Read fon Jɔ̌bu 3 Bible Online

Jɔ̌bu 3 - fon bible

Jɔ̌bu 3

¹ Ée nǔ énɛ́ lɛ́ɛ bǐ jɛ wá yi ɔ́, Jɔ̌bu gbɔ bo kɛ nu, bó dó nu azǎn e gbe è ji i é.

²Xó e é ɖɔ ɔ́ ɖíe:

³Azǎn e gbe un jɔ ɔ́ ní bú sín azǎn lɛ́ɛ mɛ; zǎn e ɖɔ: “Vǐ súnnu ɖokpó sín kɛ́n jɛ mɛ wú” ɔ́ ní bú sín zǎn lɛ́ɛ mɛ.

⁴Azǎn nɛ́ ɔ́ ní húzú zǐnflú, Mawu ní má sɔ́ flín azǎn énɛ́ ɔ́ ó! Wěziza ní má sɔ́ hɔ́n dó azǎn nɛ́ ɔ́ jí kpɔ́n ó!

⁵Ablu gɔngɔn ní cyɔ́n azǎn énɛ́. Akpɔ́kpɔ́ ɖaxó ní bú i. Zǎn ní kú kéze!

⁶Zǎn énɛ́ ní dó ablu hú zǎn bǐ! É ní bú sín xwezán lɛ́ɛ mɛ, è ma sɔ́ lɛ́n azǎn énɛ́ dó sun sín azǎn lɛ́ɛ mɛ ó!

⁷Kɛ́n má sɔ́ jɛ mɛɖé wú zǎn énɛ́ ɔ́ mɛ ó, awǎjijɛ ɖě má sɔ́ tíin zǎn énɛ́ ɔ́ mɛ ó!

⁸Mɛ e nɔ dó nu azǎn lɛ́ɛ, yě mɛ e tunwun lě e è nɔ dó xomɛsin nú kanlin ɖaxó Levyatáan gbɔn lɛ́ɛ ní ɖe xlɛ́ ɖɔ zǎn énɛ́ ɔ́ zǎn nyanya wɛ.

⁹Sunví e nɔ tɔ́n zǎn ɖo bibɔ wɛ lɛ́ɛ ní cí zǎn énɛ́ ɔ́ mɛ. Zǎn énɛ́ ní má mɔ wěziza e ɖó nukún wɛ é ɖe ɔ́ ó! Ayǐxomɛ ní má hɔ́n dó e vɔ́vɔ́ ó!

¹⁰Đó é gbɛ́ gbɛ li sú dó mì, bɔ un wá ɖo ya ɖaxó élɔ́ ji wɛ égbé din.

¹¹Aniwú un ma ka kú ɖo nɔ ce xomɛ ǎ? Aniwú un ma ka lɛ́ kɔ ɖo ajidonu ǎ?

¹²Aniwú un ka mɔ asá jí bó nɔ? Aniwú un mɔ anɔ̌ bó nɔ́?

¹³Un ná kó ɖo yɔdo mɛ ce xwíí égbé din, bó ná kó ɖo amlɔ dɔ́ wɛ, bó ná ɖo vivo mɛ,

¹⁴nyi kpó axɔ́sú lɛ́ɛ kpó, nyi kpó tonukún lɛ́ɛ kpó; mɛ énɛ́ lɛ́ɛ e nɔ́ vɔ́ xwé nukúnɖéjí e gba lɛ́ɛ bló ɖó lɛ́ɛ kpó nyi kpó ná nɔ kpɔ́.

¹⁵Gǎn e ɖó siká lɛ́ɛ, yě mɛ énɛ́ lɛ́ɛ e nɔ kplé kpatágan gɔ́ xwé yětɔn lɛ́ɛ kpó nyi kpó ná nɔ kpɔ́.

¹⁶Abǐ étɛ́wú un ma nyí vǐflɛ́kɛ́n e è sɔ́ hwlá ɔ́ ǎ? Étɛ́wú un ma nyí vǐ e má mɔ hwe ɖó nukún wú ɔ́ ǎ é?

¹⁷Mɛdídá lɛ́ɛ sɔ́ ɖó adǎn ɖě ɖo yɔdo mɛ fínɛ́ ǎ. Mɛ e nǔ cikɔ ná, mɛ e má ɖó gǎn ǎ lɛ́ɛ nɔ gbɔjɛ́ ɖo fínɛ́.

¹⁸Gantɔ́ lɛ́ɛ bǐ wɛ vo ɖo fínɛ́, azɔ̌gán ɖěbǔ sɔ́ nɔ́ sú xó dó ta nú yě ǎ.

¹⁹Mɛ bǐ wɛ nyí nǔ ɖokpó ɔ́ ɖo fínɛ́. Kannumɔ gosín gǎn tɔn sín acɛ mɛ.

²⁰Aniwú Mawu ká nɔ gbɔ bɔ è nɔ ji lelenɔ? Aniwú é nɔ́ gbɔ bɔ è nɔ ji yě mɛ e gbɛ ná vlɛ́ nu ná lɛ́ɛ?

²¹ Yě mɛ énɛ́ lɛ́ɛ nɔ́ ba kú, bó ká nɔ́ ba kpo. Yě nɔ́ nya kú gbé hú dɔkun.

²²Nǔɖé ló kó sɔ́ yɔdo ɖó nukɔn nú yě, é ná víví nú yě kpɔ́n.

²³Un cí mɛ e ma tunwun fí e é xwe ɔ́ ǎ é ɖɔhun, un cí mɛ e Mawu mɛ dǒ lɛ́ dó ɔ́ ɖɔhun.

²⁴Azɔn winwɛn húzú nǔɖuɖu nú mì, un nɔ sú xó magbokɔ, tɔ ɖo sisa wɛ ɖɔhun.

²⁵Nǔ e ɖi xɛsi ná wɛ un ɖe ɔ́ wɛ nɔ gbo mì; nǔ e hɔn ná wɛ un ɖe ɔ́ wɛ nɔ wa mì.

²⁶Un vo ǎ, un mɔ agbɔ̌n ǎ, un ka mɔ gbɔjɛ ǎ; un ɖo adohu adohu jí.