔ́ mɛ bɔ kpo lɛ́ɛ húzú dan. Aalɔ́ɔn sín kpo ɔ́ ká fɔ kpo yědɛɛ lɛ́ɛ tɔn lɛ́ɛ mi.

¹³Nǔ ɖo mɔ̌ có, axɔ́sú ɔ́ lɛ́ kpo ɖo tó tlí wɛ, bó gɔn tó ɖó Mɔyízi kpó Aalɔ́ɔn kpó, lě e Mawu Mavɔmavɔ kó ɖɔ gbɔn ɖ'ayǐ é.

¹⁴Mawu Mavɔmavɔ ɖɔ nú Mɔyízi ɖɔ: “Axɔ́sú Ejípu tɔn ɔ́ tlí tó bó gbɛ́ ɖɔ émí kún ná jó Izlayɛ́li ví lɛ́ɛ dó bɔ yě ná yi ó.

¹⁵Fɔ́n zǎn bó yi axɔ́sú Ejípu tɔn ɔ́ gɔ́n; hwenu e é ná tɔ́n bó ná xwe Nilu tɔ nu ɔ́, a nǎ yi kpé e ɖo Nilu tɔ ɔ́ tó, bɔ kpo e húzú dan ɖ'ayǐ ɔ́ ná ɖo alɔ towe mɛ.

¹⁶A nǎ ɖɔ nú axɔ́sú ɔ́ ɖɔ: ‘Mawu Mavɔmavɔ, Mawu Eblée lɛ́ɛ tɔn sɛ́ mì dó gɔ̌n towe ɖɔ má wá ɖɔ nú we ɖɔ hwi ní jó togun émítɔn dó nú yě ná yi sɛn émí ɖo gbětótló mɛ. Hwi ɖíe má ká ɖi nǔ nú xó énɛ́ ɔ́ káká wá jɛ din ǎ e.

¹⁷ Énɛ́ ɔ́ wú ɔ́, Mawu Mavɔmavɔ ɖɔ nǔ e ná jlɛ́ wɛ émí ɖe din ɔ́ ná ɖe xlɛ́ we ɖɔ Mawu Mavɔmavɔ wɛ émí nyí. Din ɔ́, kpɔ́n ganjí, un ná zin kpo e ɖo alɔ ce mɛ ɔ́ dó Nilu tɔ ɔ́ mɛ, bɔ é ná húzú kanjɔ.

¹⁸Hweví e ɖo tɔ ɔ́ mɛ lɛ́ɛ ná kú; tɔ ɔ́ ná gblé bɔ Ejípunu lɛ́ɛ ná wa nǔ bǐ ɖɔ émí ná nu sin tɔn. Yě ká ná sixú nu ǎ.’ ”

¹⁹Mawu Mavɔmavɔ ɖɔ nú Mɔyízi ɖɔ: “Đɔ nú Aalɔ́ɔn ɖɔ ní zé kpo tɔn bó dlɛ́n dó sin e ɖo Ejípu lɛ́ɛ bǐ: tɔsisa lɛ́ɛ, tɔdo lɛ́ɛ kpódó tán lɛ́ɛ kpó bǐ jí, énɛ́ ɔ́, sin lɛ́ɛ bǐ ná húzú kanjɔ, bɔ kanjɔ ná gbɔn Ejípu to ɔ́ bǐ mɛ, bó ná gbɔn atínká lɛ́ɛ kpó awǐnnyaká lɛ́ɛ kpó mɛ.”

²⁰Mɔyízi kpó Aalɔ́ɔn kpó ká bló nǔ e Mawu Mavɔmavɔ ɖɔ nú yě lɛ́ɛ: Aalɔ́ɔn zé kpo ɔ́ dó jǐ bó zin dó tɔ ɔ́ mɛ ɖo axɔ́sú ɔ́ kpó azaglɔ́gán tɔn lɛ́ɛ kpó nukún mɛ. Ée Aalɔ́ɔn bló mɔ̌ ɔ́, tɔsisa ɔ́ bǐ húzú kanjɔ.

²¹Hweví e ɖo tɔ ɔ́ mɛ lɛ́ɛ bǐ kú, bɔ tɔ ɔ́ gblé, bɔ Ejípunu lɛ́ɛ sɔ́ sixú nu sin tɔn ǎ; Ejípu to ɔ́ bǐ nyí kanjɔ.

²²Lo ɔ́, bokɔ́nɔ Ejípu tɔn lɛ́ɛ lɔ zé azě yětɔn dó bló nǔ ɖokpó ɔ́; énɛ́ ɔ́, axɔ́sú ɔ́ lɛ́ tlí tó; é wa nǔ e Mɔyízi kpó Aalɔ́ɔn kpó ɖɔ é ǎ, lě e Mawu Mavɔmavɔ kó ɖɔ gbɔn ɖ'ayǐ é.

²³Axɔ́sú ɔ́ lɛ́ kɔ yi hɔnmɛ; é ké ya nú nǔ énɛ́ lɛ́ɛ e jɛ ɔ́ lɔ ǎ.

²⁴Ée nǔ cí mɔ̌ ɔ́, Ejípunu lɛ́ɛ sɔ́ sixú nu tɔsisa ɔ́ ǎ; énɛ́ ɔ́, yě bǐ kun tɔ ɖó tɔsisa ɔ́ kpá bó ná mɔ sin nu.

²⁵Mawu Mavɔmavɔ zé tɔsisa ɔ́ dó húzú kanjɔ, bɔ é nɔ mɔ̌ káká nú azǎn tɛ́nwe.

²⁶Énɛ́ ɔ́ gúdo ɔ́, Mawu Mavɔmavɔ ɖɔ nú Mɔyízi ɖɔ: “Yi axɔ́sú Ejípu tɔn ɔ́ gɔ́n, bó ɖɔ n'i ɖɔ: ‘Mawu Mavɔmavɔ ɖɔ: Jǒ togun ce dó bónú é ní yi sɛn mì.

²⁷Ényí a gbɛ̌ ɖɔ émí kún ná jó yě dó bɔ yě ná yi ó ɔ́, un ná sɛ́ běsé dó, bɔ yě ná vun blá to towe, bó ná hɛn nǔ e ɖ'é mɛ lɛ́ɛ bǐ gblé.

²⁸Běsé ná gɔ́ tɔsisa ɔ́ mɛ; yě ná nɔ gosín tɔ ɔ́ mɛ, bó ná nɔ byɔ́ xwé towe gbe, xɔnɔnɔ towe mɛ, bó ná nɔ́ hun káká yi akánma towe jí; yě ná nɔ́ byɔ́ gǎn hɔn-yitɔ́ towe lɛ́ɛ kpó toví towe lɛ́ɛ kpó sín xwé gbe; yě ná nɔ byɔ́ myɔkpó towe lɛ́ɛ kpó nǔ e mɛ è nɔ nya linfín ɖe lɛ́ɛ kpó mɛ.

²⁹Běsé lɛ́ɛ ná nɔ́ xá hwi kpó mɛ e ɖo to towe mɛ lɛ́ɛ kpó, kpó gǎn hɔn-yitɔ́ towe lɛ́ɛ bǐ kpó jí.’ ”