Read fon Jɔ̌bu 9 Bible Online

Jɔ̌bu 9 - fon bible

Jɔ̌bu 9

¹ Ée Jɔ̌bu sín xɔ́ntɔn Biludádi ɖɔ xó ɔ́, Jɔ̌bu yí xó, bó ɖɔ:

²Gbɛtɔ́ sixú nyí hwɛjijɔnɔ ɖo Mawu nukɔn ǎ. Un tunwun ganjí ɖɔ mɔ̌ wɛ nyí.

³Nú gbɛtɔ́ jló ná dɔn nǔ xá Mawu ɔ́, nú Mawu kan nǔ afatɔ́n (1.000) byɔ́ ɛ ɔ́, é sixú mɔ sin nú ɖokpó vɔ́vɔ́ ǎ.

⁴Mawu wɛ ɖó nǔnywɛ́; hlɔ̌nhlɔ́n tɔn d'agba; mɛ̌ wɛ sixú li za xá Mawu bó tɔ́n wǔɖíɖí aji ɖɔhun?

⁵Mawu nɔ́ sɛ tɛn nú só ajijimɛ; xomɛ sin i ɔ́, é nɔ́ flí só lɛ́ɛ xwe.

⁶É nɔ́ húnhún ayǐkúngban ɔ́ ɖo azan tɔn jí; dodó tɔn lɛ́ɛ nɔ́ dán wǔ.

⁷É nɔ́ dó sɛ́n nú hwe bɔ é nɔ́ tɔ́n ǎ. É nɔ́ dó gan sunví lɛ́ɛ.

⁸Mawu ɖokpónɔ géé wɛ vlɔ́n jǐnukúnsin. É nɔ́ ɖi zɔnlin gbɔn xu jí.

⁹ É wɛ bló sunvísɛkplé totaligbé tɔn lɛ́ɛ, sunvísɛkplé hweyihwǎn tɔn lɛ́ɛ, sunvísɛkplé tofɔligbé tɔn lɛ́ɛ[4]

¹⁰É wɛ bló nǔ ɖaxó ɖaxó lɛ́ɛ, nǔ e è ma sixú mɔ ɖó nukún wú ǎ lɛ́ɛ; nǔ ɖagbe ɖagbe e é bló lɛ́ɛ ɔ́, maxamaxa wɛ.

¹¹Mawu ná bó ɖo akpá ce gbɔn wɛ ɔ́, un sixú mɔ ɛ ǎ; é ná bó sɛ yi zɔ nú mì ɔ́, un nɔ tunwun ǎ.

¹²Nú é xo nǔɖé yí ɔ́, mɛ̌ ká sixú hwlɛ́n xá ɛ? Mɛ̌ wɛ sixú glá bó kan nǔ e wa wɛ é ɖe ɔ́ byɔ́ ɛ?

¹³Mawu sin xomɛ ɔ́, é nɔ́ lɛ́ kɔ nú xomɛsin tɔn ǎ. Nǔdábaɖa xu mɛ tɔn lɛ́ɛ bǐ: Hlaxávu kpó ahwan tɔn lɛ́ɛ kpó yi do ɖo nukɔn tɔn.

¹⁴Nyɛ ɔ́, xó tɛ́ un sixú ɖɔ dó xó tɔn wú? Xó tɛ́ un sixú ɖɔ dó gba xó tɔn ná?

¹⁵Nú hwɛ ce na bo jɔ ɔ́, un sixú ná xósin ɖé ǎ; vo jɛ́n un ná sa nú hwɛɖɔtɔ́ ce ɖɔ é ní jɔwǔ mì.

¹⁶Nú un na bo ylɔ́ ɛ, bɔ é yí gbe nú mì ɔ́, un sixú ɖi ɖɔ é ná ɖótó mì ǎ.

¹⁷É nɔ mɔ̌ kpowun bo xo mì zindɛ́[5]; é nɔ́ nɔ dadá mɛ, bó nɔ́ jɛ wǔ gblé mì jí ma ɖó alɔ te.

¹⁸É nɔ́ ná agbɔ̌n mì ɖěbǔ ǎ; ya dó nú mì wɛ jɛ́n é nɔ́ ɖe.

¹⁹Hun wɛ un ka ná tɔ́ ɛ a? Éɖíe ká dó hlɔ̌nhlɔ́n hú mì e! Hwɛxɔsá wɛ mǐ nǎ yi ɖɔ gbo ɖe a? Bɔ mɛ̌ ká ná ylɔ́ mì ɖo hwɛɖɔxɔsá bɔ un ná yi ɖe tɔ nyiɖée?

²⁰Nú hwɛ ce na bo jɔ ɔ́, nu ce ná zɔ́n bɔ è nǎ dó hwɛ mì un ná bo nyí xomɛvɔ́nɔ ɔ́, xó e nɔ́ tɔ́n sín nu ce mɛ ɔ́ wɛ è nǎ dó gblé hwɛ dó ta nú mì.

²¹Xomɛvɔ́nɔ wɛ un nyí a? Un ma ka tunwun nɛ́! Gbɛ cikɔ nú mì.

²²Nukún ce mɛ ɔ́, xomɛvɔ́nɔ kpó mɛdídá kpó ɔ́, nǔ ɖokpó ɔ́ wɛ yě nyǐ; énɛ́ ɔ́ wú wɛ un nɔ ɖɔ: Mawu nɔ́ sú xomɛvɔ́nɔ kpó mɛdídá kpó sín kún dó.

²³Nú awě ɖé xo xomɛvɔ́nɔ lɛ́ɛ vawun bɔ yě kú ɔ́, Mawu nɔ ko yě.

²⁴Nú to ɖé jɛ adǎnúwatɔ́ lɛ́ɛ lɔ mɛ ɔ́, Mawu nɔ blá nukún mɛ nú hwɛɖɔtɔ́ tɔn lɛ́ɛ; é má nyí é wɛ nɔ́ wa mɔ̌ ǎ ɔ́, mɛ̌ ká wɛ lo?

²⁵Gbɛ ce ɖo wezun jí hú wezunkántɔ́; un mɔ gbɛ víví ɖěbǔ ǎ.

²⁶Gbɛzán ce ɖo yiyi wɛ bléblé tɔjíhún fúɖáfúɖá ɖɔhun; é ɖo yiyi wɛ húu gangan ja nǔ sá gbé ɖɔhun.

²⁷Nú un ɖɔ un ná dó vɛ̌ nú ya e ji wɛ un ɖe lɛ́ɛ, bó gosín aluwɛ mɛ, bó vlɔ́n nukún mɛ ɔ́,

²⁸wǔvɛ́ e mɔ wɛ un ɖe lɛ́ɛ bǐ nɔ́ jɛ adohu dó nú mì jí, un ka tunwun ganjí ɖɔ hwɛ Mawu ɔ́, a kún ná ɖe tɔ mì ó.

²⁹È na bo ɖɔ gbɔn ɖěbǔ ɔ́, hwɛhutɔ́ jɛ́n un nyí nú we tɛgbɛ. Ani sín tagba jɛ wɛ un ka ná lɛ́ ɖe?

³⁰Un na bo sɔ́ aɖǐ dó lɛ wǔ ná gbɔn ɖěbǔ ɔ́, un na bo zé aɖǐsin dó klɔ́ alɔ gbɔn ɖěbǔ ɔ́,

³¹a nǎ lɛ́ zin mì dó bɔ̌ mɛ tlóló, bɔ awu ce lɛ́ɛ ná gbɛ́ mì bó sɔ́ ná ba ná jɛ wǔ ce ǎ.

³²Mawu ká nyí gbɛtɔ́ nyɛ ɖɔhun, bónú má kɛ nu n'i ǎ. É nyí gbɛtɔ́ nyɛ ɖɔhun bónú nyɛ kpódó e kpó ná yi hwɛ nukɔn ǎ.

³³Hwɛgbotɔ́ ɖé ɖo tɛ́ntin mǐtɔn, bó ná gbo hwɛ nú mǐ ǎ.

³⁴Ényí mɛ mɔ̌hun wɛ ɖe ɔ́, Mawu ná ɖó kpo e dó xo mì wɛ é ɖe ɔ́ te, bɔ xɛsi e dó mì wɛ é ɖe ɔ́ sɔ́ ná gba ayi dó nú mì ɖě ǎ.

³⁵Nú nǔ sixú cí mɔ̌ ɔ́, un ná nɔ́ ɖɔ xó n'i ma ɖi xɛsi. Nǔ ɖíe má ká cí mɔ̌ din ǎ, bɔ un kpo nú nyiɖée e.