Read fon Ɖɛhan 140 Bible Online

Ɖɛhan 140 - fon bible

Ɖɛhan 140

¹Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

²Mawu Mavɔmavɔ, hwlɛ̌n mì ɖo mɛdídá lɛ́ɛ sí, xɔ mì ɖo alǎnnúwatɔ́ lɛ́ɛ sí.

³Nǔ nyanya e yě ná dó sin é wú lin tamɛ dó wɛ jɛ́n yě nɔ́ ɖe, ayǐ hɔ́n tɛgbɛ ɔ́, ahwan te jɛ́n yě nɔ́ ɖe;

⁴ ɖɛ̌ yětɔn ɔ́, dan aɖǐvɛ́nɔ wɛ, Xó e nɔ́ tɔ́n sín nu yětɔn mɛ ɔ́ nɔ́ hu mɛ jakpata sín aɖǐvɛ́ ɖɔhun. Agbɔ̌n

⁵Mawu Mavɔmavɔ, ma nú un jɛ mɛdídá lɛ́ɛ sín fɛn mɛ ó, xɔ mì ɖo alǎnnúwatɔ́ lɛ́ɛ sí. Lě e yě ná wa gbɔn bó zin mì dɛ́ ɔ́ jɛ́n ɖo ayi yětɔn mɛ.

⁶Goyítɔ́ lɛ́ɛ ɖó mɔ nú mì, yě ɖó kanmɔ nú mì; yě dlɛ̌n ɖɔ ɖó alixo nú mì, yě ɖó gɛ̌ nú mì. Agbɔ̌n

⁷Un ɖɔ nú Mawu Mavɔmavɔ ɖɔ: “Mawu Mavɔmavɔ, Mawu ce wɛ a nyǐ, kɛnklɛ́n, ɖǒtó vo e sa nú we wɛ un ɖe é!

⁸Mawu Mavɔmavɔ, Aklúnɔ ce, hwi wɛ nyí hlɔ̌nhlɔ́n ce, hwi wɛ nyí mɛhwlɛ́ngántɔ́ ce, hwi wɛ nɔ nya xɛ ɖo jǐ ce ɖo ahwangbénu.

⁹Mawu Mavɔmavɔ, ma lɔn nú mɛdídá lɛ́ɛ kpé nǔ e yě lin lɛ́ɛ wú bó wa ó; ma lɔn nú yě kpé tito yětɔn lɛ́ɛ wú bó bló ó, yě táá wá tɛ afɔ ayǐ.” Agbɔ̌n

¹⁰Mɛ e lɛ́ dó mì lɛ́ɛ ɔ́, nǔ nyanya e yě sɔ́ nu yětɔn dó byɔ́ nú mì lɛ́ɛ ní jɛ dó yě jí; Agbɔ̌n

¹¹myɔkán ní kɔn dó yě jí; è nǐ kpíkpé yě dó myɔ mɛ, è nǐ kpíkpé yě dó do gɔngɔn mɛ, fí e yě má ná sixú tɔ́n sín gbeɖé ǎ é.

¹²Mɛ e nɔ ɖɔ mɛnú é ní ma nɔ to ɔ́ mɛ ó. Awě ní xo alǎnnúwatɔ́ hwebǐnu.

¹³Un tunwun ɖɔ Mawu Mavɔmavɔ nɔ gbo hwɛ nú lelenɔ, é nɔ́ jɛ hun dó wamamɔnɔ jí.

¹⁴Nǔgbó wɛ, hwɛjijɔnɔ ná mlá we, ayijlɔ́jlɔ́nɔ ná nɔ gɔ̌n towe.