Read fon Ɖɛhan 106 Bible Online

Ɖɛhan 106 - fon bible

Ɖɛhan 106

¹ Mi kpa Mawu Mavɔmavɔ! Mi kpa susu nú Mawu Mavɔmavɔ, ɖó é nyɔ́, wǎn yíyí tɔn ɖo te káká sɔ́yi.

²Mɛ̌ ká sixú ɖɔ nǔ ɖaxó ɖaxó e Mawu Mavɔmavɔ bló lɛ́ɛ? Mɛ̌ ká sixú jlá susu e jɛ xá ɛ lɛ́ɛ gbɔn fí bǐ?

³Nǔ nyɔ́ nú mɛ e nɔ nyi Mawu Mavɔmavɔ sɛ́n ɔ́, bó nɔ́ wa nǔ dó sɛ́nxwi jí hwebǐnu lɛ́ɛ é.

⁴Mawu Mavɔmavɔ, hwenu e a nǎ wa ɖagbe nú togun towe ɔ́, flín mì; hwenu e a nǎ hwlɛ́n togun towe gán ɔ́, kpé nukún wǔ ce.

⁵Énɛ́ ɔ́, nyi lɔ ná mɔ ɖagbe e a nɔ wa nú mɛ e a sɔ́ ɖó vo lɛ́ɛ é, awǎ e jɛ wɛ togun towe ɖe ɔ́ ná dó xomɛhunhun nú mì, nyi lɔ ná gó togun e nyí towe é ɖɔhun.

⁶Mǐ hu hwɛ tɔ́gbó mǐtɔn lɛ́ɛ ɖɔhun, mǐ jɛ agɔ, mǐ wa nǔ nyi do.

⁷ Tɔ́gbó mǐtɔn lɛ́ɛ ké ya nú nǔ e Mawu jlɛ́ ɖo Ejípu lɛ́ɛ é ǎ, yě sɔ́ flín xomɛ tobutóbú e é nyɔ́ dó yě wú é ǎ. Yě wǎ fɔ́n gǔ ɖo xutó, ɖo Xu Vɔvɔ ɔ́ tó.

⁸Lo ɔ́, é ka kpɔ́n dó nyǐkɔ tɔn wú bó hwlɛ́n yě gán, bó dó ɖe hlɔ̌nhlɔ́n tɔn xlɛ́.

⁹ Mawu ɖe gbe dó Xu Vɔvɔ ɔ́ bɔ é mɛ, bɔ é kplá yě gbɔn xuzan jí, ayǐ xúxú jí gbɔn wɛ yě ɖe ɖɔhun.

¹⁰É hwlɛ́n yě gán ɖo mɛ e gbɛ́ wǎn nú yě ɔ́ sí, é yí yě sín kɛntɔ́ lɔ mɛ.

¹¹Sin ɔ́ ɖi bú kɛntɔ́ yětɔn lɛ́ɛ; mɛ ɖěbǔ gán ɖ'é mɛ ǎ.

¹² Énɛ́ ɔ́, yě ɖi nǔ nú xó e Mawu ɖɔ é, bó ji han dó mlá ɛ.

¹³Tlóló jɛ́n yě ká lɛ́ wɔn nǔ e é bló lɛ́ɛ, yě sɔ́ nɔ te bɔ nǔ e é ɖɔ ɔ́ jɛ vɔ́vɔ́ ǎ.

¹⁴ Nǔ jɛ yě jló jí ɖo gbětótló mɛ, bɔ yě jɛ Mawu tɛ́nkpɔ́n jí.

¹⁵Mawu ná nǔ e byɔ́ wɛ yě ɖe ɔ́ yě, bó ka sɛ́ azɔn dó yě bɔ yě jɛ gǒ xú jí.

¹⁶ Yě jɛ wǔ hwan Mɔyízi wú jí ɖo fí e yě ɖó gɔnu ɖó ɔ́, yě jɛ wǔ hwan Aalɔ́ɔn mɛ e Mawu Mavɔmavɔ sɔ́ ɖó vo é wú jí,

¹⁷Énɛ́ ɔ́ wú ɔ́, ayǐkúngban kɛ nu bó mi Datáni, bó mi Abilámu sín ahwangbɛ́ lɛ́ɛ.

¹⁸Mɛdídá nɛ́ lɛ́ɛ bǐ ji zo, yě bǐ fyɔ́.

¹⁹ Yě bló nyibúví ɖokpó ɖo Holɛ́bu só ɔ́ kɔn, yě jɛ akpajlɛ́ e è sínsín gan dó bló é sɛn jí.

²⁰Mawu e nyí susu yětɔn ɔ́, yě sɔ́ nyibú dó ɖyɔ́ ɛ, nyibú amaɖukanlin ɖé kpowun dó ɖyɔ́ ɛ.

²¹Yě wɔn Mawu, Mɛhwlɛ́ngántɔ́ yětɔn ɔ́; Yě wɔn Mawu e bló nǔ ɖaxó tɛnmɛ tɛnmɛ ɖo Ejípu ɔ́.

²²É jlɛ́ nǔ tɛnmɛ tɛnmɛ ɖo Cámu, é bló nǔjíwǔ alɔkpa alɔkpa ɖo Xu Vɔvɔ ɔ́ kɔn.

²³É ɖe gbe ɖɔ è nǐ vívá kún yětɔn bǐ. Lo ɔ́, Mɔyízi e é sɔ́ ɔ́ sa vo n'i dó ta yětɔn mɛ, bó yí yě sín xomɛsin Mawu tɔn sí, bónú é má sú kún yětɔn dó ó.

²⁴ Yě hu tɛ́ nú to e mɛ gbɛ ɖe é, ɖó yě ɖi nǔ nú xó e Mawu Mavɔmavɔ ɖɔ ɔ́ ǎ.

²⁵Yě nɔ́ húnhún nǔ ɖɔ ɖo goxɔ yětɔn lɛ́ɛ mɛ, yě bló nǔ e é ɖɔ é ɖě ɖ'é jí ǎ.

²⁶Énɛ́ ɔ́ wú ɔ́, é wá sɔ́ alɔ dó jǐ, bó xwlé ɖɔ émí ná jó yě dó, bɔ yě bǐ ná kú ɖo gbětótló mɛ.

²⁷ É xwlé ɖɔ émí ná jó vǐ yětɔn lɛ́ɛ dó, émí ná gba yě dó gbɔn tomɛ tomɛ, bɔ yě ná kú jɛ gbě.

²⁸ Yě jɛ vodún Baalu sɛn jí ɖo Peɔ́ɔ, yě nɔ́ ɖu kanlin e è hu dó vodún lɛ́ɛ é sín lan; vodún énɛ́ lɛ́ɛ ɔ́, nǔ kúkú wɛ yě ká nyí.

²⁹Nǔ e yě nɔ́ wa lɛ́ɛ dó xomɛsin nú Mawu; awě ɖokpó wá xo yě.

³⁰Pínxási ka sí te bo ɖɔ xó ɔ́ gbo; énɛ́ ɔ́, awě e ɖo yě xo wɛ é nɔ te.

³¹Mawu mɔ Pínxási dó mɔ hwɛjijɔnɔ káká sɔ́yi, é nyí hwɛjijɔnɔ tɛgbɛ káká sɔ́yi.

³² Yě dó xomɛsin nú Mawu ɖo Mɛliba sin ɔ́ kɔn, bɔ Mawu dɔn tó nú Mɔyízi ɖó yědɛɛ lɛ́ɛ wú,

³³ɖó yě dó xomɛsin nú Mɔyízi bɔ é kɛ nu nyi do.

³⁴ Yě sɔ́ vívá kún nú togun lɛ́ɛ lě e Mawu Mavɔmavɔ zɔ́n gbɔn é ǎ.

³⁵Yě dǒ xɔ́ntɔn akɔta énɛ́ lɛ́ɛ, yě jɛ walɔ yětɔn lɛ́ɛ xwedó jí.

³⁶Yě jɛ vodún yětɔn lɛ́ɛ sɛn jí, bɔ énɛ́ ɔ́ nyí mɔ bɔ yě jɛ mɛ.

³⁷ Yě nɔ́ hu vǐ yětɔn súnnu kpó nyɔ̌nu kpó dó vodún.

³⁸ Yě kɔn xomɛvɔ́nɔ sín kanjɔ kɔn nyi ayǐ, yě kɔn vǐ yětɔn súnnu kpó nyɔ̌nu kpó sín kanjɔ kɔn nyi ayǐ, yě hu yě dó vodún Kanáa tɔn lɛ́ɛ, énɛ́ nyí su bɔ yě ɖu nú to ɔ́.

³⁹Nǔ énɛ́ lɛ́ɛ hɛn yě blí; yě nɔ gbejí nú Mawu ǎ nyɔ̌nu e dó afɔ gbě ɔ́ ɖɔhun.

⁴⁰ Mawu sin xomɛ dó togun tɔn bɔ é vɛ́ jlɛ́, é gbɛ́ wǎn nú togun e nyí étɔn é.

⁴¹É jó yě nú akɔta lɛ́ɛ, bɔ mɛ e gbɛ́ wǎn nú yě lɛ́ɛ kpa acɛ nú yě.

⁴²Kɛntɔ́ yětɔn lɛ́ɛ táfú yě, yě húzú alɔnugbɔ́ví yětɔn.

⁴³É hwlɛ́n yě gán azɔn mɔ̌kpán, lo ɔ́, yě ká fɔ́n gǔ gbɔn walɔ gblégblé yětɔn lɛ́ɛ mɛ, yě húzú lelenɔ ɖó hwɛ yětɔn wú.

⁴⁴Mawu se vo e sa wɛ yě ɖe é, é mɔ aluwɛ e mɛ yě ɖe é.

⁴⁵É flín akɔ e é jɛ xá yě é, bɔ nǔ yětɔn blá wǔ n'i, ɖó xomɛnyínyɔ́ tɔn d'agba.

⁴⁶Énɛ́ ɔ́, Mawu bló bɔ mɛ e wlí kannumɔ yětɔn lɛ́ɛ bǐ kú nǔbláwǔ nú yě.

⁴⁷ Mawu Mavɔmavɔ, Mawu mǐtɔn, hwlɛ̌n mǐ, ɖe mǐ sín akɔta lɛ́ɛ mɛ, bó xo mǐ kplé, bónú mǐ ná sɔ́ nyǐkɔ mímɛ́ towe su, bónú susu kpa nú we ná nɔ́ hun xomɛ nú mǐ.

⁴⁸Susu nú Mawu Mavɔmavɔ, Mawu Izlayɛ́li tɔn káká sɔ́yi. Togun ɔ́ bǐ ní ɖɔ: “Amǐ! Mi kpa Mawu Mavɔmavɔ!”