Read fon Ɖɛhan 102 Bible Online

Ɖɛhan 102 - fon bible

Ɖɛhan 102

¹Adǎn ɖo nya ɖé gbó wɛ bɔ é dán ɖě wa gbɔn, bó ɖɔ nǔ e ɖo gbigbo e wɛ é nú Mawu Mavɔmavɔ.

²Mawu Mavɔmavɔ, ɖǒtó ɖɛ ce, xó e sú wɛ un ɖe ɔ́ ní hun káká wá gɔ̌n towe.

³Gbe e gbe adǎn ná gbo mì ɔ́, ma sɔ́ hwiɖée hwlá dó mì ó. Un sú xó ylɔ́ we hǔn, ɖǒtó mì. Se ɖɛ ce, ma lín ó!

⁴Đó gbɛzán ce ɖo kinkɛn wɛ azizɔ ɖɔhun, bɔ xú ce lɛ́ɛ ɖo jiji wɛ myɔtín ɖɔhun.

⁵Ayi e ɖo xo ce mɛ é sɔ́ ɖó gǎn ɖé ǎ gběhan e è xo ɔ́ ɖɔhun, un sɔ́ nɔ́ flín nǔɖuɖu lɔ bo nɔ ɖu ǎ.

⁶Un ɖo azɔn wɛn wɛ káká bó wá kpo xú kɛ́ɖɛ́,

⁷un cí gbětótló mɛ xɛ ɖɔhun, un cí kwlele e ɖo xwé gbigba gbe é ɖɔhun.

⁸Un sɔ́ nɔ́ dɔ́ amlɔ ǎ, un cí xɛ goɖokpónɔ ɖé ɖɔhun ɖo xɔ ta.

⁹Ayǐ hɔ́n tɛgbɛ ɔ́, kɛntɔ́ ce lɛ́ɛ nɔ́ ɖo zunzun mì wɛ, yě nɔ́ ɖo cícá mì ko wɛ; yě ja nu dó mɛɖé gbé ɔ́, yě nɔ́ ɖɔ nú mɛ ɔ́ ɖɔ nǔ e wa mì ɔ́ ní wa mɛ ɔ́.

¹⁰Afín wɛ un nɔ ɖu ɖó nǔɖuɖu do mɛ, un ná nu nǔɖé ɔ́, ɖasin ce nɔ hán ɖ'é mɛ ǎ;

¹¹a sɔ́ mì nyi dó gbě, ɖó a ɖo xomɛsin jí, bó ɖo adǎn jɛ wɛ.

¹²Gbɛzán ce ɖo wǐwá yi wɛ gbada yɛ ɖɔhun, un ɖo xúxú wɛ gběhan ɖɔhun.

¹³Amɔ̌, hwɛ Mawu Mavɔmavɔ ɔ́, a ɖo axɔ́sú ɖu wɛ káká sɔ́yi; gbɛtɔ́ e kó jɔ wá gbɛ ɔ́ mɛ ɔ́ bǐ wɛ tunwun we, mɛ e ná wá jɔ sɔ lɛ́ɛ lɔ ná tunwun we.

¹⁴A nǎ sí te bó kú nǔbláwǔ nú Sinyɔ́ɔ, ɖó hwenu e a ɖǒ, bɔ nǔ tɔn ná blá wǔ nú we é su.

¹⁵Mɛsɛntɔ́ towe lɛ́ɛ yí wǎn nú awǐnnya Sinyɔ́ɔ tɔn lɛ́ɛ. Sinyɔ́ɔ ɔ́ bǐ wɛ gba hánnyá có yě nɔ́ kpo ɖo wǎn yí ná wɛ.

¹⁶Énɛ́ ɔ́, akɔta lɛ́ɛ bǐ ná ɖó sísí nú nyǐkɔ Mawu Mavɔmavɔ tɔn, bɔ axɔ́sú e ɖo ayǐkúngban ɔ́ jí lɛ́ɛ bǐ ná ɖó sísí nú Mawu Mavɔmavɔ sín susu,

¹⁷hwenu e Mawu Mavɔmavɔ ná lɛ́ vɔ́ Sinyɔ́ɔ to ɔ́ bló ɖó, bó ná ɖe éɖée xlɛ́ gbɔn susu tɔn mɛ é,

¹⁸hwenu e é ná nɔ́ ɖótó lelenɔ lɛ́ɛ sín ɖɛ, bó ma sɔ́ ná gbɛ́ ɖɛ yětɔn se ɖě ǎ é.

¹⁹È nǐ wlán nǔ élɔ́ lɛ́ɛ dó wěma mɛ ɖ'ayǐ nú vǐ tɔn e ná wá jɔ sɔ lɛ́ɛ é, bónú togun e ná lɛ́ vɔ́ ɖ'ayǐ wɛ è ɖe é ná sɔ́ Mawu Mavɔmavɔ su:

²⁰jǐ aga wɛ Mawu Mavɔmavɔ ɖe bó nɔ́ kpɔ́n nǔ sɛ́ dó. Mawu Mavɔmavɔ nɔ́ nɔ jǐ aga dɔ̌n, bó nɔ́ kpɔ́n ayǐkúngban ɔ́ jí sɛ́ dó,

²¹bó nɔ́ se azɔn e wɛn wɛ mɛ e ɖo gan mɛ lɛ́ɛ ɖe é, bó nɔ́ hwlɛ́n mɛ e ɖo nǎ kú wɛ lɛ́ɛ gán.

²²Énɛ́ ɔ́, yě ná jlá Mawu Mavɔmavɔ nyíkɔ ɖo Sinyɔ́ɔ; yě ná nɔ́ mlá ɛ ɖo Jeluzalɛ́mu,

²³hwenu e togun lɛ́ɛ bǐ ná kplé ɖo fínɛ́, bɔ axɔ́súɖuto lɛ́ɛ bǐ ná kplé bó ná sɛn Mawu Mavɔmavɔ é.

²⁴Mawu ɖe hlɔ̌nhlɔ́n ce kpo ɖo alixo, é ɖe gbɛzán ce kpo.

²⁵Un ɖɔ nú we ɖɔ: “Mawu ce, ma lɔn nú un wɛ́n kú ó, hwi mɛ e ɖo gbɛ káká sɔ́yi é.”

²⁶ Hwi wɛ ɖó ayǐkúngban ɔ́ ayǐ sín do, bɔ jǐxwé ɔ́ nyí alɔ towe núwiwa.

²⁷Nǔ nɛ́ lɛ́ɛ bǐ ná vɔ, hwɛ ka ná ɖe tɛgbɛ. Bǐ wɛ ná gbi avɔ ɖɔhun; a nǎ ɖyɔ́ bǐ awu ɖɔhun, bɔ yě bǐ nǎ vɔ.

²⁸Lo ɔ́, mɛ e a nyǐ ɔ́ jɛ́n a nyǐ tɛgbɛ; gbɛ towe ná vɔ gbeɖé ǎ.

²⁹Mɛsɛntɔ́ towe lɛ́ɛ sín vǐ lɛ́ɛ ná ɖó nɔtɛn, vǐ yětɔn lɛ́ɛ ná nɔ nukɔn towe.