Read fon Tíntɔ́n 8 Bible Online

Tíntɔ́n 8 - fon bible

Tíntɔ́n 8

¹Mawu Mavɔmavɔ ɖɔ nú Mɔyízi ɖɔ: “Đɔ nú Aalɔ́ɔn ɖɔ ní dlɛ́n alɔ tɔn lɛ́ɛ dó tɔsisa lɛ́ɛ, tɔdo lɛ́ɛ kpó tán lɛ́ɛ kpó jí, bó ɖe běsé lɛ́ɛ tɔ́n kɔn nyi Ejípu to ɔ́ mɛ.”

²Aalɔ́ɔn ka dlɛ́n kpo tɔn ɖó tɔ e ɖo Ejípu lɛ́ɛ jí, bɔ běsé lɛ́ɛ tɔ́n bó vun blá Ejípu to ɔ́.

³Lo ɔ́, majíkiblótɔ́ lɛ́ɛ lɔ zé majíki yětɔn dó bló nǔ ɖokpó ɔ́, bɔ běsé lɛ́ɛ tɔ́n bó vun blá Ejípu to ɔ́.

⁴Énɛ́ ɔ́, axɔ́sú ɔ́ ylɔ́ Mɔyízi kpó Aalɔ́ɔn kpó, bó ɖɔ nú yě ɖɔ: “Mi sa vo nú Mawu Mavɔmavɔ, bónú é ná nya běsé lɛ́ɛ sín nyɛ kpó togun ce kpó gɔ́n; énɛ́ ɔ́, un ná jó Izlayɛ́li ví lɛ́ɛ dó, bɔ yě ná yi sá vɔ̌ n'i.”

⁵Mɔyízi ka ɖɔ nú axɔ́sú ɔ́ ɖɔ: “Axɔ́sú susunɔ, vɛ̌ kó ná gbe mì! Hwe tɛ́ nu wɛ a jlǒ ɖɔ má sa vo nú Mawu Mavɔmavɔ dó hwi kpó gǎn hɔn-yitɔ́ towe lɛ́ɛ kpó togun towe kpó ta mɛ dó? Sɛ́mɛɖó, hwi ɖésú ní ɖɔ hwe ɔ́ nu. Énɛ́ ɔ́, é jɛ hwe ɔ́ nu ɔ́, un ná sa vo n'i bɔ é ná sú běsé e ɖo xɔ towe mɛ lɛ́ɛ kpó éé ɖo hɔnmɛ lɛ́ɛ kpó sín kún dó; éé ɖo tɔsisa ɔ́ mɛ lɛ́ɛ kɛ́ɖɛ́ wɛ ná kpo.”

⁶Bɔ axɔ́sú ɔ́ ɖɔ n'i ɖɔ: “É jɛ sɔ hǔn, bo bló.” Mɔyízi ka ɖɔ n'i ɖɔ: “É nyɔ́; é jɛ sɔ ɔ́, un ná bló bɔ a nǎ tunwun ɖɔ è kún sixú jlɛ́ Mawu Mavɔmavɔ, Mawu mǐtɔn dó mɛ ɖěbǔ wú ó.

⁷Běsé lɛ́ɛ ná gosín xwé towe lɛ́ɛ gbe, bó ná gosín gǎn hɔn-yitɔ́ towe lɛ́ɛ kpó mɛ é ɖo to towe mɛ lɛ́ɛ kpó sín xwé gbe; tɔsisa ɔ́ mɛ kɛ́ɖɛ́ jɛ́n yě ná kpo ɖe.”

⁸Énɛ́ ɔ́ gúdo ɔ́, Mɔyízi kpó Aalɔ́ɔn kpó tɔ́n sín axɔ́sú ɔ́ xwé. Bɔ Mɔyízi sa vo nú Mawu Mavɔmavɔ ɖɔ é ní hwlɛ́n axɔ́sú ɔ́ ɖo běsé e é sɛ́ dó lɛ́ɛ sí.

⁹Mawu Mavɔmavɔ ká bló nǔ e Mɔyízi byɔ́ ɛ ɔ́: běsé lɛ́ɛ bǐ kú gbɔn xwé gbe, kɔ́xota kɔ́xota, gbɔn gle mɛ gle mɛ.

¹⁰Bɔ è bɛ̌ yě kplé ɖó sonu sonu, bɔ wǎn kpé to ɔ́ bǐ mɛ.

¹¹Ée axɔ́sú ɔ́ sín ayi jɛ ayǐ kpɛɖé ɔ́, é lɛ́ tlí tó lě e Mawu Mavɔmavɔ ko ɖɔ gbɔn ɖ'ayǐ é; é wa nǔ e Mɔyízi kpó Aalɔ́ɔn kpó ɖɔ ɔ́ ǎ.

¹²Énɛ́ ɔ́ gúdo ɔ́, Mawu Mavɔmavɔ ɖɔ nú Mɔyízi ɖɔ: “Đɔ nú Aalɔ́ɔn ɖɔ ní dlɛ́n kpo tɔn bó zin dó kɔ́gúdu mɛ, bónú kɔ́gúdu ɔ́ ná húzú jɔ̌[5] gbɔn Ejípu to ɔ́ bǐ mɛ.”

¹³Mɔyízi kpó Aalɔ́ɔn kpó ká bló nǔ e Mawu Mavɔmavɔ ɖɔ é: Aalɔ́ɔn dlɛ́n kpo tɔn bó zin dó kɔ́gúdu mɛ; bɔ kɔ́gúdu ɔ́ húzú jɔ̌ bó kpé gbɛtɔ́ kpó kanlin kpó wú. Kɔ́gúdu e ɖo Ejípu to ɔ́ mɛ ɔ́ bǐ húzú jɔ̌.

¹⁴Majíkiblótɔ́ lɛ́ɛ lɔ bló majíki bónú jɔ̌ lɛ́ɛ ná tɔ́n, yě ká kpé wú ǎ. Jɔ̌ kpé gbɛtɔ́ kpó kanlin kpó wú.

¹⁵ Énɛ́ ɔ́, majíkiblótɔ́ lɛ́ɛ ɖɔ nú axɔ́sú ɔ́ ɖɔ: “Hlɔ̌nhlɔ́n Mawu tɔn wɛ ɖo nǔ wa wɛ ɖo fínɛ́.” Axɔ́sú ɔ́ ká lɛ́ tlí tó lě e Mawu Mavɔmavɔ kó ɖɔ gbɔn ɖ'ayǐ é; é wa nǔ e Mɔyízi kpó Aalɔ́ɔn kpó ɖɔ é ǎ.

¹⁶Mawu Mavɔmavɔ ɖɔ nu Mɔyízi ɖɔ: “A nǎ fɔ́n zǎn, bɔ hwenu e axɔ́sú Ejípu tɔn ná tɔ́n bó ná xwe tɔ nu ɔ́, a nǎ ɖɔ n'i ɖɔ: ‘Mawu Mavɔmavɔ ɖɔ: jǒ togun ce dó bónú é ní yi sɛn mì.

¹⁷Đǒtó! Nú a ma jó togun ce dó nú é yi ǎ ɔ́, un ná sɛ́ asɔfin dó we, un ná sɛ́ dó gǎn hɔn-yitɔ́ towe lɛ́ɛ, bó ná sɛ́ do togun towe kpó mɛ e ɖo xwé towe gbe lɛ́ɛ kpó. Asɔfin lɛ́ɛ ná gɔ́ Ejípunu lɛ́ɛ sín xwé gbe, bó ná kpé ayǐkúngban e jí yě ɖe ɔ́ bǐ jí.

¹⁸Amɔ̌, gbe énɛ́ ɔ́ gbe ɔ́, un ná xásá Gocɛ́ni to e mɛ togun ce nɔ nɔ ɔ́ ɖó, bɔ asɔfin ɖě ná tíin ɖo fínɛ́ ǎ, bónú a nǎ dó tunwun ɖɔ nyɛ Mawu Mavɔmavɔ ɖo to ɔ́ mɛ.

¹⁹Un ná bló bɔ vogbingbɔn ɖé ná tíin ɖo togun ce kpó togun towe kpó tɛ́ntin. Sɔ wɛ nǔ énɛ́ ɔ́ ná jɛ.’ ”

²⁰Mawu Mavɔmavɔ ká bló nǔ e é ɖɔ ɔ́. Asɔfin vun blá axɔ́sú ɔ́ sín hɔnmɛ, bó vun blá gǎn hɔn-yitɔ́ tɔn lɛ́ɛ sín xwé gbe, bó hɛn nǔ e ɖo to ɔ́ mɛ lɛ́ɛ bǐ gblé.

²¹Axɔ́sú ɔ́ ká ylɔ́ Mɔyízi kpó Aalɔ́ɔn kpó, bó ɖɔ nú yě ɖɔ: “Mi sá vɔ̌ nú Mawu mitɔn ɖo to mɛ fí.”

²²Bɔ Mɔyízi ɖɔ n'i ɖɔ: “É nyɔ́ bónú mǐ ná bló mɔ̌ ǎ, ɖó vɔ̌sánú e mǐ nɔ xwlé Mawu Mavɔmavɔ, Mawu mǐtɔn ɔ́ lɛ́ɛ ɔ́, suɖunú wɛ Ejípunu lɛ́ɛ nɔ́ dó mɔ. Ényí mǐ sɔ́ nǔ e yě nɔ́ mɔ dó mɔ suɖunú ná lɛ́ɛ dó sá vɔ̌ ná ɖo nukún yětɔn mɛ ɔ́, yě ná nyi awǐnnyaglo dó hu mǐ.

²³Hǔn, mǐ ná zun zɔnlin ɖo gbětótló mɛ xɔ azǎn atɔn, bɔ vɔ̌ e Mawu Mavɔmavɔ, Mawu mǐtɔn ná ɖɔ nú mǐ ɔ́, mǐ nǎ sá n'i ɖo fínɛ́.”

²⁴Bɔ axɔ́sú ɔ́ ɖɔ: “É nyɔ́, un ná jó mi dó bɔ mi ná yi xwlé vɔ̌sánú Mawu Mavɔmavɔ, Mawu mitɔn ɔ́ ɖo gbětótló mɛ. Amɔ̌, mi ma yi fí línlín ó, mi ka xo ɖɛ nú mì.”

²⁵Mɔyízi ka ɖɔ n'i ɖɔ: “Nú un gosín gɔ̌n towe din tlóló ɔ́, un ná sa vo nú Mawu Mavɔmavɔ. É jɛ sɔ ɔ́, é ná bló bɔ hwi kpó gǎn hɔn-yitɔ́ towe lɛ́ɛ kpó, kpó togun towe kpó sɔ́ ná mɔ asɔfin lɛ́ɛ ɖě ǎ. Amɔ̌, è ma sɔ́ blɛ́ mǐ ɖě ó, è ma sɔ́ gbɛ́ ɖě ɖɔ émí kún ná jó togun ɔ́ dó nú é ná yi sá vɔ̌ nú Mawu Mavɔmavɔ ó.”

²⁶Ée Mɔyízi ɖɔ mɔ̌ ɔ́, é gosín axɔ́sú ɔ́ gɔ́n, bó sa vo nú Mawu Mavɔmavɔ.

²⁷Mawu Mavɔmavɔ ká bló nǔ e Mɔyízi byɔ́ ɛ é, bɔ axɔ́sú ɔ́ kpó gǎn hɔn-yitɔ́ tɔn lɛ́ɛ kpó, kpó togun ɔ́ kpó ba asɔfin lɛ́ɛ kpo; é sɔ́ kpo ɖokpó géé ǎ.

²⁸Nǔ énɛ́ ɔ́ jɛ có, axɔ́sú ɔ́ lɛ́ tlí tó; é jó togun ɔ́ dó bɔ é yi ǎ.