Read fon Jɔ̌bu 32 Bible Online

Jɔ̌bu 32 - fon bible

Jɔ̌bu 32

¹Elifázi kpó Biludádi kpó, kpódó Sofáa kpó tin dó Jɔ̌bu, ɖó yě mɔ ɖɔ é ɖo lě e é nyí xomɛvɔ́nɔ gbɔn ɔ́ ɖe xlɛ́ wɛ magbokɔ.

²Énɛ́ ɔ́ wú ɔ́, nya ɖokpó ɖo fínɛ́ bó sin xomɛ dó Jɔ̌bu; nya ɔ́ nɔ nyí Elihu; Balakeɛ́li ví wɛ, é jɔ ɖo akɔta Buzi tɔn mɛ, ɖo hɛ̌nnu Hlamu tɔn mɛ. É sin xomɛ dó Jɔ̌bu ɖésú, ɖó Jɔ̌bu mɔ ɖɔ émí kún hu hwɛ ɖě dó Mawu ó.

³É sin xomɛ dó Jɔ̌bu sín xɔ́ntɔn atɔn lɛ́ɛ lɔmɔ̌, ɖó yě sɔ́ tunwun xó e jɛ́n yě ná ɖɔ nú Jɔ̌bu ɔ́ ǎ, bó ká ɖo hwɛ ɖó n'i wɛ.

⁴Éyɛ́ ko ɖɔ xó ɖě nú Jɔ̌bu ǎ, ɖó mɛ ɖě lɛ́ɛ bǐ nyí mɛxó n'i.

⁵Lo ɔ́, éé é mɔ ɖɔ xó ɖé kún sɔ́ ɖo nu nú yě mɛ ɖěbǔ ó ɔ́, xomɛ sin i.

⁶Elihu, Balakeɛ́li ví e jɔ ɖo akɔta Buzi tɔn mɛ ɔ́ yí xó lo, bó ɖɔ: midɛɛ lɛ́ɛ ɔ́, mɛxó wɛ nú mi, yɔkpɔ́vú wɛ nyɛ ka nyí; énɛ́ ɔ́ wú wɛ un ɖi xɛsi bó má glá ɖɔ nǔ e nyɛ tunwun ɔ́ ǎ.

⁷Un nɔ ɖɔ dó ayi mɛ ɖɔ: “Mɛxó lɛ́ɛ wɛ è nɔ jó xó ná, mɛ e xwe yětɔn ko sɛ yi lɛ́ɛ wɛ nɔ́ ná nǔnywɛ́ mɛ.”

⁸Lo ɔ́, nú è na ɖɔ nǔgbó ɔ́, yɛ Mawu tɔn, funfún Nǔbǐwúkpétɔ́ ɔ́ tɔn ɔ́ wɛ nɔ́ ná nukúnnú-mɔjɛnǔmɛ mɛ.

⁹Nǔnywɛ́ ɖíɖó ɔ́ ɖo xwe nu ǎ. Nǔ jlɔ́jlɔ́ tunwuntunwun ɖo mɛxó nyínyí nu ǎ.

¹⁰Énɛ́ ɔ́ wú ɔ́, Jɔ̌bu, kɛnklɛ́n, ɖǒtó mì; nyi lɔmɔ̌ jló ná ɖɔ nǔ e un tunwun é.

¹¹Midɛɛ lɛ́ɛ ɔ́, káká jɛ din ɔ́, un kɛ nu dó xó mitɔn mɛ ǎ; un ɖótó xó mitɔn, bó ɖótó linlin mitɔn lɛ́ɛ; un bló mɔ̌ bó jó mi dó, bɔ mi ɖɔ xó dó Jɔ̌bu xó wú.

¹²Un wlí tó xó mitɔn wú, bó mɔ din ɖɔ mɛ ɖěbǔ kún ɖo mi mɛ bó mɔ xó ɖé ɖɔ dó Jɔ̌bu wú ó. Mɛ ɖěbǔ ɖo mi mɛ, bó mɔ xó ɖé ɖɔ dó gba xó tɔn lɛ́ɛ ǎ.

¹³Mi ma ka ɖɔ émí tunwun nǔ e wɛ tawun é ó; Mawu kɛ́ɖɛ́ wɛ ná kpé Jɔ̌bu wú, gbɛtɔ́ sixú kpé wǔ tɔn ǎ.

¹⁴Xó e Jɔ̌bu ɖɔ lɛ́ɛ ɔ́, nyɛ wɛ é ɖɔ ná ǎ. Un ka ná ɖɔ xó n'i lě e midɛɛ ɖɔ n'i gbɔn ɔ́ ǎ.

¹⁵Jɔ̌bu, xɔ́ntɔn towe lɛ́ɛ ba nu tɔn kpo bǐ, yě sɔ́ sixú kɛ nu ǎ, yě sɔ́ tunwun xó e yě ná ɖɔ ɔ́ ǎ.

¹⁶Un ɖo hwenu e yě ná ɖɔ xó yětɔn fó dó ɔ́ nɔ te kpɔ́n wɛ. Lo ɔ́, ée yě ma sɔ́ ɖo xó ɖé ɖɔ wɛ ǎ, bɔ nukikɛ gló yě din é ɔ́,

¹⁷un hɛn ɔ́, un ná ɖɔ xó lo. Nyi lɔmɔ̌ ná ɖɔ nǔ e un tunwun é.

¹⁸Xó e ɖo xo ce mɛ ɔ́ sukpɔ́ dín, nǔ ɔ́ nɔ́ ɖɔ nú mì ɖɔ nyi ní yá wǔ ɖɔ xó.

¹⁹Xo ce mɛ ɖo agbǎn hun wɛ vɛ̌ɛn e è dǒ va é ɖɔhun; é cí anyǔglo yɔ̌yɔ́ e ɖo ná wú wɛ é ɖɔhun.

²⁰Un ná ɖɔ xó, bó ná mɔ agbɔ̌n; un ná hun nu lo, bɔ xó e a ɖɔ ɔ́, un ná ná sin tɔn we.

²¹Un na nɔ mɛɖé jí ǎ, un ka na wa yɛ nú mɛɖé ǎ,

²²ɖó un nyɔ́ mɛ klɔ́ ǎ; ényí un klɔ́ mɛ ɔ́, Gbɛɖótɔ́ e ɖó mì ɔ́ ná yí gbɛ ce tlóló.