Read fon Jɔ̌bu 41 Bible Online

Jɔ̌bu 41 - fon bible

Jɔ̌bu 41

¹Nú mɛ ɖé lin ɖɔ émí ná kpé kanlin ɖaxó Levyatáan tɔn wú ɔ́, mɛ ɔ́ blɛ́ éɖée. È mɔ ɛ ja lě ɔ́, ayǐ jɛ́n è nɔ dín yi jɛ.

²Mɛ ɖěbǔ sixú glá bó ba xó e ǎ. Nú mi ma kpé éyɛ́ wú ǎ ɔ́, mɛ̌ wɛ ná sixú nɔ te nukɔn nyɛtɔn?

³Un ɖu nǔɖé sín axɔ́ dó mɛ ɖé ǎ. Nǔ e ɖo hwe glɔ́ fí lɛ́ɛ bǐ wɛ nyí ce.

⁴Un na gɔn xó ɖɔ dó wǔjɔnú Levyatáan tɔn lɛ́ɛ wú ǎ, un ná gɔn xó ɖɔ dó hlɔ̌nhlɔ́n tɔn wú ǎ, un ná gɔn xó ɖɔ dó ɖɛkpɛ tɔn wú ǎ.

⁵Mɛ̌ ká sixú ɖe awu sín kɔ n'i? Mɛ̌ ka sixú xo ganwu tlitli e ɖo wǔ tɔn ɔ́ zlɛ́?

⁶Mɛ̌ ká hun gbla tɔn kpɔ́n? A hun bo mɔ aɖǔ ɖo caan lě ɖo nu tɔn mɛ ɔ́, ado jɛ́n ná hu we.

⁷Nɛgbé tɔn bǐ wɛ nyí zǎ cɛɖɛɖɛ. È to ɖě bɔdó ɖě wú, bó ján bǐ; ali yi mɛ ǎ.

⁸Yě sɛbɔ dó yěɖée wú, bɔ jɔhɔn nɔ sixú gbɔn tɛ́ntin yětɔn ǎ.

⁹Zǎ ɖě tɛ́ dó ɖě wú bó kpan, bɔ è sixú ɖe ɖě sín ɖě wú ǎ.

¹⁰É nyi cin lě ɔ́, é nɔ́ kán myɔ; nukún tɔn lɛ́ɛ cí hwe ɖo tíntɔ́n wɛ ɖɔhun.

¹¹Zoɖɛ́ nɔ́ tɔ́n sín nu tɔn mɛ, nu tɔn mɛ nɔ kán myɔ.

¹²Azizɔ nɔ tɔ́n sín awɔntín tɔn mɛ, sin ɖo agbǎn hun ɖo ado jí wɛ ɖɔhun, azizɔ ɖo tíntɔ́n sín azɔgo mɛ wɛ ɖɔhun.

¹³Jɔhɔn e nɔ tɔ́n sín nu tɔn mɛ ɔ́ ná flɔ́ akán; myɔ nɔ tɔ́n sín nu tɔn mɛ.

¹⁴Kɔ tɔn mɛ wɛ hlɔ̌nhlɔ́n tɔn ɖe, mɛ bǐ nɔ́ hɔn ɖo nukɔn tɔn.

¹⁵Fí ɖěbǔ bɔ ɖo wǔ tɔn ǎ; è na bo zín wǔ tɔn ɔ́, é nɔ́ wán do ǎ.

¹⁶Hǔn e ɖo xo tɔn mɛ ɔ́ syɛ́n awǐnnya ɖɔhun, é syɛ́n sé ɖɔhun.

¹⁷Nú kanlin ɖaxó Levyatáan sí te ɔ́, xɛsi nɔ jɛ akowunká lɛ́ɛ[15] jí; ado nɔ hu yě, bɔ yě nɔ́ yí yɛ dó nǔ wú.

¹⁸È sɔ́ hwǐ i ɔ́, é nɔ́ yi lan tɔn mɛ ǎ; hwǎn kpé wǔ tɔn ǎ, gǎ kpé wǔ tɔn ǎ, kposó kpé wǔ tɔn ǎ.

¹⁹Gan cí nǔywɛ́ ɖɔhun ɖo nukún tɔn mɛ, ganvɔ cí atín e jɛ wɔvli ɔ́ ɖɔhun n'i.

²⁰É nɔ hɔn ɖo gǎ nukɔn ǎ; è da klohwán dó e ɔ́, nǔywɛ́ ɖɔhun wɛ é nɔ́ cí ɖo nukún tɔn mɛ.

²¹Nǔywɛ́ ɖé kpowun wɛ é nɔ́ zé kpota dó mɔ; è ɖo gyankpa xú i wɛ ɔ́, nǔ ko wɛ é nɔ́ ɖe.

²²Nǔ nuxwíɖíxwíɖí ɖé lɛ́ɛ wɛ gbɔn adɔgo tɔn mɛ, bó nɔ kán kɔ́ alǐn ɖɔhun.

²³É nɔ́ dán xu, bɔ xu glɔ́ nɔ́ hun agbǎn nǔ ɖo ado jí ɖɔhun; é nɔ́ zé xu dó húzú ganzɛ́n e mɛ nǔsáwǔ ɖo agbǎn hun ɖe wɛ é.

²⁴É gbɔn fí ɖé dín ɔ́, wěziza nɔ́ mlí hwǐn ɖo gǔdo tɔn, bó nɔ́ wé degénɔ kpikpoe sín ɖa ɖo tɔ nukún mɛ ɖɔhun.

²⁵Mɛ ɖěbǔ nyí gǎn n'i ɖo ayǐkúngban jí ǎ; un bló e bɔ é nɔ́ ɖi xɛsi nú nǔɖé ǎ.

²⁶É nɔ́ hu tɛ́ nú nǔ e d'agba lɛ́ɛ bǐ, é wɛ nyí adǎnkanlin lɛ́ɛ bǐ xɔ́sú.