Read fon Ɖɛhan 107 Bible Online

Ɖɛhan 107 - fon bible

Ɖɛhan 107

¹ “Mi kpa susu nú Mawu Mavɔmavɔ, ɖó é nyɔ́, wǎn yíyí tɔn ɖo te káká sɔ́yi.”

²Xó e mɛ e Mawu Mavɔmavɔ xɔ gbɛ ná lɛ́ɛ bǐ ná vɔ́ ɖɔ ɔ́ nɛ́, mɛ e é hwlɛ́n gán ɖo kɛntɔ́ sí lɛ́ɛ bǐ ná vɔ́ ɖɔ é nɛ́;

³yě wɛ é kplé sín to lɛ́ɛ mɛ, to lɛ́ɛ mɛ, sín Zǎnzǎnhwe jí, sín Gbadahwe jí, sín Totaligbé, sín Tofɔligbé.

⁴Mɛ ɖé lɛ́ɛ nɔ́ ɖo flúflú wɛ gbɔn gbětótló mɛ; yě tunwun ali e yě ná gbɔn, bó yi mɔ fí ɖé, bó nɔ é ǎ.

⁵Adɔ nɔ ɖo nǔ yětɔn wa wɛ, yě nɔ́ mɔ sin nu ǎ, énɛ́ ɔ́, awakanmɛ kú yě.

⁶Aluwɛ énɛ́ ɔ́ mɛ wɛ yě ɖe, bó sú xó ylɔ́ Mawu Mavɔmavɔ, bɔ é wá xɔ yě ɖo adǎn e ɖo yě gbo wɛ lɛ́ɛ mɛ.

⁷É kplá yě gbɔn ali e jlɔ́ é jí, bónú yě ná yi mɔ to ɖé bó nɔ mɛ.

⁸Yě ní kpa Mawu Mavɔmavɔ ɖó wǎn yíyí tɔn wú, yě ní kpa ɛ ɖó nǔjíwǔ e é nɔ́ wa nú gbɛtɔ́ lɛ́ɛ wú.

⁹É ná sin mɛ e kɔ xú lɛ́ɛ, é hun alɔ bó ná nǔɖuɖu mɛ e xovɛ́ sin lɛ́ɛ.

¹⁰Mɛ ɖěvo lɛ́ɛ ɖo ganxó, yě ɖo ayǐjínjɔ́n ɖo ablu mɛ, yě ɖo wlɔ mɛ, yě ɖo aluwɛ mɛ,

¹¹ɖó yě fɔ́n gǔ dó xó e Mawu ɖɔ é jí, yě hu tɛ́ nú nǔ e Mawu Ajalɔ̌nlɔn kplɔ́n yě é.

¹²Mawu sɔ́ ya dó wa nǔ xá yě, yě ɖo ayǐ jɛ wɛ, mɛɖé ka ɖe bó ná dó alɔ yě ǎ.

¹³Aluwɛ énɛ́ ɔ́ mɛ wɛ yě ɖe, bó sú xó ylɔ́ Mawu Mavɔmavɔ, bɔ é wá hwlɛ́n yě gán sín adǎn e ɖo yě gbo wɛ lɛ́ɛ mɛ.

¹⁴É ɖe yě sín ganxó, é ɖe yě sín ablu mɛ, é wɛ́n wlɔ e mɛ yě ɖe é.

¹⁵Yě ní kpa Mawu Mavɔmavɔ ɖó wǎn yíyí tɔn wú, yě ní kpa ɛ ɖó nǔjíwǔ e é nɔ́ wa nú gbɛtɔ́ lɛ́ɛ wú.

¹⁶É fó ganhɔn lɛ́ɛ, é wɛ́n sɛxlo lɛ́ɛ.

¹⁷Mɛ ɖěvo lɛ́ɛ sín walɔ nɔ ɖe xlɛ́ ɖɔ taglo mɛ yětɔn kún ɖo ganjí ó, yě ɖo wǔvɛ́ mɔ wɛ ɖó hwɛ e yě hu lɛ́ɛ wú.

¹⁸Yě mɔ nǔɖuɖu ɖěbǔ lě ɔ́, jigbɔ́ nɔ́ tɔ́ yě; afɔ yětɔn ɖokpó ko ɖo yɔdo mɛ.

¹⁹Aluwɛ énɛ́ ɔ́ mɛ wɛ yě ɖe, bó sú xó ylɔ́ Mawu Mavɔmavɔ, bɔ é wá hwlɛ́n yě gán sín adǎn e ɖo yě gbo wɛ lɛ́ɛ mɛ.

²⁰É kɛ nu kpowun bɔ xó tɔn gbɔ azɔn nú yě, é yí yě sín kú sí.

²¹Yě ní kpa Mawu Mavɔmavɔ ɖó wǎn yíyí tɔn wú, yě ní kpa ɛ ɖó nǔjíwǔ e é nɔ́ wa nú gbɛtɔ́ lɛ́ɛ wú.

²²Yě ní sá vɔ̌ dó dó kú n'i, yě ní jlá nǔ ɖaxó ɖaxó e é wa lɛ́ɛ kpó awǒbóbó kpó.

²³Mɛ ɖěvo lɛ́ɛ sɔ́ tɔjíhún nyi xu jí, yě ɖo ajɔ̌ yětɔn wa wɛ bó ɖo yiyi wɛ;

²⁴yědɛɛ lɛ́ɛ nɔ́ mɔ nǔ e Mawu Mavɔmavɔ bló lɛ́ɛ, nǔjíwǔ e é bló ɖo xuzan mɛ lɛ́ɛ.

²⁵É ɖɔ xó kpowun bɔ jɔhɔn ɖaxó ɖé nyi, bɔ aslɔkɛ́ lɛ́ɛ sí te.

²⁶Aslɔkɛ́ nɔ́ sɔ́ tɔjíhún yi jǐ ɖéé bó nɔ́ sɔ́ wá do; xɛsi jɛ yě jí, ɖó nǔ e mɔ wɛ yě ɖe ɔ́ wú.

²⁷Nukún mɛ yětɔn nɔ́ gba zǐn, yě nɔ́ dán gɔgɔgɔ ahannumúnɔ ɖɔhun, nǔ e yě nyɔ́ wa é bǐ bú dó yě.

²⁸Aluwɛ énɛ́ ɔ́ mɛ wɛ yě ɖe, bó sú xó ylɔ́ Mawu Mavɔmavɔ, bɔ é ɖe yě sín adǎn e ɖo yě gbo wɛ lɛ́ɛ mɛ.

²⁹É ɖó jɔhɔn ɔ́ te, bɔ xu ɔ́ hwíhwɛ́ bǐ tótótó.

³⁰Ée xu ɔ́ hwíhwɛ́ ɔ́, é víví nú yě, bɔ Mawu kplá yě yi tɔjíhúnglíntɛn e yě xwe é.

³¹Yě ní kpa Mawu Mavɔmavɔ ɖó wǎn yíyí tɔn wú, yě ní kpa ɛ ɖó nǔjíwǔ e é nɔ́ wa nú gbɛtɔ́ lɛ́ɛ wú.

³²Yě ní ɖɔ lě e é d'agba gbɔn ɔ́ ɖo togun ɔ́ sín kplékplé mɛ, yě ní kpa susu n'i ɖo tomɛxó lɛ́ɛ sín kplé jí.

³³Mawu wɛ nɔ sɔ́ tɔsisa ɖaxó lɛ́ɛ dó húzú axéko, é wɛ nɔ́ sɔ́ tɔjɔtɛn lɛ́ɛ dó húzú ayǐ xúxú,

³⁴é wɛ nɔ́ sɔ́ to e sín ayǐkúngban nɔ hwán nǔ ɔ́ dó húzú ayǐkúngban jɛvɛ́jɛvɛ́, ɖó adǎka e to ɔ́ mɛ nu lɛ́ɛ nɔ́ xo é wú.

³⁵É nɔ́ sɔ́ axéko dó húzú tán, é nɔ́ sɔ́ ayǐkúngban xúxú dó húzú tɔjɔtɛn.

³⁶Fínɛ́ wɛ é ɖó tɛnmɛ nú mɛ e adɔ ɖo nǔ yětɔn wa wɛ lɛ́ɛ ɖe, bɔ yě nɔ́ wa xwé nyi fínɛ́.

³⁷Yě nɔ́ dó jinukún, yě nɔ́ tun vǐwuntín, yě nɔ́ ya nǔ e yě dó lɛ́ɛ.

³⁸É nɔ́ xo ɖɛ dó yě jí, bɔ yě nɔ́ ji gba, é nɔ́ lɔn nú kanlin yětɔn lɛ́ɛ nɔ́ ɖe kpo ǎ.

³⁹Mɛ ɖěvo lɛ́ɛ nɔ́ ɖo vivɔ wɛ, yě nɛ́ ɖo azɔn wɛn wɛ ɖo kannumɔgban, yagban kpó aluwɛgban kpó e ɖo ta nú yě lɛ́ɛ glɔ́ nɛ́.

⁴⁰Mawu nɔ dó winnyá mɛjɔmɛ lɛ́ɛ, é nɔ́ jó yě dó bɔ yě nɔ́ yi bú ali ɖo gbětótló mɛ.

⁴¹Lo ɔ́, é nɔ́ hwlɛ́n yatɔ́nɔ lɛ́ɛ gán sín ya mɛ, é nɔ́ bló bɔ hɛ̌nnu yětɔn lɛ́ɛ nɔ sukpɔ́ winnini kanlin hwan ɖɔhun.

⁴²Ayijlɔ́jlɔ́nɔ lɛ́ɛ nɔ́ mɔ nǔ e jɛ é, bó nɔ́ j'awǎ. Lo ɔ́, nǔnyanyawatɔ́ lɛ́ɛ sín nu nɔ yi xɔ.

⁴³Mɛ e ɖó nǔnywɛ́ ɔ́ ní ɖó ayi nǔ nɛ́ lɛ́ɛ jí, é ní tunwun ɖagbe e Mawu Mavɔmavɔ nɔ wa lɛ́ɛ.