Read fon Ɖɛhan 118 Bible Online

Ɖɛhan 118 - fon bible

Ɖɛhan 118

¹ Mi kpa susu nú Mawu Mavɔmavɔ, ɖó é nyɔ́, wǎn yíyí tɔn ɖo te káká sɔ́yi.

²Izlayɛ́li ví lɛ́ɛ ní ɖɔ: “Wǎn yíyí tɔn ɖo te káká sɔ́yi.”

³Aalɔ́ɔn ví lɛ́ɛ ní ɖɔ: “Wǎn yíyí tɔn ɖo te káká sɔ́yi.”

⁴Mɛ e nɔ ɖó sísí nú Mawu Mavɔmavɔ lɛ́ɛ ní ɖɔ: “Wǎn yíyí tɔn ɖo te káká sɔ́yi.”

⁵Aluwɛ mɛ wɛ un ɖe bó sú xó ylɔ́ Mawu Mavɔmavɔ, é sɔ nú mì, é ɖe mì nyi te.

⁶ Mawu Mavɔmavɔ ɖo jǐ ce, un ɖi xɛsi ǎ. Étɛ́ gbɛtɔ́ ka sixú wa nú mì?

⁷Mawu Mavɔmavɔ ɖo jǐ ce, é wɛ nyí alɔgɔ́númɛtɔ́ ce, un ná mɔ ayǐ jijɛ kɛntɔ́ ce lɛ́ɛ tɔn.

⁸È hɔn yi su Mawu Mavɔmavɔ ɔ́, é nyɔ́ hú è gǎn jɛ gbɛtɔ́ wú.

⁹È hɔn yi su Mawu Mavɔmavɔ ɔ́, é nyɔ́ hú è gǎn jɛ gbɛtɔ́ nukúnɖéjí wú.

¹⁰Akɔta lɛ́ɛ bǐ wɛ lɛ́ lɛ̌ dó mì, un ka nɔ ɖu ɖo yě jí ɖo Mawu Mavɔmavɔ sín acɛ mɛ.

¹¹Yě nɔ́ lɛ́ lɛ̌ dó mì, yě nɔ́ vun blá mì, un ka nɔ ɖu ɖo yě jí ɖo Mawu Mavɔmavɔ sín acɛ mɛ.

¹²Yě nɔ́ vun blá mì wǐin ɖɔhun, lo ɔ́, yě nɔ́ kɛn nǔywɛ́ myɔ ɖɔhun, un nɔ ɖu ɖo yě jí ɖo Mawu Mavɔmavɔ sín acɛ mɛ.

¹³È tun mì kpó hlɔ̌nhlɔ́n kpó, bó ná zin mì dɛ́, Mawu Mavɔmavɔ ka gɔ́ alɔ nú mì.

¹⁴ Mawu Mavɔmavɔ wɛ nyí hlɔ̌nhlɔ́n ce, é wɛ nyí han bo ɖo nu ce, é wɛ hwlɛ́n mì gán.

¹⁵Đuɖéjí kpó hwlɛngán kpó sín axwá wɛ nɔ́ ɖi, ɖo mɛ e nɔ wa nǔ jlɔ́jlɔ́ lɛ́ɛ sín goxɔ sá, bɔ yě nɔ́ ɖɔ: “Mawu Mavɔmavɔ bló nǔ ɖaxó ɖé!

¹⁶Mawu Mavɔmavɔ ná ɖuɖéjí mǐ! Mawu Mavɔmavɔ bló nǔ ɖaxó ɖé!”

¹⁷Éeǒ, un ná kú ǎ, un ná nɔ gbɛ, bó ná ɖɔ nǔ e Mawu Mavɔmavɔ bló lɛ́ɛ.

¹⁸Mawu Mavɔmavɔ dɔn tó nú mì, lo ɔ́, é jó mì dó nú kú ǎ.

¹⁹Mi hun hwɛjijɔ sín hɔn lɛ́ɛ kɛ́ nú mì, nú ma byɔ́ mɛ, bó ná mlá Mawu Mavɔmavɔ.

²⁰Hɔn Mawu Mavɔmavɔ tɔn ɖíe, fínɛ́ wɛ mɛ e nɔ wa nǔ jlɔ́jlɔ́ lɛ́ɛ nɔ́ gbɔn.

²¹Mawu, un ná mlá we, ɖó a se ɖɛ ce, a hwlɛ̌n mì gán.

²² Awǐnnya e xɔmɛtɔ́ lɛ́ɛ xo nyi kɛ́n é, wɛ wá húzú awǐnnya tají e ɖo zwe jí é.

²³Mawu Mavɔmavɔ sín nǔwiwa wɛ, nǔjíwǔ wɛ é nyí ɖo nukún mǐtɔn mɛ.

²⁴Égbé wɛ nyí azǎn e Mawu Mavɔmavɔ bló é, mi wá mǐ ní j'awǎ, mi wá mǐ ní hun xomɛ ɖó azǎn énɛ́ ɔ́ wú!

²⁵ Mawu Mavɔmavɔ, kɛnklɛ́n, hwlɛ̌n mǐ gán! Mawu Mavɔmavɔ, kɛnklɛ́n, nǎ ɖuɖéjí mǐ!

²⁶ Mawu Mavɔmavɔ ní xo ɖɛ dó mɛ e jǎwe ɖo nyǐkɔ tɔn mɛ é jí. Mǐ ɖo ɖɛ xo dó mi jí wɛ sín Mawu Mavɔmavɔ xwé gbe.

²⁷Mawu Mavɔmavɔ wɛ nyí Mawu, é wɛ nɔ́ ná wěziza mǐ. Mi dó kan kanlin e ná hu wɛ è ɖe lɛ́ɛ, bó dɔn yě yi káká vɔ̌sákpe ɔ́ sín zwe lɛ́ɛ kɔn.

²⁸Mawu Mavɔmavɔ, hwi wɛ nyí Mawu ce, un ná kpa susu nú we. Mawu ce, un ná ɖɔ lě e a dǒ agba sɔ é.

²⁹Mi kpa susu nú Mawu Mavɔmavɔ, ɖó é nyɔ́, wǎn yíyí tɔn ɖo te káká sɔ́yi.