Read fon Jɔ̌bu 34 Bible Online

Jɔ̌bu 34 - fon bible

Jɔ̌bu 34

¹Elihu lɛ́ ɖɔ:

²Nǔnywɛ́tɔ́ e mi, mi ɖótó xó ce! Mi mɛ e ɖó mɛxóyixa lɛ́ɛ ní wlí tó xó e ɖɔ gbé un ja ɔ́ wú.

³ Tó wɛ nɔ́ se xó, é ɖo ɖě ɔ́ nu wɛ ka nɔ ɖɔ.

⁴Mǐ ní ba nǔ e sɔgbe ɔ́, mǐ bǐ ní tunwun nǔ e nyɔ́ é.

⁵Jɔ̌bu ɖíe ɖɔ xomɛvɔ́nɔ wɛ émí nyí, bɔ Mawu ká gba acɛ émí wú e.

⁶É ɖɔ hwɛ émítɔn jɔ, bɔ è ka ɖo émí zé dó mɔ adingbannɔ wɛ. É ɖɔ è gblě wǔ émí kúwunda gbɛwunda, có émí kún ká hu hwɛ ó.

⁷Jɔ̌bu ɔ́, gbɛtɔ́ alɔkpa tɛ́ é ká nyí? É nɔ́ bɔ nu nyi mɛcáko mɛ, sin ɖɔhun.

⁸É nɔ dó mɛ e nɔ wa nǔ nyanya lɛ́ɛ sín gbɛ̌, é nɔ́ zɔn xá mɛdídá lɛ́ɛ,

⁹ɖó é nɔ́ ɖɔ: “Ganjí ba ná nɔ́ nú Mawu ɖó le ɖěbǔ nú gbɛtɔ́ ǎ.”

¹⁰Hǔn, gbɛtɔ́ ayisɔgbenánɔ e mi, mi ɖótó mì: Mawu nɔ wa nǔ nyanya gbeɖé ǎ. Nǔbǐwúkpétɔ́ ɔ́ nɔ dó hwɛ agɔ gbeɖé ǎ.

¹¹ Amɔ̌, nǔ e jɛ xá gbɛtɔ́ lɛ́ɛ ɔ́ wɛ é nɔ́ ná yě, nǔ e mɛ ɖokpó ɖokpó wa ɔ́ sín ajɔ wɛ é nɔ ná mɛ ɔ́.

¹²É ɖo wɛn din ɖɔ Mawu kún nɔ́ wa nǔ nyanya ó. Nǔbǐwúkpétɔ́ ɔ́ nɔ kpé ta do nú hwɛjijɔ ǎ.

¹³Mɛ ɖé wɛ sɔ́ ayǐkúngban ɔ́ dó alɔ mɛ n'i a? Acɛ e é ɖó dó wɛ̌kɛ́ ɔ́ jí ɔ́, é ɖokpónɔ géé sí wɛ é ɖe.

¹⁴Ényí Mawu ɔ́, é ɖésúnɔ kɛ́ɖɛ́ wú jɛ́n é nɔ́ kpé nukún dó, lobo yí funfún tɔn sín nǔ e ɖo gbɛ lɛ́ɛ sí ɔ́,

¹⁵yě bǐ ná kú vawun, bɔ gbɛtɔ́ ná lɛ́ húzú kɔ́gúdu.

¹⁶Jɔ̌bu, ényí ayi towe nɔ mɔ nǔ hǔn, ɖǒtó mì, wlǐ tó xó e ɖɔ gbé un ja é wú.

¹⁷Nú Mawu nɔ gbɛ́ wǎn nú nǔjlɔ́jlɔ́wiwa ɔ́, é sixú ɖu gǎn a? Hwɛjijɔnɔ hlɔ̌nhlɔ́nnɔ ɖokpó géé e tíin é wɛ a nǎ dó hwɛ din a?

¹⁸É ɖokpó jɛ́n sixú ɖɔ nú axɔ́sú ɖɔ: “Nǔvɔ́nɔ!” Bó ɖɔ nú gǎn ɖɔ: “Adǎnúwatɔ́!”

¹⁹É nɔ́ kán gǎn ɖó vo nú ahwanvú ǎ, é nɔ́ tunwun dɔkunnɔ ɖó vo nú wamamɔnɔ ǎ, ɖó é wɛ bló yě bǐ.

²⁰Kú fyán togun ɔ́ ɖo zǎn tɛ́ntin: mɛ bǐ nɔ dán jojo, mɛ bǐ kú; è nɔ wa nǔɖé nú acɛgannaganna-kpanúmɛtɔ́ cóbɔ é nɔ́ kú ǎ.

²¹Đó Mawu nɔ mɔ lě e zán gbɛ gbɔn wɛ mɛ bǐ ɖe ɔ́, nukún tɔn ɖo afɔ e ɖe wɛ mɛ ɖokpó ɖokpó ɖe ɔ́ wú.

²²Zǐnflú kpó ablu gɔngɔn kpó sixú hwlá nǔnyanyawatɔ́ lɛ́ɛ dó Mawu ǎ.

²³É byɔ́ ɖɔ Mawu ná ba do nú gbɛtɔ́ cóbɔ gbɛtɔ́ ná wá hwɛgun ɖo nukɔn tɔn ǎ.

²⁴Mawu nɔ se mɛɖé xó cóbó nɔ́ gba gǎn lɛ́ɛ hánnyá, bó nɔ́ sɔ́ mɛ ɖěvo lɛ́ɛ ɖó tɛn yětɔn mɛ ǎ;

²⁵ɖó é tunwun nǔwiwa yětɔn lɛ́ɛ; é nɔ́ flí gǎn lɛ́ɛ xwe zǎn mɛ bɔ è nɔ nyínyɛ́ yě.

²⁶É nɔ́ xo yě ɖo mɛ bǐ nukún mɛ agbawungba nǔnyanyawatɔ́ ɖɔhun.

²⁷Nǔgbó ɔ́, mɛ énɛ́ lɛ́ɛ lɛ́ kɔ sín Mawu gúdo, yě gbɛ́ nǔkplɔ́nmɛ tɔn lɛ́ɛ bǐ,

²⁸lobo wa nǔ xá mɛ ma ɖó gǎn lɛ́ɛ kpódó wamamɔnɔ lɛ́ɛ kpó, bɔ yě sú xo ylɔ́ alɔdómɛtɔ́, bɔ Mawu se xósúsú yětɔn.

²⁹Nú Mawu ka nɔ abwɛ̌ ɔ́, mɛ̌ wɛ ná dó hwɛ ɛ? Nú é sɔ́ éɖée hwlá ɔ́, mɛ̌ ká ná sixú mɔ ɛ? Có é nɔ́ kpé nukún dó akɔta lɛ́ɛ kpó gbɛtɔ́ lɛ́ɛ kpó wú,

³⁰bónú mɛ e ma nɔ sí i ǎ ɔ́ ní ma sɔ́ ɖu axɔ́sú ó, abǐ mɛ e nɔ ɖó mɔ nú togun ɔ́ ní má sɔ́ ɖu gǎn ó.

³¹Nú mɛɖé ɖɔ nú Mawu ɖɔ: “Un kú hwɛ, un sɔ́ ná wa nǔ nyanya ɖě ǎ.

³²Hwi ɖésúnɔ ní ɖe hwɛ e un ma tunwun ǎ bó hu ɔ́ xlɛ́ mì. Nú un wa nǔɖé nyi do ɔ́, un sɔ́ ná lɛ́ bló nǔ ɔ́ kpɔ́n ǎ.”

³³Nú mɛ ɔ́ ɖɔ mɔ̌ nú Mawu ɔ́, Mawu na dɔn tó n'i wɛ a? Hwi mɛ e ɖo nǔ mɔ dó nǔ wú wɛ ɔ́, étɛ́ a ka mɔ d'é wú? Ée é nyí ɖɔ hwi wɛ nɔ gbo xó din, bɔ é má sɔ́ nyí nyɛ ǎ e ɔ́, ɖɔ nǔ e a mɔ d'é wú ɔ́.

³⁴Gbɛtɔ́ e nɔ lin tamɛ ganjí lɛ́ɛ ná yí gbe nú xó e un ɖɔ ɔ́, lobo ná ɖɔ xó ɖokpó ɔ́ nǔnywɛ́tɔ́ e ɖo tó ɖó mì wɛ lɛ́ɛ ɖɔhun, yě ná ɖɔ:

³⁵“Xlonɔ xó ɖɔ wɛ Jɔ̌bu ɖe. Xó tɔn lɛ́ɛ xwe ali ǎ.

³⁶É ɖo xó ɖɔ wɛ gbɛtɔ́ baɖabaɖa ɖɔhun, hǔn é nyɔ́ ɖɔ è ní lɛ́ gbéjé xó e ɖɔ wɛ é ɖe lɛ́ɛ kpɔ́n titewungbe.

³⁷É hu hwɛ lobo ka lɛ́ ɖo gǔ fɔ́n wɛ. É ɖo mǐ dɔn bú wɛ, é ɖo xó nyanya ɖɔ dó Mawu wǔ wɛ.”