Read fon Ɖɛhan 18 Bible Online

Ɖɛhan 18 - fon bible

Ɖɛhan 18

¹Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi mɛsɛntɔ́ Mawu Mavɔmavɔ tɔn ɔ́ wɛ ká kpa, gbe e gbe Mawu Mavɔmavɔ hwlɛ́n ɛ sín kɛntɔ́ tɔn lɛ́ɛ bǐ lɔ mɛ, ɖo tají ɔ́, sín Sawúlu lɔ mɛ é.

²Un yí wǎn nú we Mawu Mavɔmavɔ. Hwi wɛ nyí hlɔ̌nhlɔ́n ce.

³Mawu Mavɔmavɔ wɛ nyí só ce; é wɛ nyí ahohó ce; é wɛ nyí mɛhwlɛ́ngántɔ́ ce, é wɛ nyí Mawu ce, só ce; é glɔ́ wɛ un nɔ hɔn hwlá cí. É wɛ nyí gǎglónú ce; é wɛ nyí hlɔ̌nhlɔ́n e nɔ hwlɛ́n mì gán é. É glɔ́ wɛ un hɔn hwlá cí.

⁴Susu nú Mawu Mavɔmavɔ! Un sú xó ylɔ́ ɛ hweɖěbǔnu ɔ́, é nɔ́ yí mì sín kɛntɔ́ ce lɛ́ɛ lɔ mɛ.

⁵Kú kó dó gɛdɛ mì; kú ɖo xɛsi dó mì wɛ tɔsisa ɖo adǎn jí ɖɔhun.

⁶Yɔdo lɛ́ɛ nyi kan lɛ́ lɛ̌ dó mì; kú nyi ɖɔ dó fyán mì.

⁷Hwenu e adǎn gbo mì ɔ́, un ylɔ́ Mawu Mavɔmavɔ. Un sú xó ylɔ́ Mawu ce. É se gbe ce sɛ́ dó sín xwé tɔn gbe; xó e un sú ɔ́ yi tó tɔn mɛ.

⁸Ayǐkúngban ɔ́ húnhún bó dán wǔ; só lɛ́ɛ sín dodó lɛ́ɛ sísɔ́, bó húnhún, ɖó Mawu sin xomɛ.

⁹Azizɔ nɔ tɔ́n sín awɔntín tɔn mɛ; myɔ hɛhɛ ɖé nɔ́ tɔ́n sín nu tɔn mɛ, myɔkán nɔ́ tɔ́n sín myɔ ɔ́ mɛ.

¹⁰É dɔn jǐnukúnsin wá do, bó jɛ te; akpɔ́kpɔ́ tlitli ɖaxó ɖé ɖo afɔ tɔn lɛ́ɛ glɔ́.

¹¹É xá wɛnsagun ɖokpó jí, bó zɔn ɖidó; é ɖo dǐndán gbɔn jɔhɔn mɛ wɛ.

¹²É sɔ́ zǐnflú dó ɖó fí e é nɔ́ hɔn hwlá cí é. É sɔ́ ablu dó ɖó nɔtɛn tɔn ná, é sɔ́ ablu gɔngɔn dó bló xwé.

¹³Wěziza ɖé nɔ́ ɖo nukɔn tɔn. Akpɔ́kpɔ́ kpó kɛ́njí kpó ɖo nukɔn tɔn; myɔkán ɖo zo da wɛ ɖo nukɔn tɔn, bó nɔ́ tɔ́n sín wěziza ɔ́ mɛ.

¹⁴Mawu Mavɔmavɔ dó gbe jǐ dǒ gbe ɖɔhun ɖo sɛ́xwé. Mawu Ajalɔ̌nlɔn sín gbe ɖi kpó kɛ́njí kpó, kpó myɔkán kpó.

¹⁵É da gǎ bó gba kɛntɔ́ ce lɛ́ɛ dó. É kɛ nu bo nyí awǎn, bɔ kɛntɔ́ lɛ́ɛ hɔn.

¹⁶Mawu Mavɔmavɔ! Adǎn e jɛ wɛ a ɖe ɔ́, kpó funfún e nɔ́ tɔ́n sín awɔntín towe mɛ ɔ́ sín zǐngídi kpó zɔ́n, bɔ tɔ lɛ́ɛ sín azan jɛ wěxo, bɔ è mɔ nǔ jɛ gbɛ ɔ́ sín dodó lɛ́ɛ wú.

¹⁷É dlɛ́n alɔ tɔn sín jǐxwé, bó hɛn mì. É ɖe mì sín tɔ ɖé mɛ.

¹⁸É yí mì sín kɛntɔ́ hlɔ̌nhlɔ́nnɔ ɔ́ sí, bó yí mì sín kɛntɔ́ e hú gǎn mì lɛ́ɛ sín alɔ mɛ.

¹⁹Hwenu e adǎn ɖo gbigbo mì wɛ ɔ́, yě wá fyán mì; lo ɔ́, Mawu Mavɔmavɔ wɛ nyí gǎnjɛwú ce.

²⁰É ɖe mì tɔ́n bó ná ayi j'ayǐ mì; é yí mì sín yě sí, ɖó é yí wǎn nú mì.

²¹Mawu Mavɔmavɔ nɔ wa mɔ̌ nú mì, ɖó un ɖo gbejí n'i. É ná ajɔ mì, bɔ é sɔgbe xá walɔ ɖagbe e un ɖó é.

²²Đó un nɔ wa nǔ e Mawu Mavɔmavɔ ɖɔ má wa lɛ́ɛ. Un nɔ wa nǔɖé nyi do nú Mavɔmavɔ ce ǎ.

²³Sɛ́n tɔn lɛ́ɛ bǐ wɛ ɖo ayi ce mɛ. Nǔ e é zɔ́n lɛ́ɛ ɔ́, un hɔn ɖě nyi gbě ǎ.

²⁴Un jló ɖɔ è nǐ mɔ nǔɖé ɖɔ dó wǔ ce ǎ; un lɔn bo jɛ hwɛ ɖé mɛ ǎ.

²⁵Énɛ́ ɔ́ wú wɛ Mawu Mavɔmavɔ ná ajɔ mì, bɔ é sɔgbe xá nǔ jlɔ́jlɔ́ e un nɔ wa é, bó sɔgbe xá walɔ ɖagbe e un ɖó é.

²⁶Mɛ ɖé ɖo gbejí nú we ɔ́, hwi lɔ nɔ nɔ gbejí n'i. Mɛ e ɖo sɛ́nxwi jí é ɔ́, hwi lɔ nɔ nɔ sɛ́nxwi jí n'i.

²⁷Mɛ e ɖo mǐmɛ́ jí é ɔ́, a nɔ nɔ mǐmɛ́ jí xá ɛ; mɛɖé ká ɖo yɛmɛnú wa wɛ ɔ́, a nɔ ko e.

²⁸A nɔ hwlɛ́n togun e nɔ sɔ́ éɖée hwe ɔ́ gán, bó nɔ́ sɔ́ mɛ e nɔ sɔ́ éɖée su ɔ́ hwe.

²⁹Mawu Mavɔmavɔ, hwi wɛ nɔ tá zogbɛ́n ce nú mì. Mawu ce, hwi wɛ nɔ sɛ́ wěziza dó mì ɖo ablu mɛ.

³⁰A ɖo kpɔ́ xá mì ɔ́, un nɔ zɔn mɛ e fɔ alǐnnyánú kplá, bó tɔ́n ahwan mì lɛ́ɛ jí. Mawu ce ɖo kpɔ́ xá mì ɔ́, un nɔ lɔ́n d'asá ahohó.

³¹Mawu ɔ́, alixlɛ́mɛtɔ́ e nyɔ́ bɔ nǔ bǐ vɔ ɖ'é wú ɔ́ wɛ. Xó e Mawu Mavɔmavɔ nɔ́ ɖɔ ɔ́ nɔ́ sɔgbe; gǎglónú wɛ é nyí nú mɛ e nɔ hɔn wá su i lɛ́ɛ bǐ.

³²Mawu mǐtɔn ɖɔhun we ɖe ǎ; Mawu Mavɔmavɔ wɛ é nyí. Mawu mǐtɔn ɖokpónɔ géé wɛ nyí só e wú mǐ gán jɛ é.

³³É wɛ nɔ́ ná hlɔ̌nhlɔ́n mì; é wɛ nɔ́ bló ali ce ɖó bɔ nǔ nɔ vɔ ɖ'é wú.

³⁴ É bló bɔ afɔ ce nɔ yá zungbɔ́ sín afɔ ɖɔhun. É nɔ hɛn mì bɔ un nɔ nɔ te só jí.

³⁵É wɛ nɔ́ kplɔ́n ahwanfunfun mì; é wɛ nɔ́ bló bɔ awa ce lɛ́ɛ nɔ́ mɔ gǎn, bó nɔ́ da gǎ e syɛ́n lɛ́ɛ.

³⁶Mawu Mavɔmavɔ, a nɔ cyɔ́n alɔ jǐ ce gǎglónú ɖɔhun, a nɔ hwlɛ́n mì gán; aɖisí lɔ towe nɔ́ hɛn mì ɖó te. Un ylɔ́ we ɔ́, a nɔ yí gbe nú mì, bó nɔ́ ná hlɔ̌nhlɔ́n mì.

³⁷A nɔ bló bɔ un nɔ kán wezun blélé, un nɔ ɖe afɔ nyi do ǎ.

³⁸Un nɔ jɛ kɛntɔ́ ce lɛ́ɛ gúdo, bó nɔ́ wlí yě; un ma sú kún yětɔn dó ǎ ɔ́, un nɔ lɛ́ kɔ ǎ.

³⁹Un nɔ gba yě hánnyá, bɔ yě nɔ́ sixú sí te ǎ; yě nɔ́ j'ayǐ, bɔ un nɔ gbɔn yě jí.

⁴⁰A nɔ ná hlɔ̌nhlɔ́n mì bɔ un nɔ dó fun ahwan; a nɔ zin kɛntɔ́ ce lɛ́ɛ dɛ́ ɖo nukɔn ce.

⁴¹A nɔ bló bɔ kɛntɔ́ ce lɛ́ɛ nɔ́ hɔn ɖo nukɔn ce; bɔ un nɔ vívá kún nú mɛ e gbɛ́ wǎn nú mì lɛ́ɛ.

⁴²Yě nɔ́ ba mɛ e ná hwlɛ́n yě gán ɔ́ gbɔn fí bǐ bó nɔ́ ba kpo. Yě nɔ́ sú xó ylɔ́ Mawu Mavɔmavɔ; Mawu Mavɔmavɔ ká nɔ́ kɛ nu d'é mɛ nú yě ǎ.

⁴³Un nɔ li yě kpɔ́ɖɔ́kpɔ́ɖɔ́, bɔ jɔhɔn nɔ dó alɔ mɛ afúntúntún ɖɔhun; un nɔ́ sɔ́ afɔ dó gbídí yě babá e ɖo ali jí é ɖɔhun.

⁴⁴A ɖe mì sín gǔ e togun ɔ́ fɔ́n dó jǐ ce ɔ́ mɛ; a sɔ́ mì ɖó akɔta lɛ́ɛ nu; togun e un ma tunwun ɖ'ayǐ ǎ ɔ́ ɖo acɛ ce mɛ.

⁴⁵Un ɖɔ xó ɖé lě tlóló kpowun ɔ́, yě nɔ́ bló ɖ'é jí; toɖévomɛnu lɛ́ɛ nɔ́ jló ná nyí mɛ ɖo así ce.

⁴⁶Toɖévomɛnu lɛ́ɛ nɔ́ dán ɖě wa gbɔn; yě nɔ́ tɔ́n sín ahohó yětɔn lɛ́ɛ mɛ bɔ ahohó lɛ́ɛ nɔ́ jɛ vɔ̌.

⁴⁷Susu nú Mawu Mavɔmavɔ! Un dó kú nú só e wú un gán jɛ é! È nǐ kpa susu nú Mawu Mɛhwlɛ́ngántɔ́ ce.

⁴⁸Mawu énɛ́ wɛ nɔ́ ba hlɔn nú mì; é wɛ nɔ́ sɔ́ togun lɛ́ɛ dó acɛ ce mɛ.

⁴⁹Mawu Mavɔmavɔ, a nɔ yí mì sín kɛntɔ́ ce lɛ́ɛ sí. Hú mɔ̌ ɔ́, a nɔ ná ɖuɖéjí mì ɖo mɛ e nɔ tɔ́n ahwan mì lɛ́ɛ jí, bó nɔ́ hwlɛ́n mì gán ɖo adǎkaxotɔ́ lɛ́ɛ sí.

⁵⁰ Mawu Mavɔmavɔ! Énɛ́ ɔ́ wú wɛ un ná nɔ́ kpa we ɖo akɔta lɛ́ɛ tɛ́ntin. Un ná nɔ́ ji han dó kpa susu nú nyǐkɔ towe.

⁵¹Mawu Mavɔmavɔ wa nǔ ɖaxó ɖaxó dó hwlɛ́n axɔ́sú e é sɔ́ é gán. É nyɔ́ xomɛ dó mɛ e é kɔn ami dó ta ná é wú, bó nyɔ́ xomɛ dó Davídi kpó vǐ tɔn lɛ́ɛ kpó wú káká sɔ́yi.