Read fon Ɖɛhan 116 Bible Online

Ɖɛhan 116 - fon bible

Ɖɛhan 116

¹Un yí wǎn nú Mawu Mavɔmavɔ, ɖó un sú xó ylɔ́ ɛ ɔ́, é nɔ́ se.

²É ɖo tó ɖó mì wɛ tlítlí, un ná nɔ sú xó ylɔ́ ɛ ɖo gbɛzán ce bǐ mɛ.

³Kú ko dó wlɔ mì bǐ, xɛsi jɛ jǐ ce mɛ ɖo yɔdo tó ɖɔhun, ahwi xo mì bɔ un ɖo aluwɛ mɛ.

⁴Lo ɔ́, un sú xó ylɔ́ Mawu Mavɔmavɔ nyíkɔ bó ɖɔ: “Mawu Mavɔmavɔ, kɛnklɛ́n, hwlɛ̌n mì!”

⁵Mawu Mavɔmavɔ nɔ nyɔ́ xomɛ, é nɔ́ wa nǔ jlɔ́jlɔ́, Mawu mǐtɔn ɔ́, mɛ nú nɔ́ blá wǔ n'i.

⁶Mawu Mavɔmavɔ nɔ hɛn mɛ e ma nɔ ɖó ayi we ǎ lɛ́ɛ. Gǎn kó vɔ ɖo wǔ ce, é ka wá hwlɛ́n mì gán.

⁷Din ɔ́, un ɖó ná mɔ vivo, ɖó Mawu Mavɔmavɔ wa ɖagbe nú mì.

⁸Nǔgbó wɛ, é hwlɛ́n mì gán ɖo kú sí, é súnsún ɖasin nú mì, é lɔn bɔ un ɖe afɔ nyi do ǎ.

⁹Un ná zun zɔnlin ɖo nukɔn tɔn ɖo ayǐkúngban jí fí, ɖo mɛ e ɖo gbɛ lɛ́ɛ tɛ́ntin.

¹⁰ Un ɖɔ: “Gbɛ ce blá wǔ mɛ nya!” Un ɖɔ mɔ̌, có un kpo ɖo nǔɖiɖi ɖó nú Mawu Mavɔmavɔ wɛ.

¹¹Un dán ɖě wa gbɔn káká bó ɖɔ: “È sixú gán jɛ gbɛtɔ́ ɖě wú ǎ.”

¹²Nǔ e Mawu Mavɔmavɔ wa nú mì lɛ́ɛ ɔ́, étɛ́ un ka sixú wa dó sú i axɔ́ tɔn?

¹³Un ná nɔ sɔ́ hwlɛngán kɔ́fu ɔ́ dó jǐ, un ná nɔ́ xomlá Mawu Mavɔmavɔ nyíkɔ.

¹⁴Akpá e un dó nú Mawu Mavɔmavɔ lɛ́ɛ ɔ́, un ná ɖe yě ɖo togun tɔn bǐ nukɔn.

¹⁵Mɛ e ɖo gbejí nú Mawu Mavɔmavɔ lɛ́ɛ ɔ́, kú yětɔn nɔ́ vɛ́ n'i tawun.

¹⁶Mawu Mavɔmavɔ, mɛsɛntɔ́ towe wɛ un nyí, mɛsɛntɔ́ towe nyɔ̌nu sín vǐ wɛ un nyí, a tún mì sín wlɔ mɛ.

¹⁷Mawu Mavɔmavɔ, un ná sá vɔ̌ ɖokpó dó dó kú nú we, un ná nɔ́ xomlá nyǐkɔ towe.

¹⁸Akpá e un dó nú Mawu Mavɔmavɔ lɛ́ɛ ɔ́, un ná ɖe yě ɖo togun tɔn bǐ nukɔn,

¹⁹ɖo Mawu Mavɔmavɔ xwé gbe, ɖo kɔ́xo tɔn lɛ́ɛ ta, ɖo Jeluzalɛ́mu toxo ɔ́ mɛ. Mi kpa Mawu Mavɔmavɔ!