Read fon Jɔ̌bu 10 Bible Online

Jɔ̌bu 10 - fon bible

Jɔ̌bu 10

¹Gbɛ cikɔ nú mì, un ná ɖɔ nǔ e ɖo xíxá mì wɛ ɔ́ lo; un ná nɔ abwɛ̌ ǎ, un ɖo wǔvɛ́ mɔ wɛ ɖo ayi mɛ dín.

²Un ná ɖɔ nú Mawu lo ɖɔ: Ma ɖó hwɛ nú mì ó! Đɔ nǔ e un wa nyi do ɔ́ nú mì.

³Ya dó nú mì nɔ́ víví nú we wɛ a? Wǎn gbɛ́ nú nǔ e hwi ɖésú zé alɔ towe dó bló ɔ́ nɔ́ víví nú we wɛ a? É nyɔ́ ɖɔ a nǐ dó alɔ mɛdídá lɛ́ɛ sín tito mɔ̌ a?

⁴Nukún towe nɔ mɔ nǔ hú gbɛtɔ́ lɛ́ɛ tɔn ǎ wɛ a? Nukúnnú mɔ jɛ nǔ mɛ gbɛtɔ́ tɔn wɛ a ɖǒ a?

⁵Xwe e gbɛtɔ́ lɛ́ɛ nɔ́ nɔ gbɛ xɔ ɔ́ jɛ́n hwi lɔ nɔ nɔ xɔ a? Xwe kpɛɖé jɛ́n hwi lɔ ná bló mǐ ɖɔhun a?

⁶Hwi ɖíe má cí mǐ gbɛtɔ́ lɛ́ɛ ɖɔhun ǎ e! Bɔ étɛ́wú a ka ɖo hwlɛndó jí bó ná tunwun nǔ e un wa nyi do é? Étɛ́wú hwɛ e un hu ɔ́ wú ná mɔ nǔ jɛ ká myá nukún nú we sɔ mɔ̌?

⁷A ka tunwun ganjí ɖɔ un kún wa nǔɖé nyi do ó; mɛɖé kún ka sixú hwlɛ́n mì ɖo así we ó.

⁸Alɔ towe ɖésú wɛ bló mì, hwi wɛ ján mì, alɔ ɖokpó énɛ́ jɛ́n a ka lɛ́ myɔ́ dó mì, bó jló ná gblé gbɛ dó nú mì.

⁹Flín ganjí: hwi wɛ sɔ́ ko dó bló mì zɛ̌n ɖɔhun! Bɔ din ɔ́, a ka ná lɛ́ sɔ́ mì dó húzú kɔ́gúdu a?

¹⁰Hwi wɛ kɔn mì dó nɔ ce xomɛ anɔ̌sin ɖɔhun, bɔ un wá ló amɔ̌ ɖɔhun ǎ cé?

¹¹A sɔ́ xú kpó kan kpó dó ján mì; a bǔ anyǔ kpó lanti kpó dó mì.

¹²A nǎ gbɛ mì, a nyɔ̌ xomɛ dó wǔ ce; be e a lě nú mì lɛ́ɛ hɛn mì ɖó gbɛ.

¹³Lo ɔ́, a ɖo nǔɖé sɔ́ hwlá dó mì wɛ; un ka tunwun nǔ e ɖo xo towe mɛ é:

¹⁴Un ɖo nǔɖé wa nyi do wɛ ɔ́, a nɔ jló ná nɔ́ gbo mì dó ɖ'é kɔn, bó ná sɔ́ hwɛ ɖě kɛ mì gbeɖé ǎ.

¹⁵Nú un hu hwɛ hǔn, cu ta mì nɛ́! Un na bo ɖo xomɛ vɔ́ ɔ́, un ná glá zé ta ǎ, ɖó winnyá hu mì dín. Gbɛ ce blá wǔ mɛ nya!

¹⁶Nú un ɖɔ má zé ta lě ɔ́, a nɔ zun dó jǐ ce kinnikínní ɖɔhun; a nɔ jlɛ́ nǔ xá mì bɔ ado nɔ hu mì.

¹⁷A nɔ tɔ́n ahwan mì ɖě jɛ ɖě gúdo, xomɛ e sin dó mì wɛ a ɖe ɔ́ nɔ́ lɛ́ ɖo syɛ́nsyɛ́n d'é jí wɛ; a sɛ́ ahwanfuntɔ́ towe lɛ́ɛ dó mì ɖě jɛ ɖě gúdo.

¹⁸Aniwú wɛ a ka ɖe mì tɔ́n sín nɔ ce xomɛ? Un ná kó kú ɖo nɔ ce xomɛ, bɔ mɛɖé ná mɔ mì ǎ.

¹⁹Un na kó kú ɖo nɔ ce xomɛ, bó ná kó zɔn tlɔlɔ yi yɔdo mɛ. Énɛ́ ɔ́, un ná cí mɛ e ma tíin gbeɖé ǎ ɖɔhun.

²⁰Gbɛ sin kpɛɖé jɛ́n kpo nú mì din. Bo gɔn ahwan tɔ́n mì sɔ mɔ̌ bó, jǒ mì dó lo, bónú má nu gbɛ sin kpɛ e kpo nú mì ɔ́.

²¹Zaanɖé din ɔ́, un ná ɖidó to e mɛ è nɔ yi bó má sɔ́ nɔ́ lɛ́ kɔ ǎ é, zǐnflú gɔngɔn sín to ɔ́ mɛ.

²²To e mɛ zǎn kpó nǔ hannyahannya kpó ɖu axɔ́sú ɖe é, to e mɛ kéze nyí ablu gɔngɔn ɖe é.