Read fon Jɔ̌bu 1 Bible Online

Jɔ̌bu 1 - fon bible

Jɔ̌bu 1

¹Nya ɖé tíin ɖo Wúsi bɔ è nɔ ylɔ́ ɛ ɖɔ Jɔ̌bu. È nɔ mɔ nǔ jɛ do ɖě ɖɔ dó nya énɛ́ ɔ́ wú ǎ; é nɔ́ wa nǔ jlɔ́jlɔ́, é ɖo gbejí nú Mawu, é nɔ́ hɔn nú nǔ nyanya wiwa.

²Nya énɛ́ ɔ́ ɖó vǐ súnnu tɛ́nwe, vǐ nyɔ̌nu atɔn.

³É ɖó gbɔ̌ děgba ɖě afɔwó-afatɔ́n (7.000), lǎkúnmí afɔwó-afatɔ́n (3.000), nyibú we we donu afɔwe kanwe ko (500), tócí asi afɔwe kanwe ko (500). É ɖó azɔ̌watɔ́ kɔn nyi kpɔ́. Nya nukúnɖéjí ɖaxó bǐ e ɖo to ɖěɖě e ɖo zǎnzǎnhwe jí nú Judɛ́ɛn tɔ ɔ́ lɛ́ɛ é wɛ.

⁴Vǐ tɔn súnnu lɛ́ɛ nɔ́ yi yěɖée xwé, bó nɔ́ ɖu agɔ̌ mɛ jí jɛ mɛ jí jɛ. Yě nɔ́ ylɔ́ nɔví yětɔn nyɔ̌nu atɔn lɛ́ɛ, bɔ yě nɔ́ nɔ kpɔ́ bó nɔ́ ɖu nǔ, bó nɔ́ nu ahan.

⁵Nú yě ɖu agɔ̌ fó ɔ́, Jɔ̌bu nɔ ylɔ́ yě bó nɔ́ slá wǔ nú yě. Ayǐhɔ́ngbe tɔn ɔ́, é nɔ́ fɔ́n zǎn, bó nɔ́ sá vɔ̌ e è nɔ dó zo ɔ́ nú Mawu, dó vǐ lɛ́ɛ ɖokpó ɖokpó ta mɛ, ɖó é nɔ́ ɖo ɖiɖɔ dó ayi mɛ wɛ ɖɔ: “È nɔ nywɛ́ ǎ, vǐ ce lɛ́ɛ sixú kó hu hwɛ ɖé din. Yě sixú ko dó nu Mawu ɖo ayi mɛ.” Lě e Jɔ̌bu nɔ wa nǔ gbɔn tɛgbɛ ɔ́ nɛ́.

⁶É ká wá su gbe ɖokpó, bɔ wɛnsagun Mawu tɔn lɛ́ɛ ɖo gbe ɖó nú Mawu Mavɔmavɔ wɛ, bɔ Satáan, hwɛdómɛtɔ́ ɔ́ lɔ wá xwetɔ́n ɖo yě tɛ́ntin.

⁷Mawu Mavɔmavɔ kanbyɔ́ ɛ ɖɔ: “Fítɛ́ a gosín?” Bɔ hwɛdómɛtɔ́ ɔ́ yí gbe n'i ɖɔ: “Ayǐkúngban ɔ́ jí wɛ un yi ɖi sa gbɔn.”

⁸Ée é ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “A ma mɔ mɛsɛntɔ́ ce Jɔ̌bu a? Étɔn ɖɔhun ɖě ɖo ayǐkúngban ɔ́ jí ǎ. Mɛ ɖé wɛ é nyí bɔ è nɔ mɔ nǔ jɛ do ɖě ɖɔ dó wǔ tɔn ǎ, é nɔ́ wa nǔ jlɔ́jlɔ́, é ɖo gbejí nú mì, é nɔ́ hɔn nú nǔ nyanya wiwa.”

⁹ Hwɛdómɛtɔ́ ɔ́ lɛ́ yí xó, bó ɖɔ: “Yǎyá wɛ Jɔ̌bu ɖo gbejí nú we a?

¹⁰É má nyí hwi wɛ cyɔ́n alɔ é kpódó mɛ tɔn lɛ́ɛ kpó, kpódó dɔkun tɔn lɛ́ɛ kpó jí a? A blǒ bɔ nǔ e wa wɛ é ɖe ɔ́ ɖo yiyi n'i wɛ ganjí, bɔ kanlin tɔn lɛ́ɛ gba kpé to ɔ́ bǐ mɛ.

¹¹Vɛ̌ hɛn nǔ tɔn lɛ́ɛ gblé din, bó ná kpɔ́n ɖɔ é má ná dó nu we agbawungba a jí.”

¹²Énɛ́ ɔ́, Mawu Mavɔmavɔ ɖɔ nú hwɛdómɛtɔ́ ɔ́ ɖɔ: “É nyɔ́, a hɛn ɔ́, a nǎ yí nǔ e é ɖó lɛ́ɛ bǐ, amɔ̌, ma nú alɔ towe jɛ wǔ tɔn ó.” Ée Mawu Mavɔmavɔ ɖɔ mɔ̌ ɔ́, hwɛdómɛtɔ́ ɔ́ gosín nukɔn tɔn.

¹³É wá su gbe ɖokpó, bɔ Jɔ̌bu sín vǐ lɛ́ɛ, súnnu kpó nyɔ̌nu kpó kplé ɖo fofó yětɔn ɖaxó ɔ́ xwé bó ɖo nǔ ɖu wɛ, bó ɖo vɛ̌ɛn nu wɛ,

¹⁴bɔ mɛsɛntɔ́ ɖokpó yi Jɔ̌bu xwé bó ɖɔ n'i ɖɔ: “Nyibú lɛ́ɛ ɖo gle lɛ wɛ, bɔ tócí asi lɛ́ɛ ɖo ama ɖu wɛ ɖo akpá yětɔn,

¹⁵Sevanu lɛ́ɛ ká wá zɔn kanlin lɛ́ɛ mɛ, bó bɛ́ yě yi, bó hu mɛsɛntɔ́ towe lɛ́ɛ bǐ ɖó hwǐ wú. Nyɛ ɖokpónɔ géé wɛ hɔn ɖo yě mɛ, bó ɖɔ má wá ɖɔ nú we.”

¹⁶Énɛ́ ɔ́ ɖɔ wɛ é kpo ɖe, bɔ mɛsɛntɔ́ ɖěvo wá, bó ɖɔ: “So jɛ lɛ̌ngbɔ́ towe lɛ́ɛ kpó mɛsɛntɔ́ towe lɛ́ɛ kpó, bɔ yě bǐ fyɔ́. Nyɛ ɖokpónɔ wɛ gán ɖ'é mɛ, bó ɖɔ má wá ɖɔ nú we.”

¹⁷Mɛsɛntɔ́ énɛ́ kpo ɖo xó ɖɔ wɛ, bɔ mɛsɛntɔ́ ɖěvo wá, bó ɖɔ: “Kaludéenu lɛ́ɛ so gbɛ̌ta atɔn bó wá zɔn lǎkúnmí towe lɛ́ɛ mɛ, bó bɛ́ yě yi, bó hu mɛsɛntɔ́ towe lɛ́ɛ ɖó hwǐ wú. Nyɛ ɖokpónɔ géé wɛ hɔn ɖo yě mɛ, bó ɖɔ má wá ɖɔ nú we.”

¹⁸Énɛ́ ɔ́ ɖɔ wɛ mɛ énɛ́ kpo ɖe, bɔ mɛsɛntɔ́ ɖěvo wá, bó ɖɔ: “Vǐ towe lɛ́ɛ ɖo nǔ ɖu wɛ, bó ɖo vɛ̌ɛn nu wɛ, ɖo fofó yětɔn xwé,

¹⁹bɔ jɔhɔn ɖaxó ɖé sí te sín gbětótló mɛ, bó nyi kpódó hlɔ̌nhlɔ́n kpó, bɔ xɔ e mɛ yě ɖe ɔ́ mu, bɔ mɛ wínnyáwínnyá nɛ́ lɛ́ɛ bǐ kú. Nyɛ ɖokpónɔ géé wɛ gán ɖ'é mɛ, bó ɖɔ má wá ɖɔ nú we.”

²⁰Ée Jɔ̌bu se xó nɛ́ lɛ́ɛ ɔ́, é sí te, bó hɛn awu ɖaxó e ɖo kɔ tɔn é vún, bó xwlɛ́ ta, bó húzú jɛ kpoli bó ɖe kɔ́,

²¹bó ɖɔ: “Mɛ̌ wɛ un zɔn sín nɔ ce xomɛ, bó ká ná lɛ́ zɔn mɛ̌ byɔ́ kɔ́ glɔ́. Mawu Mavɔmavɔ wɛ ná, Mawu Mavɔmavɔ wɛ ka lɛ́ yí, susu nú Mawu Mavɔmavɔ.”

²²Nǔ énɛ́ lɛ́ɛ bǐ gbo Jɔ̌bu, có é ká hu hwɛ ɖěbǔ ǎ, é ɖɔ nǔ ɖěbǔ nyi do nú Mawu ǎ.