Read fon Jɔ̌bu 33 Bible Online

Jɔ̌bu 33 - fon bible

Jɔ̌bu 33

¹Din ɔ́ Jɔ̌bu, ɖǒtó xó e un ɖó bó ná ɖɔ ɔ́. Đǒtó te bó se xó ce lɛ́ɛ ganjí.

²É ɖíe! Xó ɖé ɖo nu ce bɔ un ɖó ná ɖɔ.

³Lě e é ɖé gbɔn ɖo ayi ce mɛ ɔ́, ɖɔ nú we gbé wɛ un ja. Xó jɔ xó séé wɛ ɖo nu ce mɛ ná tɔ́n sín wɛ.

⁴Yɛ Mawu tɔn wɛ bló mì; funfún Nǔbǐwúkpétɔ́ ɔ́ tɔn wɛ ná gbɛ mì.

⁵Ényí un ɖɔ xó nú a sixú kɛ nu hǔn, kɛ nu bónú má kpɔ́n. Blǒ hwiɖée ɖó. É yá! Wa mǐ tɔ́ nyi nú.

⁶Nyi kpó hwi kpó ɔ́, nǔ ɖokpó ɔ́ wɛ mǐ nyí ɖo Mawu nukɔn; ko wɛ Mawu sɔ́ dó bló nyi lɔ.

⁷Hǔn ma vɛdó ɖɔ un hú gǎn we bó ɖi xɛsi nú mì ó; un ná ván nukún dó we ǎ.

⁸Amɔ̌, xó e a ɖɔ ɔ́ kpo ɖo tógwle ce mɛ; a ɖo ɖiɖɔ wɛ ɖ'ayǐ ɖɔ:

⁹“Un mɛ́, un hu hwɛ ɖěbǔ ǎ, xomɛvɔ́nɔ wɛ un nyí, un wa nǔ ɖěbǔ nyi do ǎ.

¹⁰Mawu ká kpo ɖo nǔ jɛ do mɔ ɖo wǔ ce wɛ; é mɔ mì dó mɔ kɛntɔ́.

¹¹ É bɛ́ afɔ ce lɛ́ɛ dó sókpo mɛ; é ɖo nǔ e wa wɛ un ɖe lɛ́ɛ bǐ kpɔ́n wɛ tlítlí.”

¹²Jɔ̌bu, xó énɛ́ e tɔ́n sín nu towe mɛ ɔ́, un ná ɖɔ nú we ɖɔ hwɛ towe kún jɔ ó, ɖó Mawu hú gǎn gbɛtɔ́.

¹³Étɛ́ sín hwɛ dó Mawu wɛ a ɖe? É ɖo nǔ e wa wɛ é ɖe ɔ́ sín gbe ná ɖó nú mɛɖé wɛ ǎ.

¹⁴Nú Mawu ɖo xó ɖɔ wɛ ɔ́, é ɖɔ gbɔn alɔkpa ɖě din ɔ́, é ná ɖɔ gbɔn alɔkpa ɖěvo; è ka nɔ wlí ayi wú ǎ.

¹⁵ Hwenu e gbɛtɔ́ lɛ́ɛ nɔ́ ɖo sɛnmlɔ mɛ ɔ́, hwenu e yě nɔ́ ɖo amlɔ mɛ, ɖo adɔ̌zan yětɔn jí ɔ́, Mawu nɔ́ xo dlɔ̌ yě, é nɔ́ ɖe nǔ xlɛ́ yě zǎn mɛ dó ɖɔ xó nú yě.

¹⁶Mawu nɔ bló mɔ̌ dó ɖe nǔ xlɛ́ gbɛtɔ́, nǔ e ɖo te kpɔ́n ɛ ɔ́, é nɔ́ ɖe xlɛ́ ɛ nyi wɛn:

¹⁷é jló ná lɛ́ kɔ nú gbɛtɔ́ sín nǔ nyanya wiwa li jí, é jló ɖɔ yě ní yí go ǎ;

¹⁸é nɔ́ cyɔ́n alɔ yě jí mɔ̌, bónú yě má yi yɔdo mɛ ó, é jló ɖɔ yě ní kú ǎ.

¹⁹Lo ɔ́, wǔvɛ́ e Mawu nɔ sɛ́ dó gbɛtɔ́ ɖo azɔn zan jí ɔ́ nɔ́ kplɔ́n nǔ gbɛtɔ́: gbɛtɔ́ sín wǔtu nɔ hun zo káká bɔ é nɔ ɖo sísɔ́sísɔ́ wɛ magbokɔ.

²⁰É jɛ mɔ̌ ɔ́, nǔɖuɖu ɖěbǔ sɔ́ nɔ́ jló e ǎ; é ná bó mɔ nǔɖuɖu e é yí wǎn ná ɔ́, adɔ tɔn nɔ hun ǎ.

²¹É nɔ́ xú gǒ káká bɔ è sɔ́ nɔ́ mɔ lan ɖě ɖo wǔ tɔn ǎ, é nɔ́ kpo xú kɛ́ɖɛ́ ɖo te.

²²Afɔ tɔn ko ɖo yɔdo tó nɛ́, gbɛ tɔn ko jɛ kú lɔ mɛ.

²³Amɔ̌, afɔ nyɔ́ ɔ́, wɛnsagun Mawu tɔn ɖokpó ná kó ɖo akpá tɔn, ɖɛ̌mɛnu Mawu tɔn wɔ̌buwɔ́bú lɛ́ɛ ɖokpó ná kó ɖo akpá tɔn, bó ná ɖɔ nǔ e é ɖó ná wá lɛ́ɛ n'i.

²⁴Wɛnsagun ɔ́ ná kú nǔbláwǔ n'i, bó ná ɖɔ nú Mawu ɖɔ: “Hwlɛ̌n ɛ; é ní má yi yɔdo mɛ ó. Un ko mɔ nǔ e un ná dó xɔ gbɛ n'i é.”

²⁵Énɛ́ ɔ́, gbɛ ná wá wǔ tɔn; é ná lɛ́ wínnyá.

²⁶É nɔ́ sú xó ylɔ́ Mawu bɔ é nɔ ɖótó e. É nɔ́ yi Mawu gɔ̌n kpó xomɛhunhun kpó. Đó Mawu lɛ́ mɔ ɛ dó mɔ hwɛjijɔnɔ.

²⁷É nɔ́ dó han ɖo mɛ bǐ nukún mɛ ɖɔ: “Un hu hwɛ, un gba sɛ́n, Mawu ká dɔn tó nú mì lě e é ɖó ná dɔn gbɔn é ǎ.

²⁸É hwlɛ́n mì gán sín yɔdo tó, bɔ un ɖo gbɛ, bó ɖo hwe mɔ wɛ.”

²⁹Nǔ tobutóbú e Mawu nɔ́ wa nú gbɛtɔ́ ɔ́ nɛ́! É nyí azɔn ɖokpó ǎ, é ká nyí azɔn we ǎ.

³⁰É nɔ́ bló mɔ̌, bó nɔ́ ɖe gbɛtɔ́ sín yɔdo tó, bɔ wěziza ná hɔ́n dó gbɛtɔ́ jí.

³¹Jɔ̌bu, ɖǒ ayi te, ɖǒtó mì ganjí. Nɔ xwíí bónú má ɖɔ xó.

³²Nú a ka ɖó xó ɖé bó ná ɖɔ hǔn ɖɔ nú má se. Đɔ xó, nú hwɛ towe jɔ ɔ́, un ná ɖɔ hwɛ towe jɔ.

³³Nú a ma ka ɖó xó ɖé bó ná ɖɔ ǎ hǔn, bo gbɔ bo ɖótó mì; nɔ xwíí nú má ná nǔnywɛ́ we.