Read fon Jɔ̌bu 38 Bible Online

Jɔ̌bu 38 - fon bible

Jɔ̌bu 38

¹Mawu Mavɔmavɔ nɔ jɔhɔn syɛ́nsyɛ́n ɖé tɛ́ntin, bó ɖɔ nú Jɔ̌bu ɖɔ:

²Mɛ nǎhún wɛ a nyǐ bó ná xo tito ce lɛ́ɛ kpɔ́n kpó xlonɔxó é ɖɔ wɛ a ɖe lɛ́ɛ kpó?

³Dǒ gǒ dó lanvɛ mɛ súnnu akowunká ɖɔhun; un ná kan nǔ byɔ́ we, bɔ a nǎ kplɔ́n nǔ mì.

⁴Jɔ̌bu, hwenu e un ɖo ayǐkúngban ɔ́ ɖó ayǐ wɛ ɔ́, fítɛ́ wɛ a ɖe hwenɛ́nu? Ényí a ɖǒ nǔnywɛ́ hǔn, ɖɔ lě e a mɔ do ná gbɔn ɔ́ nú mì.

⁵A tunwun mɛ e ɖó dogbó nú ayǐkúngban ɔ́ a? A tunwun mɛ e nyi kan tɔn ɔ́ a?

⁶A tunwun dodó e jí dotín tɔn lɛ́ɛ jínjɔ́n ɔ́ a? A tunwun mɛ e dó awǐnnya e ɖo tají ɔ́ do ɔ́ a?

⁷Hwenɛ́nu wɛ sunví zǎnzǎn tɔn lɛ́ɛ ɖo kpɔ́ bó ɖo han ji wɛ, bɔ wɛnsagun Mawu tɔn lɛ́ɛ ɖo xó sú wɛ kpó xomɛhunhun kpó.

⁸ Hwenu e xu gba wu sín nɔtɛn tɔn ɖo kɔ́ glɔ́ ɔ́, a tunwun mɛ e sú ali dó e ɔ́ a?

⁹Nyɛ Mawu wɛ, nyɛ wɛ bú akpɔ́kpɔ́ dó e. Un bú ahǔn e sú ganjí ɔ́ dó e.

¹⁰Adǎn e jí é ɖe ɔ́, un ɖó te. Un bló dogbó dó glɔ́n ali n'i.

¹¹Un ɖɔ n'i ɖɔ: “Fí e a nǎ nɔ te ɖe ɔ́ ɖíe; a nǎ zɛ fí wú ǎ; zǐngídi e jí a ɖe ɔ́, ná nɔ te fí.”

¹²A jɔ gbógbó ɔ́, a ɖe gbe dó ayǐ, bɔ é hɔ́n kpɔ́n a? A ɖɔ nú ayǐtéhɔ̌nnu ɖɔ:

¹³“Zě ayǐkúngban ɔ́ ɖo tóvínu tɔn lɛ́ɛ, lobo húnhún i avɔ ɖɔhun, bó zin gbɛtɔ́ dídá lɛ́ɛ dó ayǐ”, a ɖɔ mɔ̌ kpɔ́n a?

¹⁴Énɛ́ ɔ́, ayǐkúngban ɔ́ húzú bó cí lě e è nɔ zín wuntun ɖé dó ko jí ɔ́ ɖɔhun, bɔ nǔ bǐ ɖó acɔ́ lě e è nɔ ɖe nǔ dó avɔ mɛ ɔ́ ɖɔhun.

¹⁵Mɛdídá lɛ́ɛ ɔ́, nǔ e nyí wěziza nú yě ɔ́, è tɛ yě, bɔ awa e glá wɛ yě nɔ́ ɖe ɔ́ yi do.

¹⁶Jɔ̌bu, a ko hun káká yi xu ɔ́ sín jɔtɛn kpɔ́n a? A ko ba do nú nǔ gbɔn xuzan jí kpɔ́n a?

¹⁷Kútomɛ sín hɔn lɛ́ɛ ɔ́, è xlɛ́ yě we kpɔ́n a? A mɔ ablu gɔngɔn sín hɔn lɛ́ɛ kpɔ́n a?

¹⁸A tunwun káká fí e gbɛ ɔ́ gbló ada yi jɛ ɔ́ a? Ényí a mɔ do nú nǔ énɛ́ lɛ́ɛ bǐ hǔn, ɖɔ nú mì.

¹⁹A tunwun ali e è nɔ gbɔn yi wěziza sín nɔtɛn ɔ́ a? Ablu ɔ́, a tunwun fí e éyɛ́ nɔ́ nɔ ɔ́ a?

²⁰Ényí a ko tunwun ali e è nɔ gbɔn yi fí e yě nɔ́ nɔ ɔ́ wɛ ɔ́, a nǎ kó kplá yě yi nɔtɛn yětɔn.

²¹A nǎ tunwun hǔn! Ɖó a jɔ din ɔ́, é sɔ́ hwe ǎ. Xwe towe ko sɛ yi.

²²A yi fí e un kplé laglásilinfín ɖó ɔ́ kpɔ́n a? A mɔ fí e un kplé kɛ́njí ɖó ɔ́ a?

²³Un kplé ɖ'ayǐ nú adǎngbomɛzán gbe, un kplé ɖ'ayǐ nú zalixámɛzán gbe, un kplé ɖ'ayǐ nú ahwanfunfunzán gbe.

²⁴A tunwun fí e wěziza gosín ɔ́ a? A tunwun fí e jɔhɔn zǎnzǎnhwe jí tɔn nɔ gbɔn bó nɔ nyi dó ayǐkúngban jí ɔ́ a?

²⁵Mɛ̌ wɛ hun ali nú jǐ? Mɛ̌ wɛ ɖe ali nú jǐkɛwun bɔ é nɔ́ gbɔn

²⁶bó nɔ́ dɔn jǐ wa ayǐkúngban e jí mɛɖé má ɖe ǎ é? Mɛ̌ wɛ ɖe ali n'i bɔ é nɔ́ ja kɔn nyi gbětótló mɛ fí e gbɛtɔ́ ɖé má ɖe ǎ é?

²⁷Mɛ̌ wɛ bló bɔ jǐ nɔ ja bɔ ayǐkúngban e xú, bó zɛ ɔ́ nɔ́ mɔ sin, bɔ nǔkún lɛ́ɛ nɔ́ wú, bɔ ama nɔ zɔ́n?

²⁸Jǐ ɖó tɔ́ wɛ a? Mɛ̌ wɛ dó ahǔn é nɔ́ ja ɔ́ sín kún?

²⁹Nyɔ̌nu tɛ́ sín xomɛ wɛ laglási tɔ́n sín? Mɛ̌ wɛ ji laglásilinfín e nɔ́ kplé ɖo jǐxwé é?

³⁰Mɛ̌ wɛ bló bɔ sin nɔ syɛ́n awǐnnya ɖɔhun? Mɛ̌ wɛ bló bɔ aslɔkɛ́ nɔ́ syɛ́n dó te?

³¹ A sixú blá sunvísɛkplé totaligbé tɔn lɛ́ɛ a? Abǐ a sixú tún kan nú sunvísɛkplé tofɔligbé tɔn lɛ́ɛ a?

³²A sixú ɖe sunví lɛ́ɛ tɔ́n ɖo hwe yětɔn yětɔn nu a? A sixú xlɛ́ ali sunvísɛkplé totaligbé tɔn e è nɔ ylɔ́ ɖɔ Lɔnmɔ ɖaxó kpó Lɔnmɔ kpɛví kpó lɛ́ɛ ɔ́ a?

³³A tunwun jǐnukúnsin sín sɛ́n lɛ́ɛ a? Hwi wɛ nɔ ɖɔ lě e sɛ́n énɛ́ lɛ́ɛ nɔ́ wa azɔ̌ gbɔn ɖo ayǐkúngban jí é a?

³⁴A ɖe gbe sɛ́ dó akpɔ́kpɔ́ ɔ́, é kpé bɔ jǐ ná wlí bó xo we a?

³⁵Hwi wɛ nɔ ɖe gbe nú jǐ bɔ é nɔ́ kɛ wun a? É nɔ se tónú nú we a?

³⁶Mɛ̌ wɛ bló bɔ xɛ e è nɔ ylɔ́ ɖɔ ibísi[13] ɔ́ ɖó nǔnywɛ́ sɔ mɔ̌? Mɛ̌ wɛ ná nukúnnú mɔ jɛ nu mɛ koklósú?

³⁷Mɛ̌ wɛ ɖó nǔnywɛ́ bó ná sixú xa akpɔ́kpɔ́ e ɖo jǐxwé lɛ́ɛ? Mɛ̌ wɛ sixú húzú sin e ɖo tɔyizɛ́n jǐxwé tɔn mɛ lɛ́ɛ kɔn nyi ayǐ?

³⁸Énɛ́ ɔ́, kɔ́gúdu ná xwe, bɔ kɔ́glo lɛ́ɛ ná kpan ɖó bǔ.

³⁹Hwi wɛ nɔ wlí lan nú kinnikínní asi a? Xovɛ́ sin kinnikínní ví lɛ́ɛ ɔ́, hwi wɛ nɔ ná nǔɖuɖu yě a?

⁴⁰Hwenu e yě nɔ́ yi hwlá cí nɔtɛn yětɔn abǐ hwenu e yě nɔ́ yi tɔ wu ɖo wudo mɛ ɔ́, hwi wɛ nɔ ná nǔɖuɖu yě a?

⁴¹Avǔnsákɔwó ví lɛ́ɛ ɔ́, mɛ̌ wɛ nɔ́ ná nǔɖuɖu yě hwenu e xovɛ́ nɔ́ sin yě, bɔ yě nɔ́ ba hlɔ̌nhlɔ́n kpo, bó nɔ́ ɖo xó sú ylɔ́ Mawu wɛ é?