Read fon Ɖɛhan 41 Bible Online

Ɖɛhan 41 - fon bible

Ɖɛhan 41

¹Hanjigbɛ́gán ɔ́ sín hanjiwéma mɛ wɛ han élɔ́ ɖe. Davídi sín han wɛ.

²Nǔ nyɔ́ nú mɛ e nɔ kpɔ́n wamamɔnɔ jí é; adǎngbomɛzán gbe ɔ́, Mawu Mavɔmavɔ nɔ hwlɛ́n ɛ gán.

³Mawu Mavɔmavɔ nɔ́ cyɔ́n alɔ jǐ tɔn; é nɔ́ hɛn ɛ ɖó gbɛ. Nǔ nɔ́ nyɔ́ n'i ɖo ayǐkúngban jí fí; é nɔ́ jó e nú kɛntɔ́ tɔn lɛ́ɛ, bɔ yě nɔ́ zé e dó wa nǔ e jló yě ɔ́ ná ǎ.

⁴Mawu Mavɔmavɔ nɔ kpé nukún dó wǔ tɔn ɖo azɔnzan jí, é nɔ́ tɔ́jú i ɖo azɔn hwenu.

⁵Un nɔ ɖɔ: “Mawu Mavɔmavɔ, kú nǔbláwǔ ce! Un hu hwɛ dó we nǔgbó có, ka gbɔ azɔn nú mì.”

⁶Kɛntɔ́ ce lɛ́ɛ nɔ́ ɖɔ xó ce nyanya. Yě nɔ́ ɖɔ: “Hwetɛ́nu ná kú dó wɛ é ka ɖe tawun bɔ xó tɔn ná fó?”

⁷Ényí mɛɖé wá kpɔ́n mì ɔ́, nǔ ce ná ɖɔ wú wɛ é nɔ wá; é nɔ́ wá hwlɛ́n awɔntín ayǐ, bó nɔ́ ba adingban e é ná ɖó é. É gosín gɔ̌n ce lě tlóló ɔ́, é nɔ́ yi fúnfún kpé.

⁸Mɛ e gbɛ́ wǎn nú mì lɛ́ɛ bǐ nɔ́ yi ɖɔ nǔ ce ɖo kpá, yě nɔ́ lin nyanya ce, yě nɔ́ ɖɔ:

⁹“Nǔ e jɛ dó jǐ tɔn ɔ́ nyí ayihún ǎ mɛ! Ayǐ e é mlɔ́ din ɔ́, é sɔ́ ɖó fínfɔ́n ǎ mɛ!”

¹⁰ Xɔ́ntɔn ce vívɛ́ná e wú un ɖeji dó é, mɛ e nɔ ɖu nǔɖuɖu ce ɔ́ húzú kpan nukɔn mì.

¹¹Mawu Mavɔmavɔ, hwɛ ɔ́, kú nǔ blá wǔ ce, sɔ́ mì sí te sín azɔnzan jí bónú má ba hlɔn.

¹²Ényí kɛntɔ́ ce gɔn ahwannɔwe ɖú ɔ́, un ná tunwun ɖɔ a yǐ wǎn nú mì.

¹³Mawu Mavɔmavɔ, a kpé nukún dó wǔ ce ɖo gbejíninɔ ce mɛ, a nǎ hɛn mì ɖó gɔ̌n towe káká sɔ́yi.

¹⁴ Susu nú Mawu Mavɔmavɔ, Mawu Izlayɛ́li tɔn ɔ́ sín din káká sɔ́yi! Amǐ! Amǐ!