Read fon Jɔ̌bu 5 Bible Online

Jɔ̌bu 5 - fon bible

Jɔ̌bu 5

¹Sú xó bó kpɔ́n ɖɔ mɛ ɖé ná yí gbe nú we a jí. Wɛnsagun Mawu tɔn tɛ́ a sixú ɖɔ xó ná din?

²Xomɛsin nɔ hu ayixa ma sɔgbe ná nɔ; aɖi ɖíɖó nɔ́ hu taɖunɔ.

³Un mɔ ayixa ma sɔgbe ná nɔ bɔ nǔ ɖo nyǐnyɔ́ n'i wɛ, un yi gǔdo cóbó sá heelú xwédo tɔn ǎ.

⁴Un ɖɔ: “Vǐ tɔn lɛ́ɛ ní má mɔ gǎnjɛwú ɖěbǔ ó; yě yi hwɛgun hǔn, è nǐ ɖó hwɛ nú yě, mɛ ɖěbǔ ma hwlɛ́n yě gán ó.

⁵Jinukún e é ya lɛ́ɛ ɔ́, mɛ e ɖo xovɛ́ lɛ́ɛ ní ɖu bǐ; é ná zé wun dó dó kpá lɛ́ lɛ̌ dó có yě ná bɛ́. Mɛ e ma ɖó nǔɖé ǎ lɛ́ɛ ní bɛ́ dɔkun tɔn lɛ́ɛ.”

⁶Nyladó tɔ́n sín kɔ́ glɔ́ ǎ, yajiji ka wú sín ayǐkúngban lanmɛ ǎ.

⁷Ya e gbɛtɔ́ nɔ́ ji ɔ́, gbɛtɔ́ ɖésú wɛ nɔ́ dó éɖée, lě e myɔkán e nɔ́ zlɔ́n sín myɔ mɛ ɔ́, myɔ ɖésú wɛ nɔ́ ná gbɔn é ɖɔhun.

⁸Tɛn towe mɛ wɛ un ɖe ɔ́, Mawu wɛ un nǎ ylɔ́; é wɛ un nǎ ɖɔ nǔ e ɖo gbigbo mì wɛ ɔ́ ná.

⁹Nǔ e Mawu nɔ́ wa lɛ́ɛ d'agba, è sixú mɔ nukúnnú jɛ wú ǎ. Nǔ e é nɔ́ jlɛ́ lɛ́ɛ ɔ́, è sixú xa bǐ ǎ.

¹⁰É nɔ́ sɛ́ jǐ dó ayǐkúngban ɔ́, é nɔ́ hú sin nú gle lɛ́ɛ.

¹¹É nɔ́ sɔ́ mɛ e ɖo do lɛ́ɛ d'aga, mɛ e ɖo aluwɛ mɛ lɛ́ɛ nɔ́ mɔ awǎjijɛ.

¹² É nɔ́ flí mɛ sísɛ́ lɛ́ɛ sín tito lɛ́ɛ xwe, é nɔ́ hɛn wě e yě ɖe lɛ́ɛ gblé dó así nú yě.

¹³É nɔ́ wlí nǔnywɛ́tɔ́ lɛ́ɛ dó mɔ e yě ɖǒ ayi nukɔn nú mɛ bó ɖó lɛ́ɛ mɛ; nǔ e yě nɔ́ zé bǐbí yětɔn dó kplɔ́n mɛ lɛ́ɛ sɔ́ nɔ́ nyí nǔɖé wa nú ǎ.

¹⁴Zǎn nɔ́ kú dó yě kéze ɖéɖé; yě nɔ́ dlá avi hwemɛ cíɖíɖí zǎn mɛ wɛ yě ɖe ɖɔhun.

¹⁵Lo ɔ́, Mawu nɔ́ yí mɛ e ma ɖó gǎn ǎ ɔ́ sín nu yětɔn, é nɔ́ hwlɛ́n ɛ sín alɔ hlɔ̌nhlɔ́nnɔ yětɔn mɛ.

¹⁶Énɛ́ wɛ nɔ́ ná nukúnɖíɖó mɛ e ma ɖó gǎn ɖěbǔ ǎ é, bɔ nǔnyanyawatɔ́ bǐ sín nu nɔ yi xɔ.

¹⁷ Énɛ́ ɔ́ wú ɔ́, nǔ nyɔ́ nú mɛ e Mawu nɔ́ dɔn tó ná é. Jɔ̌bu, ma gbɛ́ kplɔ́n e ná we wɛ Nǔbǐwúkpétɔ́ ɔ́ ɖe ɔ́ ó.

¹⁸ Mawu nɔ́ gblé wǔ mɛ, é ká nɔ́ lɛ́ blá akpa nú mɛ. É wɛ nɔ́ dó akpa wǔ nú mɛ, é jɛ́n ká nɔ́ zé alɔ tɔn dó klɔ́ akpa nú mɛ.

¹⁹Adǎn gěgé ná gbo we adǎn ɖěbǔ ká gbo we ɔ́, é ná nɔ́ hwlɛ́n we sín mɛ, bɔ nǔɖé ná wa we gbeɖé ǎ.

²⁰Adɔ hwenu ɔ́, é ná lɔn bɔ a nǎ kú ǎ. Ahwan na bo syɛ́n gbɔn ɖěbǔ ɔ́, é ná hwlɛ́n we gán.

²¹Nu nyanya e è nǎ kɛ dó wǔ we ɔ́ ɖě ná wa nǔɖé nú we ǎ; hwenu e adla ná jɛ gbě jí ɔ́, a nǎ ɖi xɛsi nú nǔ ɖěbǔ ǎ.

²²Adla na bo jɛ gbě jí ɔ́, a nǎ ké ya ná ǎ, è ɖo xovɛ́ xó ɖɔ wɛ ɔ́, tó wú wɛ a nǎ se ɖó; xɛsi na ɖi we ɖo adǎnkanlin lɛ́ɛ nukɔn ǎ.

²³È ɖo awǐnnyaglo nyi dó gle lɛ́ɛ mɛ wɛ, abǐ kanlin lɛ́ɛ ɖo dǐndín gbɔn gle lɛ́ɛ mɛ wɛ ɔ́, hwɛ ná ɖó jiɖiɖe ɖɔ nǔɖé kún ná gblé ɖo gle émítɔn mɛ ó.

²⁴A nǎ vo ɖo xwé towe gbe; a wǎ kpɔ́n xwé towe gbe ɔ́, nǔ ɖěbǔ ná hwe ɖo xwé towe gbe ǎ.

²⁵A nǎ mɔ vǐ towe lɛ́ɛ ná ɖo jijɛ jí wɛ; vǐ towe lɛ́ɛ ná ɖo kpɔ́ su wɛ gběhan ɖo wǔwú wɛ ɖɔhun.

²⁶A nǎ kpo kújɛ́kújɛ́, hlɔ̌nhlɔ́n ká ná kpo ɖo wǔ we káká yi kúzán gbe towe, hlɔ̌nhlɔ́n ná kpo ɖo wǔ we, lě e jinukún nɔ́ myá, bó nɔ́ kpo ɖo ganjí káká jɛ yiya hwenu gbɔn é.

²⁷Jɔ̌bu, ée mǐ lin tamɛ káká ɔ́, nǔ e mǐ mɔ é nɛ́; mɔ̌ wɛ é ká ɖe nǔgbó, yǐ gbe ná, bó zé dó wa azɔ̌ ná.