Read fon Ɖɛhan 37 Bible Online

Ɖɛhan 37 - fon bible

Ɖɛhan 37

¹Davídi sín han. Ma sin xomɛ dó mɛdídá lɛ́ɛ ó, ma jló mɛ e nɔ wa nǔ nyanya lɛ́ɛ sín gbɛ ó,

²ɖó yě ná mlú ɖa ama ɖɔhun, gběhan ɖɔhun wɛ yě ná xú.

³Đe ji dó Mawu Mavɔmavɔ wú, bó nɔ wa ɖagbe; nɔ to ɔ́ mɛ, bó ná mɔ fífá.

⁴Sɔ́ Mawu Mavɔmavɔ dó ɖó nǔ e víví nú we hú nǔ bǐ é; énɛ́ ɔ́, é ná ná nǔ e ɖo hǔn mɛ nú we lɛ́ɛ we.

⁵Sɔ́ gbɛ towe jó nú Mawu Mavɔmavɔ, gǎn jɛ wǔ tɔn, é ná wa azɔ̌ tɔn.

⁶É ná ɖe hwɛjijɔ towe xlɛ́ hwe tɔ́n ɖɔhun; é ná ɖe nǔjlɔ́jlɔ́wiwa towe xlɛ́, bɔ mɛ bǐ ná mɔ hwe ɖo hwǎn ɖɔhun.

⁷Tin xwíí ɖo Mawu Mavɔmavɔ nukɔn, bó nɔ te kpɔ́n ɛ, ma hwlɛ́n dó ó. Ma sin xomɛ dó mɛ e lɛ́n nǔɖé ɔ́, é nɔ́ kpé wú ɔ́ ó, ma sin xomɛ dó mɛ e nɔ ɖo ayi wínníwínní zán wɛ ɔ́ ó.

⁸Jǒ xomɛsin dó, jǒ hunnylánylá dó, ma sin xomɛ ó, a táá wa nǔ nyi do.

⁹Đó è nǎ sú mɛdídá lɛ́ɛ kún dó sín to ɔ́ mɛ, bɔ to ɔ́ ná nyí mɛ e ɖeji dó Mawu Mavɔmavɔ wú lɛ́ɛ tɔn.

¹⁰Zaanɖé din ɔ́, mɛdídá sɔ́ ná ɖe ǎ; a nyi kɔ kpɔ́n fí e é nɔ ɔ́, a sɔ́ ná mɔ ɛ ǎ.

¹¹ To ɔ́ ká ná nyí mɛ e nɔ sɔ́ yěɖée hwe lɛ́ɛ tɔn, bɔ fífá ma ɖó dogbó e yě ná mɔ ɔ́ wɛ ná nyí nǔ e ná nɔ́ víví nú yě é.

¹²Mɛdídá nɔ́ lin hwɛjijɔnɔ sín nyanya, xomɛ tɔn nɔ sin i káká bɔ é nɔ́ ɖu aɖǔkún.

¹³Lo ɔ́, Aklúnɔ nɔ ɖo kiko e wɛ, ɖó é mɔ ɖɔ azǎn tɔn kó vɔ.

¹⁴Mɛ nyanya lɛ́ɛ nɔ́ sún hwǐ, yě nɔ́ tlɔ́ gǎ, bó ná hu gbɛ̌dónɔ kpó mɛ ma ɖó mɛɖé kpó, bó ná gbo gbe mɛ e ɖo ali jlɔ́jlɔ́ jí é.

¹⁵Yě ɖésúnɔ sín hǔn wɛ hwǐ yětɔn ka ná xo zlɛ́, bɔ gǎ yětɔn ná wɛ́n.

¹⁶Nǔ kpɛ e ɖo hwɛjijɔnɔ sí ɔ́, nyɔ́ hú wɔ̌buwɔ́bú e ɖo mɛdídá lɛ́ɛ bǐ sí é.

¹⁷Đó è nǎ wɛ́n awa mɛdídá lɛ́ɛ, Mawu Mavɔmavɔ ka ná sɔ́ hwɛjijɔnɔ lɛ́ɛ sín alɔ d'aga.

¹⁸Mawu Mavɔmavɔ nɔ kpé nukún dó mɛ e nɔ se tónú n'i lɛ́ɛ wú, mɛ e wú è ma nɔ mɔ nǔɖé ɖɔ dó ǎ lɛ́ɛ wú; to e é ná yě ɔ́ ná nyí yětɔn káká sɔ́yi.

¹⁹Yě ná ɖu winnyá ɖo azǎn nyanya gbe ǎ, adɔ hwenu ɔ́, yě ná mɔ nǔ ɖu bó gɔ́ xo.

²⁰Lo ɔ́, mɛdídá lɛ́ɛ ná dɔn; Mawu Mavɔmavɔ kɛntɔ́ lɛ́ɛ cí folówa e ɖo gběhan mɛ é ɖɔhun; yě ná mlú ɖa; yě ná ji kɛn ɖo myɔ mɛ.

²¹Mɛdídá nya nǔ ɖo mɛ sí ɔ́, é sɔ́ nɔ́ jó ǎ; nǔjlɔ́jlɔ́watɔ́ ká nɔ́ hun alɔ bó nɔ́ ná nǔ mɛ.

²²To ɔ́ ná nyí mɛ e jí Mawu Mavɔmavɔ xo ɖɛ dó lɛ́ɛ tɔn; mɛ e Mawu Mavɔmavɔ dó nu lɛ́ɛ ɔ́, é ká ná sú kún yětɔn dó sín to ɔ́ mɛ.

²³Mɛ ɖé sín walɔ nyɔ́ Mawu Mavɔmavɔ nukún mɛ ɔ́, é nɔ́ bló bɔ mɛ ɔ́ nɔ́ yi nukɔn ɖo gbɛzán tɔn mɛ kpó jiɖiɖe kpó.

²⁴É ná bo j'ayǐ ɔ́, é nɔ́ cí kɔ́ mɛ ǎ, ɖó Mawu Mavɔmavɔ nɔ hɛn alɔ tɔn, bó nɔ́ sɔ́ ɛ sí te.

²⁵Un ko nɔ dɔ̌nkpɛ mɛ kpɔ́n có bó wá kpo din; un ka mɔ Mawu jó hwɛjijɔnɔ lɛ́ɛ dó kpɔ́n ǎ, un ka mɔ vǐ yětɔn lɛ́ɛ ɖě byɔ́ nǔ ɖu kpɔ́n ǎ.

²⁶Hwɛjijɔnɔ nɔ hun alɔ bó nɔ ná nǔ mɛ hwebǐnu, bɔ vǐ tɔn lɛ́ɛ nɔ́ ɖu le tɔn[4].

²⁷Jǒ nyanya wiwa dó, bó wa ɖagbe; énɛ́ ɔ́, a nǎ ɖó nɔtɛn káká sɔ́yi.

²⁸Đó Mawu Mavɔmavɔ yí wǎn nú nǔ wa ɖó sɛ́nxwi jí; é nɔ́ jó mɛ e nyí étɔn lɛ́ɛ dó ǎ. É nɔ́ ɖo nukún kpé dó yě wú wɛ tɛgbɛ. Lo ɔ́, Mawu Mavɔmavɔ ná sú mɛdídá lɛ́ɛ sín kún dó bǐ gbídígbídí.

²⁹To ɔ́ ná nyí hwɛjijɔnɔ lɛ́ɛ tɔn, bɔ yě ná nɔ mɛ káká sɔ́yi.

³⁰Hwɛjijɔnɔ kɛ nu ɔ́, nǔnywɛ́ kɛ́ɖɛ́ wɛ nɔ́ tɔ́n sín nu tɔn mɛ, xó jlɔ́jlɔ́ kɛ́ɖɛ́ wɛ é nɔ́ ɖɔ.

³¹Mawu tɔn sín sɛ́n nɔ́ nɔ ayi tɔn mɛ; é nɔ́ ɖe afɔ nyi do ǎ.

³²Mɛdídá nɔ́ ɖo wu yi nú hwɛjijɔnɔ wɛ, bó nɔ́ ɖo hwenu e é ná mɔ tɛn ɖo wǔ tɔn bó hu i é ba wɛ.

³³Mawu Mavɔmavɔ ka nɔ jó e dó nyi alɔ tɔn mɛ ǎ. É yi hwɛ nukɔn ɔ́, Mawu Mavɔmavɔ nɔ jó e dó bɔ è nɔ ɖó hwɛ n'i ǎ.

³⁴Nɔ te kpɔ́n Mawu Mavɔmavɔ, bó nɔ ali e é ɖe nú we ɔ́ jí, é ná sɔ́ we dó jǐ, bɔ to ɔ́ ná nyí towe. A nǎ mɔ bɔ è nǎ sú mɛdídá lɛ́ɛ sín kún dó sín to ɔ́ mɛ.

³⁵Un mɔ mɛdídá bɔ é ɖo hlɔ̌nhlɔ́n sa wɛ; é ɖo vunvun wɛ atín e ayǐ nyɔ́ ná ganjí é ɖɔhun.

³⁶Ée un lɛ́ wá gbɔn fínɛ́ ɔ́, un sɔ́ mɔ mɛɖé ǎ, un ba ɛ káká, un ka sɔ́ mɔ ɛ ǎ.

³⁷Kpɔ́n gbɛtɔ́ e xo tɔn mɛ ɖo wɛn é, kpɔ́n gbɛtɔ́ ayijlɔ́jlɔ́nɔ, a nǎ mɔ ɖɔ gbɛtɔ́ mɔ̌hun nɔ́ ɖó donu.

³⁸Lo ɔ́, è nɔ vívá kún gǔfɔ́ntɔ́ lɛ́ɛ bǐ tɔn; mɛdídá lɛ́ɛ nɔ́ ɖó vǐ donu ǎ.

³⁹Mawu Mavɔmavɔ gɔ́n wɛ hwɛjijɔnɔ lɛ́ɛ sín hwlɛngán nɔ́ gosín, é wɛ nyí bibɛtɛn yětɔn adǎngbomɛzán gbe.

⁴⁰Mawu Mavɔmavɔ nɔ gɔ́ alɔ nú yě, bó nɔ́ hwlɛ́n yě; é nɔ́ yí yě sín mɛdídá lɛ́ɛ sí, bó nɔ́ hwlɛ́n yě gán, ɖó é wɛ yě nɔ́ hɔn yi su.