Read fon Ɖɛhan 138 Bible Online

Ɖɛhan 138 - fon bible

Ɖɛhan 138

¹Davídi sín han. Mawu Mavɔmavɔ, un ɖo mlǎmlá we wɛ kpó ayi ce bǐ kpó. Un ná ɖɔ xó lómílómí dó hangbe mɛ ɖo Mawu nukɔn.

²Un jɛ kpo ɖo sinsɛnxɔ mímɛ́ towe nukɔn, bó ɖo mlǎmlá we wɛ, ɖó xomɛnyínyɔ́ towe ma ɖó blɔ̌ ɔ́ wú, ɖó akpá e a dǒ lɛ́ɛ kɛ́ɖɛ́ wɛ a ɖe ǎ, a lɛ̌ bló hú mɔ̌. A blǒ hú nǔ e ɖó nukún wɛ e ɖe ɖo gɔ̌n towe é.

³Gbe e gbe un sú xó ylɔ́ we ɔ́, a sɔ nú mì. A nǎ akɔ́nkpinkpan mì, bó ná hlɔ̌nhlɔ́n mì.

⁴Óo! Mawu Mavɔmavɔ! Axɔ́sú e ɖo ayǐkúngban jí lɛ́ɛ bǐ ná mlá we. Yě se xó e nɔ́ gosín nu towe mɛ ɔ́, yě ná mlá we.

⁵Yě ná ɖɔ nǔ e a wa lɛ́ɛ dó han mɛ: “Susu Mawu Mavɔmavɔ tɔn d'agba.”

⁶Mawu Mavɔmavɔ ɖo káká jǐxwé aga nǔgbó; é ná mɔ mɛ e nɔ sɔ́ yěɖée hwe lɛ́ɛ. É mɔ goyítɔ́ lɛ́ɛ ja sín zɔ ɔ́, é nɔ́ tunwun yě.

⁷Adǎn ɖo gbigbo mì wɛ ɔ́, a nɔ cyɔ́n alɔ xomɛsin kɛntɔ́ ce lɛ́ɛ tɔn jí, bó nɔ́ sɔ́ alɔ towe aɖisí ɔ́ dó hwlɛ́n mì.

⁸Mawu Mavɔmavɔ, nǎ jɛ hun dó jǐ we. Mawu Mavɔmavɔ, xomɛnyínyɔ́ towe ɖo te káká sɔ́yi. Ma jó nǔ e a zě alɔ towe dó bló lɛ́ɛ dó ó.