Read fon Jɔ̌bu 24 Bible Online

Jɔ̌bu 24 - fon bible

Jɔ̌bu 24

¹Nɛ̌ ká gbɔn bɔ Nǔbǐwúkpétɔ́ ɔ́ má zé azǎn ɖé lɛ́ɛ ɖó vo, bó ná nɔ́ dó ɖɔ hwɛ ǎ? Nɛ̌ ká gbɔn bɔ mɛ e tunwun i lɛ́ɛ má nɔ mɔ ɖɔ é ɖo hwɛ ɖɔ wɛ nǔgbó a?

²Mɛ ɖé lɛ́ɛ nɔ sɛ tɛn nú gle sín dogbó lɛ́ɛ, mɛ ɖěvo lɛ́ɛ nɔ fin lɛ̌ngbɔ́, bó nɔ́ ná nǔɖuɖu yě.

³Mɛ ɖé lɛ́ɛ nɔ klá jɛ tócí tɔ́cyɔvǐ tɔn nu, abǐ yě nɔ́ yí nyibú asúkúsi tɔn ɖó gbanu.

⁴Yě nɔ́ kpíkpé gbɛ̌dónánɔ lɛ́ɛ sín ali jí. Wamamɔnɔ e ɖo to ɔ́ mɛ lɛ́ɛ nɔ́ gbɔ bó nɔ́ sɔ́ yěɖée hwlá.

⁵Wamamɔnɔ lɛ́ɛ nɔ wa nǔ tócí e nɔ́ nɔ gbětótló mɛ lɛ́ɛ ɖɔhun, yě nɔ́ fɔ́n zǎn dó azɔ̌ wǔ, lobo nɔ ba nǔɖuɖu nú vǐ yětɔn lɛ́ɛ ɖo zunkan mɛ.

⁶Yě nɔ́ ba gběhan gbɔn gle lɛ́ɛ mɛ. Yě nɔ́ gbɛ vǐwun mɛdídá lɛ́ɛ tɔn.

⁷Yě nɔ́ dɔ́ godé; yě ɖǒ avɔ e yě ná cyɔ́n dó glɔ́n jɔhɔn é ǎ.

⁸Sókanmɛjí nɔ́ ja bó nɔ xo yě; yě nɔ́ yí yɛ dó só wú, ɖó yě ɖǒ xɔ ta ǎ.

⁹Mɛdídá nɔ ɖe tɔ́cyɔvǐ sín nɔ tɔn kɔn. É nɔ́ ɖɔ wamamɔnɔ na zé nǔ ɖó gbanu.

¹⁰Wamamɔnɔ nɔ zɔn mɛ̌ jɔgbe, ɖó yě sɔ́ ɖó avɔ ɖěbǔ ǎ. Yě nɔ́ ɖo xovɛ́, nǔɖuɖu ká nɔ́ ɖo ta nú yě.

¹¹Yě nɔ́ ɖa ami ɖo mɛdídá lɛ́ɛ sín xwé gbe; yě nɔ́ fyɔ́n vǐwun, bó ká nɔ sixú dó ɖɛ̌ ǎ.

¹²È nɔ se azɔn e wɛn wɛ mɛ e ɖo kúdonu lɛ́ɛ ɖe ɔ́, ɖo toxo ɔ́ mɛ. Mɛ e gblé wǔ lɛ́ɛ nɔ́ ɖo alě ná wɛ, Mawu ká ké ya nú nǔ baɖabaɖa nɛ́ lɛ́ɛ e ɖo jijɛ wɛ ɔ́ ǎ.

¹³Mɛdídá lɛ́ɛ ɖo mɛ e ma yí wǎn nú wěziza ǎ lɛ́ɛ mɛ; yě nɔ́ gbɔn ali e jí wěziza ɖe lɛ́ɛ ǎ, yě gosín ali énɛ́ lɛ́ɛ jí.

¹⁴Wun ɖo kinkɛn wɛ ɔ́, mɛhutɔ́ nɔ́ fɔ́n, bó nɔ́ hu wamamɔnɔ, mɛ e ma ɖó mɛɖé ǎ é. Zǎn ká bɔ ɔ́, é nɔ́ húzú ajotɔ́.

¹⁵Mɛsibatɔ́ nɔ́ ɖo zǎn kúkú nɔ te kpɔ́n wɛ bó nɔ́ ɖɔ mɛɖé kún ná mɔ émí ó, lobo nɔ cyɔ́n nǔ nukún mɛ.

¹⁶Zǎn mɛ ɔ́, ajotɔ́ lɛ́ɛ nɔ tɔ́n dǒ; kéze ɔ́, yě nɔ́ sú hɔn dó ta; yě nɔ́ ba wěziza xó ǎ.

¹⁷Zǎn kú ɔ́ wɛ ayǐ yětɔn nɔ́ hɔ́n[10]. Yě wɛ nyí mɛ e nɔ dó xɛsi mɛ ɖo zǐnflú gɔngɔn mɛ lɛ́ɛ.

¹⁸Étɛ́ ɖíe! Mɛdídá fúɖá ɖo tɔ nukún mɛ mɛ nya! È ko dó nu nɔtɛn tɔn ɖo ayǐkúngban ɔ́ jí. É ná mɔ ali e yi vǐwungbo tɔn mɛ ɔ́ ǎ.

¹⁹Lě e ayǐkúngban xúxú nɔ nu kɛ́njí gbɔn ɔ́, mɔ̌ wɛ kútomɛ nɔ mi hwɛhutɔ́ gbɔn.

²⁰Étɛ́! Nyɔ̌nu e ji i ɔ́ ná wɔn ɛ; é ná húzú nǔɖuɖu ɖagbe nú wǎnvú; mɛɖé sɔ́ ná flín i vɔ́vɔ́ ǎ. È nǎ fɔ ɖɔ nú nǔ nyanya atín ɖɔhun.

²¹Mɛdídá lɛ́ɛ dó ya nú nyɔ̌nu e má ɖó vǐ ǎ é, yě nyɔ́ xomɛ dó asúkúsi wú ǎ.

²²Lo ɔ́, Mawu ɖó hlɔ̌nhlɔ́n e ná nya gǎnhúnǔtɔ́ lɛ́ɛ é; é sí te ɔ́, yě nɔ́ tunwun ɖɔ émí kún sɔ́ ná nɔ gbɛ ó.

²³Mawu nɔ tín dó yě hwe ɖé lɛ́ɛ nu, bɔ yě nɔ́ vɛdó ɖɔ mɔ̌ wɛ sín; lo ɔ́, nukún tɔn ká nɔ ɖo nǔ e wa wɛ yě ɖe lɛ́ɛ bǐ wú.

²⁴Yě nɔ́ su zogbe, bɔ nukikɛ ɖokpó mɛ kpowun ɔ́, xó yětɔn ká nɔ́ fó. Yě nɔ́ j'ayǐ, yě nɔ́ kú gbɛtɔ́ bǐ ɖɔhun. È ya yě jinukún ɖɔhun.

²⁵Mɛ̌ wɛ ná ɖɔ nǔ kún nyí mɔ̌ ó? Mɛ̌ wɛ ná gbɛ́ xó e un ɖɔ é?