Read fon Jɔ̌bu 4 Bible Online

Jɔ̌bu 4 - fon bible

Jɔ̌bu 4

¹Elifázi Temaninu ɔ́ yí xó, bó ɖɔ:

²È ka ná ɖɔ xó nú we din ɔ́, é ná ɖó akpɔ nú we ǎ cé? È ká sixú tin dó we din a?

³A kplɔ́n nǔ mɛ gěgé; a dǒ wǔsyɛ́n lanmɛ nú mɛ e awakanmɛ gbɔ́jɔ́ lɛ́ɛ.

⁴Xó towe lɛ́ɛ hɛn mɛ e ɖo ayǐ jɛ wɛ lɛ́ɛ ɖó te. Mɛ e sín dɔnkanmɛ xo dɔjɔ lɛ́ɛ lí dǒ.

⁵Ée é ka jɛ hwi ɖésú jí din ɔ́, akpɔ ɖó we. Ée nǔ wá gbo hwi ɖésú din ɔ́, ayi towe bǐ gbadó.

⁶É má nyí Mawu wɛ a nɔ sɛn a? A sixú ɖeji dó wǔ tɔn ǎ cé? Gbɛ ɖagbe e a nɔ zán ɔ́ sixú ná nukúnɖíɖó ɖagbe we ǎ cé?

⁷Dǒ ayi mɛ kpɔ́n! A mɔ nǔ ɖo xomɛvɔ́nɔ ɖé gbo wɛ káká bɔ é dɔn ɖ'é mɛ kpɔ́n a? Abǐ nǔjlɔ́jlɔ́watɔ́ ɖé, káká bɔ é dɔn ɖ'é mɛ kpɔ́n a?

⁸Nyɛ ɔ́, un mɔ ɖɔ mɛ e nɔ wa nǔ nyanya lɛ́ɛ, abǐ yě mɛ e nɔ dó nǔ baɖabaɖa sin lɛ́ɛ ɔ́, yě nɔ́ sún sin tɔn.

⁹Yě mɛ énɛ́ lɛ́ɛ ɔ́, Mawu nɔ́ zé fúnfún tɔn dó za yě; Jɔhɔn e nɔ gosín awɔntín tɔn mɛ ɔ́ nɔ́ sú kún yětɔn dó.

¹⁰Gbe e dó wɛ yě nɔ́ ɖe kinnikínní ɖɔhun ɔ́, Mawu ɖó te, é lɔ́ aɖǔ yě mɛ adǎnkanlin nɛ́ lɛ́ɛ.

¹¹Adǎnkanlin nɛ́ lɛ́ɛ ba lan kpo, bó kú, vǐ yětɔn lɛ́ɛ gbadó.

¹²Wɛn ɖé wá nú mì, é cí kpá ɖe mì wɛ è ɖe ɖɔhun; è zě gbe dó do bó ɖɔ xó dó tómɛ nú mì.

¹³ Zǎn xóxó mɛ wɛ nǔ énɛ́ jɛ ɖo dlɔ̌ nyanya ɖé mɛ, hwenu e gbɛtɔ́ lɛ́ɛ ɖo sɛnmlɔ dɔ́ wɛ é.

¹⁴Xɛsi jɛ jǐ ce, ado hu mì, bɔ wǔtu ce bǐ nɔ́ sísɔ́.

¹⁵Jɔhɔn ɖé gbɔn jǐ ce, bɔ lanmɛ ce slɔ́ avivɔfún.

¹⁶Nǔɖé wá cí nukɔn ce, un mɔ nukúnnú jɛ nǔ ɔ́ wú ganjí ǎ; nǔ ɔ́ ɖo nukɔn ce. Fí bǐ cí tóó, bɔ un jɛ gbe ɖé se jí.

¹⁷Nǔ ɔ́ ɖɔ nú mì ɖɔ: “Gbɛtɔ́ ká sixú nyí hwɛjijɔnɔ ɖo Mawu nukɔn a? Gbɛtɔ́ sixú nyí mɛ mímɛ́ ɖo mɛ e ɖó e ɔ́ nukɔn a?

¹⁸Hwi ɖésú kpɔ́n! Mawu nɔ́ ɖeji dó wɛnsagun tɔn lɛ́ɛ wú ǎ, é nɔ́ mɔ hwɛ nú mɛsɛntɔ́ tɔn énɛ́ lɛ́ɛ;

¹⁹bɔ nɛ̌ é ká sixú ɖeji dó gbɛtɔ́ lɛ́ɛ wú gbɔn? Gbɛtɔ́ e è sɔ́ ko kpowun dó bló é, gbɛtɔ́ e agbaza tɔn nyí kɔ́gúdu yǎyá é, nǔ e è hɛn ɔ́, è nǎ zě afɔ dó gbídí wǎnvú ɖɔhun kpowun é!

²⁰Gbɛtɔ́ e, có zǎn nǎ kú ɔ́ xó tɔn kó fó é, yě nɔ́ yi maɖɔnǔxwɛ; mɛɖé ka nɔ́ ké ya ná ǎ.

²¹Kan e hɛn gbɛ yětɔn ɖó te ɔ́ wɛ́n; yě ɖǒ nǔnywɛ́ nǔgbó ɔ́ cóbó kú ǎ.”