Read fon Jɔ̌bu 28 Bible Online

Jɔ̌bu 28 - fon bible

Jɔ̌bu 28

¹Nǔgbó wɛ, fí e è nɔ kun kpatágan ɖe ɔ́ tíin, fí e è nɔ kun siká bó nɔ́ kɔn ɖe ɔ́ tíin.

²Gan ɔ́, ayǐkúngban lanmɛ wɛ è nɔ kun sín. Ganvɔ ɔ́, awǐnnya ɖé lɛ́ɛ wɛ è nɔ sínsín bó nɔ mɔ ɖ'é mɛ.

³Mɛ e nɔ wa azɔ̌ énɛ́ lɛ́ɛ nɔ́ hɛn zogbɛ́n yi ayǐkúngban glɔ́; yě nɔ́ kíjé awǐnnya lɛ́ɛ káká yi kɔ́ glɔ́ bǐ bó nɔ́ yi ba awǐnnya e ɖo hwlǎhwlá ɖo nǔglɔ́ bǐ ɖo ablu mɛ lɛ́ɛ.

⁴Yě nɔ́ ɖe ali gbɔn kɔ́ glɔ́, ɖo fí e xwé ɖé má yá ǎ é. Fí ɔ́ nɔ lín dó gbɛtɔ́ lɛ́ɛ; mɛɖé nɔ gbɔn fínɛ́ ǎ, bɔ azɔ̌watɔ́ lɛ́ɛ nɔ zɔn kan mɛ, bó nɔ xo yi aɖisí amyɔ.

⁵Ayǐkúngban ɔ́ jí wɛ jinukún nɔ́ nyɔ́ ɖe. Nǔ e ká ɖo jijɛ wɛ ɖo ayǐkúngban ɔ́ glɔ́ mɔ̌ ɔ́ cí nǔ e è bɔ myɔ dó bɔ é ɖo agbǎn hun wɛ ɔ́ ɖɔhun.

⁶Awǐnnya tɔn lɛ́ɛ mɛ wɛ awǐnnya xɔ akwɛ́ safíi lɛ́ɛ ɖe; awǐnnya tɔn lɛ́ɛ ɖokpó ɔ́ mɛ wɛ è nɔ mɔ sikálinfín ɖe.

⁷Aklasú tunwun ali e ɖo ayǐkúngban glɔ́ lɛ́ɛ é ǎ; Nǔsáxɛ lɛ́ɛ ɖěbǔ mɔ kpɔ́n ǎ.

⁸Adǎnkanlin lɛ́ɛ ɖě tɛ afɔ ali énɛ́ jí kpɔ́n ǎ, kinnikínní gbɔn ali énɛ́ kpɔ́n ǎ.

⁹Gbɛtɔ́ ká nɔ́ glá káká bó nɔ́ ɖ'alɔ só énɛ́ wú, é nɔ́ fɔ ɖɔ nú só lɛ́ɛ.

¹⁰Gbɛtɔ́ nɔ́ ɖe ali dó só lɛ́ɛ mɛ, bɔ nukún tɔn nɔ́ mɔ nǔ e nyí nǔ xɔ akwɛ́ é bǐ.

¹¹É nɔ́ ɖó tɔ e ɖo sisa wɛ ɔ́ te, é nɔ́ ɖe nǔ e ɖo hwlǎhwlá lɛ́ɛ nyi wěxo.

¹²Lo ɔ́, nǔnywɛ́ ɔ́, fítɛ́ é ká ɖe tawun? Fítɛ́ wɛ nukúnnú mɔ jɛ nǔ mɛ ɔ́ nɔ́ nɔ?

¹³Gbɛtɔ́ lɛ́ɛ tunwun lě e nǔnywɛ́ xɔ akwɛ́ sɔ é ǎ, nǔnywɛ́ ɖo hwe glɔ́ fí ǎ.

¹⁴Agbetɔ awoyó ɖɔ: “Nǔnywɛ́ ɖo fí ǎ”, xu ɖɔ: “É ɖo gɔ̌n ce ǎ.”

¹⁵Siká akú sixú nɔ nǔnywɛ́ tɛnmɛ ǎ, kpatágan kpinkpɛn ka sixú xɔ nǔnywɛ́ ǎ.

¹⁶È sixú jlɛ́ nǔnywɛ́ dó siká akú wú ǎ, è sixú jlɛ́ nǔnywɛ́ dó awǐnnya xɔ akwɛ́ onísi wú ǎ, è ka sixú jlɛ́ dó awǐnnya xɔ akwɛ́ safíi wú ǎ.

¹⁷Siká xɔ akwɛ́ sɔ nǔnywɛ́ ǎ. Wěkpɛ́n ɖagbe ɖagbe xɔ akwɛ́ sɔ nǔnywɛ́ ǎ. Siká goví sixú nɔ do tɔn mɛ ǎ.

¹⁸Awǐnnya xɔ akwɛ́ koláyi kpó klisutálu kpó sixú nɔ te nukɔn tɔn ǎ. Nǔnywɛ́ xɔ akwɛ́ hú jɛ̌nana.

¹⁹È sixú jlɛ́ nǔnywɛ́ dó awǐnnya xɔ akwɛ́ tokpázi e è nɔ mɔ ɖo Etiopíi ɔ́ wú ǎ. È sixú jlɛ́ nǔnywɛ́ dó siká akú wú ǎ.

²⁰Ée nǔ cí mɔ̌ ɔ́, fítɛ́ nǔnywɛ́ ká gosín lo? Fítɛ́ wɛ nukúnnú mɔ jɛ nǔ mɛ ɔ́ nɔ́ nɔ?

²¹Nǔnywɛ́ sɔ́ éɖée hwlá dó nǔ e ɖo gbɛ lɛ́ɛ bǐ, é sɔ́ éɖée hwlá dó xɛ e ɖo jǐ aga lɛ́ɛ bǐ.

²²Domaɖó-azan kpódó kú kpó ɖɔ: “È ko ɖɔ xó tɔn bɔ mǐ se.”

²³Mawu wɛ tunwun nǔnywɛ́ sín ali, é wɛ tunwun nɔtɛn tɔn.

²⁴Mawu nɔ́ mɔ nǔ káká yi jɛ fí e ayǐkúngban ɔ́ kponu ɖó é; é nɔ́ mɔ nǔ e ɖo gbɛ ɔ́ mɛ lɛ́ɛ bǐ sɛ́ dó.

²⁵Hwenu e é ɖɔ gan nabí e jɔhɔn ná da ɔ́, hwenu e é ɖɔ bǎ e mɛ sin ná nɔ ɔ́,

²⁶hwenu e é dó sɛ́n e jǐ ná nɔ́ xwedó dó ja ɔ́, hwenu e é ɖe ali nú jǐkɛwun kpó jǐdógbe kpó ɔ́,

²⁷hwenɛ́nu wɛ é mɔ nǔnywɛ́ bó ɖe xlɛ́; é dó dodó tɔn lɛ́ɛ do, bó gbéjé kpɔ́n káká yi do.

²⁸ Énɛ́ ɔ́ gúdo ɔ́, é ɖɔ nú gbɛtɔ́ ɖɔ: “Đǒtó! Sísí ɖó nú nyɛ Aklúnɔ wɛ nyí nǔnywɛ́; è nǐ hɔn nú nǔ nyanya wiwa ka nyí nukúnnú mɔ jɛ nǔ mɛ.”