Read fon Jɔ̌bu 2 Bible Online

Jɔ̌bu 2 - fon bible

Jɔ̌bu 2

¹É wá su gbe ɖokpó bɔ wɛnsagun Mawu tɔn lɛ́ɛ ɖo gbe ɖó nú Mawu Mavɔmavɔ wɛ, bɔ hwɛdómɛtɔ́ ɔ́ lɔ wá xwetɔ́n ɖo tɛ́ntin yětɔn, bó ná ɖó nǔ e é lɔmɔ̌ wa ɔ́ sín gbe.

²Mawu Mavɔmavɔ kanbyɔ́ ɛ ɖɔ: “Fítɛ́ a gosín?” Hwɛdómɛtɔ́ ɔ́ yí gbe n'i ɖɔ: “Ayǐkúngban ɔ́ jí wɛ un yi ɖi sa gbɔn.”

³Ée é ɖɔ mɔ̌ ɔ́, Mawu Mavɔmavɔ ɖɔ n'i ɖɔ: “A ma mɔ mɛsɛntɔ́ ce Jɔ̌bu a? Étɔn ɖɔhun ɖě ɖo ayǐkúngban ɔ́ jí ǎ. È nɔ mɔ nǔ jɛ do ɖě ɖɔ dó nya énɛ́ ɔ́ wú ǎ; é nɔ́ wa nǔ jlɔ́jlɔ́, é ɖo gbejí nú mì, é nɔ́ hɔn nú nǔ nyanya wiwa. Mɛ ɖěbǔ nɔ́ mɔ nǔ nyanya kwín ɖokpó lě ɖɔ dó wǔ tɔn ǎ. A ba, bɔ un dó ya n'i dó wǔvɔ́.”

⁴Hwɛdómɛtɔ́ ɔ́ ká lɛ́ yí xó bó ɖɔ: “Lɛ̌ ba ayixa ɖěvo; gbɛtɔ́ nɔ́ jó nǔ e é ɖó ɔ́ bǐ bó nɔ́ dó hwlɛ́n gbɛ éɖée tɔn gán.

⁵Vɛ̌ nú alɔ towe jɛ wǔ tɔn din, bónú a nǎ kpɔ́n ɖɔ é má ná dó nu we agbawungba a jí.”

⁶Bɔ Mawu Mavɔmavɔ ɖɔ nú hwɛdómɛtɔ́ ɔ́ ɖɔ: “É nyɔ́! Un jó e nú we, amɔ̌, ma nú alɔ towe jɛ gbɛ tɔn wú ó.”

⁷Ée Mawu Mavɔmavɔ ɖɔ mɔ̌ ɔ́, hwɛdómɛtɔ́ ɔ́ gosín nukɔn tɔn, bó yi dó wǔtuzɔn baɖabaɖa ɖé Jɔ̌bu, sín afɔ káká yi ta.

⁸Jɔ̌bu nɔ zé zɛ̌nlákwɛ́ dó klú wǔtu, bó nɔ́ jínjɔ́n afín mɛ.

⁹Asi tɔn ɖɔ n'i ɖɔ: “È nǎ mɔ nǔ jɛ do ɖé ɖɔ dó wǔ we ǎ ba wɛ jɛ́n a ɖe. A gbɔ bo dó nu Mawu bó kú ɔ́, é nyɔ́ hú.”

¹⁰Ée asi tɔn ɖɔ mɔ̌ ɔ́, é ɖɔ n'i ɖɔ: “A nɔ ɖɔ xó nyɔ̌nu e ayixa tɔn ma sɔgbe ǎ é ɖɔhun. Mawu sɔ́ ɖagbe wá ɔ́, mǐ nɔ yí, é sɔ́ nyanya wá ɔ́, mǐ nǎ gbɛ́ wɛ a?” Nǔ énɛ́ lɛ́ɛ bǐ gbo Jɔ̌bu, có é hu hwɛ ɖěbǔ ɖo xó ɖiɖɔ mɛ ǎ.

¹¹Jɔ̌bu sín xɔ́ntɔn atɔn se nǔ e ɖo gbigbo e wɛ lɛ́ɛ. Xɔ́ntɔn tɔn atɔn lɛ́ɛ sín nyǐkɔ ɖíe: Elifázi, Temaninu wɛ; Biludádi, Cuwáxinu wɛ; Sofáa, Naamánu wɛ. Fí yětɔn yětɔn wɛ yě gosín wá. Yě ɖó gbe kpɔ́, bó ná ɖe wǎn yíyí e yě ɖǒ nú Jɔ̌bu ɔ́ xlɛ́ ɛ, bó ná dó wǔsyɛ́n lanmɛ n'i.

¹²Ée yě mɔ ɛ sɛ́ dó ɔ́, yě sɔ́ tunwun i ǎ. Énɛ́ ɔ́, yě dó avǐ gbe bó ya káká. Yě vún awu ɖaxó e ɖo kɔ yětɔn é, bó lɛ kɔ́ dó ta.

¹³Énɛ́ ɔ́ gúdo ɔ́, yě jínjɔ́n kɔ́ mɛ xá Jɔ̌bu xɔ kéze tɛ́nwe, zǎn tɛ́nwe. Yě kɛ nu dó wǔ tɔn ǎ, ɖó yě mɔ ɖɔ é ɖo wǔvɛ́ mɔ wɛ dín.