Read fon Tíntɔ́n 9 Bible Online

Tíntɔ́n 9 - fon bible

Tíntɔ́n 9

¹Mawu Mavɔmavɔ ɖɔ nú Mɔyízi ɖɔ: “Yi axɔ́sú Ejípu tɔn ɔ́ gɔ́n, bó ɖɔ n'i ɖɔ: ‘Mawu Mavɔmavɔ, Mawu Eblée lɛ́ɛ tɔn ɔ́ ɖɔ: Jǒ togun ce dó bónú é ní yi sɛn mì.

²Ényí a gbɛ́ ɖɔ émí kún ná jó e dó bónú é ná yi ó, bó hɛn ɛ ɖó te ɔ́,

³Mawu Mavɔmavɔ ná wa nǔ xá kanlin towe e ɖo amagbo mɛ lɛ́ɛ, azɔn nyanya ɖé ná byɔ́ sɔ́ towe lɛ́ɛ, tócí towe lɛ́ɛ, lǎkúnmí towe lɛ́ɛ, nyibú towe lɛ́ɛ kpódó lɛ̌ngbɔ́ towe lɛ́ɛ kpó mɛ, bɔ yě ná kú kpɔ́ gěgé.

⁴Mawu Mavɔmavɔ ká ná tunwun Izlayɛ́li ví lɛ́ɛ sín kanlin lɛ́ɛ ɖo Ejípunu lɛ́ɛ tɔn mɛ, bɔ Izlayɛ́li ví lɛ́ɛ sín kanlin ɖěbǔ ná kú ǎ.’ ”

⁵É lɛ́ ɖɔ: “Mawu Mavɔmavɔ ɖɔ hwenu e nǔ énɛ́ ɔ́ ná jɛ dó ɔ́, é ɖɔ: ‘Sɔ wɛ un ná jlɛ́ nǔdábaɖa énɛ́ ɔ́ ɖo Ejípu to ɔ́ mɛ.’ ”

⁶Ée ayǐ hɔ́n tlóló ɔ́, Mawu Mavɔmavɔ bló nǔ e é ɖɔ ɔ́ nǔgbó; Ejípunu lɛ́ɛ sín kanlin lɛ́ɛ bǐ kú; Izlayɛ́li ví lɛ́ɛ sín kanlin ɖokpó géé ká kú ǎ.

⁷Axɔ́sú Ejípu tɔn ɔ́ sɛ́ mɛ dó ɖɔ è nǐ yi ba do nú nǔ e jɛ ɔ́; bɔ mɛ lɛ́ɛ wá ɖɔ n'i ɖɔ Izlayɛ́li ví lɛ́ɛ sín kanlin ɖokpó kún kú ó, bɔ é kpácá ɛ; é se mɔ̌ có, é lɛ́ tlí tó bó gbɛ́ ɖɔ togun ɔ́ kún ná yi ó.

⁸Énɛ́ ɔ́ gúdo ɔ́, Mawu Mavɔmavɔ ɖɔ nú Mɔyízi kpó Aalɔ́ɔn kpó ɖɔ: “Mi wún myɔkpó sín avi gɔ́ alɔgogo, bónú Mɔyízi ní nyi dó jǐ ɖo axɔ́sú ɔ́ nukún mɛ.

⁹Avi ɔ́ ná húzú afúntúntún bó ná vun kpé Ejípu to ɔ́ bǐ mɛ, bó ná zɔ́n bɔ nǔtitɛ ná tɔ́n ɖo gbɛtɔ́ kpó kanlin kpó wú gbɔn Ejípu to ɔ́ bǐ mɛ. Nǔtitɛ lɛ́ɛ ná dó sin bó ná wú, lobo ná bló agadá.”

¹⁰ Mɔyízi kpó Aalɔ́ɔn kpó wún avi, bó yi mɔ axɔ́sú ɔ́; Mɔyízi nyi avi ɔ́ dó jǐ, bɔ é húzú nǔtitɛ ɖo gbɛtɔ́ kpó kanlin kpó wú, bó nɔ́ dó sin bó nɔ wú, bó nɔ bló agadá.

¹¹Majíkiblótɔ́ Ejípu tɔn lɛ́ɛ sɔ́ sixú wá Mɔyízi gɔ́n ǎ, ɖó agadá ɖo yě ɖésúnɔ wú, Ejípunu ɖe lɛ́ɛ bǐ ɖɔhun.

¹²Lo ɔ́, Mawu Mavɔmavɔ zɔ́n bɔ axɔ́sú ɔ́ lɛ́ tlí tó; é wa nǔ e Mɔyízi kpó Aalɔ́ɔn kpó ɖɔ ɔ́ ǎ, lě e Mawu Mavɔmavɔ kó ɖɔ gbɔn nú Mɔyízi ɖ'ayǐ é.

¹³Mawu Mavɔmavɔ ɖɔ nú Mɔyízi ɖɔ: “Fɔ́n zǎn yi axɔ́sú Ejípu tɔn ɔ́ gɔ́n, bó ɖɔ n'i ɖɔ: ‘Mawu Mavɔmavɔ, Mawu Eblée lɛ́ɛ tɔn ɔ́ ɖɔ: Jǒ togun ce dó, bónú é ní yi sɛn mì.

¹⁴Đó din tɔn ɔ́, un ná sɛ́ nǔ nyanya e ɖo así ce lɛ́ɛ bǐ dó hwi kpó gǎn hɔn-yitɔ́ towe lɛ́ɛ kpó, kpó togun towe kpó, bónú a nǎ dó tunwun ɖɔ è kún sixú jlɛ́ mì dó mɛ ɖěbǔ wú ɖo ayǐkúngban ɔ́ jí ó.

¹⁵Nú un ko wa nǔ xá we, bó dɔn azɔn baɖabaɖa byɔ́ hwi kpó togun towe kpó tɛ́ntin din ɔ́, mi bǐ ná kú sín ayǐkúngban ɔ́ jí.

¹⁶ Lo ɔ́, un jó we dó nyi gbɛ bó ná ɖe hlɔ̌nhlɔ́n ce xlɛ́ we, lobɔ nyǐkɔ ce ná gba kpé ayǐkúngban ɔ́ bǐ jí.

¹⁷Káká jɛ din ɔ́, a ɖo nǔ e jló we ɔ́ wa xá togun ce wɛ, bó gbɛ́ ɖɔ émí kún ná jó e dó bɔ é ná yi ó.

¹⁸Énɛ́ ɔ́ wú ɔ́, un ná bló bɔ sɔ ɖo gan élɔ́ mɛ ɔ́, kɛ́njí ná ja ɖésú; sín gbe e gbe è ɖǒ Ejípu to ɔ́ ayǐ káká wá jɛ égbé ɔ́, kɛ́njí mɔ̌hunkɔtɔn kó ja ɖo Ejípu ǎ.

¹⁹Hǔn, sɛ kanlin towe lɛ́ɛ kpó nǔ e a ɖǒ ɖo gleta lɛ́ɛ bǐ kpó xwe. Đó kɛ́njí ná ja kɔn nyi gbɛtɔ́ kpó kanlin kpó e má ná ɖo xɔ mɛ ǎ, bó ná ɖo gle mɛ lɛ́ɛ bǐ jí, bɔ yě ná kú.’ ”

²⁰Yě mɛ e ɖo gǎn hɔn-yitɔ́ axɔ́sú ɔ́ tɔn lɛ́ɛ mɛ, bó mɔ Mawu Mavɔmavɔ xó ɔ́ dó mɔ nǔjɔnǔ lɛ́ɛ kplá mɛsɛntɔ́ yětɔn lɛ́ɛ kpó kanlin yětɔn lɛ́ɛ kpó dó xɔ mɛ.

²¹Lo ɔ́, yě mɛ e ma ké ya nú Mawu Mavɔmavɔ xó ɔ́ ǎ lɛ́ɛ jó mɛsɛntɔ́ yětɔn lɛ́ɛ kpó kanlin yětɔn lɛ́ɛ kpó dó nyi gle mɛ.

²²Mawu Mavɔmavɔ ká ɖɔ nú Mɔyízi ɖɔ: “Dlɛ̌n alɔ dó jǐnukúnsin, bónú kɛ́njí ní ja ɖo Ejípu to ɔ́ bǐ mɛ kɔn nyi gbɛtɔ́ kpó kanlin kpó gběhan kpó bǐ jǐ.”

²³Énɛ́ ɔ́, Mɔyízi dlɛ́n kpo tɔn dó jǐnukúnsin, Mawu Mavɔmavɔ ɖɔ bɔ jǐ nɔ́ dó gbe, kɛ́njí ja; jǐ dó gbe bó nɔ́ nyí awǎn. Mawu Mavɔmavɔ ɖɔ bɔ kɛ́njí ja kɔn nyi Ejípu to ɔ́ mɛ.

²⁴ Kɛ́njí ja bɔ jǐ dó gbe lobo nɔ nyí awǎn gbɔn mɛ. Kɛ́njí ɔ́ ja ɖésú; é ja káká bɔ è ko mɔ mɔ̌hunkɔtɔn ɖě kpɔ́n gbeɖé ɖo Ejípu to ɔ́ bǐ mɛ, sín hwenu e é kó nyí to dó é ǎ.

²⁵Kɛ́njí ɔ́ ja gbɔn Ejípu to ɔ́ bǐ mɛ, bó xo nǔ e kó ɖo gle mɛ lɛ́ɛ bǐ, gbɛtɔ́ kpó kanlin kpó bɔ bǐ kú; é ja kɔn nyi gběhan e ɖo gle mɛ lɛ́ɛ lɔ jí, bó lɔ́ atín e ɖo zunkan mɛ lɛ́ɛ.

²⁶Gocɛ́ni tomɛ fí e Izlayɛ́li ví lɛ́ɛ ɖe ɔ́ kɛ́ɖɛ́ jɛ́n kɛ́njí ɔ́ má ja ɖe ǎ.

²⁷Bɔ axɔ́sú ɔ́ ylɔ́ Mɔyízi kpó Aalɔ́ɔn kpó bó ɖɔ nú yě ɖɔ: “Din tɔn ɔ́, nyɛ wɛ hu hwɛ; Mawu Mavɔmavɔ wɛ nyí hwɛjijɔnɔ, nyɛ kpó togun ce kpó wɛ wa nǔ nyi do.

²⁸Mi sa vo nú Mawu Mavɔmavɔ, bónú é ma sɔ́ dó gbe ɖě ó, kɛ́njí ní má sɔ́ ja ɖě ó. Énɛ́ ɔ́, un ná jó mi dó, bɔ mi ná yi; è sɔ́ ná hɛn mi ɖó te ɖě ǎ.”

²⁹Énɛ́ ɔ́, Mɔyízi ɖɔ n'i ɖɔ: “Un tɔ́n sín toxo ɔ́ mɛ ɔ́, un ná dlɛ́n alɔ sɛ́ dó Mawu Mavɔmavɔ, bɔ jǐ sɔ́ ná dó gbe ɖě ǎ, kɛ́njí ká sɔ́ ná ja ɖě ǎ; énɛ́ ɔ́, a nǎ tunwun ɖɔ Mawu Mavɔmavɔ tɔn wɛ nyí ayǐkúngban ɔ́.

³⁰Lo ɔ́, un tunwun ɖɔ hwi kpó gǎn hɔn-yitɔ́ towe lɛ́ɛ kpó kún ɖó sísí nú Mawu Mavɔmavɔ ó.”

³¹“Kɛ́njí ɔ́ hɛn ɔ́ji ɔ́ bǐ gblé, é lɛ́ hɛn lɛ̌ɛnkantín lɔ bǐ gblé; ɖó ɔ́ji ɔ́ kó sɛ́n, bɔ lɛ̌ɛnkantín ɔ́ kó wlí sɛ́;

³²kɛ́njí ka wa nǔɖé nú jinukún e è nɔ ylɔ́ ɖɔ blěe ɔ́, kpó éé è nɔ ylɔ́ ɖɔ epotlu ɔ́ kpó ǎ; ɖó yě nɔ́ yá wǔ sɛ́n ǎ.”

³³Mɔyízi ka tɔ́n sín axɔ́sú ɔ́ xwé, bó gosín toxo ɔ́ mɛ; é dlɛ́n alɔ sɛ́ dó Mawu Mavɔmavɔ, bɔ jǐ e ɖo gbe dó wɛ ɔ́ kpó kɛ́njí e ɖo jija wɛ ɔ́ kpó xwɛ; bɔ jǐ sɔ́ ja ɖě ǎ.

³⁴Ée axɔ́sú ɔ́ mɔ ɖɔ jǐ kpó kɛ́njí kpó, kpó jǐ e ɖo gbe dó wɛ ɔ́ kpó bǐ xwɛ ɔ́, é lɛ́ jɛ hwɛ hu jí bɔ é kpó gǎn hɔn-yitɔ́ tɔn lɛ́ɛ kpó lɛ́ jɛ tó tlí jí.

³⁵Axɔ́sú ɔ́ lɛ́ tlí tó bó gbɛ́ ɖɔ Izlayɛ́li ví lɛ́ɛ kún ná yi ó, lě e Mawu Mavɔmavɔ kó ɖɔ gbɔn ɖ'ayǐ gbɔn Mɔyízi jí é.