Read fon Jɔ̌bu 39 Bible Online

Jɔ̌bu 39 - fon bible

Jɔ̌bu 39

¹Jɔ̌bu, a tunwun hwenu e sógbɔ́ lɛ́ɛ nɔ́ ji vǐ dó ɔ́ a? A mɔ agbanlín ɖo vǐ ji wɛ kpɔ́n a?

²A xa sun nabí e yě nɔ́ hɛn xo ná ɔ́ kpɔ́n a? A tunwun hwenu e kanlin énɛ́ lɛ́ɛ nɔ ji vǐ dó ɔ́ a?

³Yě ja vǐ ji gbé ɔ́, yě nɔ́ fɛ bó nɔ ji vǐ, bɔ wǔvɛ́ e mɔ wɛ yě ɖe ɔ́ nɔ́ xwɛ.

⁴Wǔ nɔ syɛ́n vǐ yětɔn lɛ́ɛ, bɔ vǐ lɛ́ɛ nɔ́ jɛ susu jí kpowun, bó nɔ́ fɔ́n gbe ɖokpó, bó nɔ́ jó nɔ yětɔn dó, lobo sɔ́ nɔ́ lɛ́ kɔ wá gbeɖé ǎ.

⁵Mɛ̌ wɛ ɖe tócí gbě tɔn nyi te? Mɛ̌ wɛ tún kan n'i, bɔ é yi?

⁶Fí e gběhan má nɔ́ ɖi be ɖe ǎ ɔ́ wɛ un sɔ́ dó ɖó xwé n'i, ayǐkúngban jɛvɛ́jɛvɛ́ wɛ un sɔ́ dó ɖó nɔtɛn n'i.

⁷É nɔ́ ké ya nú zǐngídi e nɔ ɖo toxo mɛ ɔ́ ǎ, é nɔ́ se xó e tócíkplátɔ́ nɔ ɖo súsú wɛ lɛ́ɛ ɖě gbeɖé kpɔ́n ǎ.

⁸É nɔ́ gbɔn sókan mɛ sókan mɛ, bó ná mɔ nǔɖuɖu; é nɔ́ ɖo ama e ɖo mǔ ɔ́ gbé mɛ.

⁹Agbo gbě tɔn sixú wa azɔ̌ nú we a? É sixú dɔ́ kanlinkpó towe mɛ a?

¹⁰A nǎ sixú sin mɔ e è nɔ lɛ gle ná ɔ́ dó kɔ n'i, bɔ é ná dɔn dó lɛ gle nú we a? É ná sixú xwɛ, bó dɔn mɔ ɔ́ dó lɛ gle nú we gbɔn tɔdo mɛ a?

¹¹A nǎ sixú ɖeji dó hlɔ̌nhlɔ́n tobutóbú e ɖo wǔ tɔn ɔ́ wú, bó jó azɔ̌ towe bǐ dó n'i a?

¹²A sixú ɖeji dó wǔ tɔn, bɔ é ná bɛ́ jinukún towe lɛ́ɛ wá kplé ɖó fí e è nɔ fún jinukún ɖe ɔ́ a?

¹³Gowungo nɔ ɖo awa kɛ wɛ kpó awǎjijɛ kpó; é ká sixú zɔn aɖɔwé ɖɔhun ǎ.

¹⁴Gowungo nɔ ɖó azin dó kɔ́gúdu mɛ, bó nɔ́ jó dó, bɔ yǒzo e nɔ́ tɔ́n sín kɔ́gúdu mɛ ɔ́ nɔ́ mɔ azin ɔ́;

¹⁵é sɔ́ nɔ́ flín ɖɔ è nǎ zun zɔnlin gbɔn jí ǎ, é nɔ́ flín ɖɔ gběkanlin ná tɛ afɔ jí ǎ.

¹⁶É nɔ́ nylá hun dó vǐ tɔn lɛ́ɛ ɖi nǔ ɖɔ é kún nyí é wɛ ji yě ó ɖɔhun. É dó ya nú éɖée kpowun azinɖíɖó hwenu, é ké ya ná ǎ.

¹⁷Đó nyɛ Mawu ɔ́, un ná ɛ nǔnywɛ́ ǎ, un ná ɛ nukúnnú mɔ jɛ nǔ mɛ ǎ.

¹⁸Amɔ̌, ényí é sí te bó bɛ́ wezun ɔ́, è xá sɔ́ bó wlí ǎ; é ké ya nú sɔ́xátɔ́ ǎ.

¹⁹Jɔ̌bu, hwi wɛ ná hlɔ̌nhlɔ́n sɔ́ a? Hwi wɛ zé kɔjafún dó ba acɔ́ n'i a?

²⁰Hwi wɛ bló bɔ é nɔ́ lɔ́n wɛn ɖɔhun a? Gbe e ɖo kɔ tɔn nu ɔ́ nɔ́ dó xɛsi.

²¹É nɔ́ zé afɔ dó kán kɔ́ ná; hlɔ̌nhlɔ́n e é ɖó ɔ́ nɔ́ víví n'i. É nɔ́ kplɔ́ dó kɛntɔ́.

²²É tunwun xɛsi ǎ, nǔɖé nɔ́ dó xɛsi n'i ǎ, é nɔ́ hɔn ɖo hwǐ nukɔn ǎ.

²³Hwenu e gǎgo kpó gǎ kpó kpódó hwǎn kpó e mɛ e xá ɛ ɔ́ hɛn lɛ́ɛ nɔ́ ɖo nǔ ɖɔ wɛ ɔ́,

²⁴é nɔ́ zlɔ́n kpó adǎn kpó. Ényí lanzo jɛ gbe ɔ́, akpakpa nɔ sɔ́ ɛ.

²⁵Ényí lanzo ɖɔ nǔ ɔ́, é nɔ́ sú xó kpó akɔ́nkpinkpan kpó. Ahwan ja sín zɔ ɔ́, é nɔ́ tunwun; ahwangán lɛ́ɛ ɖo gbe ɖe wɛ ɔ́, é nɔ́ se; ahwanfuntɔ́ lɛ́ɛ ɖo xó sú wɛ ɔ́, é nɔ́ se.

²⁶Nǔnywɛ́ towe wɛ zɔ́n bɔ gɛ̌n nɔ zɔn a? Nǔnywɛ́ towe wɛ zɔ́n bɔ é nɔ́ zɔn yi tofɔligbé a?

²⁷Hwi wɛ ɖe gbe nú hɔ̌n, bɔ é nɔ́ yi jǐ a? Hwi wɛ ɖe gbe n'i, bɔ é nɔ́ w'adɔ̌ tɔn nyi nǔ ta aga a?

²⁸Sókan mɛ wɛ é nɔ́ nɔ, sókan mɛ wɛ é nɔ́ dɔ́; só ta aga, fí e mɛɖé má sixú yi ǎ é wɛ é nɔ́ dɔ́.

²⁹Aga dɔ̌n wɛ é nɔ́ nɔ, bó nɔ́ cɔ́ nǔ e é ná sá é; é nɔ́ ɖo aga dɔ̌n, bó nɔ́ mɔ nǔ sɛ́ dó do.

³⁰ Hɔ̌n ɔ́, vǐ tɔn lɛ́ɛ ɔ́, hun wɛ yě nɔ́ nu; nǔ kúkú ɖo fí ɖé ɔ́, a nǎ mɔ hɔ̌n ɖo fí ɔ́.