Read fon Ɖɛhan 21 Bible Online

Ɖɛhan 21 - fon bible

Ɖɛhan 21

¹Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

²Mawu Mavɔmavɔ, axɔ́sú ɔ́ ɖo awǎ jɛ wɛ, ɖó hlɔ̌nhlɔ́n towe wú. Alɔ e a nɔ gɔ́ n'i ɔ́ nɔ víví n'i tawun.

³A nǎ ɛ nǔ e jló e é; nǔ e é byɔ́ we ɔ́, a tɛ ɛ ǎ, Agbɔ̌n

⁴ɖó nyɔ̌ná ɖagbe ɖagbe sín agban wɛ a nɔ dó wá n'i. A xwe siká akú gbákún n'i.

⁵É byɔ́ gbɛ we bɔ a nǎ ɛ; bɔ é ná nɔ gbɛ káká yi káká sá.

⁶Alɔ e a dǒ e ɔ́ zɔ́n bɔ é xɔ susu bɔ é vɛ́ jlɛ́. A sɔ́ ɛ axɔ́sú ɖaxó; a ɖǒ wi ta n'i.

⁷A sɔ́ ɛ bó xo ɖɛ towe tɛgbɛ tɔn dó jǐ tɔn bɔ é nyí nǔnyɔ́nánɔ. A nǎ ɛ awǎjijɛ ma ɖó jlɛ̌ bɔ nǔ vɔ ɖ'é wú ɖo gɔ̌n towe.

⁸Axɔ́sú ɔ́ ɖeji dó Mawu Mavɔmavɔ wú, bɔ gbɔn xomɛnyínyɔ́ Mawu Ajalɔ̌nlɔn ɔ́ tɔn mɛ ɔ́, nǔɖé nɔ́ sɛ tɛn n'i ǎ.

⁹Alɔ towe ná jɛ kɛntɔ́ towe lɛ́ɛ wú. Đisí lɔ towe ná jɛ mɛ e gbɛ́ wǎn nú we lɛ́ɛ wú.

¹⁰Gbe e gbe a nǎ ɖe hwiɖée xlɛ́ ɔ́, a nǎ sɔ́ yě dó húzú myɔkpó. Mawu Mavɔmavɔ ná wa nǔ xá yě ɖo xomɛsin tɔn mɛ, bɔ yě bǐ ná ji kɛn ɖo myɔ mɛ.

¹¹A nǎ vɔ donu yětɔn sín ayǐkúngban ɔ́ jí, bó ná sú vǐ yětɔn lɛ́ɛ kún dó sín gbɛtɔ́ lɛ́ɛ tɛ́ntin.

¹²Nú yě lɛ̌n ná wa nǔ nyanya xá we ɔ́, nú yě tunwun ɖɔ émí ná xo dǎka wǔ we ɔ́, yě ná kpé wú ǎ.

¹³Đó a nǎ lɛ́ kɔ nú yě, bɔ yě ná hɔn ɖo nukɔn towe, bɔ a nǎ da gǎ towe dó yě.

¹⁴Mawu Mavɔmavɔ! Sí te! Sí te kpó hlɔ̌nhlɔ́n towe kpó, mǐ jló ná ji han mlá we, mǐ nǎ ɖɔ xó lómílómí.