Read fon Ɖɛhan 31 Bible Online

Ɖɛhan 31 - fon bible

Ɖɛhan 31

¹Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

²Mawu Mavɔmavɔ, hwi gɔ́n wɛ un wá bɛ ta dó, ma lɔn nú un ɖu winnyá gbeɖé ó. Kpɔ́n dó gbejíninɔ towe wú bó ɖe hwɛn mì.

³Đǒtó mì, yǎ wǔ wá hwlɛ́n mì. Nyǐ só e glɔ́ un ná hɔn hwlá cí é, nyǐ ahohó e mɛ un ná mɔ hwlɛngán ɖe é,

⁴ɖó hwi wɛ nyí awǐnnya ce, ahohó ce, a nǎ kplá mì, a nǎ xlɛ́ ali mì, ɖó mɛ e a nyǐ é wú.

⁵Ma lɔn nú ma jɛ mɔ e è ɖǒ nú mì ɔ́ mɛ ó, ɖó hwi wɛ nɔ nya xɛ ɖo jǐ ce.

⁶ Mawu Mavɔmavɔ, un sɔ́ funfún ce dó alɔ mɛ nú we, Mawu gbejínɔtɔ́, hwi wɛ xɔ gbɛ nú mì.

⁷Un gbɛ́ wǎn nú mɛ e nɔ sɛn vodún lɛ́ɛ, vodún nǔ yǎyá lɛ́ɛ. Nyɛ ɔ́, Mawu Mavɔmavɔ, hwi wɛ un sɔ́ nyiɖée jó ná.

⁸Un ná hun xomɛ bo j'awǎ ɖó xomɛnyínyɔ́ towe wú, ɖó a mɔ ya e ji wɛ un ɖe é, a tunwun adǎn e ɖo gbigbo mì wɛ é.

⁹A lɔn nú un jɛ kɛntɔ́ lɔmɛ ǎ; a fɔ́n mì sí te, a ɖe mì nyi te.

¹⁰Mawu Mavɔmavɔ, kú nǔ blá wǔ ce, ɖó adǎn ɖo gbigbo mì wɛ. Agbaza ce kpó lǐndɔ̌n ce kpó bǐ ɖo aluwɛ mɛ; nukún ce sɔ́ nɔ́ mɔ nǔ ǎ, nǔ lin wɛ un ɖe sɔ mɔ̌ nɛ́.

¹¹Nǔ e ɖo xíxá mì wɛ lɛ́ɛ ɖo huhu mì dó anyǔ mɛ wɛ. Azɔn wɛn wɛ jɛ́n un nɔ ɖe, bó ɖo da vɔ́ wɛ. Hwɛ e un hu lɛ́ɛ yí gǎn e ɖo wǔ ce é bǐ. Hlɔ̌nhlɔ́n e ɖo wǔ ce é bǐ ɖo vivɔ wɛ.

¹²Kɛntɔ́ ce lɛ́ɛ bǐ nɔ́ ɖo zunzun mì wɛ; mɛ e nyí mɛ ce lɛ́ɛ tɔn é lɛ́ nylá. Yě mɔ mì ɖo fí ɖé ɔ́, yě nɔ́ hɔn.

¹³Mɛ ɖé sɔ́ nɔ́ flín mì ǎ; mɛ bǐ ɖe ayi sín jǐ ce mɛ e ko kú é ɖɔhun, un sɔ́ nyí nǔɖéwanú nú yě ǎ.

¹⁴Un nɔ se nǔ ce e ɖɔ wɛ mɛ lɛ́ɛ nɔ ɖe ɔ́ bǐ. Ayi ce jɛ ayǐ ɖo fí ɖěbǔ ǎ. Yě ɖo kpá yi dó ta ce wɛ, yě ɖo gbě ce blá wɛ bó ná hu mì.

¹⁵Amɔ̌, nyɛ ɔ́, Mawu Mavɔmavɔ, un sɔ́ nyiɖée jó nú we. Un nɔ ɖɔ: “Mawu nyɛ tɔn ɔ́, hwi wɛ.”

¹⁶Gbɛ ce ɖo alɔ towe mɛ hwebǐnu; hwlɛ̌n mì ɖo kɛntɔ́ ce lɛ́ɛ sí, hwlɛ̌n mì ɖo mɛ e ɖo ya dó nú mì wɛ lɛ́ɛ sí.

¹⁷Nukún towe mɛ ní hɔ́n dó nyɛ mɛsɛntɔ́ towe jí, hwlɛ̌n mì ɖó xomɛnyínyɔ́ towe wú.

¹⁸Mawu Mavɔmavɔ, ma nú un ylɔ́ we bó lɛ́ ɖu winnyá ó. Mɛdídá lɛ́ɛ ní ɖu winnyá, nu yětɔn ní yi xɔ mɛkúkú ɖɔhun.

¹⁹Yě mɛ adingbannɔ nɛ́ lɛ́ɛ, goyítɔ́ nɛ́ lɛ́ɛ, wǎngbɛ́númɛtɔ́ nɛ́ lɛ́ɛ ɔ́, yě mɛ énɛ́ lɛ́ɛ e nɔ́ syɛ́n ta, bo nɔ́ kpɔ́n nukún mɛ nú hwɛjijɔnɔ é ɔ́, ɖɛ̌ yětɔn ní tɛ́.

²⁰Mawu Mavɔmavɔ, mɛ e ɖo gbejí nú we lɛ́ɛ ɔ́, xomɛ e a nɔ nyɔ́ dó yě wú é d'agba mɛ nya! Mɛ e nɔ hɔn wá su we lɛ́ɛ ɔ́, xomɛnyínyɔ́ e a nɔ ɖe xlɛ́ yě ɖo gbɛtɔ́ lɛ́ɛ bǐ nukɔn ɔ́ d'agba lóóo!

²¹A nɔ sɔ́ yě hwlá ɖó fí e a ɖe é, bɔ yě nɔ́ gló gbɛtɔ́; a nɔ sɔ́ yě hwlá, bɔ nǔ nyanya e gbɛtɔ́ nɔ́ lin dó yě wú lɛ́ɛ ɖě nɔ́ ɖi yě wú ǎ.

²²Mawu Mavɔmavɔ, un dó kú nú we, ɖó toxo e kɛntɔ́ kó xá ɔ́ ɖɔhun wɛ un cí, a ka nyɔ́ xomɛ dó wǔ ce.

²³Ayi ce ko gbadó káká bɔ un ɖɔ: “Nyi ɖíe è nya sín nukɔn towe e.” Amɔ̌, hwenu e un ɖo vo sa wɛ, bó ɖo xó sú ylɔ́ we wɛ ɔ́, a se.

²⁴Mi mɛ e ɖo gbejí nú Mawu Mavɔmavɔ lɛ́ɛ bǐ ní yí wǎn n'i, ɖó é nɔ́ nya xɛ ɖo mɛ e ɖi nǔ n'i lɛ́ɛ jí; amɔ̌, goyítɔ́ lɛ́ɛ ɔ́, Mawu Mavɔmavɔ nɔ sú nǔ e yě wa ɔ́ sín axɔ́ yě.

²⁵Mi mɛ e ɖo te kpɔ́n Mawu Mavɔmavɔ lɛ́ɛ ɔ́, mi dó gǎn; mi kpan akɔ́n.