Read fon Ɖɛhan 111 Bible Online

Ɖɛhan 111 - fon bible

Ɖɛhan 111

¹Mi kpa Mawu Mavɔmavɔ! Un ná nɔ kpa Mawu Mavɔmavɔ kpó ayi ce bǐ kpó, un ná nɔ́ kpa ɛ ɖo ayijlɔ́jlɔ́nɔ lɛ́ɛ tɛ́ntin, un ná nɔ́ kpa ɛ ɖo kplékplé mɛ e nɔ sɛn ɛ lɛ́ɛ tɔn mɛ.

²Mawu Mavɔmavɔ sín azɔ̌ lɛ́ɛ d'agba, mɛ e yí wǎn ná lɛ́ɛ nɔ́ lin tamɛ dó azɔ̌ énɛ́ lɛ́ɛ wú.

³Nǔ e é bló lɛ́ɛ bǐ wɛ nyí nǔsacɔ́, nǔjíwǔ, é nyí hwɛjijɔnɔ káká sɔ́yi.

⁴É jló ɖɔ nǔjíwǔ e émí nɔ́ bló lɛ́ɛ ɔ́, è nǐ nɔ́ flín. Mawu Mavɔmavɔ nyɔ́ xomɛ, mɛ nú nɔ́ blá wǔ n'i.

⁵É nɔ ná nǔɖuɖu mɛ e nɔ ɖó sísí n'i lɛ́ɛ, é nɔ́ flín akɔ e é jɛ xá togun tɔn é tɛgbɛ.

⁶Mawu sɔ́ akɔta ɖě lɛ́ɛ sín to jó nú togun tɔn; é bló mɔ̌ dó ɖe hlɔ̌nhlɔ́n e é nɔ́ dó wa nǔ é xlɛ́ togun tɔn.

⁷Nǔ e é sɔ́ alɔ tɔn dó bló lɛ́ɛ nɔ́ ɖe xlɛ́ ɖɔ é nyí gbejínɔtɔ́, é nyí hwɛjijɔnɔ. Nǔ e é zɔ́n ɖɔ è wa lɛ́ɛ bǐ wɛ nyí nǔ ɖeji d'é wú,

⁸yě ná nɔ te káká sɔ́yi, ɖó yě nyí nǔgbó, yě ɖo xwi jí.

⁹É sɛ́ hwlɛngán dó togun tɔn, é jɛ akɔ mavɔ mavɔ xá ɛ. Mawu nyí Mɛ mímɛ́, é dó xɛsi.

¹⁰ Sísí ɖó nú Mawu Mavɔmavɔ wɛ nyí fí e nǔnywɛ́ bɛ́ sín é. Mɛ e nɔ wa nǔ gbɔn mɔ̌ lɛ́ɛ bǐ sín linlin wɛ nɔ mɛ́. Susu Mawu Mavɔmavɔ tɔn ɖo te káká sɔ́yi.