Read fon Ɖɛhan 16 Bible Online

Ɖɛhan 16 - fon bible

Ɖɛhan 16

¹Xó lómílómí Davídi tɔn. Mawu ce, cyɔ́n alɔ jǐ ce, ɖó hwi wɛ un nɔ hɔn wá su.

²Un ɖɔ nú Mawu Mavɔmavɔ ɖɔ: “Hwi wɛ nyí Aklúnɔ ce, un sɔ́ ɖó nǔɖé zɛ hwɛ wú ǎ.”

³Un ɖó sísí ɖaxó nú mɛ e nyí towe ɖo to ɔ́ mɛ lɛ́ɛ, è ɖo nǔsúɖaxó ba wɛ ɔ́, yědɛɛ lɛ́ɛ wɛ.

⁴Yě mɛ e nɔ ɖo nyɔ̌ná ba wɛ ɖo vodún gɔ́n lɛ́ɛ ɔ́, tagba dó tagba jí nú yěɖée wɛ yě ɖe. Un ná hu nǔ dó vodún yětɔn ɖě ǎ, è ka ná se vodún yětɔn ɖě sín nyǐkɔ ɖo nu ce vɔ́vɔ́ ǎ.

⁵Mawu Mavɔmavɔ, hwi wɛ nyí gbɛ nú mì. Nǔɖé hu dó mì ɔ́, hwi wɛ nɔ ná mì. Nǔ e un ná nyí sɔ ɔ́ ɖo alɔ towe mɛ.

⁶Lě e a sɔ́ gbɛ ce ɖó ɔ́ nɔ́ dó xomɛhunhun nú mì. Gbɛ ɖaxó ɖokpó wɛ un ɖu.

⁷Un dó kú nú Mawu Mavɔmavɔ, é wɛ nɔ́ kplɔ́n nǔ mì. Zǎn mɛ ɖésú ɔ́, ayi ce nɔ ɖɔ xó nú mì dó nǔkplɔ́nmɛ tɔn lɛ́ɛ wú.

⁸ Ayi ce ɖo Mawu Mavɔmavɔ jí hwebǐnu. Mawu Mavɔmavɔ ɖo kpɔ́ xá mì; nǔɖé nɔ́ gba ayi dó nú mì ǎ.

⁹Énɛ́ ɔ́ wú wɛ xomɛ hun mì, un ɖo awǎ jɛ wɛ, bɔ ayi ce jɛ ayǐ.

¹⁰ A nǎ jó lǐndɔ̌n ce dó nyi kútomɛ ǎ, a nǎ lɔn nú mɛsɛntɔ́ towe ná yi yɔdo mɛ ǎ.

¹¹A nǎ xlɛ́ gbɛli mì; awǎjijɛ ɖo gɔ̌n towe bó túnflá, gbɛ wɛ è nɔ ɖu ɖo gɔ̌n towe káká sɔ́yi.