Read fon Ɖɛhan 132 Bible Online

Ɖɛhan 132 - fon bible

Ɖɛhan 132

¹È ɖo kpó fán wɛ xwe Mawu xwé ɖo Jeluzalɛ́mu ɔ́ wɛ è nɔ ji han élɔ́. Mawu Mavɔmavɔ, flín Davídi, flín tagba e é jɛ lɛ́ɛ é bǐ.

²Flín Davídi e dó akpá nú hwi Mawu Mavɔmavɔ bo xwlé nǔ d'é jí é, flín akpá e é dó nú hwi Mawu hlɔ̌nhlɔ́nnɔ Jakɔ́bu tɔn é, é dó akpá ɖɔ:

³“Un ma ɖó tɛnmɛ nú Mawu ǎ ɔ́, un ma bló xwé ɖokpó nú Mawu hlɔ̌nhlɔ́nnɔ Jakɔ́bu tɔn ǎ ɔ́, un sɔ́ ná byɔ́ goxɔ e mɛ un nɔ nɔ é mɛ ɖě ǎ, un sɔ́ ná mlɔ́ ayǐ ɖě ǎ, un sɔ́ ná myɔ́ nukún ɖě ǎ, un ná dɔ́ amlɔ ǎ.”

⁶ Mǐ se bɔ é ɖɔ: Akɔjijɛgbá mímɛ́ ɔ́ ɖo Efláta, bɔ mǐ yi mɔ ɖo Yaa nǔkan mɛ.

⁷Mi wá mǐ ní yi Mawu xwé gbe. Mi wá mǐ ní ɖe kɔ́ ɖo nǔ e jí é nɔ́ bɛ́ afɔ ɖó ɔ́ nukɔn.

⁸Mawu Mavɔmavɔ, kplá akɔjijɛgbá e mɛ hlɔ̌nhlɔ́n towe ɖe ɔ́ wá tɛn élɔ́ e è blǒ ɖ'ayǐ, bɔ a nǎ gbɔjɛ́ ɖe é mɛ.

⁹Mɛ e nɔ xwlé vɔ̌sánú we lɛ́ɛ ɔ́, nǔ jlɔ́jlɔ́ ní nyí awu bó nɔ kɔ nú yě; mɛ e nɔ nɔ gbejí nú we lɛ́ɛ ní nɔ sú xó kpó awǎjijɛ kpó.

¹⁰Kpɔ́n dó mɛsɛntɔ́ towe Davídi wú, bó má jó mɛ e a sɔ́ axɔ́sú ɔ́ dó ó.

¹¹ Mawu Mavɔmavɔ dó akpá nú Davídi bó xwlé éɖée n'i, akpá ɔ́ ná húzú gbeɖé ǎ; é ɖɔ: “Vǐ towe lɛ́ɛ mɛ wɛ un ná sɔ́ axɔ́sú e ná nɔ zinkpo towe jí ɔ́ ɖe.

¹²Ényí vǐ towe lɛ́ɛ nɔ gbejí nú akɔ e un jɛ xá we ɔ́, bó nyi sɛ́n e un ná kplɔ́n yě lɛ́ɛ ɔ́, vǐ yětɔn lɛ́ɛ lɔ ná nɔ zinkpo towe jí, ɖě jɛ ɖě gúdo káká sɔ́yi.”

¹³Mawu Mavɔmavɔ sɔ́ Sinyɔ́ɔ; é jló e bɔ é sɔ́ bó ná dó ɖó nɔtɛn tɔn.

¹⁴É ɖɔ: “Fí e ná nyí vivotɛn ce káká sɔ́yi ɔ́ ɖíe. Fí wɛ un ná nɔ, ɖó fí jló mì.

¹⁵Un ná ná nǔɖuɖu Sinyɔ́ɔ dó wa ɖagbe n'i, nǔɖuɖu e hu dó wamamɔnɔ e ɖo fí lɛ́ɛ ɔ́, un ná ná bǐ yě.

¹⁶Un ná dó hwlɛngán nú mɛ e nɔ xwlé vɔ̌sánú mì ɖo fí lɛ́ɛ awu ɖɔhun, bɔ mɛ e ɖo gbejí nú mì ɖo fí lɛ́ɛ ná sú xó kpó awǎjijɛ kpó.

¹⁷ Un ná sɔ́ axɔ́sú syɛ́nsyɛ́n ɖokpó ɖo fí ɖo Davídi ví lɛ́ɛ mɛ ɖó zinkpo tɔn jí. Un ná hɛn axɔ́sú e un sɔ́ ɔ́ ɖó te ɖo zinkpo tɔn jí zogbɛ́n ɖo te ɖɔhun.

¹⁸Un ná dó winnyá kɛntɔ́ tɔn lɛ́ɛ, gǎngbákún tɔn ka ná nɔ kɛn ɖo ta tɔn.”