Read fon Jɔ̌bu 36 Bible Online

Jɔ̌bu 36 - fon bible

Jɔ̌bu 36

¹Elihu lɛ́ ɖɔ:

²Jɔ̌bu, lɛ̌ yi agbɔ̌n jí kpɛɖé, bónú má kplɔ́n nǔ we: un ɖó xó ɖěvo lɛ́ɛ bó ná ɖɔ nú we dó Mawu ta mɛ.

³Un na yí ba nǔnywɛ́ sín fí má yá fí, bó ná ɖe xlɛ́ ɖɔ mɛ e ɖó mì ɔ́ hwɛjijɔnɔ wɛ.

⁴Xó e ɖɔ gbé un ja ɔ́, xó nǔgbó séé wɛ. Gbɛtɔ́ e ɖó nǔnywɛ́ lobo ɖeji dó xó e ɖɔ wɛ é nɔ́ ɖe ɔ́ wú ɔ́, ɖokpó ɖíe mɔ wɛ a ɖe ɖo nukɔn towe e.

⁵Mawu kpé nǔ bǐ wǔ, é ká nɔ gbɛ́ wǎn nú mɛɖé ǎ. Mawu ɖó hlɔ̌nhlɔ́n ɖésú, nǔ e é ɖɔ lɛ́ɛ ɔ́ nɔ gɔn ma jɛ ǎ.

⁶É nɔ́ jó mɛdídá dó nyi gbɛ ǎ, lo ɔ́, é nɔ́ mɔ hwɛjijɔ nú wamamɔnɔ lɛ́ɛ.

⁷É nɔ ɖe nukún tɔn sín mɛ e nɔ wa nǔ jlɔ́jlɔ́ lɛ́ɛ wú ǎ; lo ɔ́, é nɔ́ zé yě jínjɔ́n axɔ́sú zinkpo jí; é nɔ́ hɛn yě lǐ dó bɔ yě nɔ́ ɖu axɔ́sú káká yi káká sá; é nɔ́ sɔ́ yě su.

⁸Ényí yě wǎ byɔ́ hɔzɔ mɛ ɔ́, ényí nukún wá jɛ yě myá jí ɔ́,

⁹hwenɛ́nu wɛ Mawu nɔ ɖe nǔ e yě wa lɛ́ɛ xlɛ́ yě, é nɔ́ ɖe nǔ e yě ɖo go yí wɛ bó wa nyi do ɖ'ayǐ lɛ́ɛ xlɛ́ yě.

¹⁰É nɔ ɖó afɔ afɔ jí nú yě, bónú yě ná tunwun nǔ; é ɖɔ nú yě ɖɔ yě ní lɛ́ kɔ sín nǔ nyanya e wa wɛ yě ɖe lɛ́ɛ gúdo.

¹¹Ényí yě ɖǒtó Mawu bó hwíhwɛ́ yěɖée n'i ɔ́, yě ná zǎn gbɛ yětɔn yi vivɔnu ɖo nyɔ̌ná ɖaxó mɛ.

¹²Lo ɔ́, nú yě ma ɖótó e ǎ ɔ́, è nǎ sɔ́ hwǎn yě, bɔ yě ná kú, ɖó nukúnnú má mɔ jɛ nǔ mɛ yětɔn wú.

¹³Mɛdídá lɛ́ɛ nɔ ɖo xomɛsin jí. Nú yě wǎ byɔ́ hɔzɔ mɛ lo ɔ́, yě nɔ́ byɔ́ ɖɔ è nǐ wǎ gɔ́ alɔ nú émí ǎ.

¹⁴Yě nɔ́ zé gbɛ yětɔn nyi gbě ɖo dɔ̌nkpɛvú mɛ, yě nɔ́ kú dɔ̌nkpɛvú agalɛtɔ́ lɛ́ɛ ɖɔhun.

¹⁵Mawu nɔ hwlɛ́n gbɛ̌dónɔ gán gbɔn yajiji mɛ; wǔvɛ́ e mɔ wɛ é ɖe ɔ́ wɛ Mawu nɔ zé dó ɖó afɔ afɔ jí n'i.

¹⁶É ná ɖe hwi lɔ tɔ́n sín adǎn e ɖo gbigbo we wɛ ɔ́ mɛ, bó ná ná tɛnmɛ gblogblo we bɔ nǔɖé ná dó tagba nú we ǎ, bó ná tɛ́ nǔɖuɖu ɖagbe ɖagbe lɛ́ɛ ɖó nukɔn towe.

¹⁷Amɔ̌, din ɔ́, bǎ e nɔ xo mɛdídá lɛ́ɛ ɔ́ wɛ ɖo xixo we wɛ, tó e dɔn nú we wɛ è ɖe ɔ́, a sixú wa nǔ ɖěbǔ bó tɔ́n sín mɛ ǎ.

¹⁸Ma nú xomɛsin kun we yi gba ó! Ma nú ayi towe flú we, bónú a lin gbeɖé ɖɔ émí ná dó nǔ nu nú Mawu ó.

¹⁹Dɔkun towe lɛ́ɛ kpé mɛ ǎ, siká towe kpé mɛ ǎ, gǎn tobutóbú e dó wɛ a ɖe ɔ́ kpé mɛ ǎ.

²⁰Zǎn e mɛ togun lɛ́ɛ ná blí bú ɔ́, ma ɖeji dó zǎn énɛ́ lɔ wú ó.

²¹Cɔ́ hwiɖée bó má lɛ́ yi jɛ nǔ nyanya wa jí ó, nǔ e wú wɛ a ɖo wǔvɛ́ mɔ wɛ ɔ́ nɛ́.

²²Éɖíe! Mawu ɖǒ acɛ hú nǔ bǐ, ɖó hlɔ̌nhlɔ́n tɔn d'agba. Mɛ̌ wɛ ná sixú kplɔ́n nǔ mɛ éyɛ́ ɖɔhun?

²³Mɛ̌ ká nɔ ɖɔ nǔ e é ná wa lɛ́ɛ n'i? Mɛ̌ ká ná glá ɖɔ n'i ɖɔ é wa nǔ nyi do?

²⁴Azɔ̌ e Mawu wa bɔ mɛ bǐ nɔ ji dó han mɛ ɔ́, ma wɔn ó; é ní nɔ́ ɖo nu towe hwebǐnu.

²⁵Gbɛtɔ́ lɛ́ɛ bǐ mɔ azɔ̌ e é wa lɛ́ɛ, bó nɔ́ kpa azɔ̌ tɔn sɛ́ dó.

²⁶Mawu kló, bɔ è sixú jlɛ́ ǎ; mɛ ɖěbǔ sixú tunwun xwe e é ɖó ɔ́ ǎ.

²⁷É nɔ́ sɔ́ sin dó húzú azizɔ, bɔ é nɔ́ yi jǐxwé, lobo nɔ húzú jǐ bó nɔ́ ja.

²⁸Sin nɔ kun sín akpɔ́kpɔ́ lɛ́ɛ mɛ, bó nɔ́ ja dó gbɛtɔ́ e ɖo ayǐkúngban jí lɛ́ɛ jí.

²⁹Mɛ̌ ká sixú mɔ nǔ jɛ lě e akpɔ́kpɔ́ nɔ́ dó gbɔn ɔ́, kpódó lě e jǐ nɔ dó gbe ɖo jǐnukúnsin gbɔn ɔ́ kpó wú?

³⁰Mawu nɔ ɖe gbe bɔ jǐ nɔ kɛ wun gbɔn jǐnukúnsin ɔ́ bǐ; lo ɔ́, xuzan jí do dɔ̌n bǐ ɔ́ nɔ dó zǐnflú.

³¹Mawu nɔ zé nǔ énɛ́ lɛ́ɛ bǐ dó ɖe xlɛ́ ɖɔ émí wɛ kpa acɛ nú togun lɛ́ɛ; é nɔ́ zé nǔ énɛ́ lɛ́ɛ dó ná nǔɖuɖu yě bɔ é nɔ́ túnflá.

³²Mawu nɔ́ bú alɔ dó jǐkɛwun, lobo nɔ nyi sɛ́ dó fí e é ɖó ná yi é.

³³É nɔ́ ɖe gbe bɔ jǐ nɔ dó gbe dó ɖe xlɛ́ ɖɔ émí jǎwe, kanlin lɛ́ɛ lɔmɔ̌ nɔ tunwun ɖɔ Mawu ɖo sisɛkpɔ́ wɛ.